Bo Por Haci Mas pa Spierta Otro Hende?

Un pelicula fascinante, sin zonido, cu tabatin e titulo A Trip Down Market Street, a duna e hendenan cu a mir’e un idea con e bida di tur dia tabata na San Francisco, Merca, na cuminsamento di siglo 20. E productornan a instala un camara cu nan tabata draai na man parti dilanti di un tram cu tabata move, pa asina capta e imagennan di loke tabata tuma luga den un caya druk. E escenanan a inclui wagon cu cabay tabata lastra, e prome modelonan di auto, y tambe hende cu tabata haci compras y mucha homber cu tabata bende corant.

Loke a duna e pelicula aki un toke tragico ta cu probablemente nan a film’e na april di 1906, un poco prome cu un temblor y candela devastador, cu a tuma luga dia 18 di april, a cobra bida di miles di hende y destrui e parti ey di e stad casi completamente. Algun di e caranan bibito den e pelicula lo tabatin solamente un par di dia mas di bida. Scott Miles, descendiente di un di e productornan di e pelicula, a bisa: “Mira e hendenan ey. Nan no sa mes kico ta bay pasa nan. Bo ta haya duele di nan.”

Nos ta mira un paralelo cu nos tempo. Nos tambe ta haya duele di nos prohimo. Nan ta sigui cu nan actividadnan di tur dia sin tene cuenta cu e calamidad cu ta djis dilanti porta, esta, destruccion di e sistema di cosnan aki y di bida humano. Sinembargo, na contraste cu un temblor cu ta bin sin previo aviso, ainda nos tin un oportunidad pa spierta nos prohimo tocante Jehova su dia di huicio. Casi sigur bo ta dedicando tempo caba tur siman pa sali den sirbishi di cas pa cas, pero bo por haci mas pa spierta otro hende?

SEMPER HESUS TABATA CLA PA DUNA TESTIMONIO

Hesus ta un ehempel notabel pasobra semper e tabata cla pa duna testimonio. El a papia cu tur hende cu el a topa, sea ta un cobrado di belasting cu el a pasa na caminda of un hende muher cu el a topa na un pos durante pausa di merdia. (Luc. 19:1-5; Juan 4:5-10, 21-24) Hasta ora el a aparta poco tempo pa sosega su curpa, el a laga loke e tabata bay haci para pa e por a siña hende. Su compasion pa otro hende a motiv’e pa haci tur loke e tabata por. (Mar. 6:30-34) Con algun di nos rumannan ta imita Hesus su sentido di urgencia awe?

NAN TA PROBECHA DI TUR OPORTUNIDAD

Melika ta biba den un compleho di apartamento di alta siguridad. Hopi di su bisiñanan ta studiante cu a bin di otro pais y kende nan nomber no ta  aparece riba e lista di habitante di e compleho. Y e telefonnan celular cu nan ta uza no ta registra riba nan nomber tampoco. Melika ta probecha di e oportunidad special cu e tin pa cuminsa combersacionnan riba temanan di Bijbel cu nan den lobby of den lift. E ta bisa: “Mi ta mira esey como mi teritorio.” Melika ta cana cu literatura den varios idioma, y hopi di e studiantenan ta acepta tratado y revista. Tambe e ta dirigi nan atencion na nos website jw.org. Di e forma ey el a cuminsa varios estudio di Bijbel.

Sonia tambe ta alerta pa duna testimonio na ken cu e topa. E ta traha na un centro medico, y el a pone meta pa duna un testimonio cabal na cada un di su coleganan di trabou. Na principio el a tuma tempo pa haya sa kico ta e necesidad- y interesnan di cada un. Despues el a uza su pausa di merdia pa purba combersa cu cada un di nan tocante Bijbel. Como resultado, Sonia por a cuminsa dos estudio di Bijbel. Tambe e ta planeando pa tuma algun di su pausanan den e lobby di e centro medico pa papia cu e hendenan cu ta warda riba nan turno.

PROBECHA DI TUR OPORTUNIDAD

Un di e sobrevivientenan di e temblor di 1906 a yam’e “e desaster di mas teribel cu a yega di pasa cu un estado of stad.” Pero e tipo di desasternan aki no ta nada na comparacion cu e dia di venganza cu lo bin pronto riba “esnan cu no conoce Dios.” (2 Tes. 1:8) Jehova ta anhela pa hende cambia y reacciona na un manera positivo riba e spiertamento cu su Testigonan ta dunando.—2 Ped. 3:9; Rev. 14:6, 7.

Bo tin e privilegio di habri wowo di hende pa nan mira den ki tempo nos ta bibando y yuda nan stop di sigui nan interesnan egoista, y yuda nan busca Jehova. (Sof. 2:2, 3) Abo por probecha di tur oportunidad pa duna testimonio na bo coleganan di trabou, na bo bisiñanan y na esnan cu bo ta topa ora bo ta atende bo asuntonan di tur dia? Bo por haci mas esfuerso pa spierta otro hende?

[Plachi na pagina 31]

Sin ningun previo aviso, e temblor di 1906 y e candela cu a surgi despues a destrui gran parti di e centro di ciudad di San Francisco

[Reconocemiento 31]

U.S. National Archives photo

[Plachi na pagina 32]

Abo por probecha di tur oportunidad pa duna testimonio ora bo ta atende bo asuntonan di tur dia?