“Sirbi Manera Esclavo pa Jehova”

“Sea ferviente y no floho ... Sirbi manera esclavo pa Jehova.”—ROM. 12:11.

KICO BO TA PENSA?

Kico e sclavitud menciona na Romanonan 12:11 ta encera?

Kico nos mester haci pa nos no bira esclavo di Satanas y di su mundo?

Con Jehova ta recompensa su esclavonan?

1. Splica e contraste entre e manera cu mayoria di hende ta mira sclavitud y e sclavitud cu Romanonan 12:11 ta menciona.

 PA MAYORIA di hende, un esclavo ta un persona cu ta ser domina cruelmente, controla y maltrata pa su shon of doño. Pero ser un esclavo di Dios ta hopi diferente. E Palabra di Dios ta bisa cu un cristian por scoge boluntariamente pa sirbi como esclavo di un Doño amoroso. Ora apostel Pablo a conseha e cristiannan di prome siglo pa “sirbi manera esclavo pa Jehova”, e tabata animando nan pa sirbi Dios pasobra nan ta stim’e. (Rom. 12:11) Kico e tipo di sclavitud aki ta encera? Kico nos mester haci pa nos no bira esclavo di Satanas y di su mundo? Y kico ta e recompensa- of beneficionan di sirbi Jehova fielmente manera esclavo?

‘MI TA STIMA MI SHON’

2. (a) Kico lo a motiva un esclavo Israelita pa renuncia su libertad? (b) Kico un esclavo a demostra ora el a laga su shon bora su horea?

² E Ley cu Dios a duna Israel ta yuda nos compronde ki sorto di esclavo nos mester ta. Normalmente un esclavo Hebreo tabata haya su libertad despues di seis aña di sclavitud. (Exo. 21:2) Pero pa e esclavo cu di berdad tabata stima su shon y kier a keda sirbie, Jehova a inclui un excepcion den Ley cu a haci esey posibel. E shon mester a pone e catibo para na un porta of kozijn y bora su horea cu prim, un obheto skerpi. (Exo. 21:5, 6) Dicon mester a bora net su horea? Pasobra na Hebreo, nan a expresa e idea di obediencia cu un palabra cu ta nifica scucha y tende. Pues, ora e esclavo a laga bora su horea, el a demostra cu e kier a sigui sirbi su shon obedientemente. Esey ta mescos cu nos dedicacion na Dios. Ora nos haci esey, nos ta bisando cu nos ta dispuesto pa obedece Jehova pasobra nos ta stim’e.

3. Dicon nos a dedica nos mes na Dios?

³ Prome cu nos bautismo, nos a tuma e decision cu nos lo sirbi Jehova, si, cu nos lo ta su esclavo. Ora nos  a haci nos dedicacion na Jehova, nos a primintie cu nos lo obedec’e y haci su boluntad. Ningun hende no a obliga nos tuma e decision ey. Hasta ora hobennan ta bay batisa, nan ta haci esey pasobra nan a haci un dedicacion personal na Jehova y no djis pa nan haci nan mayornan contento. Pues, e motibo pakico nos como cristian a dedica nos mes na nos Doño celestial, Jehova, ta pasobra nos ta stim’e. Apostel Juan a skirbi: “Amor pa Dios ta nifica cu nos ta cumpli cu su mandamentonan.”—1 Juan 5:3.

LIBER PERO TOCH ESCLAVO

4. Kico nos tin cu haci pa nos bira “esclavo di husticia”?

⁴ Nos ta hopi agradecido na Jehova cu nos por ta su esclavo. Nos fe den e sacrificio di rescate di Cristo a libra nos di sclavitud na pica. Ainda nos ta imperfecto, pero nos a scoge pa obedece Jehova y Hesus como nos Doñonan. Pablo a splica esaki bon cla den un di su cartanan inspira: “Considera cu boso realmente ta morto pa loke ta pica, ma bibo pa Dios pa medio di Cristo Hesus.” Despues el a duna e spiertamento aki: “Boso no sa cu si boso sigui presenta boso mes na un hende como esclavo obediente, boso ta esclavo di esun cu boso ta obedece? Pesey, boso ta sea esclavo di pica cu ta hiba na morto of esclavo di obediencia cu ta hiba na husticia. Ma mi ta gradici Dios cu boso, cu un tempo tabata esclavo di pica, awor a bira obediente di curason na e patronchi di siñansa cu tabata confia na boso. Si, como cu boso a keda libra di pica, boso a bira esclavo di husticia.” (Rom. 6:11, 16-18) Tuma nota cu apostel Pablo a bisa cu nos mester ta “obediente di curason.” Pues, ora nos a dedica nos mes na Jehova, nos a bira “esclavo di husticia.”

5. Contra kico nos tur tin cu lucha, y dicon?

⁵ Pero pa nos cumpli cu nos dedicacion na Dios, nos tin cu supera varios obstaculo. Nos tin cu lucha contra dos cos. Di prome, nos tin e mesun lucha cu Pablo tabatin. El a skirbi: “Realmente, mi tin placer den e ley di Dios segun e hende cu mi ta di paden, pero mi ta mira den mi curpa un otro ley cu ta bringa contra e ley di mi mente. Y e ley di pica aki tin mi preso.” (Rom. 7:22, 23) Como cu nos tambe a hereda imperfeccion, nos tin un lucha diario contra nos mal inclinacionnan. Apostel Pedro a urgi nos: “Sea manera hende liber, pero no uza boso libertad como capa pa haci malo, sino uz’e como esclavo di Dios.”—1 Ped. 2:16.

6, 7. Con Satanas ta laga e mundo parce masha atractivo?

⁶ E di dos cos cu nos tin cu lucha contra dje ta e mundo aki cu ta bou di influencia di demoño. Satanas ta e gobernante di mundo, y e ta uza tur arma cu e tin na su disposicion pa purba di kibra nos lealtad na Jehova y na Hesus. E kier pa nos bira su catibo y pa logra esey e ta purba di pone nos cay den tentacion pa nos bira parti di mundo. (Lesa Efesionan 6:11, 12.) Un manera cu e ta haci esey ta door di laga e mundo parce masha atractivo, si, algo cu nos lo kier ta parti di dje. Pero apostel Juan a spierta: “Si un hende ta stima mundo, e no tin amor pa e Tata; pasobra tur loke tin den mundo—deseo di carni, deseo di wowo y cana broma cu loke bo tin—no ta bin di e Tata, sino di mundo.”—1 Juan 2:15, 16.

⁷ Den mundo ta reina e deseo pa prosperidad material; tur hende kier mas y mas cos material. Satanas ta laga nan kere cu placa ta e clave pa felicidad. Tur caminda nan ta traha megastore. Propaganda kier laga nos kere cu e mihor cos ta pa hiba un bida yen di luho y placer. Agencianan di biahe ta ofrece excursion pa luganan exotico, hopi biaha den compania di hende cu no tin e mesun principionan cu nos. Unda cu nos bira, e mesun mensahe ta resona: percura pa bo bay dilanti. Si,  bay dilanti, pero for di e punto di bista di mundo.

8, 9. Kico lo por pasa cu nos, y dicon esey ta asina peligroso?

⁸ Den prome siglo, Pedro a spierta e cristiannan pa tene cuidou cu hende den congregacion cu a cuminsa pensa mescos cu e mundo. El a bisa: “Pa nan ta un placer pa hiba un bida di luho, hasta di dia cla. Nan ta manera mancha y defecto meymey di boso cu ta gosa sin fin den nan siñansanan engañoso ora nan ta na boso banketenan. Nan ta uza palabranan grandi, sin bisa nada. Y cu accionnan sinberguensa, stimulando deseonan di carni, nan ta seduci esnan cu apenas a scapa for di hende cu ta haci malo. Mientras cu nan ta priminti e hendenan aki libertad, nan mes ta esclavo di cosnan degenera. Pasobra si un hende ta bou di dominio di un otro hende, e ta esclavo di e hende ey.”—2 Ped. 2:13, 18, 19.

⁹ Si nos ta trata di satisface e “deseo di wowo”, es decir, purba di haya tur loke nos kier, esey lo no duna nos libertad. Al contrario, nos lo bira esclavo di Satanas e Diabel, e doño invisibel di e mundo aki. (1 Juan 5:19) E peliger di bira esclavo di materialismo ta masha real y, si nos cay den materialismo, ta bira hopi dificil pa libra nos mes for di dje.

UN ESCOGENCIA CU TA HACI NOS REALMENTE FELIZ

10, 11. (a) Ken Satanas ta gusta ataca den nos tempo? (b) Con e enseñanza di mundo por causa problema pa hobennan cristian?

¹⁰ Satanas, e enemigo di Dios, ta prefera di ataca hende cu no tin hopi experencia, manera el a haci den Eden. Pesey, e ta gusta ataca e hobennan. E no ta keda contento ora un hoben, of cualkier otro hende, dicidi di sirbi Jehova como esclavo. Satanas su meta ta pa kibra e lealtad y devocion di tur hende cu a dedica nan bida na Jehova.

¹¹ Ban bek na e ehempel di e esclavo cu a laga bora su horea. Esey mester a haci dolor, pero e dolor lo no a dura largo. Loke si lo a keda tabata un marca permanente cu a indica cu el a dicidi di keda cerca su doño. Asina tambe por ta dificil, hasta doloroso, pa hobennan scoge un caminda cu ta distinto for di loke otro hobennan rond di nan ta scoge. Por ehempel, Satanas ta promove e idea cu e unico cos cu por haci hende feliz ta door di sigui un carera profesional den e mundo aki. Pero como cristian, nos mester corda cu felicidad ta bin di otro fuente. Nos lo ta feliz solamente ora nos ta haci Jehova e parti mas importante di nos bida. Hesus a bisa: “Feliz ta esnan cu ta consciente di nan  necesidad spiritual.” (Mat. 5:3) Cristiannan dedica na Dios ta biba pa haci Su boluntad, no di Satanas. Nan ta stima e ley di Jehova, y nan ta medita riba dje di dia y anochi. (Lesa Salmo 1:1-3.) Pero hopi di e cursonan di enseñanza superior di awendia ta tuma asina tanto tempo cu ora un sirbidor di Jehova dicidi di sigui un di nan, e no ta resta hopi tempo pa medita y satisface su necesidad spiritual.

12. Ki decision hopi hoben tin cu tuma awe?

¹² Pablo a puntra den su prome carta na e Corintionan: “Bo tabata un esclavo ora bo a ricibi bo yamada?” Anto el a duna e conseho: “No laga esey preocupa bo; ma si bo por bira liber, probecha di e oportunidad ey.” (1 Cor. 7:21) Den e prome siglo tabatin doño cu lo por a haci bida dificil pa un esclavo cristian. Den tal caso, lo tabata mihor pa e cristian haya su libertad. Awe, den hopi pais enseñanza ta obligatorio te cu cierto edad. Despues di esey, e hoben tin e libertad pa dicidi si e ta sigui bay scol of si e ta scoge sirbishi di tempo completo. Si un hoben cristian scoge pa sigui enseñanza superior pa asina desaroya su mes profesionalmente den e mundo aki, e por perde su libertad pa drenta sirbishi di tempo completo.—Lesa 1 Corintionan 7:23.

CUA TA E MIHOR ENSEÑANZA?

13. Ki tipo di enseñanza ta beneficia sirbidornan di Jehova mas tanto?

¹³ Pablo a spierta e cristiannan di Colosas: “Tene cuidou pa ningun hende no coy boso den nan gara pa medio di filosofia y engaño vano cu ta basa riba tradicion di hende, segun e cosnan basico di mundo y no segun e siñansanan di Cristo.” (Col. 2:8) Awendia, hopi docente ta promove e “filosofia y engaño vano cu ta basa riba tradicion di hende.” Enseñanza superior ta siña hobennan desaroya habilidadnan academico pero ta duna nan masha poco, of casi ningun entrenamento practico, y como resultado nan no ta realmente prepara pa e bida di tur dia. Pero sirbidornan di Jehova ta scoge enseñanza cu ta yuda nan desaroya e habilidadnan necesario pa nan por hiba un bida simpel den sirbishi na Dios. Nan ta tuma na pecho e conseho cu Pablo a duna Timoteo: “Un cos ta sigur: devocion na Dios ta di gran probecho, basta nos ta satisfecho cu loke nos tin. Pues, si nos tin cuminda, paña y un dak riba nos cabes, nos lo keda contento cu e cosnan aki.” (1 Tim. 6:6, 8) Cristiannan berdadero no ta traha duro pa haya hopi diploma of titulo. Mas bien, nan ta haci esfuerso pa haya “carta di  recomendacion”, esta, hende cu nan a yuda bira discipel di Hesus. Nan ta haci esey door di participa mas tanto posibel den sirbishi di veld.—Lesa 2 Corintionan 3:1-3.

14. Segun Filipensenan 3:8, con Pablo a mira su privilegio di ta un esclavo di Dios y Cristo?

¹⁴ Tuma e caso di apostel Pablo. El a ser educa na pia di Gamaliel, un maestro hudiu di Ley. E educacion cu Pablo a haya ta mescos cu un enseñanza universitario di awendia. Pero con Pablo a mira esaki ora el a compar’e cu su privilegio di ta un esclavo di Dios y di Hesus? El a skirbi: “Mi ta considera tur cos como perdida pa motibo di e conocemento tocante Cristo Hesus, mi Señor, cu ta di mucho mas balor. Pa motibo di dje mi a acepta perdida di tur cos y ta considera nan como cos di benta afo, a fin cu mi por gana Cristo.” (Flp. 3:8) Pablo su manera di mira e enseñanza ey por yuda hobennan cristian y nan mayornan tuma un decision sabi pa loke ta enseñanza. (Wak e plachinan.)

BENEFICIA DI E MIHOR ENSEÑANZA CU TIN

15, 16. Ki enseñanza e organisacion di Jehova ta ofrece, y cu ki proposito?

¹⁵ Ki tipo di ambiente ta reina hopi biaha na e institutonan di enseñanza superior? Wel, inmoralidad y bebemento di mas sa ta hopi comun. E institutonan ey ta promove tambe e teoria di evolucion y ta instiga hende pa rebela. (Efe. 2:2) Na contraste cu esey, e organisacion di Jehova ta ofrece e mihor enseñanza cu tin den e ambiente trankil di e congregacion cristian. Cada un di nos por beneficia tur siman di e Scol di Ministerio Teocratico. Tambe tin cursonan special pa ruman homber soltero cu ta traha pionero (Scol Biblico pa Ruman Homber Soltero) y pa pareha casa cu ta pionero (Scol Biblico pa Pareha Cristian). Tur e enseñanza teocratico aki ta yuda nos obedece Jehova, nos Doño celestial.

¹⁶ Nos por descubri hopi berdad valioso cu yudansa di e Indice di Publicacion Watch Tower (na otro idioma) of di e Bibliotheek Online di Watchtower (na Papiamento). E proposito di tur e enseñanza biblico aki ta pa yuda nos adora Jehova mihor. Nos ta siña con nos por yuda hende bira amigo di Dios. (2 Cor. 5:20) Y nan, na nan turno, lo por siña otro hende.—2 Tim. 2:2.

E ESCLAVO SU RECOMPENSA

17. Ki recompensa nos ta haya ora nos scoge pa e mihor enseñanza?

¹⁷ Den Hesus su comparacion di e talentonan, e doño a elogia e dos esclavonan fiel pa nan trabou. Ademas, nan a comparti e alegria di nan doño, y el a confia nan cu mas trabou. (Lesa Mateo 25:21, 23.) Nos por ta feliz y contento si nos scoge e mihor enseñanza cu tin. Tuma, por ehempel, Michael. E tabata siña asina bon na scol cu su docentenan a invit’e pa un reunion pa nan papia tocante e posibilidadnan cu e tin pa bay universidad. Pa nan sorpresa, Michael no a scoge pa enseñanza superior, sino mas bien a dicidi di sigui un curso cortico cu a siñ’e un ofishi pa e por cria su mes y alabes traha pionero. Acaso Michael ta sinti cu el a perde un bon chens? El a bisa: “E enseñanza teocratico cu mi a haya como pionero—y awor como anciano den congregacion—ta impagabel. E bendicionnan y privilegionan cu mi tin ta bal mas cu tur e placa cu lo mi por a gana. Mi ta masha contento mes cu mi no a scoge pa enseñanza superior.”

18. Kico ta motiva bo pa scoge e mihor enseñanza cu tin?

¹⁸ E enseñanza cu ta bin di Dios ta e mihor cu tin, pasobra e ta yuda nos sirbi Jehova manera esclavo y ta laga nos sa kico ta su boluntad. Tambe e ta duna nos e speransa di “ser libra di sclavitud na un curpa cu ta caba na nada” y, cu tempo, alcansa “e glorioso libertad di e yiunan di Dios.” (Rom. 8:21) Mas importante ainda, e ta siña nos e mihor manera pa demostra cu di berdad nos ta stima nos Doño celestial, Jehova.—Exo. 21:5.

[Preguntanan di Estudio]

[Plachi na pagina 14]

Cua doño bo ta prefera di sirbi?