Creacion Ta Revela e Dios Bibo

“Bo ta digno, Jehova, nos Dios, di ricibi alabanza pa bo gloria, ... pasobra ta abo a crea tur cos.” —REV. 4:11.

CON LO BO CONTESTA?

Kico nos por haci pa proba hende cu evolucion y creacionismo ta siñansa falso?

Con creacion ta revela Dios su poder y sabiduria?

Con mayornan por yuda nan yiunan haya mas fe den Jehova?

1. Kico nos tin cu haci pa keda cu un fe firme?

 HOPI hende ta bisa cu nan ta kere solamente loke nan por mira. Con nos por yuda hende asina haya fe den Jehova, ya cu Bijbel ta bisa cu “ningun hende no a mira Dios nunca.” (Juan 1:18) Con nos por haci sigur cu nos mes ta keda cu un fe firme den “e Dios invisibel”, Jehova? (Col. 1:15) Di prome, nos tin cu haya sa cua doctrina ta sconde e berdad tocante Jehova. Di dos, nos tin cu haci bon uzo di Bijbel pa proba cu tal “rasonamento incorecto” ta stroba hende di haya “e conocemento di Dios.”—2 Cor. 10:4, 5.

2, 3. Menciona dos siñansa cu ta stroba hende di haya sa e berdad tocante Dios.

² Un siñansa falso cu ta stroba hende di siña e berdad tocante Dios ta e teoria di evolucion. E teoria aki ta hopi plama y ta contradeci loke tin skirbi den Bijbel. Ademas, e ta pone hende kere cu no tin ningun speransa pa un mihor futuro. Basicamente, e siñansa di evolucion ta bisa cu bida a cuminsa di su mes. Si esey ta berdad, nos lo no por splica e ora ey pakico nos ta na mundo.

³ Di otro banda, tin hende den cristiandad ta siña e doctrina cu universo, incluso nos planeta Tera y tur forma di bida riba dje, a aparece apenas un 10.000 aña pasa. E siñansa aki ta conoci como creacionismo. E hendenan cu ta kere den dje kisas tin masha respet pa Bijbel, pero nan ta pretende cu Dios a crea tur cos den 6 dia di 24 ora. Nan ta rechasa tur evidencia cientifico cu ta contradeci nan punto di bista. Esey ta pone cu ta dificil pa otro hende confia e Palabra di Dios pasobra e siñansa ey ta laga Bijbel parce irasonabel y incorecto. Esnan cu ta promove e siñansa di creacionismo ta pone nos corda riba algun hende di prome siglo cu tabatin “celo pa sirbi Dios, ma no segun conocemento exacto.” (Rom. 10:2) Con nos por uza e Palabra di Dios pa demostra cu e siñansanan fuertemente hancra di evolucion y creacionismo ta falso? * Nos por  haci esey solamente si nos haci nos best pa haya un conocemento exacto di loke Bijbel ta siña.

FE TA BASA RIBA EVIDENCIA Y RASONAMENTO LOGICO

4. Nos fe mester ta basa riba kico?

⁴ Bijbel ta siña nos pa busca y adkiri conocemento. (Prov. 18:15) Jehova kier pa nos fe den dje ta basa riba evidencia y rasonamento logico, no riba filosofia humano ni tradicion religioso. (Lesa Hebreonan 11:1.) Pa cultiva un fe firme den Dios, nos mester ta, na prome luga, convenci cu Jehova ta existi. (Lesa Hebreonan 11:6.) Y nos no ta kere ciegamente den esey, sino nos ta kere pasobra nos a analisa e echonan y a uza nos “capacidad di pensa.”—Rom. 12:1.

5. Menciona un motibo pakico nos por ta convenci cu Dios ta existi.

⁵ Apostel Pablo a duna un motibo pakico nos por ta convenci cu Jehova Dios ta existi maske nos no por mir’e. Pablo a skirbi: “Su cualidadnan invisibel, esta, su poder eterno y Divinidad, ta ser mira bon cla for di creacion di mundo padilanti, ya cu nan ta bisto den e cosnan traha.” (Rom. 1:20) Con bo por yuda un hende cu ta duda cu Dios ta existi mira cu e palabranan inspira cu Pablo a skirbi ta berdad? Bo por uza algun di e siguiente ehempelnan di creacion cu ta duna prueba di Dios su poder y sabiduria.

CREACION TA DUNA PRUEBA DI DIOS SU PODER

6, 7. Con Jehova ta revela su poder pa medio di dos cos cu ta proteha nos?

⁶ Nos ta mira prueba di Jehova su poder den dos cos cu ta proteha nos: tera su atmosfera y su campo magnetico. * Por ehempel, e capa di atmosfera no t’ey solamente pa percura aire pa nos hala rosea. E ta proteha nos tambe. Con? Wel, den espacio tin baranca grandi ta bula rond cu lo por causa hopi daño na nos planeta. Pero ora nan drenta e atmosfera di tera, mayoria di nan ta kima y ta crea rayonan di luz bunita y briyante den cielo di anochi, y nos ta bisa cu un strea a cay.

⁷ E campo magnetico di tera tambe ta proteha nos. E capa protector aki ta origina den e nucleo of centro di planeta Tera. E parti mas pafo di e nucleo ey ta consisti principalmente di hero gesmelt cu ta draai rond, y e ta crea un campo magnetico poderoso cu ta rondona Tera y ta extende hopi leu den espacio. E capa aki ta proteha nos contra di e radiacion di solo y di e erupcion- y explosionnan cu ta tuma luga den e parti mas pafo di e atmosfera di solo. Danki na tera su campo magnetico, e explosionnan aki di solo no ta caba cu tur bida riba tera. Mas bien, e campo magnetico ta absorba e radiacion perhudicial aki of mand’e bek den espacio. Y den naturaleza tin cosnan visibel cu ta duna nos prueba di e campo magnetico aki, entre otro, e fenomeno di luz colorido den cielo cerca di Noordpool y Zuidpool. No tin duda: Jehova su poder ta inmenso!—Lesa Isaias 40:26.

NATURALEZA TA REVELA DIOS SU SABIDURIA

8, 9. Con e ciclonan cu ta sostene bida ta revela Jehova su sabiduria?

⁸ Nos por mira e sabiduria di Jehova den e ciclonan natural riba tera cu ta sostene bida. Un ehempel: Imagina bo un stad cu tin miyones di habitante y cu ta rondona pa un muraya. No tin manera pa trece awa dushi den e stad ni pa deshaci di sushi. E stad ey den poco tempo lo yena cu asina tanto sushi cu lo ta imposibel pa keda biba aden. Den cierto sentido, planeta Tera ta mescos cu e stad ey: E tin un cantidad limita di awa dushi, y no ta facil pa saca sushi hiba den espacio. Pero toch e tera tin e capacidad pa sostene  miles di miyones di criatura, generacion tras di generacion. Con esey ta posibel? Debi na e manera asombroso cu Tera ta recicla of bolbe uza tur e elementonan cu ta esencial pa bida.

⁹ Laga nos considera e ciclo di oxigeno. Miles di miyones di hende y bestia ta hala oxigeno aden y ta saca kooldioxide afo. A pesar cu esaki ta sosode henter dia, toch oxigeno no ta caba y nos no ta stik pa motibo di demasiado “desperdicio” di kooldioxide den atmosfera. Dicon? Nos ta haya e contesta den e proceso maraviyoso yama fotosintesis: Mata ta absorba kooldioxide, awa, luz di solo y substancianan nutritivo pa produci carbohidrato y oxigeno. Ora nos ta hala oxigeno aden y saca kooldioxide afo, nos ta completa e ciclo. Jehova literalmente ta uza mata cu el a crea pa ‘duna tur hende bida y rosea.’ (Echo. 17:25) Esta un sabiduria asombroso!

10, 11. Con e barbulet monarca y spirito di cabrito ta revela Jehova su sabiduria extraordinario?

¹⁰ Un otro cos cu ta revela Jehova su sabiduria extraordinario ta e cantidad grandi di criatura cu el a diseña pa biba riba nos planeta remarcabel. Cientificonan ta calcula cu tin entre 2 pa 100 miyon sorto di bida riba tera. (Lesa Salmo 104:24.) Tuma nota di e sabiduria cu ta bisto den e diseño di djis algun di e criaturanan aki.

¹¹ Por ehempel, e barbulet monarca tin un celebro tamaño di un cabes di feneta. Pero maske su celebro ta asina chikito, toch e tin e capacidad pa bula un distancia di casi 3.000 kilometer for di Canada te na un cierto mondi na Mexico, y e ta uza solo pa yud’e orienta. Pero dicon e por haci esey siendo cu solo no ta keda para un caminda den cielo? Jehova a diseña e celebro chikito ey di tal manera cu e por reahusta su rumbo di acuerdo cu e movemento di solo. Un otro ehempel ta e wowo di spirito di cabrito. Cada wowo ta consisti di mas o menos 30.000 lens. Pero asina mes, e celebro chikito di spirito di cabrito por capta e señalnan di tur e lensnan ey y detecta e movecion di mas chikito cu ta tuma luga rond di dje.

12, 13. Kico ta impresiona bo di e manera cu Jehova a diseña e celnan di nos curpa?

¹² E manera cu Jehova a diseña e celnan di tur loke tin bida ta hasta mas impresionante ainda. Por ehempel, bo curpa ta consisti di 100 biyon (100.000.000.000.000) cel. Den cada un di e celnan ey tin un parti chikito cu parce un cabuya, conoci como DNA (acido desoxiribonucleico). E ta contene mayoria di e informacion necesario pa traha henter bo curpa.

¹³ Cuanto informacion DNA ta contene? Laga nos compara un gram di DNA cu un disco compacto (CD). Un CD por contene tur e informacion cu tin den un diccionario. Esey ta un cos impresionante si tuma na cuenta cu un CD ta djis un disco chikito plat di plastic. Pero un gram di DNA ta  contene mes tanto informacion cu 1 biyon (1.000.000.000.000) CD. Un otro manera pa splica esaki ta cu un telep di DNA por contene e informacion necesario pa traha 2,5 biyon hende (2.500.000.000.000).

14. Ora bo mira loke cientificonan a descubri, kico bo ta sinti pa Jehova?

¹⁴ Segun Rey David, ta comosifuera Jehova a skirbi den un buki tur e informacion necesario pa crea e curpa humano. David a bisa: “Bo wowo a mira hasta mi embryo, y den bo buki tur su partinan a ser skirbi, encuanto e dianan ora cu nan a ser forma y ainda no tabatin ningun di nan.” (Sal. 139:16, NW) Nos por compronde dicon David kier a alaba Jehova ora el a pensa riba e manera cu su propio curpa a ser crea. E cosnan cu cientificonan a descubri e ultimo añanan aki a pone nos sinti mas admiracion pa e manera asina asombroso cu Jehova a traha nos. E descubrimentonan aki ta duna nos mas motibo ainda pa bay eens cu loke David a bisa tocante Jehova: “Mi ta alaba bo, pasobra mi ta traha na un manera temerosamente maraviyoso; maraviyoso ta bo obranan, y mi alma sa esey masha bon.” (Sal. 139:14) Ta bisto cu creacion ta duna prueba palpabel cu ta existi un Dios bibo. Con por ta posibel cu hende no ta mira e pruebanan ey?

YUDA OTRO HENDE DUNA GLORIA NA E DIOS BIBO

15, 16. (a) Con nos publicacionnan ta yuda hende haya mas aprecio pa e creacion di Jehova? (b) Menciona un parti di e foyeto Bida Ta Obra di un Kreador? cu a impresiona bo.

¹⁵ Pa hopi aña caba, e revista ¡Despertad! ta yudando miyones di hende siña loke creacion ta revela tocante e Dios bibo. Por ehempel, na aña 2006, e edicion di september tabatin como titulo “Ta Existi un Creador?” E edicion ey tabata completamente dedica na habri wowo di hende ciega pa e siñansanan di evolucion y creacionismo. Un ruman muher na Merca a skirbi tocante e edicion special ey: “E campaña pa ofrece e edicion special aki a bay masha bon mes. Un señora a pidi 20 revista. E ta docente di biologia y tabata kier pa cada un di su alumnonan haya nan mes revista.” Un ruman homber a skirbi: “Mi ta activo den sirbishi di veld for di final di decada di 1940 y mi tin casi 75 aña. Pero nunca prome mi no a gosa asina tanto di sirbishi manera e luna aki cu nos a ofrece e edicion special di ¡Despertad!”

¹⁶ For di aña 2008, mayoria di edicion di ¡Despertad! tin un articulo di e serie titula “Casualidad of Diseño?” E articulonan cortico aki ta destaca con asombroso creacion ta y ta mustra maneranan cu hende a purba di copia e cosnan increibel cu nos Creador a diseña. Na 2010, nos a haya tambe e foyeto Bida Ta Obra di un Kreador? E bunita diagram- y plachinan den e foyeto ey ta diseña pa yuda nos haya mas aprecio pa Jehova su creacion. E preguntanan na final di cada seccion ta pa yuda e lector pensa riba e informacion cu el a caba di lesa. Bo tabatin oportunidad di uza e foyeto aki den e trabou di predica di cas pa cas, riba caya of informalmente?

17, 18. (a) Ki responsabilidad mayornan tin? (b) Con abo a uza e foyetonan tocante creacion den bo adoracion como famia?

¹⁷ Mayornan, boso a considera e foyeto colorido aki cu boso yiunan como parti di boso adoracion como famia? Esey lo por yuda nan haya mas fe den Jehova y mas aprecio p’e. Talbes bo tin yiu teenager cu ta bay scol secundario; y hopi biaha hende cu ta siña e siñansa falso di evolucion ta gusta pone presion riba nan. Cientificonan, maestronan di scol, documentalnan tocante naturaleza y hasta mundo di entretenimento—via programa di television y pelicula—kier laga hobennan kere cu evolucion ta un echo comproba, mientras cu esey no ta e caso. Bo por yuda bo yiunan teenager defende e berdad uzando e foyeto Cinco Pregunta Importante Tocante Origen di Bida, cu tambe a keda publica na  2010. E foyeto aki, mescos cu esun Bida Ta Obra di un Kreador?, ta yuda hobennan desaroya nan “capacidad di pensa.” (Rom. 12:1) E foyeto Origen di Bida no ta disponibel na Papiamento, pero na Hulandes of Spaño si. Lo ta bon pa bo haci bo best pa familiarisa bo mes cu nan, ya asina bo por yuda bo yiunan refuta e siñansa falso di evolucion. E dos foyetonan aki ta siña nan con pa determina si loke nan ta siña na scol ta basa riba logica of no. *

¹⁸ Tin biaha ta sali den noticia informenan sensacional cu ta bisa cu cientificonan a descubri fosil cu supuestamente ta proba cu evolucion ta un echo real. Of nos ta tende di cierto experimentonan cientifico cu a logra crea bida den laboratorio. E foyeto Origen di Bida ta skirbi di tal manera cu e por yuda muchanan di scol dicidi pa nan mes si e informenan aki ta berdad. Mayornan, uza e foyetonan aki pa yuda boso yiunan haya mas confianza ora nan ta splica dicon nan ta kere den un Creador.—Lesa 1 Pedro 3:15.

19. Ki privilegio nos tur tin?

¹⁹ Den e publicacionnan cu nos ta haya for di e organisacion di Jehova tin informacion bon documenta cu ta siña nos hopi cos tocante Su bunita cualidadnan cu ta bisto den e mundo rond di nos. Tur e evidencianan aki ta motiva nos pa alaba Jehova di curason. (Sal. 19:1, 2) Nos tin e gran privilegio di duna Jehova, e Creador di tur cos, e honor y gloria cu tanto e ta merece!—1 Tim. 1:17.

[Nota]

[Preguntanan di Estudio]

[Plachi na pagina 9]

Dios su sabiduria ta bisto den e diseño di e wowo di spirito di cabrito, manera e detaye amplia ta mustra (Wak paragraf 11)

[Reconocemento]

Detaye amplia: Boris Krylov, www.macro-photo.org

[Plachinan na pagina 11]

Mayornan, prepara boso yiunan pa defende nan fe (Wak paragraf 17)