1. Ki sacrificio hopi hende ta haci, y dicon?

 HENDE ta cla pa haci sacrificio ora ta trata di cosnan cu ta importante pa nan. Mayornan, por ehempel, ta duna di nan tempo, placa y energia na bienestar di nan yiunan. Atletanan hoben cu ta aspira pa representa nan pais na e Weganan Olimpico ta train vigorosamente varios ora pa dia, mientras cu nan pareunan ta hunga y diberti. Hesus tambe a haci sacrificio pa cosnan cu tabata importante p’e. E no a busca un bida luho ni e no tabatin yiu. Mas bien, boluntariamente el a uza su bida pa promove e Reino. (Mat. 4:17; Luc. 9:58) Su siguidornan tambe a haci hopi sacrificio na beneficio di e Reino di Dios. Si, como cu e Reino tabata e cos di mas importante pa nan, nan a haci sacrificio pa apoy’e mas tanto posibel. (Mat. 4:18-22; 19:27) Kico di nos? Ta bon pa nos puntra nos mes: ‘Kico ta importante den mi bida?’

2. (a) Ki sacrificio tur cristian berdadero mester haci? (b) Ki sacrificio extra algun ruman ta haci?

² Tin cierto sacrificionan cu tur cristian berdadero mester haci pa por tin un bon relacion cu Jehova Dios. Algun di e cosnan cu nos ta sacrifica ta nos tempo y energia; nos ta uza esakinan pa haci oracion, lesa Bijbel, tene nos Adoracion Como Famia, asisti na reunion y participa den sirbishi di veld. * (Jos. 1:8; Mat. 28:19, 20; Heb. 10:24, 25) Y debi na nos esfuerso y e bendicion di Jehova, e trabou di predica ta acelerando y hopi hende ta sigui basha bin na “e sero di e cas di SEÑOR.” (Isa. 2:2) Pa apoya e Reino, tin hopi ruman ta haci sacrificio pa por sirbi na Betel, yuda den construccion di Salon di Reino y di Asamblea, organisa congresonan of yuda despues di desasternan natural. E trabounan,  of sacrificionan, extra aki no ta un rekisito pa gana bida, pero nan ta importante pa apoya e Reino.

3. (a) Ki beneficionan nos ta disfruta di dje ora nos ta haci sacrificio pa apoya e Reino? (b) Ki preguntanan nos lo contesta den e articulo aki?

³ Awe, mas cu nunca, ta masha importante pa nos haci tur loke nos por pa apoya e Reino. Y ta un goso pa mira cu hopi ruman ta haci sacrificio di buena gana pa sirbi Jehova. (Lesa Salmo 54:6.) Si nos tambe ta haci asina, esaki ta yena nos cu goso segun cu nos ta spera e yegada di e Reino di Dios. (Deu. 16:15; Echo. 20:35) Sinembargo, nos tur mester examina nos mes cuidadosamente y puntra nos mes: ‘Mi por haci mas sacrificio pa e Reino? Con mi ta uzando mi tempo, placa, energia, capacidad y habilidadnan? Kico mi no mester neglisha ora mi ta haci sacrificio?’ Laga nos wak kico nos por siña for di algun sacrificio di buena gana cu hende a yega di haci pa sirbi Jehova; esaki lo aumenta nos goso.

4. Con e sacrificionan cu e Israelitanan a haci a beneficia nan?

⁴ Den Israel di antiguedad, pa un hende por a haya pordon pa pica y ricibi Jehova su aprobacion, e mester a ofrece sacrificio. Algun di e sacrificionan aki tabata obligatorio, mientras cu otronan tabata ofrenda boluntario. (Lev. 23:37, 38) Un persona por a ofrece ofrendanan kima como ofrenda boluntario, of regalo, na Jehova. Un excelente ehempel di sacrificio na Jehova ta esun en conexion cu e inauguracion di e tempel den tempo di Salomon.—2 Cro. 7:4-6.

5. Ki areglo Jehova a haci na beneficio di hende pober?

⁵ Jehova ta un Dios amoroso y e tabata compronde cu no ta tur hende por a duna mes tanto. Pesey, el a rekeri pa cada Israelita duna loke e tabata por. Jehova su ley a stipula cu mester a haci sacrificio di bestia y drama nan sanger. E sacrificionan aki lo a bira “un sombra di e cosnan bon cu lo a bin” pa medio di su Yiu, Hesus. (Heb. 10:1-4) Pero Jehova no tabata irasonabel. Por ehempel, si un persona no por a ofrece un toro, cabrito of carne, Dios lo a acepta ofrenda di pichon. Pues, hasta hende pober por tabatin e goso di ofrece sacrificio na Jehova. (Lev. 1:3, 10, 14; 5:7) Pero, aunke Jehova a acepta diferente sorto di bestia  como sacrificio, tabatin dos rekisito cu tur hende cu a haci sacrificio boluntario mester a cumpli cu ne.

6. Kico tabata e rekisitonan pa un hende cu kier a haci sacrificio, y dicon tabata importante pa cumpli cu e rekisitonan aki?

⁶ Pa di prome, e persona mester a duna lo mihor cu e tabatin. Jehova a bisa e nacion cu tur loke nan ta ofrece mester ta sin defecto of di bon calidad pa nan por a “wordo acepta”, of ricibi Jehova su aprobacion. (Lev. 22:18-20) Pues, si e bestia tabatin defecto, Jehova lo no a acepta esaki como sacrificio. Di dos, e persona cu ta ofrece e sacrificio mester tabata limpi y sin mancha. Si e persona no tabata limpi, e mester a haci un ofrenda pa pica of un ofrenda di culpa pa e por a drecha su relacion cu Jehova prome y despues e por a ofrece un ofrenda boluntario. (Lev. 5:5, 6, 15) Esaki tabata un asunto serio. Jehova a stipula cu si un hende tabata impuro y e come toch di un sacrificio di comunion, cu a inclui ofrenda boluntario, lo el a ser mata. (Lev. 7:20, 21) Di otro banda, si un persona tabatin un bon relacion cu Jehova y su ofrenda tabata sin defecto, lo e por a disfruta di un bon consenshi y su goso lo tabata inmenso.—Lesa 1 Cronicanan 29:9.

7, 8. (a) Ki goso hopi ruman tin ora nan ta haci sacrificio na beneficio di e Reino? (b) Ki recursonan nos por uza pa e gloria di Jehova?

⁷ Awe tambe, hopi ruman ta dispuesto pa traha duro den Jehova su sirbishi, y esaki ta haci Jehova masha contento. Ora nos ta traha duro na beneficio di nos rumannan den fe, nos tambe ta haya goso. Un ruman homber cu ta yuda den construccion di Salon di Reino y tambe despues di desaster natural a bisa cu ta dificil pa e describi e satisfaccion cu e ta sinti ora e ta sirbi den e maneranan aki. El a bisa: ‘Tur e trabou y esfuerso ta bale la pena ora mi mira e aprecio di e rumannan y con contento nan ta bira ora nan drenta nan Salon di Reino nobo of ora nan haya yudansa despues di un desaster natural.’

⁸ Jehova su organisacion semper a busca oportunidad pa apoya e Reino. Na 1904, Ruman C. T. Russell a skirbi: ‘Nos cada un tin cu considera nos mes como mayordomo nombra pa Señor di nos mes tempo, poder, placa, etcetera y nos mester haci  nos maximo esfuerso pa uza e recursonan aki lo mihor posibel, pa e gloria dje Doño’, esta, Jehova. No tin duda, nos tin cu haci sacrificio pa nos ofrece sacrificio na Jehova. Y esaki sigur ta trece hopi bendicion. (2 Sam. 24:21-24) Awor, con nos por haci mihor uzo di nos recursonan?

9. Kico e principio na Lucas 10:2-4 ta siña nos encuanto uzo di nos tempo?

⁹ Nos tempo. Ta exigi hopi tempo y esfuerso pa traduci y imprimi nos literatura, construi luganan di adoracion, organisa congreso, yuda ora di desaster natural y pa haci hopi otro trabou necesario. I maske nos tin solamente 24 ora den un dia, Hesus a duna un principio cu por yuda nos. Ora el a manda su discipelnan bay predica, el a bisa nan pa “no para cuminda ningun hende na caminda.” (Luc. 10:2-4) Dicon Hesus a duna nan e instruccion ey? Un experto riba tereno di Bijbel a bisa cu den tempo di Hesus, ora hende tabata cuminda otro, nan no tabata djis buig cabes of duna man. Mas bien, nan tabata cuminda otro cu hopi brasamento y buigmento y nan tabata hasta tira nan curpa plat abou na suela. Tur esaki a tuma tempo. Hesus no tabata animando su siguidornan pa nan demostra mal manera. No, e tabata kier yuda nan mira cu e tempo cu nan tabatin ta limita y cu nan mester a haci bon uzo di nan tempo, haciendo e cosnan di mas importante. (Efe. 5:16) Nos por aplica e principio aki pa nos por tin mas tempo pa yuda cu e trabounan na fabor di e Reino?

10, 11. (a) Cua ta algun manera cu nos donacionnan pa e obra mundial ta ser uza? (b) Ki principio na 1 Corintionan 16:1 y 2 por yuda nos?

¹⁰ Nos placa. Ta costa hopi placa pa financia e actividadnan relaciona cu e Reino. Tur aña, miyones di dollar ta bay na gastonan di superintendentenan biahero, pioneronan special y misioneronan. Desde aña 1999, mas cu 24.500 Salon di Reino a ser construi den paisnan di menos recurso. Asina mes, ainda tin mester di casi 6.400 Salon di Reino. Tur luna, un 100 miyon Toren di Vigilancia y ¡Despertad! ta ser imprimi. Tur esaki ta ser sostene pa donacion boluntario.

¹¹ Apostel Pablo a duna un principio cu nos por sigui ora nos kier duna contribucion. (Lesa 1 Corintionan 16:1, 2.) Bou di inspiracion, el a anima su rumannan na Corinto pa no warda te fin di siman pa wak kico nan a sobra pa nan por contribui, pero pa aparta loke nan por contribui for di comienso di siman. Mescos cu den prome siglo, awe rumannan ta plania adelanta pa contribui generosamente cu loke nan por. (Luc. 21:1-4; Echo. 4:32-35) Jehova ta balora e spirito generoso aki di su pueblo.

12, 13. Ki pensamento por stroba algun ruman di uza nan energia, capacidad y habilidadnan plenamente pa apoya e Reino, pero con Jehova por yuda nan?

¹² Nos energia, capacidad y habilidadnan. Ora nos ta haci esfuerso pa uza nos energia, capacidad y habilidadnan na beneficio di e Reino, Jehova ta sostene nos. El a priminti cu e lo yuda nos ora nos ta cansa. (Isa. 40:29-31) Bo ta sinti cu bo no ta capaz pa yuda cu e trabou of cu otronan por hacie mihor cu bo? Si ta asina, corda cu Jehova por yuda nos tur bira mas habil, manera el a haci cu Bezaleel y Aholiab.—Exo. 31:1-6; wak e prome plachi.

¹³ Jehova ta anima nos pa no laga nada stroba nos di duna lo mihor cu nos por. (Prov. 3:27) Durante reconstruccion di e tempel, Jehova a urgi e Hudiunan na Jerusalem pa pensa seriamente riba loke nan tabata haciendo pa sostene e trabou. (Hageo 1:2-5) Nan a ser distrai y a stop di enfoca riba e trabou di Jehova. Pesey, ta bon pa nos puntra nos mes: ‘Jehova su boluntad ta  e cos di mas importante den mi bida?’ Si, ta bon pa nos pensa seriamente tocante nos bida. Y si nos por haci mas pa apoya e Reino di Dios den e ultimo dianan aki, laga nos plania con pa logra esey.

14, 15. (a) Con e ehempel di rumannan di menos recurso ta anima nos? (b) Kico mester ta nos deseo?

¹⁴ Hopi hende ta biba den areanan caminda tin hopi pobreza y bida ta sumamente dificil. Nos organisacion ta purba di “compensa” loke nos rumannan cu ta biba den paisnan ey ta falta. (2 Cor. 8:14) Pero hasta rumannan di menos recurso ta balora e privilegio di duna. Y Jehova ta keda masha contento ora e ta mira con e rumannan aki ta duna tur loke nan por cu alegria.—2 Cor. 9:7.

¹⁵ Den un pais masha pober na Africa, algun ruman ta separa pida chikito di nan hardin pa e Reino. Con asina? Wel, e placa cu nan ricibi despues cu nan bende e cosecha cu e seccion ey a produci nan ta uza pa sostene e obra di Reino. Ora cu a plania pa construi un Salon di Reino den e pais ey, e rumannan local tabata cla pa yuda. Pero e proyecto mester a cuminsa net den temporada di plantacion. Asina mes, como cu e rumannan tabata determina pa yuda, nan tabata traha den dia riba e Salon di Reino y anochi nan tabata ocupa nan mes cu nan plantacion. Ki un excelente spirito di sacrificio propio! Esaki ta laga nos corda riba nos rumannan di prome siglo cu tabata biba na Macedonia. Aunke nan tabata “masha pober”, toch nan a suplica Pablo pa laga nan contribui pa e proyecto cu tabata andando. (2 Cor. 8:1-4) Di mes manera, laga cada un di nos ‘duna manera nos por, conforme e bendicion cu Jehova a duna nos.’—Lesa Deuteronomio 16:17.

16. Con nos por haci sigur cu nos sacrificionan ta aceptabel pa Jehova?

¹⁶ Ora nos ta haci sacrificio, nos tin cu tene cuidou si pa nos no neglisha loke ta mas importante. Dicon? Wel, mescos cu e Israelitanan di antiguedad, nos tambe mester haci sigur cu e sacrificionan cu nos ta haci boluntariamente ta aceptabel pa Dios. Nos mester corda cu nos famia y nos relacion cu Jehova ta nos responsabilidadnan di mas importante. Pues, e echo cu nos ta uza nos tempo y recursonan na beneficio di otronan no mester pone cu nos ta neglisha e spiritualidad of bienestar fisico di nos famia. Pasobra, realmente, nos lo ta dunando algo cu nos no tin. (Lesa 2 Corintionan 8:12.) Ademas, ta importante pa nos sigui fortalece nos relacion cu Jehova. (1 Cor. 9:26, 27) Y nos por tin sigur cu si nos sigui biba na harmonia cu principionan biblico, nos sacrificionan lo haci nos feliz y nan lo ta “specialmente aceptabel” pa Jehova.

17, 18. Con nos ta sinti encuanto nos rumannan cu ta haci sacrificio pa e Reino, y kico nos tur mester pensa ariba?

¹⁷ Na moda di papia, hopi ruman ta ‘basha nan mes manera un ofrenda di bibida’ mediante e esfuersonan cu nan ta haci pa apoya e Reino. (Flp. 2:17) Nos tin gran aprecio pa e rumannan cu ta demostra un spirito asina. Ademas, nos palabranan di elogio ta bay pa esposa y yiunan di e ruman hombernan cu ta dirigi e trabou di Reino pa nan generosidad y e spirito di sacrificio propio cu nan ta desplega.

¹⁸ No tin duda, trabou duro ta necesario pa apoya e Reino. Pesey, laga nos tur haci oracion y pensa seriamente con nos por duna mas tanto posibel na Jehova. Si nos haci esey, nos lo ricibi hopi bendicion, awor y mucho mas ainda “den e era cu ta bin.”—Mar. 10:28-30.