1. (a) Cua ta algun tema cu nos ta studia cu regularidad na nos reunionnan? (b) Ki beneficio nos ta saca ora nos repasa e temanan ey?

 BO A yega di pensa ora bo ta preparando pa e Estudio di Toren di Vigilancia: ‘Nos a studia e tema aki un biaha caba?’ Si bo ta asisti na reunion pa un tempo caba, lo bo a ripara cu tin algun tema cu nos ta trata bes tras bes. Por ehempel, cu basta regularidad nos ta studia tocante e Reino di Dios, e rescate y e predicacion, of tocante cualidadnan manera fe y amor. E echo cu nos ta repasa e temanan aki ta yuda nos mantene un fe firme y ‘bira hende cu ta cumpli cu e palabra, y no hende cu ta tend’e so.’—Sant. 1:22.

2. (a) Kico e recordatorionan di Dios ta encera? (b) Kico ta e diferencia entre ley di hende y ley di Jehova?

² Den Bijbel, nos ta haya recordatorio den forma di ley-, mandamento- y normanan cu Dios a duna su pueblo. Distinto for di ley di hende, cu constantemente mester ser ahusta of revisa, e leynan y normanan di Jehova semper ta confiabel. Ta berdad cu Dios a duna algun ley den pasado cu no ta conta mas pa su pueblo awe. Pero esaki no ta pasobra tabatin algo robes cu e leynan ey. E salmista a bisa: “Bo testimonionan [“recordatorionan”, NW] ta husto pa semper.”—Sal. 119:144.

3, 4. (a) Ki mensahe e recordatorionan di Jehova ta transmiti tin biaha? (b) Con e Israelitanan lo a beneficia si nan a haci caso di nan?

³ Tin biaha e recordatorionan di Jehova ta transmiti un mensahe di advertencia of spiertamento. Den caso di e Israelitanan, e profetanan di Dios tabata spierta nan cu regularidad. Por ehempel, un poco prome cu e nacion a drenta e Tera Priminti, Moises a bisa nan: “Tene cuidou pa boso curason no wordo gaña y boso bira bay y sirbi otro diosnan y adora nan. Sino e  rabia di SEÑOR lo cende contra boso.” (Deu. 11:16, 17) Den Bijbel nos ta haya un gran cantidad di recordatorio util cu Jehova a duna su pueblo.

⁴ Na hopi otro ocasion mas Jehova a corda e Israelitanan pa nan tem’e, scucha su bos y santifica su nomber. (Deu. 4:29-31; 5:28, 29) Si nan a haci caso di e recordatorionan ey, lo el a bendiciona nan ricamente.—Lev. 26:3-6; Deu. 28:1-4.

5. Dicon Jehova a bringa pa Rey Ezekias?

⁵ Durante e historia turbulento di Israel, Dios semper a cumpli cu su promesa. Por ehempel, ora Rey Senakerib di Asiria a invadi Juda y a menasa di baha Rey Ezekias for di trono, Jehova a manda un angel pa yuda su pueblo. Den un solo anochi, e angel di Dios a mata “tur guerero poderoso” di e ehercito di Asiria, di manera cu Senakerib a hay’e obliga di bay cas bek tur humilia. (2 Rey. 19:35; 2 Cro. 32:21) Dicon Dios a bringa na fabor di Rey Ezekias? Pasobra ‘Ezekias a tene duro na Jehova; e no a laga di siguie, ma a warda su mandamentonan.’—2 Rey. 18:1, 5, 6.

6. Con Rey Josias a demostra confianza den Jehova?

⁶ Un otro rey cu a obedece e mandamentonan di Jehova tabata Josias. For di ora e tabatin ocho aña, el a ‘haci bon den bista di Jehova y no a desvia ni na man drechi ni na man robes.’ (2 Cro. 34:1, 2) Josias a demostra confianza den Jehova ora el a elimina e diosnan falso for di e pais y a restaura adoracion berdadero. Y como resultado, Jehova a bendiciona no e so, sino henter e nacion.—Lesa 2 Cronicanan 34:31-33.

7. Kico tabata pasa cu e Israelitanan ora nan no a haci caso di e recordatorionan di Jehova?

⁷ Pero lamentablemente, no ta tur biaha e pueblo di Dios tabatin pleno confianza den e recordatorionan di Jehova. A traves di siglo, nan a desobedece Jehova bes tras bes. Uzando e palabranan di apostel Pablo, nos por bisa cu nan a ser ‘hiba p’aki p’aya pa tur biento di siñansa’ ora cu nan fe tabata zwak. (Efe. 4:13, 14) Y a sosode net manera Jehova a spierta nan: Nan a cosecha consecuencia amargo ora nan no a pone confianza den su recordatorionan.—Lev. 26:23-25; Jer. 5:23-25.

8. Den ki manera nos situacion ta parce esun di e Israelitanan?

⁸ Den ki manera nos situacion ta parce esun di e Israelitanan? Wel, mescos cu nan, e pueblo di Dios di awendia ta ricibi  conseho y disciplina. (2 Ped. 1:12) Cada biaha cu nos lesa Bijbel, Jehova ta corda nos di su normanan. Y como cu nos tin e libertad di scoge, nos mes por dicidi si nos lo obedece nan of si nos lo haci loke nos ta haya ta bon. (Prov. 14:12) Laga nos ban wak awor algun motibo pakico nos por confia e recordatorionan di Jehova y con nan por beneficia nos.

9. Con Jehova a recorda e Israelitanan durante nan biahe den desierto cu e tabata apoya nan?

⁹ Ora cu e Israelitanan a cuminsa cu nan biahe door di un “desierto grandi y teribel”, un biahe cu a dura 40 aña, Jehova no a splica nan en detaye con lo e bay dirigi nan, proteha nan y cuida nan. Pero si el a demostra nan bes tras bes cu nan por a confia den dje y den su instruccionnan. Pa medio di un pilar di nubia den dia y un pilar di candela anochi, Jehova a corda nan cu e tabata apoya nan y guia nan a lo largo di e biahe dificil ey. (Deu. 1:19; Exo. 40:36-38) Tambe Jehova a percura pa nan haya e cosnan basico cu nan tabatin mester. “Nan no tabatin falta di nada; nan paña no a gasta, ni nan pianan no a hincha.”—Neh. 9:19-21.

10. Con Jehova ta guia su pueblo awe?

¹⁰ Awe, e sirbidornan di Dios ta para na porta di un husto mundo nobo. Abo tin confianza cu Jehova ta dunando nos loke nos tin mester pa sobrevivi e binidero “tribulacion grandi”? (Mat. 24:21, 22; Sal. 119:40, 41) Ta berdad cu Jehova no ta uza un pilar di nubia ni un pilar di candela pa guia nos na e mundo nobo, pero si e ta uza su organisacion pa yuda nos keda alerta. Por ehempel, mas y mas nos ta ser anima pa fortalece nos amistad cu Jehova door di lesa Bijbel, tene un anochi di Adoracion Como Famia, asisti regularmente na reunion y sali den sirbishi. Bo a haci e cambionan necesario den bo bida pa asina bo por sigui e instruccionnan aki? Esey lo yuda bo cultiva e fe firme cu nos tin mester pa ser salba y drenta e mundo nobo.

11. Den ki manera Jehova ta demostra cu e ta interesa den nos bienestar?

¹¹ E instruccionnan cu nos ta ricibi no solamente ta yuda nos keda lanta den sentido spiritual, sino tambe ta yuda nos tuma decisionnan sabi den bida di tur dia. Por ehempel, nos a haya e animacion pa nos tin un punto di bista balansa di cos material y pa hiba un bida simpel, ya asina nos por evita hopi dolor di cabes. Tambe nos a haya conseho tocante bistimento, cuido di nos apariencia, scogemento di diberticion sano y tambe con pa dicidi cuanto enseñanza escolar nos tin mester. Anto pensa riba e consehonan cu nos a haya pa tuma medidanan di siguridad pa cu nos cas, nos auto of Salonnan di Reino, y e sugerencianan pa prepara pa un emergencia. E consehonan ey ta demostra cu Jehova ta interesa den nos bienestar.

12. (a) Tocante kico Hesus a papia na varios ocasion cu su discipelnan? (b) Ki gesto di humildad a haci un impresion profundo riba Pedro? (c) Kico nos mester siña for di e ehempel di Hesus?

¹² Den prome siglo, e pueblo di Dios tabata ricibi recordatorio regularmente. Na varios ocasion Hesus a papia cu su discipelnan tocante e importancia di ta humilde. Pero e no a djis splica nan kico kiermen ser humilde; el a mustra nan con pa ta humilde. E ultimo dia di su bida riba tera, el a reuni e apostelnan pa nan celebra Pasco Hudiu. Mientras cu e apostelnan tabata come, Hesus a lanta para y a cuminsa laba nan pia, un tarea cu normalmente un cria ta haci. (Juan 13:1-17) E gesto di humildad aki a haci un impresion profundo riba nan. Un 30 aña despues,  apostel Pedro, kende tabata presente na e cena ey, a conseha su rumannan den fe pa ta humilde. (1 Ped. 5:5) E ehempel di Hesus mester motiva nos tur pa ta humilde den e manera cu nos ta trata otro.—Flp. 2:5-8.

13. Ki cualidad esencial Hesus a recorda su discipelnan cu nan mester a cultiva?

¹³ Un otro tema cu Hesus a trata hopi biaha cu su discipelnan tabata e importancia di tin un fe fuerte. Un biaha, e discipelnan no por a saca un demoño for di un mucha homber. Nan a puntra Hesus: “Pakico nos no por a sac’e?” El a contesta nan: “Pa motibo di boso poco fe. Pasobra di berdad mi ta bisa boso: Si boso fe ta djis e tamaño di un pipita di mosterd, ... nada lo no ta imposibel pa boso.” (Mat. 17:14-20) Durante henter Hesus su sirbishi, el a siña su discipelnan cu fe ta un cualidad esencial. (Lesa Mateo 21:18-22.) Nos ta saca probecho di tur congreso, asamblea y reunion? Nan ta ocasionnan pa fortalece nos fe mediante e instruccion edificante cu ta ser duna eynan. E reunionnan aki no ta djis pa nos disfruta di un dushi ambiente; nan ta oportunidadnan pa nos demostra cu nos ta confia e guia di Jehova.

14. Dicon ta importante pa nos cultiva un amor manera di Cristo awe?

¹⁴ E Scritura Griego Cristian ta recorda nos hopi biaha pa mustra amor na otro hende. Hesus a bisa cu e di dos mandamento di mas grandi ta “stima bo prohimo mescos cu bo mes.” (Mat. 22:39) Santiago, mitar ruman di Hesus, a yam’e “e ley noble.” (Sant. 2:8) Y apostel Juan a skirbi: “Rumannan stima, mi ta skirbi boso, no un mandamento nobo, sino un mandamento bieu cu boso tabatin for di cuminsamento ... Y toch ta un mandamento nobo mi ta skirbi boso.” (1 Juan 2:7, 8) Kico Juan tabata kiermen cu e expresion “mandamento bieu”? E tabata referi na e mandamento pa stima bo prohimo. E tabata “bieu” pasobra Hesus a dun’e hopi aña prome, esta, “for di cuminsamento.” Pero e tabata “nobo” tambe pasobra e discipelnan tabatin cu sigui demostra amor di sacrificio propio ora situacionnan nobo a presenta. Como discipel di Cristo, nos por ta contento cu e Palabra di Dios ta recorda nos di e importancia di stima nos prohimo y di tene cuidou pa e actitud egoista di e mundo aki no influencia nos.

15. Kico tabata e motibo principal pakico Hesus a bin na tera?

¹⁵ Hesus a mustra interes personal den hende. Prueba di esey ta cu el a cura hende malo y a resucita hende morto. Pero e motibo principal pakico Hesus a bin na tera no tabata pa cura hende. Su predicacion  y siñansa tabatin un efecto mucho mas duradero riba hende. Dicon nos ta bisa esey? Pasobra e hendenan cu Hesus a cura y resucita den prome siglo, cu tempo, toch a bira bieu y muri. Pero esnan cu a reacciona bon na su mensahe a haya e oportunidad di biba pa semper.—Juan 11:25, 26.

16. Na ki escala e predicacion ta tumando luga den nos tempo?

¹⁶ E predicacion cu Hesus a cuminsa den prome siglo ta tuma luga awe na un escala hopi mas grandi. El a duna su siguidornan e encargo: “Bay, y haci hende di tur nacion mi discipel.” (Mat. 28:19) Y esey ta loke nan a haci y ta loke nos ta haciendo! Den mas cu 230 pais, mas cu shete miyon Testigo di Jehova ta predica e mensahe di e Reino di Dios cu entusiasmo y ta duna les di Bijbel na miyones di hende. E trabou di predica aki ta un prueba cu nos ta bibando den e ultimo dianan.

17. Ki conseho Pablo y Pedro a duna e rumannan di prome siglo?

¹⁷ Ta bisto cu e recordatorionan cu e cristiannan di prome siglo a haya a yuda nan keda cu un fe firme. Por ehempel, ora Pablo tabata preso na Roma, el a bisa Timoteo: “Sigui pega na e patronchi di palabra sano cu bo a tende for di mi.” (2 Tim. 1:13) Nos por imagina cu e palabranan ey a anima Timoteo masha hopi mes. Di otro banda, despues cu apostel Pedro a stimula e rumannan pa cultiva cualidadnan manera perseverancia, cariño pa otro y dominio propio, el a bisa: “Mi ta semper cla pa corda boso e cosnan aki, aunke boso sa nan y ta bon estableci den e berdad cu boso a siña.”—2 Ped. 1:5-8, 12.

18. Con e cristiannan di prome siglo a mira e recordatorionan cu nan a haya?

¹⁸ Si nos wak bon, e cartanan cu Pablo y Pedro a skirbi a cuadra cu “e palabranan cu e profetanan santo a papia anteriormente.” (2 Ped. 3:2) Acaso e cristiannan di prome siglo a rabia pasobra nan a haya e recordatorionan ey? No, nan no a rabia, ya cu nan tabata sa cu esey tabata un prueba cu Dios a stima nan y tabata kier pa nan “sigui haya mas bondad inmereci y conocemento di nos Señor y Salbador Hesucristo.”—2 Ped. 3:18.

19, 20. Dicon nos por confia e recordatorionan di Jehova, y con nos por beneficia di nan?

¹⁹ Awe, nos tin motibo di sobra pa confia e recordatorionan di Jehova cu ta para skirbi den su Palabra infalibel. (Lesa Josue 23:14.) Bijbel ta conta nos con Dios a trata cu hende imperfecto den transcurso di miles di aña. E relatonan historico aki a keda registra pa nos beneficio. (Rom. 15:4; 1 Cor. 10:11) Tambe nos a mira profecia di Bijbel cumpli den nos tempo. Profecia ta manera recordatorio cu a ser duna hopi aña di antemano, ya cu nan ta corda nos cu Jehova semper ta cumpli cu loke e priminti. Un ehempel di esey ta cu miyones di hende a join adoracion puro di Jehova manera a ser profetisa pa “e ultimo dianan.” (Isa. 2:2, 3) Bijbel a profetisa tambe cu e mundo aki lo bay di malo pa pio, y esey ta precies loke ta pasando. Y manera nos a considera caba, e campaña mundial di e trabou di predica cu ta tumando luga actualmente ta un cumplimento directo di e palabranan di Hesus.—Mat. 24:14.

²⁰ A traves di siglo, nos Creador a duna nos masha hopi prueba cu nos por confia den dje. Nos ta tuma su recordatorionan na pecho y actua na harmonia cu nan? Esey ta loke un ruman muher cu yama Rosellen a haci. El a bisa: “Ora mi a cuminsa pone tur mi confianza den Jehova, mi a cuminsa mira mas cla cu su man amoroso tabata sostene mi y duna mi forsa.” Laga nos tambe beneficia door di presta atencion na e recordatorionan di Jehova.