Biba na Harmonia cu e Oracion di Hesus

“Tata, ... glorifica bo yiu, pa bo yiu por glorifica bo.”—JUAN 17:1.

KICO BO TA PENSA?

Kico realmente “conoce” Dios ta encera?

Con Jehova a contesta e oracion di Hesus den e prome siglo?

Con nos por biba na harmonia cu e oracion di Hesus?

1, 2. Kico Hesus a haci despues cu el a celebra e Pasco Hudiu cu su fiel apostelnan na aña 33?

 TABATA anochi laat, dia 14 di nisan di aña 33, y Hesus a caba di celebra e Pasco Hudiu hunto cu su amigonan di mas intimo. E celebracion ey a conmemora e manera cu Dios a libra nan antepasadonan for di Egipto. Pero e fiel discipelnan di Hesus lo a experencia un liberacion mucho mas grandi, un “liberacion eterno.” E siguiente dia (pero ainda 14 di nisan pa e Hudiunan), Hesus lo a ser mata pa su enemigonan. Pero e atrocidad aki lo a ser transforma den un bendicion, pasobra e sanger perfecto cu Hesus a drama lo a percura e base pa humanidad ser libra for di pica y morto.—Heb. 9:12-14.

² Pa haci sigur cu nos no ta lubida e regalo amoroso aki, Hesus a cuminsa un conmemoracion anual nobo cu a reemplasa e Pasco Hudiu. El a coge un pida pan sin zuurdeeg, kibr’e, pas’e pa cada un di su 11 apostelnan fiel y a bisa nan: “Esaki ta representa mi curpa cu lo mi duna pa boso. Sigui haci esaki na mi memoria.” Asina tambe el a coge un copa di biña cora y a bisa nan: “E copa aki ta representa e pacto nobo a base di mi sanger cu lo mi drama pa boso.”—Luc. 22:19, 20.

3. (a) Ki cambio grandi a tuma luga despues di Hesus su morto? (b) Ki pregunta nos por haci nos mes ora nos ta analisa e oracion di Hesus cu tin na Juan capitulo 17?

³ Pronto lo a yega un fin na e pacto di Ley cu tabatin entre Dios y e nacion di Israel. Na su luga lo a bin un pacto nobo entre Jehova y Hesus su siguidornan ungi. Hesus no tabata kier pa su siguidornan bira manera e nacion di Israel. E Israelitanan tabata hopi dividi, tanto riba tereno religioso como social, y  esey a trece reproche riba e nomber di Dios. (Juan 7:45-49; Echo. 23:6-9) Na contraste, Hesus tabata kier pa su siguidornan traha den union cu otro di manera cu nan lo a trece gloria pa e nomber di Dios. Pues, kico Hesus a haci? El a pidi su Tata yudansa den e oracion di mas bunita cu un hende lo por tin e honor di lesa. (Juan 17:1-26; wak e prome plachi.) Segun cu nos ta analisa e oracion ey, nos por puntra nos mes: ‘Dios a contesta Hesus su oracion? Ami ta biba na harmonia cu e oracion ey?’

LOKE TABATA MAS IMPORTANTE PA HESUS

4, 5. (a) Kico nos ta siña for di e prome parti di e oracion di Hesus? (b) Con Jehova a contesta e peticion cu Hesus a haci pa su mes?

⁴ Hesus a keda papia te laat cu su discipelnan y a siña nan hopi cos maraviyoso tocante Dios. Ora el a caba, el a hisa su cara na cielo y a bisa: “Tata, e ora a yega; glorifica bo yiu, pa bo yiu por glorifica bo, pa asina, mescos cu bo a dun’e autoridad riba tur hende, e por duna tur esnan cu bo a dun’e bida eterno ... Mi a glorifica bo riba tera y a caba cu e trabou cu bo a duna mi pa haci. Pues awor, Tata, duna mi gloria banda di bo, e mesun gloria cu mi tabatin banda di bo prome cu mundo a existi.”—Juan 17:1-5.

⁵ Tuma nota cu Hesus a cuminsa su oracion mencionando e cosnan cu tabata mas importante p’e. Na prome luga, el a pidi pa su Tata celestial ser glorifica, y esaki ta cuadra cu e prome peticion di su oracion modelo: “Tata, laga bo nomber sea santifica.” (Luc. 11:2) Na di dos luga, el a haci oracion pa su discipelnan; el a pidi Dios dun’e e autoridad p’e ‘por duna nan bida eterno.’ Finalmente, Hesus a pidi algo pa su mes, bisando: “Tata, duna mi gloria banda di bo, e mesun gloria cu mi tabatin banda di bo prome cu mundo a existi.” Jehova a scucha e oracion di su Yiu fiel y a recompens’e cu hasta mas di loke el a pidi. Dios a dun’e “un nomber cu ta mas excelente” cu esun di e angelnan.—Heb. 1:4.

‘SIÑA CONOCE E UNICO DIOS BERDADERO’

6. Kico e apostelnan mester a haci pa nan haya bida eterno, y con nos por sa cu nan a logra haci esaki?

⁶ Hesus a menciona tambe den su oracion kico nos como pecador tin cu haci pa nos haya e regalo inmereci di bida eterno. (Lesa Juan 17:3.) El a bisa cu nos tin cu ‘siña conoce’ Dios y Cristo. Con nos por haci esey? Un manera ta door di haci nos best pa siña tur loke nos por tocante Jehova y su Yiu. Pero esey so no ta basta. Tambe nos mester practica loke nos ta siña y asina experencia e goso cu esaki ta duna. E apostelnan ya a haci e dos cosnan aki cu ta hiba na bida, pasobra Hesus a sigui bisa den oracion: “Mi a duna nan e palabranan cu bo a duna mi, y nan a acepta nan.” (Juan 17:8) Pero pa nan haya bida eterno, nan mester a sigui medita riba e palabranan di Dios y pone nan na practica den nan bida di tur dia. Acaso e apostelnan a keda haci esaki pa resto di nan bida riba tera? Definitivamente cu si. Nos sa esey pasobra e nomber di nan tur ta skirbi pa semper riba e 12 piedranan di fundeshi di e Jerusalem Nobo cu ta den cielo.—Rev. 21:14.

7. Kico “conoce” Dios ta nifica, y dicon esey ta asina importante?

⁷ Segun expertonan di idioma Griego, por traduci e expresion “siña conoce” tambe cu “mester sigui conoce.” E dos ideanan tin casi e mesun nificacion y ta referi na un proceso continuo cu ta necesario pa yega na e resultado desea, esta,  e privilegio di “conoce” Dios. Pero pa un hende por conoce e Persona di mas importante den universo, esey ta nifica mas cu solamente sa kico ta Dios su proposito y cualidadnan. Conoce Jehova ta encera cu nos ta stima Jehova profundamente y tin un bon relacion cu ne y cu nos rumannan. Bijbel ta splica cu “ken cu no ta stima no a siña conoce Dios.” (1 Juan 4:8) Conoce Dios ta encera tambe cu nos ta obedec’e. (Lesa 1 Juan 2:3-5.) Esta un gran privilegio di por ta entre esnan cu conoce Jehova! Pero nos tin cu tene cuidou pa nos no perde e amistad precioso ey, manera a pasa cu Judas Iscariot. Pesey laga nos traha duro pa fortalece nos amistad cu Jehova. Si nos haci esey, cu tempo nos lo por haya e regalo inmereci di bida eterno.—Mat. 24:13.

“PA MOTIBO DI BO NOMBER”

8, 9. Kico tabata e cos di mas importante pa Hesus ora e tabata riba tera, y cua tradicion siguramente el a rechasa?

⁸ Despues di lesa e oracion di Hesus na Juan capitulo 17, nos ta mira claramente cu Hesus tabatin un amor profundo pa su apostelnan, cu tabata eynan hunto cu ne, pero tambe pa su futuro discipelnan. (Juan 17:20) Pero nos tin cu compronde cu nos salbacion no ta e cos di mas importante pa Hesus. For di principio te na final di su sirbishi riba tera, su proposito principal tabata pa santifica y glorifica e nomber di su Tata. Por ehempel, ora cu e tabata den e sinagoga di Nazaret y a splica kico tabata su encargo, el a lesa for di e rol di Isaias: “E spirito di Jehova ta riba mi, pasobra el a ungi mi pa declara bon noticia na hende pober.” Nos por tin sigur cu ora Hesus a lesa esey, el a pronuncia e nomber di Dios bon cla.—Luc. 4:16-21.

⁹ Hopi prome cu Hesus a bin na mundo, lidernan religioso hudiu tabata siña e hendenan pa no uza e nomber di Dios. Nos por tin sigur cu Hesus a rechasa e tradicion ey categoricamente. El a bisa su opositornan: “Mi a bin den nomber di mi Tata, ma boso no ta acepta mi; si un otro hende a bin den su mes nomber, e ora  ey si boso lo a acept’e.” (Juan 5:43) Anto un par di dia prome cu su morto, Hesus a bolbe indica kico tabata e cos di mas importante den su bida ora el a pidi den oracion: “Tata, glorifica bo nomber.” (Juan 12:28) Pues, no ta straña nos cu den e oracion cu nos ta analisando awor tambe ta bisto cu e cos di mas importante den e bida di Hesus tabata pa e duna gloria na e nomber di su Tata.

10, 11. (a) Con Hesus a haci e nomber di su Tata conoci? (b) Dicon e discipelnan di Hesus ta haci e nomber di Jehova conoci?

¹⁰ Hesus a pidi den oracion: “Mi a haci bo nomber conoci na e hendenan cu tabata den mundo y cu bo a duna mi. Nan tabata di bo, y bo a duna mi nan, y nan a cumpli cu bo palabra. Ademas, mi ta bin cerca bo y no ta keda den mundo mas; ma nan si ta keda den mundo. Tata Santo, proteha nan pa motibo di bo nomber cu bo a duna mi, pa nan por ta un mescos cu nos ta un.”—Juan 17:6, 11.

¹¹ Ora Hesus a haci e nomber di su Tata “conoci” na su discipelnan, el a haci mas cu djis pronuncia e nomber ey. Hesus a yuda nan compronde ken Jehova ta. El a siña nan tocante Dios su cualidadnan maraviyoso y e manera amoroso cu e ta trata nos. (Exo. 34:5-7) Y awor cu e ta Rey den cielo, e ta sigui yuda su discipelnan haci e nomber di Jehova conoci rond mundo. Cu ki meta? Pa yuda mas hende siña conoce Jehova prome cu fin di e sistema malbado aki. Y ora e fin yega, Jehova lo libra su testigonan leal y tur hende lo conoce su gran nomber!—Eze. 36:23.

“PA ASINA MUNDO POR KERE”

12. Kico ta e tres cosnan cu ta necesario pa nos por logra haci e trabou cu ta salba bida?

¹² Tempo Hesus tabata riba tera, el a traha duro pa yuda su discipelnan vence nan debilidadnan. Esaki tabata esencial pa nan por a caba cu e trabou cu Hesus a cuminsa. El a bisa den oracion: “Mescos cu bo a manda mi den mundo, ami tambe a manda nan den mundo.” Pero Hesus a enfatisa tres cos cu ta sumamente necesario pa nan por a logra haci e trabou aki cu ta salba bida. Di prome, el a pidi pa su discipelnan no ta parti di e mundo impuro di Satanas. Di dos, el a pidi pa nan por obedece e berdad cu tin den e Palabra di Dios y asina ser santifica, es decir, keda limpi. Di tres, Hesus a suplica varios biaha pa e mesun laso di amor cu tin entre e cu su Tata por existi entre su discipelnan y yuda nan keda uni. En bista di esaki, cada un di nos mester puntra nos mes: ‘Ami ta biba na harmonia cu e tres cosnan aki cu Hesus a menciona den su oracion?’ Hesus tabatin e confianza cu si su discipelnan a haci e cosnan ey, hopi hende lo a acepta nan mensahe.—Lesa Juan 17:15-21.

13. Con Jehova a contesta e oracion di Hesus den e prome siglo?

¹³ Ora nos studia e buki di Echonan, cu ta bin despues di e cuater Evangelionan, nos por mira cu Jehova a contesta e oracion di Hesus. E congregacionnan den e prome siglo tabata consisti di Hudiu y hende no Hudiu, rico y pober, catibo y shon. Pues, tabatin hopi chens cu lo a surgi desunion. Pero e cristiannan tabata asina uni cu apostel Pablo a compara nan cu diferente parti di un curpa humano cu tabatin Hesus como nan cabes. (Efe. 4:15, 16) E tipo di union ey meymey di e mundo dividi di Satanas tabata un logro milagroso! Esaki tabata posibel solamente cu yudansa di Jehova su poderoso spirito santo.—1 Cor. 3:5-7.

14. Con Jehova a contesta e oracion di Hesus den nos tempo?

¹⁴ Lamentablemente, e union milagroso aki a disparce despues di morto di e  apostelnan. Manera a ser profetisa, a surgi un gran apostasia cu a hiba na e sectanan dividi di cristiandad. (Echo. 20:29, 30) Pero na aña 1919, Hesus a libra su siguidornan ungi for di e gara di religion falso y a trece nan hunto den “e laso perfecto di union.” (Col. 3:14) Ki efecto nan predicacion uni tabatin riba e resto di mundo? Mas cu shete miyon “otro carne” for di “tur nacion, tribu, pueblo y idioma” ta join e unginan di Dios den un solo tou uni. (Juan 10:16; Rev. 7:9) Esta un contesta espectacular di e oracion di Hesus! El a pidi Jehova: “Pa asina mundo por sa cu ta abo a manda mi y cu bo ta stima nan mescos cu bo ta stima mi.”—Juan 17:23.

UN CONCLUSION CONMOVEDOR

15. Ki peticion special Hesus a haci pa su discipelnan ungi?

¹⁵ Mas prome riba e anochi di 14 di nisan, Hesus a duna “gloria”, of honor, na su apostelnan ora cu el a cera un pacto cu nan pa nan goberna hunto cu ne den su Reino. (Luc. 22:28-30; Juan 17:22) Pues awor Hesus a pidi lo siguiente den oracion pa tur cu lo a bira su siguidor ungi: “Tata, mi kier pa esnan cu bo a duna mi tambe por ta caminda mi ta, pa nan por mira e gloria cu bo a duna mi, pasobra bo a stima mi prome cu a funda mundo.” (Juan 17:24) En bes di bira jaloers, e otro carnenan di Hesus ta keda masha contento pa nan compañeronan ungi, y esey ta un prueba mas di e union cu tin entre tur cristian berdadero awe.

16, 17. (a) Kico Hesus a bisa na final di su oracion cu lo e sigui haci? (b) Kico nos mester sigui haci?

¹⁶ Mayoria di hende na mundo, bou di influencia di nan lidernan religioso, ta scoge pa no haci caso di e evidencia cla cu Jehova tin un pueblo cu ta uni y cu realmente conoc’e. Den tempo di Hesus tambe esaki a sosode. Pesey el a conclui su oracion cu e palabranan conmovedor aki: “Tata husto, en berdad mundo no conoce bo; ma ami si conoce bo, y esakinan sa cu ta abo a manda mi. Y mi a haci bo nomber conoci na nan y lo mi sigui hacie conoci, pa nan por demostra e amor cu bo a stima mi cu ne y pa mi por ta den union cu nan.”—Juan 17:25, 26.

¹⁷ Ta ken por nenga cu Hesus a biba na harmonia cu su oracion? Como Cabes di e congregacion, e ta sigui yuda nos haci e nomber y proposito di su Tata conoci. Laga nos sigui somete nos mes na su autoridad door di obedece cu celo e mandamento cu el a duna pa predica y haci discipel. (Mat. 28:19, 20; Echo. 10:42) Ademas, laga nos sigui haci esfuerso pa keda un pueblo uni. Di e manera ey nos lo ta bibando na harmonia cu e oracion di Hesus, y esey lo resulta den gloria pa e nomber di Jehova y den nos felicidad eterno.

[Preguntanan di Estudio]

[Plachi na pagina 28]

Cristiannan di prome siglo a colabora cu spirito santo pa keda uni cu otro (Wak paragraf 13)

[Plachi na pagina 30]

Rond mundo, e pueblo di Jehova ta uni (Wak paragraf 14)