1, 2. Dicon nos no mester culpa Jehova pa e problemanan di humanidad? Splica esey cu un ehempel.

 SUPONE cu bo ta felizmente casa pa hopi aña. Un dia bo ta yega cas for di trabou y ta parce manera cos cu ta un horcan a pasa den bo cas: mueblenan tur destrosa, tayonan kibra, cortina gescheur. Lo bo dal un grito y bisa: “Dicon mi casa a haci e cos aki?” No, mas bien, e prome cos cu ta pasa den bo mente ta: “Ken a haci e cos aki?” Pasobra bo sa cu bo casa stima hamas lo causa un destruccion asina na boso cas.

² Awe, nos hogar, planeta Tera, ta tur ruina. E suela, awa y aire ta contamina. Hende ta violento y inmoral. Nos a siña for di Bijbel cu Jehova no por ta esun cu a causa ningun di e problemanan aki pasobra el a crea nos planeta pa e ta un paradijs. (Gen. 2:8, 15) E ta un Dios di amor. (1 Juan 4:8) Danki na nos estudio di Bijbel, nos sa cu esun cu realmente ta culpabel pa e tantisimo dificultadnan di mundo ta Satanas e Diabel, “e gobernante di mundo.”—Juan 14:30; 2 Cor. 4:4.

3. Con nos por haya un punto di bista robes di nos problemanan?

³ Pero nos no por culpa Satanas pa tur nos problemanan. Dicon no? Pasobra tin biaha ta nos mes fayonan ta causa nan. (Lesa Deuteronomio 32:4-6.) Pero aunke kisas nos ta admiti esaki, nos imperfeccion por pone nos haya un punto di bista robes di nos problemanan y cu tempo esaki por hiba na desaster. (Prov. 14:12) Con asina? Wel, en bes di culpa nos mes of Satanas pa un problema cu nos tin, nos por cuminsa culpa Jehova. Hasta nos por bay asina leu di rabia cu Jehova.—Prov. 19:3.

4, 5. Con nos lo por rabia cu Jehova?

 ⁴ Di berdad nos por rabia cu Jehova? Esey sigur lo no yuda nos cu nada. (Isa. 41:11) Ta kico nos ta kere nos lo logra cu esey? Un poeta a yega di bisa: “Bo brasa ta mucho cortico pa box cu Dios.” Podise nos lo no bay dje leu ey di keha na bos halto contra Jehova, pero nos lo por rabia cu ne den nos curason. Proverbionan 19:3 ta bisa cu e “locura di un hende ta ruina su caminda, y den su curason e ta bira razo contra SEÑOR.” Un persona asina, na moda di bisa, ta carga rencor contra Jehova. E actitud aki por manifesta su mes na maneranan cu no ta dje bisto ey. Por ehempel, e persona lo por cuminsa aleha for di e congregacion of baha man na loke e ta haci den su sirbishi pa Jehova.

⁵ Kico lo por pone nos rabia cu Jehova? Con nos por evita e trampa ey? Ta masha importante pa nos contesta e preguntanan aki, pasobra nos relacion cu Jehova Dios ta den wega!

6, 7. Dicon e Israelitanan den tempo di Moises a cuminsa keha contra Jehova?

⁶ Kico lo por pone un fiel sirbidor di Dios cuminsa keha contra Jehova den su curason? Laga nos wak cinco factor cu por hiba na esey y analisa algun ehempel den Bijbel di hende cu a rabia cu Jehova.—1 Cor. 10:11, 12.

⁷ Comentario negativo di otro hende por influencia nos. (Lesa Deuteronomio 1:26-28.) Jehova a libra e Israelitanan for di sclavitud den Egipto. El a manda dies plaga riba e nacion opresivo ey y despues a destrui Farao cu su ehercito den Lama Cora. (Exo. 12:29-32, 51; 14:29-31; Sal. 136:15) Awor cu e pueblo di Dios tabata cla pa drenta e Tera Priminti, net na e momento crucial ey, nan a cuminsa keha contra Jehova. Kico a causa e falta di fe aki? Nan a haya miedo pa motibo di e informe negativo cu algun di e hombernan cu a bay spiona e tera a duna. (Num. 14:1-4) Cu ki resultado? Henter e generacion ey no tabata mag di drenta “e bon tera.” (Deu. 1:34, 35) Nos tambe sa laga comentario negativo di otro hende debilita nos fe y pone nos cuminsa keha tocante e manera cu Jehova ta guia su pueblo?

8. Kico a pone e pueblo di Dios den tempo di Isaias culpa Jehova pa nan situacion?

⁸ Tragedia y problema por desanima nos. (Lesa Isaias 8:21, 22.) E nacion di Juda tabata den un situacion hopi dificil den tempo di Isaias. Nan tabata rondona pa enemigo. Cuminda tabata scars, y hopi di nan tabata pasa hamber. Pero e cos di mas pio tabata cu a reina un hamber spiritual, es decir, e pueblo a stop di scucha Jehova y a laga nan relacion cu ne bira debil. (Amos 8:11) En bes di acudi na Jehova y pidie yudansa, e pueblo a cuminsa “maldiciona nan rey y nan Dios.” Figura bo, nan a culpa Dios pa nan problemanan! Kico di nos? Ora nos ta confronta tragedia of problema personal, acaso nos tambe ta bisa den nos curason: ‘Unda Jehova tabata ora mi tabatin mester di dje?’

9. Dicon e Israelitanan den tempo di Ezekiel a haya un punto di bista robes?

⁹ Nos no sa tur detaye. Como cu e Israelitanan den tempo di Ezekiel no tabata sa tur detaye tocante un cierto situacion, nan a pensa cu Dios su manera di haci cos no tabata bon. (Eze. 18:29) Nan a haci comosifuera nan tabatin derecho di husga Dios y di dicidi si e tabata haciendo cosnan di e mihor manera, a pesar cu nan no a compronde tur su motibonan. Con nos por comete e mesun fayo ey? Den Bijbel por tin relatonan cu ta dificil pa nos  compronde, of kisas nos no ta compronde dicon cierto cos ta pasa cu nos. Nos por cuminsa pensa den nos curason cu Jehova no ta husto, cu ‘su caminda no ta recto.’—Job 35:2.

10. Con un hende por sigui e mal ehempel di Adam?

¹⁰ Nos lo por tira falta riba Dios pa nos pica- y fayonan. Ora e prome hende, Adam, a peca, el a culpa Dios pa esey. (Gen. 3:12) Adam a kibra e ley di Dios deliberadamente y tabata sa masha bon kico lo tabata e consecuencianan, pero toch el a tira e culpa riba Jehova. Cu otro palabra, el a bisa cu Jehova a dun’e un mal casa. Di eynan padilanti, hopi hende a sigui e mal ehempel di Adam y a culpa Dios pa nan fayonan. Ta bon pa nos puntra nos mes: ‘Acaso mi ta asina desapunta y frustra pa motibo di mi propio fayonan cu mi ta cuminsa pensa cu ta e normanan di Jehova ta mucho estricto?’

11. Kico nos por siña for di Jonas?

¹¹ Nos lo por kere cu nos ta hopi importante. Profeta Jonas a rabia ora Jehova a tene misericordia cu e pueblo di Ninive. (Jon. 4:1-3) Dicon? Parce cu e tabata mucho preocupa cu su cara lo a keda na berguensa, ya cu el a proclama un destruccion cu no a tuma luga. Jonas tabata asina preocupa cu su reputacion cu e no a sinti ni un tiki compasion pa e Ninivitanan arepenti. Acaso nos tambe lo por concentra asina tanto riba nos mes cu nos ta rabia cu Jehova pasobra e no a trece e fin pa caba? Kisas nos tin añanan ta predica cu e dia di Jehova ta cerca. Pero con nos ta reacciona ora hende ta critica nos pasobra e dia ey no a yega ainda? Acaso nos ta perde pasenshi cu Jehova?—2 Ped. 3:3, 4, 9.

12, 13. Kico nos tin cu haci pa evita cu nos ta cuminsa cuestiona loke Jehova ta haci of ta permiti sosode?

¹² Kico nos por haci si nos curason pecaminoso cuminsa cuestiona loke Jehova ta haci of ta permiti sosode? Tene na mente cu ta bobo pa pensa asina. Un otro  traduccion di Proverbionan 19:3 ta bisa: “Bobedat di hende mes ta pon’é dualu, pero hende ke kulpa Dios.” (BPK) Pesey laga nos considera cinco punto cu lo yuda nos pa no culpa Jehova ora nos ta sinti nos frustra.

¹³ No neglisha bo relacion cu Jehova. Si nos tin un amistad cera cu Jehova, nos lo no entrega na e inclinacion imperfecto di rabia cu ne. (Lesa Proverbionan 3:5, 6.) Nos tin cu confia den Jehova, y nunca pensa cu nos sa mas cu ne, ni kere cu nos necesidadnan ta esnan di mas importante. (Prov. 3:7; Ecl. 7:16) E ora ey lo tin menos chens cu nos ta culpa Dios ora cos malo sosode.

14, 15. Kico nos por haci pa no laga comentario negativo di otro hende influencia nos?

¹⁴ No laga comentario negativo influencia bo. E Israelitanan den tempo di Moises tabatin bon motibo pa kere cu Jehova lo a yuda nan drenta e Tera Priminti. (Sal. 78:43-53) Pero ora nan a tende e informe negativo di e dies spionnan infiel, nan no a ‘corda riba Jehova su poder.’ (Sal. 78:42) Si nos medita riba tur e cosnan maraviyoso cu Jehova a haci pa nos, e relacion cu nos tin cu ne lo bira mas fuerte. E ora ey nos lo no laga e ideanan negativo di otro hende separa nos for di Jehova.—Sal. 77:11, 12.

¹⁵ Un otro cos cu tambe por perhudica nos relacion cu Jehova ta si nos tin un punto di bista negativo di algun di nos rumannan. (1 Juan 4:20) Por ehempel, ora Aaron a keda nombra como sumo sacerdote, e Israelitanan a cuestiona esey. Pa Jehova, tabata comosifuera ta contra dje nan a murmura. (Num. 17:10) Di igual manera, si nos cuminsa reclama y keha contra e personanan cu Jehova ta uza pa dirigi e parti terenal di su organisacion, nos, de echo, ta kehando contra Jehova.—Heb. 13:7, 17.

16, 17. Kico nos tin cu corda ora nos ta confronta problema?

¹⁶ Corda cu no ta Jehova ta e causa di nos problemanan. Den tempo di Isaias, e Israelitanan a bira lomba pa Jehova, pero toch E kier a yuda nan. (Isa. 1:16-19) Maske ki problema nos por confronta awe, ta un consuelo pa sa cu Jehova ta interesa den nos y kier yuda nos. (1 Ped. 5:7) De echo, el a priminti di duna nos e fortaleza necesario pa sigui wanta.—1 Cor. 10:13.

¹⁷ Si nos ta sufri un of otro inhusticia—mescos cu e homber fiel, Job, a sufri—nos tin cu corda cu no ta Jehova su culpa. Jehova ta odia inhusticia y ta stima husticia. (Sal. 33:5) Nos mester tin e mesun actitud cu Eliu, amigo di Job, kende a bisa: “Leu sea di Dios di haci maldad, y di e Todopoderoso di comete inikidad.” (Job 34:10) En bes di ta e causa di nos problemanan, Jehova ta e fuente di “tur don cu ta bon y tur regalo perfecto.”—Sant. 1:13, 17.

18, 19. Dicon nos nunca mester duda den Jehova? Duna un ehempel.

¹⁸ Nunca duda den Jehova. Dios ta perfecto, y su pensamentonan ta mas halto cu di nos. (Isa. 55:8, 9) Si di berdad nos ta humilde y modesto, nos mester admiti cu nos no sa tur cos. (Rom. 9:20) Mayoria di biaha, nos no tin tur detaye di un situacion. Sin duda bo a yega di confirma pa bo mes cu e proverbio aki ta berdad: “Esun ku presentá su kaso promé ta parse di tin rason, te ora un otro hende bini dilanti i hasi pregunta.”—Prov. 18:17, BPK.

¹⁹ Si un bon amigo di bo haci un cos cu na prome instante bo no ta compronde of cu bo ta haya hopi straño, bo ta core acus’e mesora di a haci algo malo? No. Mas bien, lo bo pensa cu probablemente bo no sa tur detaye di loke a pasa, specialmente si bo  conoce e persona ey pa hopi tempo caba. Si nos ta dispuesto pa trata hasta nos amigonan imperfecto asina, cuanto mas nos mester confia nos Tata celestial, kende su caminda- y pensamentonan ta mucho mas halto cu di nos!

20, 21. Dicon nunca nos mester culpa Jehova pa nos problemanan?

²⁰ Culpa esun cu realmente ta responsabel. Dicon nos mester haci esey? Wel, kisas ta nos mes ta responsabel pa algun di nos problemanan. Den tal caso, nos tin cu reconoce esey. (Gal. 6:7) Dicon lo ta irasonabel pa culpa Jehova? Considera e ehempel aki: Un auto kisas por alcansa un velocidad hopi halto mes. Supone awor cu e chauffeur a perde control den un lorada skerpi pasobra e tabata core mucho duro y a dal e auto. Ta e fabricante di e auto ta culpabel pa e accidente? Claro cu no! Asina tambe, Jehova a crea nos cu boluntad liber. Pero tambe el a duna nos conseho encuanto con pa tuma decisionnan sabi. Pues, dicon nos lo kier culpa e Creador anto pa e fayonan cu nos ta comete?

²¹ Naturalmente, no ta tur nos problemanan ta pa motibo di nos propio fayo of pica. Tin cos ta sosode pa motibo di “tempo y suceso imprevisto.” (Ecl. 9:11, NW) Y nunca lubida cu Satanas e Diabel ta e causa principal di maldad. (1 Juan 5:19; Rev. 12:9) E ta e enemigo, no Jehova!—1 Ped. 5:8.

22, 23. Kico nos mester corda si nos ta sinti nos desanima pa motibo di problema?

²² Ora bo ta enfrenta prueba y dificultad, corda riba e ehempel di Josue cu Caleb. Contrario na e otro dies spionnan, e dos hombernan fiel aki si a bin cu un informe hopi positivo di e Tera Priminti. (Num. 14:6-9) Nan a demostra fe den Jehova. Pero toch nan mester a dwaal 40 aña den desierto hunto cu e otro Israelitanan. Acaso Josue cu Caleb a keha of bira amarga pasobra nan a haya esaki inhusto? No. Nan a confia den Jehova, y el a bendiciona nan pa esaki. Mientras cu mayoria di e Israelitanan infiel a muri den desierto, Jehova a laga Josue cu Caleb si drenta e Tera Priminti. (Num. 14:30) Asina tambe Jehova lo bendiciona nos si nos “no cansa” di haci su boluntad.—Gal. 6:9; Heb. 6:10.

²³ Kico bo mester haci si bo ta sinti bo desanima pa motibo di problema, imperfeccion di otro hende of bo mes imperfeccion? Concentra riba e cualidadnan maraviyoso di Jehova. Pensa riba e cosnan bunita cu el a priminti di duna bo. Y puntra bo mes: ‘Unda lo mi tabata si mi no tabatin Jehova?’ Semper keda cerca di Jehova, y percura pa hamas bo rabia cu ne den bo curason!