“Haci Esaki na Mi Memoria”
“Despues di gradici Dios, el a kibra [e pan] y a bisa: ‘Esaki ta representa mi curpa cu ta ser duna pa boso. Sigui haci esaki na mi memoria.’”—1 COR. 11:24.
1, 2. Kico e apostelnan lo a pensa prome cu Hesus su ultimo biahe pa Jerusalem?
E GUARDIANAN na Jerusalem a mira e prome señal di luna nobo. Asina cu nan a informa e Sanedrin di esaki, e Sanedrin a anuncia cu un luna nobo a cuminsa: luna di nisan. Nan a uza sea señal di candela of mensahero pa plama e noticia ey. E apostelnan tabata sa cu e tempo pa celebra nan Pasco tabata yega cerca. Nan lo mester a realisa cu Hesus lo kier a bay Jerusalem pa e por a yega prome cu e celebracion.
2 E tempo ey Hesus cu su apostelnan tabata na Perea (na e otro banda di Riu Jordan) riba su ultimo biahe pa Jerusalem. (Mat. 19:1; 20:17, 29; Mar. 10:1, 32, 46) Unabes cu e Hudiunan tabata sa ki dia tabata e prome dia di luna di nisan, nan lo a warda 13 dia mas pa celebra e Pasco, riba 14 di nisan, despues cu solo baha.
3. Dicon cristiannan ta interesa den e fecha di e Pasco Hudiu?
3 E fecha di e Cena di Señor—cu ta coresponde cu e fecha di e Pasco Hudiu—lo ta despues cu solo baha dia 14 di april 2014. Esey lo ta un dia special pa cristiannan berdadero y personanan cu kier agrada Dios. Dicon? Debi na loke nos ta lesa na 1 Corintionan 11:23-25: “Riba e anochi cu nan lo a traiciona Señor Hesus, el a coy un pan y despues di gradici Dios, el a kibr’e y a bisa: ‘Esaki ta representa mi curpa cu ta ser duna pa boso. Sigui haci esaki na mi memoria.’ El a haci mescos cu e copa.”
4. (a) Ki pregunta asina lo bo por haci bo mes tocante e Memorial? (b) Con e fecha di Memorial ta ser determina cada aña? (Wak e cuadro “Memorial 2014.”)
4 Sin duda lo bo ta presente na e unico evento cu Hesus a bisa su siguidornan cu nan mester conmemora tur aña. Prome cu e dia ey, puntra bo mes: ‘Con mi mester prepara pa e anochi ey? Kico ta e cosnan cu lo bay uza na e ocasion ey? Ki procedura lo sigui na e reunion ey? Dicon e Memorial (Conmemoracion) y e cosnan cu lo bay uza ta importante pa mi?’
E PAN CU BIÑA CU TA UZA NA MEMORIAL
5. Kico Hesus a bisa e apostelnan haci pa prepara pa su ultimo Pasco cu nan?
5 Ora Hesus a bisa e apostelnan pa prepara un camber pa tene e cena di Pasco, e no a papia nada tocante decoracion. Probablemente lo e tabata kier djis un cuarto simpel, limpi y cu suficiente luga pa e cu su apostelnan. (Lesa Marco 14:12-16.) Tambe nan lo mester a prepara e cosnan necesario pa e cena, incluso pan sin zuurdeeg y biña cora. Despues di e cena di Pasco, Hesus a concentra riba e dos cosnan ey, e pan cu e biña.
6. (a) Despues di e cena di Pasco, kico Hesus a bisa di e pan? (b) Ki tipo di pan ta uza na Memorial?
6 Apostel Mateo tabata presente na e ocasion ey, y despues el a skirbi: “Hesus a coy un pan, y despues di haci un oracion, el a kibr’e, duna su discipelnan y bisa nan: ‘Tuma, come.’” (Mat. 26:26) E “pan” tabata pan sin zuurdeeg, e mesun pan cu a uza pa e celebracion di Pasco. (Exo. 12:8; Deu. 16:3) Nan a traha e pan di hariña di trigo cu awa, sin agrega nada di zuurdeeg (of, yeast). Nan no a sason’e tampoco, por ehempel, cu salo. Como cu e pan no tabatin zuurdeeg, e no a reis. E tabata simpel y bros manera buscuchi soda, facil pa kibra na pida pida. Awendia, prome cu Memorial, e ancianonan por pidi un ruman traha e tipo di pan ey. E mester trah’e di hariña (preferiblemente hariña di trigo integral) cu awa y horn’e den forno of prepar’e riba un plancha hunta cu poco zeta. (Caminda no por haya hariña di trigo, por uza hariña di aros, di puspas, di funchi of di maishi rabo.) Por uza tambe e buscuchi Hudiu matzo, pero e mester ta esun sin ingrediente adicional, manera malta, webo of siboyo.
7. Ki tipo di biña tabatin den e copa cu Hesus a uza, y ki sorto di biña nos por uza awe na Memorial?
7 Mateo a sigui conta: “[Hesus] a coy un copa, y despues di gradici Dios, el a pas’e pa nan, bisando: ‘Boso tur bebe for di dje.’” (Mat. 26:27, 28) Den e copa cu Hesus a coy tabatin biña cora. (Lo e no tabata juice fresco di wendruif ya cu e cosecha di wendruif a tuma luga basta dia prome.) Biña no tabata parti di e prome cena di Pasco na Egipto. Pero Hesus no a bisa cu tabata malo pa beb’e na e celebracion di Pasco. Al contrario, el a uza un poco di e biña durante e Cena di Señor. Pues, awe cristiannan tambe ta uza biña na Memorial. E biña cu nos ta uza no mester tin nada agrega na dje, manera brandy of specerij, ya cu no tabatin nodo di agrega nada na e sanger di Hesus pa hacie mas valioso. Mester uza biña cora puro, sea biña traha na cas of biña comercial, manera biña tipo Beaujolais, Burgundy of Chianti.
LOKE E PAN CU E BIÑA TA REPRESENTA
8. Dicon cristiannan ta interesa den loke e pan cu e biña ta representa?
8 Apostel Pablo a indica bon cla cu no ta e apostelnan so mester a celebra e Cena di Señor sino otro cristiannan tambe. El a skirbi lo siguiente na e rumannan di Corinto: “Loke mi a ricibi di Señor, mi a siña boso, esta, cu riba e anochi cu nan lo a traiciona Señor Hesus, el a coy un pan y despues di gradici Dios, el a kibr’e y a bisa: ‘Esaki ta representa mi curpa cu ta ser duna pa boso. Sigui haci esaki na mi memoria.’” (1 Cor. 11:23, 24) Ta pesey te awe cristiannan ta conmemora e evento special aki tur aña y ta interesa den loke e pan cu e biña ta representa.
9. Ki punto di bista robes algun hende tin di e pan cu Hesus a uza?
9 Tin hende religioso, influencia pa nan traduccion di Bijbel, ta indica cu Hesus a bisa literalmente: ‘Esaki ta mi curpa.’ Pues, nan ta kere cu e pan milagrosamente a bira e curpa of carni di Hesus. Pero esaki no ta cuadra cu echo. * Tanto e curpa di Hesus como e pan sin zuurdeeg cu nan tabata bay come tabata dilanti di e apostelnan fiel. Ta bisto cu Hesus tabata papia den sentido simbolico, manera el a haci na hopi otro ocasion.—Juan 2:19-21; 4:13, 14; 10:7; 15:1.
10. Kico e pan cu ta uza na e Cena di Señor ta representa?
10 E pan cu e apostelnan por a mira y cu nan tabata a punto di bay come a representa e curpa di Hesus. Cua curpa? Un tempo, e sirbidornan di Dios a kere cu e pan a representa e congregacion di cristiannan ungi, cu Bijbel ta yama “e curpa di Cristo.” Nan tabata kere esaki pasobra Hesus a kibra e pan pero ni un di su mes wesonan no a ser kibra. (Efe. 4:12; Rom. 12:4, 5; 1 Cor. 10:16, 17; 12:27) Pero despues di mas investigacion, nan a bin compronde cu tanto e Scritura como rasonamento logico ta indica cu e pan ta representa e curpa humano di Hesus cu a ser prepara p’e. Hesus “a sufri den carni” y hasta a ser claba na staca. Pues, e pan na e Cena di Señor ta representa e curpa fisico di Hesus cu “a carga nos picanan.”—1 Ped. 2:21-24; 4:1; Juan 19:33-36; Heb. 10:5-7.
11, 12. (a) Kico Hesus a bisa tocante e biña? (b) Kico e biña cu ta uza na e Cena di Señor ta representa?
11 Awor cu nos sa kico e pan ta representa, nos por compronde mihor kico Hesus a bisa tocante e biña. Nos ta lesa: “El a haci mescos cu e copa tambe despues di e cena, bisando: ‘E copa aki ta representa e pacto nobo a base di mi sanger.’” (1 Cor. 11:25) Hopi Bijbel ta bisa mescos cu Beibel Santu: ‘E copa aki ta e alianza nobo den mi sanger.’ Ta e copa cu Hesus tabatin den su man tabata e pacto, of alianza, nobo? No. E “copa” a referi na loke tabatin den dje, esta, e biña. Segun Hesus, kico e biña a representa? E sanger cu lo el a drama.
12 Den e Evangelio di Marco, nos ta lesa cu Hesus a bisa: “Esaki ta representa mi ‘sanger di e pacto’, cu lo mi drama pa hopi hende.” (Mar. 14:24) Y den Mateo, nos ta lesa cu Hesus lo a drama su sanger “pa pordon di pica di hopi hende.” (Mat. 26:28) Pues, e biña cora ta un bon representacion di Hesus su sanger literal. Su sanger a percura e rescate di manera cu nos por “haya pordon di nos faltanan.”—Lesa Efesionan 1:7.
CON NOS TA CONMEMORA E MORTO DI CRISTO?
13. Describi con nos ta tene e Conmemoracion anual di e morto di Cristo.
13 Si ta pa prome biaha bo ta bay asisti na e Memorial hunto cu Testigonan di Jehova, kico bo por spera? E reunion lo ta na un luga simpel y limpi, caminda tur hende por disfruta comodamente di e ocasion. Por tin algun areglo floral simpel, pero lo bo no mira decoracion buya ni un ambiente di fiesta. Na un manera digno, un anciano cualifica lo duna un discurso cu ta splica bon cla kico Bijbel ta bisa di e Cena di Señor. Lo e yuda tur esnan presente compronde kico Cristo a haci pa nos: El a muri como un rescate pa nos por haya bida.—Lesa Romanonan 5:8-10.
14. Ki dos speransa e orador lo papia di dje durante e discurso di Memorial?
14 E orador lo splica tambe cu Bijbel ta papia di dos speransa distinto pa cristiannan. Un speransa ta di reina hunto cu Cristo den cielo. Ta un cantidad relativamente chikito di siguidor di Cristo, manera su apostelnan fiel, tin e speransa aki. (Luc. 12:32; 22:19, 20; Rev. 14:1) E otro speransa ta loke mayoria di cristian fiel tin. Esey ta e speransa di biba pa semper riba e tera transforma den un paradijs. E tempo ey porfin e boluntad di Dios lo sosode na tera mescos cu den cielo, algo cu cristiannan semper a pidi p’e den oracion. (Mat. 6:10) E Scritura ta describi e bida maraviyoso cu nan lo disfruta di dje pa semper.—Isa. 11:6-9; 35:5, 6; 65:21-23.
15, 16. Kico ta haci cu e pan na Memorial?
15 Despues di splica e dos speransanan ey, e orador lo bisa cu e momento a yega pa cumpli cu loke Hesus a bisa su apostelnan haci. Lo tin pan sin zuurdeeg y biña cora riba un mesa banda di e orador. Lo e lesa un relato di Bijbel cu ta describi loke Hesus a bisa y haci ora el a introduci e evento. Por ehempel, den e relato di Mateo nos ta lesa: “Hesus a coy un pan, y despues di haci un oracion, el a kibr’e, duna su discipelnan y bisa nan: ‘Tuma, come. Esaki ta representa mi curpa.’” (Mat. 26:26) Hesus a kibra e pan sin zuurdeeg pa e por a duna un pida na e apostelnan cu tabata na cada banda di dje. Na e Memorial di 14 di april, lo bo mira algun pida pan sin zuurdeeg den scalchi.
16 Prome cu pasa e scalchinan, un ruman homber lo haci un oracion cortico. Lo tin suficiente scalchi pa asina por pasa e pan rond pa tur hende den un tempo cortico y na un manera ordena. Lo no tin ningun ceremonia special pa pasa e scalchi y ta hacie na un manera cu ta practico pa e luga caminda ta tene e reunion. Masha poco hende (of kisas ningun mes) lo come di e pan, manera tabata e caso den mayoria di congregacion durante e Memorial di 2013.
17. Con nos ta sigui e instruccion di Hesus tocante e biña na Memorial?
17 Despues e orador lo enfoca riba loke Mateo a sigui describi: “[Hesus] a coy un copa, y despues di gradici Dios, el a pas’e pa nan, bisando: ‘Boso tur bebe for di dje, pasobra esaki ta representa mi “sanger di e pacto”, cu lo mi drama pa pordon di pica di hopi hende.’” (Mat. 26:27, 28) Siguiendo e patronchi ey, lo haci un oracion mas y despues ta pasa e biña entre tur esnan presente.
18. Si ta masha poco hende of kisas ningun mes ta come di e pan y bebe di e biña, dicon toch ta importante pa nos t’ey na e Memorial?
18 Hesus a indica cu ta solamente esnan cu lo reina hunto cu ne den e Reino celestial mester come di e pan y bebe di e biña. Pues, mayoria di hende presente ta djis pasa e pan cu e biña pa e persona sinta banda di nan. (Lesa Lucas 22:28-30; 2 Tim. 4:18) Aunke mayoria di cristian no ta come di e pan ni bebe di e biña, toch ta importante pa nan t’ey na e Memorial. Dicon? Pasobra nan presencia ta indica cuanto aprecio nan tin pa e sacrificio di Hesus. Durante e conmemoracion, nan por pensa riba tur e bendicionnan cu nan por haya a base di e sacrificio di rescate di Hesus. Por ehempel, nan tin e speransa di ta entre e “multitud grandi” cu lo sobrevivi e binidero “tribulacion grandi.” Debi na nan fe den e sacrificio di Hesus, nan lo ta husto den bista di Dios, comosifuera “nan a laba nan pañanan largo y a haci nan blanco den sanger di e Lamchi.”—Rev. 7:9, 14-17.
19. Kico bo por haci pa prepara pa Memorial y beneficia di dje?
19 Testigonan di Jehova rond mundo ta prepara pa e reunion special aki. Con? Wel, varios siman prome, nos lo invita mas tanto hende posibel pa asisti na e Conmemoracion. Den e dianan prome cu Memorial, mayoria di nos lo lesa e relatonan di Bijbel cu ta describi loke Hesus a haci y loke a pasa riba e fechanan corespondiente na aña 33. Tambe nos lo a regla nos asuntonan personal pa nos por tin sigur cu nos ta presente e dia ey. Nos ta haci nos best pa yega e reunion basta prome cu e cantica y oracion di apertura, ya asina nos por yama e bishitantenan bonbini y disfruta di henter e programa. Nos tur, tanto miembro di congregacion como bishitante, lo beneficia si nos sigui e orador den nos Bijbel segun cu e ta lesa y splica e textonan. Loke ta mas importante ta cu nos presencia na Memorial lo demostra cu nos tin aprecio profundo pa e sacrificio di Hesus y cu nos ta obedece e mandamento cu el a duna: “Sigui haci esaki na mi memoria.”—1 Cor. 11:24.
^ E experto Aleman, Heinrich Meyer, a bisa cu e apostelnan lo no a pensa cu di berdad nan tabata bay come e curpa di Hesus y bebe su sanger, pasobra “e curpa di Hesus tabata hente ainda (na bida ainda).” Tambe el a bisa cu Hesus a uza “palabranan simpel” pa splica loke e pan cu e biña a representa y cu Hesus lo no tabata kier pa su apostelnan comprond’e robes.
