Bo no ta di acuerdo cu Hesus tabata e mihor Maestro cu a yega di biba riba tera? Kisas bo a yega di purba di imita e manera cu el a siña hende, por ehempel haciendo uzo di pregunta y di ilustracion. Pero bo tabata sa cu hopi bes Hesus a haci uzo di contraste?

Hopi hende ta haci uzo di contraste ora nan ta papia. Por ta abo tambe sa haci uzo di contraste, hasta sin cu bo sa. Talbes bo ta bisa algo manera: “Nan a bisa mi cu tur e frutanan ta hecho, pero esakinan ta berde ainda.” Of: “Antes e tabata un mucha masha timido, pero awor e ta mas habri.”

Den casonan asina, bo ta presenta un echo of idea prome, y despues bo ta introduci e contraste cu un expresion manera pero, ma, sinembargo, mas bien of di otro banda. Despues, bo ta agrega informacion pa mustra e contraste. Ta masha normal pa uza contraste ora bo ta papia y esaki por yuda hende compronde loke bo kiermen.

Maske uzo di contraste no ta comun den algun idioma of cultura, ta bon pa reconoce su balor. Dicon? Pasobra nos ta haya hopi contraste den e Palabra di Dios. Hesus a haci bon uzo di contraste. Pensa riba esakinan: “Un hende no ta cende un lampi y tap’e cu un macutu; mas bien, e ta pon’e riba un kandelaar.” “Mi no a bin pa caba cu [Ley], sino pa cumpli [cu ne].” “Boso a tende den pasado: ‘No comete adulterio.’ Pero ami ta bisa boso cu ken cu sigui wak un muher ...” “Boso a tende den pasado: ‘Wowo pa wowo y djente pa djente.’ Ma ami ta bisa boso: No resisti e hende malbado; mas bien, si un hende dal bo un wanta na banda drechi di bo cara, bira e otro banda di cara tambe p’e.”—Mat. 5:15, 17, 27, 28, 38, 39.

Den otro bukinan di Bijbel tambe nos ta haya contraste. Un contraste por yuda nos compronde un punto of e por resalta e mihor manera pa haci algo. Si bo ta un mayor, pensa riba e siguiente contraste: “Tatanan, no irita boso yiunan, ma sigui lanta nan den e disciplina di Jehova y inculca su manera di pensa den nan.” (Efe. 6:4) Si apostel Pablo a djis skirbi cu un tata (of mama) mester lanta su yiu den e disciplina di Dios, lo el a duna un conseho sabi y veridico. No obstante, e idea ta bira mas cla y comprendibel cu e contraste: ‘No irita nan, ma inculca Jehova su manera di pensa den nan.’

Mas despues den e mesun capitulo ey, Pablo a skirbi: “Nos lucha no ta contra carni y [weso], sino contra ... forsanan spiritual di maldad den luganan celestial.” (Efe. 6:12) E contraste ey ta yuda nos compronde con dificil nos lucha ta: Nos no tin djis un lucha contra hende; mas bien, e ta un lucha contra spiritonan malbado.

Den e mesun buki di Bijbel aki, esta Efesionan, lo bo haya hopi otro texto caminda Pablo a uza contraste. Ora nos pensa riba nan, nan por yuda nos compronde mihor kico Pablo tabata kiermen y kico nos mester haci.

Lo bo disfruta y siña hopi di e tabel cu tin den e articulo aki; e ta menciona diferente contraste cu nos ta haya den capitulo 4 y 5 di Efesionan. Cada bes, cu bo lesa un di e contrastenan, pensa riba bo mes bida. Puntra bo mes: ‘Con mi actitud ta realmente? Con ami lo a reacciona den e situacion aki of den uno similar? Cu cua banda di e contraste otro hende ta identifica mi?’ Si un contraste yuda bo mira cu tin un area cu bo tin cu traha riba dje, haci esfuerso di biaha pa aplica loke bo a siña. Asina bo ta haci bon uzo di e contrastenan.

Ademas, bo por uza e tabel pa boso Adoracion Como Famia. Pa cuminsa, boso por lesa e lista di contraste hunto. Despues, un di boso por menciona e prome parti di un contraste, y e otronan ta purba di corda e di dos parti. Anto na un manera placentero boso por analisa con boso famia por mehora den e manera cu boso ta aplica e di dos parti. Si, ora nos analisa contrastenan manera esakinan, esaki lo por yuda hende di tur edad pa comporta nan manera un bon cristian, na cas y tur otro caminda.

Ora bo bira mas consciente di e balor di contraste, ta mas facil pa bo reconoce nan den Bijbel, y lo bo ripara cu nan ta masha util den sirbishi. Por ehempel, bo por bisa e doño di cas lo siguiente: “Hopi hende ta bisa cu tur hende tin un alma inmortal, ma tuma nota di loke e Palabra di Dios ta bisa akinan.” Of durante un estudio di Bijbel, bo por puntra: “Mayoria di hende akibanda ta kere cu Dios y Hesus ta e mesun persona, sinembargo, kico Bijbel ta bisa? Awor, kico abo ta kere?”

Si, den Bijbel nos ta haya hopi contraste instructivo cu por yuda nos sigui cana den e caminda di Dios y yuda otro hende conoce e berdad di Bijbel.