E rey di Siria tabata busca Eliseo tur caminda pa cog’e preso. Ora el a haya sa cu e profeta di Dios tabata na Dotan, un stad cera cu muraya y situa riba un sero, el a manda cabay, garoshi di guera y un ehercito grandi eynan. Pa ora dia a habri, su forsa militar tabatin henter e stad rondona.—2 Rey. 6:13, 14.

Ora e sirbidor di Eliseo a lanta mainta y a sali pafo, el a mira e ehercito enemigo y a haya miedo. El a sclama: “Ay, mi shon! Kico nos lo haci?” Eliseo a contest’e: “No tene miedo, pasobra esnan cu ta cu nos ta mas cu esnan cu ta cu nan.” Anto e profeta a bisa den oracion: “O SEÑOR, mi ta pidi bo, habri su wowo pa e mira.” E relato ta splica: “Y SEÑOR a habri wowo di e sirbidor y el a mira, y at’e sero tabata yen di cabay y garoshi di candela tur rond di Eliseo.” (2 Rey. 6:15-17) Kico nos por siña for di e esaki?

Eliseo a keda trankil ora el a mira e ehercito di Siria pasobra el a confia den Jehova y a mira su proteccion. Den e tempo aki nos no ta spera cu Jehova ta haci milager, pero si nos ta mira cu e ta proteha su pueblo como grupo. Den un sentido nos por bisa cu nos tambe ta mira “cabay y garoshi di candela” ta proteha nos. Si nos tin fe cu Jehova ta protehando su pueblo y ta confia plenamente den dje, nos lo sinti nos sigur y nos lo tin su bendicion. (Sal. 4:8) Laga nos analisa kico mas nos por siña for di otro sucesonan cu a tuma luga den bida di Eliseo.

Un biaha cu Eliseo tabata ploeg un cunucu, profeta Elias a bay cerca dje y a tira su mantel riba dje. Eliseo a compronde di biaha cu esey a nifica cu Elias tabata kier p’e bira su sirbidor. Pues, Eliseo a tene un bankete, a despedi di su tata cu su mama y a bandona su cas pa bay sirbi Elias. (1 Rey. 19:16, 19-21) Como cu Eliseo tabata dispuesto pa pone otro cosnan un banda pa e por ta completamente disponibel pa e sirbishi di Dios, Jehova por a haci bon uzo di dje y despues a nombr’e como profeta na luga di Elias.

 Eliseo a sirbi Elias un seis aña asina. Durante e tempo ey, Eliseo tabata esun ‘cu tabata basha awa riba man di Elias.’ (2 Rey. 3:11) Kico esey a nifica? Den e tempo ey, hende tabatin custumber di come cu man, sin cuchiu cu forki. Despues di cuminda, un sirbidor tabata basha awa riba man di su doño pa laba nan. Pues, algun di e tareanan di Eliseo tabata cos simpel y no mucho importante. Pero toch p’e tabata un honor di por a fungi como sirbidor di Elias.

Awe, hopi cristian ta participa den diferente faceta di sirbishi di tempo completo. Nan ta ser motiva pa nan fe y nan deseo fuerte di uza nan energia plenamente den e sirbishi di Jehova. Algun di nan a bay biba leu for di nan famia y amigonan pa traha na Betel of riba proyectonan di construccion haciendo trabou cu hopi hende ta considera humilde of di poco importancia. Pero ningun di nos no mester pensa asina. Tur e trabounan ey ta importante y e no ta rebaha esnan cu ta haci nan. Pa Jehova nan ta sumamente valioso.—Heb. 6:10.

Prome cu Jehova a “hiba Elias cielo den un warwaru”, el a manda e profeta bay di Gilgal pa Bet-el. Elias a bisa Eliseo cu e no mester bay cu ne, pero Eliseo a contest’e: “Lo mi no laga bo.” Na caminda, dos biaha mas Elias a bisa Eliseo cu e por a keda y no tabatin mester di bay cu ne. Pero Eliseo no a bandon’e. (2 Rey. 2:1-6) Mescos cu Ruth no a bandona Noemi, Eliseo tampoco no a bandona Elias. (Ruth 1:8, 16, 17) Dicon? Pasobra evidentemente el a aprecia e privilegio cu Dios a dun’e di sirbi Elias masha hopi mes.

Eliseo ta un bon ehempel pa nos awe. Nos tambe lo aprecia cualkier tarea cu nos haya den e organisacion di Dios, si nos keda corda cu ta Jehova nos ta sirbi. No tin un honor mas grandi cu esey.—Sal. 65:4; 84:10.

Segun cu e dos hombernan a sigui cana, Elias a bisa Eliseo: “Pidi loke bo kier pa mi haci pa bo prome cu mi wordo kita for di bo.” Eliseo a pidi algo cu tabatin di haber cu asuntonan spiritual, mescos cu Salomon a pidi hopi aña prome. El a pidi pa haya ‘un dobel porcion di Elias su spirito.’ (1 Rey. 3: 5, 9; 2 Rey. 2:9) Kico en realidad e tabata pidiendo? Wel, den Israel, ora un tata tabata parti su herencia entre su yiunan, e mester a duna su yiu homber mayo dobel di loke e otronan a haya. (Deu. 21:15-17) Si nos wak bon, Eliseo a pidi p’e bira e sucesor, of heredero spiritual, di profeta Elias. Ademas, Eliseo sin duda kier tabatin e mesun “spirito”, of actitud diligente y balente, cu Elias tabatin, pasobra e tambe kier a “traha masha duro pa SEÑOR.”—1 Rey. 19:13, 14.

Con Elias a reacciona riba e peticion ey? E profeta a bisa: “Bo a pidi un cos dificil. Sinembargo, si bo mira mi ora mi wordo kita for di bo, lo t’asina pa bo; ma si no, lo no t’asina.” (2 Rey. 2:10) Elias su contesta aparentemente a indica dos cos. Di prome, ta Jehova so por a duna Eliseo loke el a pidi. Di dos, si Eliseo kier a hay’e, e tabatin cu keda cu Elias, pase loke pase.

Dios a duna Eliseo loke el a pidi? Bijbel ta bisa: “A sosode cu mientras nan tabata cana ta papia, mira, a aparece un garoshi di candela y cabaynan di candela cu a separa nan dos. Y Elias a subi bay cielo den un warwaru. Y Eliseo a mira esaki.” * Esey tabata Jehova su contesta. Eliseo a mira ora Elias a ser kita for di dje, anto el a ricibi un dobel porcion di Elias su spirito y a bira su sucesor.—2 Rey. 2:11-14.

Eliseo a coy e mantel di Elias cu a cay for di dje y a bistie. Ora e hendenan a mir’e cu ne bisti, nan tur tabata sa cu awor ta e tabata e profeta di Dios. Y esaki a keda confirma despues ora cu Eliseo a parti e awa di Riu Jordan milagrosamente.

Loke Eliseo a mira ora cu Elias a ser hiba den e warwaru lo mester a haci un impresion profundo riba dje. Con cu bay bin, no ta tur dia bo ta mira garoshi di guera di candela ni cabay di candela! Nan a sirbi como prueba cu Jehova a contesta Eliseo su peticion. Awe ora Dios ta contesta nos oracionnan, nos no ta haya e tipo di visionnan ey. Pero si nos ta ripara cu Jehova ta uza su gran poder pa cumpli cu su boluntad. Ora nos ta mira con Jehova ta bendiciona e parti di su organisacion cu ta riba tera, ta  comosifuera nos ta “mira” su garoshi celestial moviendo padilanti.—Eze. 10:9-13.

Eliseo a pasa den hopi cos cu a convenc’e cu Jehova tin tremendo poder. De echo, Dios su spirito santo a yuda e profeta haci 16 milager, dobel e cantidad di loke Elias a haci. * E di dos biaha cu Eliseo a mira cabay y garoshi di guera di candela tabata durante e atake di Siria na Dotan, describi na cuminsamento di e articulo aki.

A pesar cu Eliseo tabata rondona pa enemigo na Dotan, el a keda trankil. Kico a yud’e? E fe fuerte cu el a cultiva den Jehova. Nos tambe tin mester di un fe asina. Pesey, laga nos pidi Dios duna nos su spirito santo di manera cu nos por demostra fe y otro cualidadnan cu ta parti di e fruta di spirito.—Luc. 11:3; Gal. 5:22, 23.

Loke a sosode na Dotan a duna Eliseo mas motibo ainda pa confia den Jehova y su ehercito invisibel di angel. Dios a manda su angelnan rondona e stad y e atacadonan. Anto Jehova a scapa tanto Eliseo como e sirbidor ora cu milagrosamente el a ciega e soldaatnan enemigo. (2 Rey. 6:17-23) Na e momento sumamente dificil ey, Eliseo a demostra fe y pleno confianza den Jehova, manera el a haci na otro ocasion.

Laga nos confia den Jehova Dios, mescos cu Eliseo. (Prov. 3:5, 6) Si nos haci esey, ‘Dios lo tene misericordia di nos y bendiciona nos.’ (Sal. 67:1) Claro cu nos no ta mira garoshi y cabay di candela literal ta rondona nos, pero Jehova ta proteha su pueblo awe y lo proteha nan den futuro durante e “tribulacion grandi.” (Mat. 24:21; Rev. 7:9, 14) Mientras cu nos ta warda e dia ey yega, laga nos semper corda cu “Dios ta un refugio pa nos.”—Sal. 62:8.