ESEY ta un di e prome cosnan cu mi ta corda di mi tata, un homber humilde cu tabata traha duro. E tabata stima husticia; pesey ora el a tende e mensahe di Bijbel na aña 1953, el a gust’e di biaha. Desde e tempo ey, e tabata haci su best pa siña nos tur loke e tabata siña. Na prome instante, mi mama no tabata mucho inclina pa bandona su tradicionnan catolico. Pero cu tempo, e tambe a cuminsa biba segun e siñansanan di Bijbel.

No tabata facil pa mi mayornan studia cu nos, pasobra mi mama casi no tabata sa lesa y mi tata tabata traha duro y oranan largo den cunucu. Tin biaha e tabata asina cansa cu e tabata pega soño durante e estudio. Pero su esfuersonan a duna fruta. Ami tabata e yiu mayor, y mi tabata yuda siña mi ruman muher y mi dos ruman hombernan. Esey a inclui algo cu mi tata hopi bes tabata menciona: E amor cu Noe a demostra pa su famia mediante su obediencia na Dios. Semper esaki tabata mi relato biblico faborito! Pronto nos tur tabata asisti na reunion na e Salon di Reino na Roseto degli Abruzzi, un stad na costa di Lama di Adria na Italia.

Na 1955, tempo mi tabatin 11 aña, ami cu mi mama a subi e seronan bay direccion west pa asisti na nos prome congreso na Roma. Desde e tempo ey, congreso a bira un di e eventonan di mas special pa mi.

E siguiente aña mi a batisa y un poco tempo despues mi a cuminsa traha pionero. Cu 17 aña di edad, mi a bira pionero special na Latina, un stad cu ta keda zuid di Roma, situa un 300 kilometer for di nos cas. Como cu e tabata un stad basta nobo, ningun hende no tabata preocupa mucho cu loke e bisiñanan tabata pensa. Y esey a pone cu tabata mas facil pa hende acepta literatura biblico cerca ami cu mi compañera pionero. Aunke mi tabata sinti mi masha contento cu esaki, mi tabata jong ainda y tabata sinti hopi falta di cas. Pero mi a compronde cu Jehova tabata kier pa mi keda eynan, y mi kier a obedec’e.

Despues mi a haya asignacion pa bay Milan pa yuda cu e preparacionnan pa e Asamblea Internacional “Bon Noticia  Eterno” di 1963. Durante e asamblea mi a traha como boluntario hunto cu hopi otro ruman; un di nan tabata Paolo Piccioli, un ruman homber jong di Florence. Riba e di dos dia di asamblea, e ruman aki a duna un tremendo discurso tocante bida soltero. Mi ta corda cu ora mi a tend’e, mi a pensa cu ‘e ruman ey si lo no casa nunca.’ Sinembargo, nos a cuminsa skirbi otro y nos a realisa cu nos tabatin hopi cos en comun: nos metanan, nos amor pa Jehova y nos deseo fuerte pa sirbie. Na 1965, ami cu Paolo a casa.

Mi a traha dies aña como pionero regular na Florence. Tabata emocionante pa mira con e congregacionnan tabata crece, specialmente con e hobennan tabata progresa. Ami cu Paolo tabata gusta dedica tempo na e hobennan; nos tabata combersa cu nan tocante Bijbel y tabata recrea cu nan. Hopi biaha Paolo tabata hunga bala cu nan. Ta claro cu lo mi a prefera pa ami cu mi casa dedica tempo na otro. Pero mi tabata compronde cu e hobennan y famianan di congregacion tambe tabatin mester di dje y cu e mester a dedica su tempo y atencion na nan tambe.

Ainda mi ta sinti un goso ora mi corda riba tur e estudionan di Bijbel cu nos tabatin. Un di e personanan cu mi a studia cu ne tabata Adriana, kende a papia cu dos miembro di su famia tocante loke e tabata siña. Nan a traha un afspraak cu nos y cu un pastoor pa papia tocante doctrinanan di iglesia manera Trinidad y alma inmortal. Finalmente, tres pastoor a presenta na e encuentro. Nan splicacion tabata confuso y inconsistente, y nos studiantenan a mira mesora cu loke nan tabata splica no tabata cuadra cu e siñansanan di Bijbel. Como resultado di e encuentro, cu tempo mas o menos 15 miembro di e famia ey a bira Testigo di Jehova.

Claro, awendia nos metodonan di predica ta basta diferente. E tempo ey, Paolo a bira “experto” den papia cu pastoor, y el a haci esey na varios ocasion. Mi ta corda con el a papia un biaha cu algun di nan dilanti di un grupo di hende cu no tabata Testigo. Tabata bisto cu e opositornan a plania adelanta pa algun hende di e grupo haci pregunta pa pone su cara na berguensa. Pero e combersacion a coy un otro rumbo. Un hende a puntra si ta corecto pa religion mete den asuntonan politico manera ta sosodiendo pa hopi siglo caba. Tabata bisto cu esey a hinca e pastoornan den preta. Diripiente e luznan a paga, y e reunion a ser cancela. Hopi aña despues, nos a bin compronde cu e blackout tabata plania den caso cu e combersacion no a bay manera e pastoornan a spera.

Despues cu ami cu Paolo tabatin dies aña casa, nos a ser invita den e trabou di circuito. Paolo tabatin un bon trabou, pesey no tabata un decision facil. Pero despues cu nos a haci oracion tocante e asunto, nos a haci nos mes disponibel pa e asignacion nobo aki. Nos a disfruta di e tempo cu nos a pasa cerca e famianan cu a ricibi nos den nan cas. Anochi, hopi biaha nos tabata studia hunto cu e famianan aki, anto despues Paolo tabata yuda e muchanan cu nan huiswerk, specialmente ora ta wiskunde. Ademas, Paolo tabata gusta lesa y cu entusiasmo e tabata comparti e cosnan interesante y edificante cu e tabata lesa. Riba dialuna, hopi biaha nos tabata predica den e pueblonan caminda no tabatin Testigo, y nos tabata invita e hendenan pa un discurso e mesun anochi ey.

Despues di dos aña den e trabou di circuito, nan a invita nos pa sirbi na Betel di Roma. Paolo a keda encarga cu asuntonan legal, y ami a bay traha den e Departamento di Revista. E cambio ey no tabata facil, pero nos tabata determina pa obedece. Tabata un goso pa mira con e sucursal tabata bira mas grandi y con e cantidad di rumannan tabata aumenta enormemente na Italia. E tempo ey, Testigonan di Jehova na Italia a haya un reconocemento legal importante. Si, nos tabata masha contento cu nos asignacion nobo.

Den e temporada cu nos tabata sirbi na Betel, nos posicion biblico tocante sanger a bin den publicidad na Italia. Na principio di añanan ’80, tabatin un caso legal riba e cuestion aki cu a causa basta conmocion. Nan a acusa un pareha Testigo falsamente di ta culpabel di e morto di nan yiu muher, a pesar cu e yiu a muri di un problema serio di sanger cu hopi hende di Italia y paisnan den bisindario tabata haya. E rumannan di e famia di Betel a yuda e abogadonan cu a representa e mayornan cristian. Un pamfleta y un edicion special di ¡Despertad! a yuda e hendenan haya e otro banda di e medaya y compronde loke e Palabra di Dios ta bisa tocante sanger. Den e lunanan ey, hopi biaha Paolo tabata traha 16 ora pa dia sin stop. Mi a haci tur loke mi tabata por pa sosten’e den su trabou.

Ora nos tabatin 20 aña casa, nos a haya nos cu algo inespera. Mi tabatin 41 aña y Paolo tabatin 49 aña di edad ora mi a bis’e cu mi kier sa cu mi ta na estado. Den su dagboek, mi a topa e palabranan pa e dia ey: “Oracion: Si esaki ta berdad, yuda nos keda den e sirbishi di tempo completo, sin baha man spiritualmente, y yuda nos pa nos pone un bon ehempel como mayor. Riba tur cos, yuda mi pone na practica maske ta 1 porciento di tur loke mi a bisa riba plataforma durante e ultimo 30 añanan.”  Ora mi pensa awor riba esey, mi por mira cu di berdad Jehova a contesta su oracion, y esun di mi.

Nacemento di Ilaria a trece cambio grandi den nos bida. Pa ta franco, tabatin momentonan cu nos a sinti nos desanima, manera Proverbionan 24:10 ta bisa: “Si bo desmaya den e dia di angustia, bo forsa ta keda limita.” Pero nos a sigui apoya otro.

Semper Ilaria sa bisa con contento e ta cu e ta yiu di mayornan Testigo cu tabata hopi activo den e sirbishi di tempo completo. Nunca el a sinti su mes neglisha; el a lanta den un famia completamente normal. Durante dia, ami tabata cuid’e. Anochi ora Paolo tabata yega cas, aunke hopi biaha e tabatin trabou di caba, e tabata dedica tempo na dje, hunga cu ne y yud’e cu su huiswerk. E tabata haci esaki maske e tabatin cu keda lanta te dos or of tres or di marduga pa caba su trabou. Ilaria tabata gusta bisa: “Mi tata ta mi mihor amigo.”

Manera bo por imagina, pa nos por a yuda Ilaria keda riba e caminda cristian, nos tabatin cu disciplin’e na un manera consistente y hasta tin biaha firme. Mi ta corda cu un biaha e tabata hunga cu un amiguita, pero el a comporta su mes masha malo. Nos a uza Bijbel pa mustr’e dicon e no mester a comporta su mes asina. Tambe nos a pon’e pidi su amiga despensa dilanti nos.

Semper Ilaria ta bisa cu e ta masha agradecido pa e amor cu su mayornan tabatin pa sirbishi. Awor cu e mes ta casa, e ta compronde mihor ki importante ta pa obedece Jehova y sigui su guia.

Na 2008, Paolo a haya sa cu e tin cancer. Na prome instante, tabata parce cu Paolo lo por a sobrevivi e maleza, y esey a anima mi hopi. Ademas di busca e mihor tratamento medico posibel, hunto cu Ilaria nos tabata haci oracion largo na Jehova, buscando su yudansa pa enfrenta e dianan dificil ey. Toch, mi a mira un homber cu un tempo tabata asina fuerte y dinamico caba na nada. Su morto na 2010 tabata un golpi duro. Mi a haya hopi consuelo den loke nos a logra hunto den 45 aña. Nos a duna Jehova lo mihor, sabiendo cu nunca lo e lubida loke nos a haci den su sirbishi. Mi ta anhela pa mira Paolo bek den e resureccion, na harmonia cu Hesus su palabranan na Juan 5:28, 29.

Den profundidad di mi curason, ainda mi ta e mucha chikito cu ta stima e relato di Noe. Ainda mi a keda cu e mesun determinacion. Mi kier obedece Jehova, sin importa kico e pidi mi haci. Mi ta sigur cu cualkier obstaculo, sacrificio of perdida no ta nada compara cu e bendicionnan maraviyoso cu Dios lo drama riba nos. Esey ta mi experencia personal, y mi por sigura bo cu esaki ta bale la pena.