ESEY tabata na 1949, mas cu 60 aña pasa, pero mi experencia ta cuminsa hopi aña mas prome. Mi tata, Hendrik, tabata sapate y hardinero na Donderen, un pueblito den e parti noord di Drente, Hulanda. Mi a nace na 1927. Nos ta shete ruman; ami ta e di cuater yiu. Nos cas tabata situa riba un caminda di tera pafo di stad. Mayoria di nos bisiñanan tabata cunukero, y mi a gusta e bida di cunucu. Na 1947, tempo cu mi tabatin 19 aña, mi a cera conoci cu e berdad via un bisiña di nos cu yama Theunis Been. Mi ta corda cu na prome instante mi no tabata gusta Theunis, pero poco despues di Segundo Guera Mundial, el a bira un Testigo di Jehova. Y mi a ripara cu e tabata hopi mas amigabel cu prome. E cambio di personalidad aki a haci mi asina curioso cu mi a cuminsa scucha ora e tabata papia cu mi tocante Dios su promesa di haci tera un paradijs. Mi a acepta e berdad masha lihe y nos a bira bon amigo. *

Mi a cuminsa predica na mei 1948, y e siguiente luna mes, dia 20, mi a batisa na e congreso na Utrecht. Dia 1 di januari 1949, mi a cuminsa traha como pionero y a ser asigna na Borculo, un stad situa den e parti oost di Hulanda, caminda tabatin un congregacion chikito. Como cu Borculo ta keda un 130 kilometer mas leu, mi a dicidi di bay cu bais. Mi a kere cu mi biahe lo a tuma mi seis ora, pero, debi na awasero pisa y biento fuerte, a tuma mi 12 ora pa yega aunke mi a biaha e ultimo  90 kilometer cu trein! Mi a yega anochi laat na cas di un famia Testigo, caminda mi a keda durante e tempo cu mi tabata traha pionero den e area ey.

Despues di e guera, hende tabatin poco cos. Tur loke mi tabatin tabata un bachi y un carson; e bachi tabata mucho grandi y e carson tabata halfstengel. Manera mi a bisa den e introduccion, mi prome luna na Borculo no tabata facil, pero Jehova a bendiciona mi cu varios estudio di Bijbel. Despues di nuebe luna, mi a haya asignacion pa bay traha na Amsterdam.

Mi a bandona e bida di cunucu pa bay biba na Amsterdam, e stad di mas grandi di Hulanda. Mi tabatin bon resultado den sirbishi. Den e prome luna, mi a laga mas literatura cu den e nuebe lunanan anterior cu mi a traha pionero na Borculo. Y no a dura mucho cu mi tabata dirigi mas cu ocho estudio di Bijbel. Despues di a ser nombra como sirbidor di congregacion (cu awor yama coordinador di e cuerpo di anciano), mi a ricibi asignacion pa duna mi prome discurso publico. Pero mi no tabata sinti cu mi tabata cualifica. Pues, mi a keda hopi contento ora nan a manda mi un otro congregacion net prome cu mi mester a duna e discurso. E tempo ey, mi no por a imagina mi cu a traves di añanan lo mi a duna mas cu 5.000 discurso!

Na mei 1950 mi a haya asignacion pa bay traha na Haarlem. Despues, mi a haya invitacion pa bay den e trabou di circuito. Pa casi tres dia largo mi no por a drumi. Mi a bisa Robert Winkler, un ruman homber cu tabata traha na e sucursal, cu mi no tabata sinti mi cualifica, pero el a bisa mi: “Djis yena e formulario. Lo bo siña.” Un poco tempo despues, mi a ricibi un luna di entrenamento, y mi a cuminsa sirbi como sirbidor (superintendente) di circuito. Durante un di mi bishitanan na un di e congregacionnan, mi a conoce un pionero jong yen di entusiasmo cu yama Janny Taatgen. E tabata stima Jehova masha hopi y tabata traha duro den sirbishi. Nos a casa na 1955. Pero prome cu mi sigui conta mi relato, Janny lo splica con el a bira pionero y con nos a sigui sirbi Jehova hunto despues cu nos a casa.

Janny: Mi mama a bira Testigo na 1945 ora mi tabatin 11 aña di edad. Di biaha el a mira e importancia di studia Bijbel cu su tres yiunan. Pero debi cu mi tata tabata contra e berdad, Mama tabata studia cu nos ora cu mi tata no tabata na cas.

E prome reunion cu mi a bay tabata un congreso na Den Haag na 1950. Un siman despues, mi a asisti na mi prome reunion na e Salon di Reino na Assen (Drente). Mi tata a bira furioso y a core cu mi for di cas. Mi mama a bisa mi: “Bo sa unda bo por bay biba.” Mi tabata sa cu e tabata kiermen cu mi por a bay cerca nos rumannan spiritual. Prome, mi a bay biba cerca un famia Testigo cu no tabata biba mucho leu di nos cas, pero mi tata a sigui causa  hopi problema. Pesey mi a muda bay e congregacion na Deventer (Overijssel), un 95 kilometer mas leu. Pero debi cu mi tabata menor di edad, mi tata a haya problema cu autoridadnan pasobra el a saca mi for di cas. Como resultado di esey, el a bisa mi cu mi por a bin cas bek. Y aunke mi tata nunca a acepta e berdad, cu tempo el a permiti mi asisti na tur reunion y bay predica.

Un poco tempo despues cu mi a bay cas bek, mi mama a bira hopi malo y mi mester a haci tur trabou di cas. A pesar di esaki, mi a sigui progresa spiritualmente y a batisa na 1951 na e edad di 17 aña. Na 1952, despues cu mi mama a recupera di su maleza, mi a traha dos luna como pionero di vakantie (auxiliar) hunto cu tres ruman muher pionero. Nos tabata biba riba un boto y a predica den dos stad na Drente. Na 1953, mi a bira pionero regular. Un aña despues, un superintendente di circuito jong a bishita nos congregacion. Esey tabata Markus. Nos a casa na mei 1955, pasobra nos a sinti cu nos por a sirbi Jehova mihor como pareha.—Ecl. 4:9-12.

Markus: Despues cu nos a casa, nos prome asignacion tabata pa traha como pionero na Veendam (Groningen). Nos a biba den un camber chikito di solamente 2 pa 3 meter. Asina mes, Janny a haci e camber comodo y bunita. Tur anochi, nos mester a hala nos mesa y dos stoel chikito un banda pa habri nos cama (un cama cu bo ta hisa pone contra muraya y cu ta keda manera un cashi).

Despues di seis luna nos a haya invitacion pa bay den e trabou di circuito na Belgica. Na 1955 tabatin solamente un 4.000 publicador den e pais ey, pero awe tin mas cu 24.000 publicador. Na Vlaanderen, parti noord di Belgica, hende ta papia Hulandes tambe. Sinembargo, nan ta papia cu un accent masha diferente; pesey, na principio nos mester a custumbra cu nan manera di papia.

Janny: Pa haci e trabou di circuito, bo mester ta dispuesto pa haci sacrificio propio. Nos tabata uza bais pa bay na e congregacionnan y tabata keda na cas di e rumannan. Y debi cu nos no tabatin un cas propio, nos tabata keda te dialuna cerca e rumannan, y diamars mainta nos tabata bay e siguiente congregacion. Pero semper nos a mira nos sirbishi como un bendicion di Jehova.

Markus: Aunke na principio, nos no tabata conoce e rumannan den e congregacionnan, nan tabata hopi amabel y hospitalario. (Heb. 13:2, wak nota.) A traves di añanan, varios biaha nos a bishita e congregacionnan di idioma Hulandes na Belgica. Esaki a resulta den hopi bendicion pa nos. Por ehempel, nos a siña conoce casi tur e rumannan den e districto Hulandes y nos ta stima nan masha hopi. Nos a mira cientos di hoben bira grandi y progresa den e berdad, dedica nan bida na Jehova y pone interesnan di Reino na prome luga den nan bida. Ta un berdadero goso pa mira hopi di nan sirbi Jehova fielmente den sirbishi di tempo completo. (3 Juan 4) E “intercambio di estimulo” aki a yuda  nos sigui cumpli cu nos asignacion cu henter nos curason.—Rom. 1:12.

Markus: For di dia cu nos a casa, nos tabatin deseo di asisti na e Scol di Galaad. Pesey, tur dia nos tabata siña Ingles pa por lo menos un ora. Pero no tabata facil pa siña Ingles for di buki, pesey nos a dicidi di bay vakantie na Inglatera pa nos por a practica e idioma mientras cu nos ta predica. Finalmente, na aña 1963, nos a ricibi un envelop cu dos carta for di e sede mundial na Brooklyn. Un tabata pa mi y e otro tabata pa Janny. Mi carta tabata un invitacion pa participa na un entrenamento special di dies luna na e Scol di Galaad. E entrenamento aki tabata specialmente pa siña ruman homber con pa organisa e trabou di predica. Pesey, di e 100 studiantenan cu a haya invitacion, 82 tabata ruman homber.

Janny: Den e carta cu mi a ricibi e dia ey, e rumannan a pidi mi pa haci oracion pa wak si mi lo ta dispuesto di keda na Belgica mientras cu Markus ta asisti na Galaad. Mi mester admiti cu na prome instante mi a keda hopi desapunta. Mi a sinti cu mi esfuersonan pa haci mas den sirbishi di Jehova no a ser bendiciona. Pero despues mi a corda cu e proposito di Scol di Galaad ta pa yuda e studiantenan predica e bon noticia rond mundo. Pues mi a bay di acuerdo pa keda Belgica, y mi a ser asigna pa sirbi como pionero special den e stad Gent hunto cu Anna y Maria Colpaert, dos pionero special cu hopi experencia.

Markus: Debi cu mi mester a mehora mi Ingles, nan a pidi mi pa bay Brooklyn cinco luna prome cu e scol cuminsa. Eynan, mi a traha den e departamento di Sirbishi y e departamento di Manda Literatura. Mi tabata yuda prepara literatura pa manda Asia, Europa y Sur America. Esaki a haci mi mas consciente di nos hermandad mundial. Un ruman cu a laga un bon impresion riba mi tabata Ruman A.H. Macmillan, kende tabata un superintendente biahero den tempo di Ruman Russell. Aunke e tabata di edad avansa y no por a tende mucho bon, e tabata asisti fielmente na tur reunion di congregacion. Esaki a siña mi cu semper nos mester balora nos reunionnan y e echo cu nos por asocia cu nos rumannan cristian.—Heb. 10:24, 25.

Janny: Ami cu Markus tabata skirbi otro varios biaha pa siman. Nos tabata sinti falta di otro masha hopi mes! No obstante, Markus tabata disfruta di e entrenamento cu e tabata ricibi na Galaad, y ami a haya hopi goso den mi sirbishi. Ora Markus a bin bek for di Merca, mi tabatin 17 estudio di Bijbel. Aunke e 15 lunanan cu nos tabata separa tabata hopi dificil, mi por a ripara cu Jehova a bendiciona nos pa e sacrificionan cu nos a haci. E dia cu Markus a bin bek, e avion tabatin varios ora di retraso. Pesey, ora cu finalmente el a yega, nos a yora den brasa di otro. For di e dia ey, nunca mas nos a separa for di otro.

Markus: Ora cu mi a bin bek for di Galaad na december 1964, nos a haya asignacion pa bay sirbi na Betel. Aunke nos no tabata sa esey e tempo ey, esey no tabata nos asignacion permanente. Apenas tres luna despues, nos a haya asignacion pa bay den e trabou di districto na Vlaanderen.  Ora cu Aalzen y Els Wiegersma a ser manda Belgica como misionero, nan a ser asigna pa bay den e trabou di districto y nos a bay Betel bek caminda mi a sirbi den e Departamento di Sirbishi. For di 1968 te cu 1980, nos asignacion a cambia varios biaha, sea nos a sirbi na Betel of nos a bay den e trabou biahero. Finalmente, di 1980 pa 2005, mi a sirbi atrobe como superintendente di districto.

Aunke nos asignacion a cambia hopi biaha, nunca nos a lubida cu nos a dedica nos bida na Jehova pa sirbie di henter nos curason. Nos a disfruta masha hopi di cada asignacion cu nos a ricibi cu e confianza cu cualkier cambio cu a bin den nos sirbishi na Jehova tabata pa adelanto di interesnan di Reino.

Janny: Mi tabata hopi contento cu mi por a bay Brooklyn cu Markus na 1977 y Patterson na 1997 pa e haya mas entrenamento como miembro di Comite di Sucursal.

Markus: Na 1982, Janny a haci un operacion y a recupera bon. Tres aña despues, e congregacion na Louvain bondadosamente a ofrece nos un apartamento riba nan Salon di Reino. Pa prome biaha den 30 aña, nos tabatin un luga chikito di nos mes. Tur diamars, ora nos mester cuminsa nos bishita na un congregacion, mi mester a baha y subi 54 trapi varios biaha pa hiba nos maletanan abou. Pesey, nos a keda hopi contento na 2002 ora nos a haya un apartamento na e piso abou. Despues cu mi a haci 78 aña di edad, nos a ser asigna como pionero special den e stad di Lokeren. Nos ta masha contento cu nos por sirbi Jehova di e manera aki y cu ainda nos por bay den sirbishi tur dia.

Janny: Hunto nos a dedica mas cu 120 aña den e sirbishi di tempo completo. Nos a experencia personalmente con Jehova ta cumpli cu loke el a priminti, esta, cu ‘hamas lo e bandona nos’ y cu si nos sirbie fielmente, nos lo ‘no tin falta di nada.’—Heb. 13:5; Deu. 2:7.

Markus: Tempo nos tabata jong, nos a dedica nos mes na Jehova. Nunca nos a busca cosnan grandi pa nos mes. Semper nos a acepta tur asignacion cu nos a haya. Nos ta kere firmemente cu no ta importante unda nos ta sirbi ni ki privilegio nos tin, sino ken nos ta sirbi, esta, Jehova Dios.