1, 2. Dicon tin asina tanto engaño awe, y den ki forma esaki ta bin padilanti? (Wak e prome plachi.)

 ENGAÑO y mentira ta masha normal den e mundo cu nos ta biba awe. Y esaki no mester sorprende nos pasobra Bijbel ta mustra bon cla cu Satanas e Diabel, kende ta gobernante di e mundo aki, ta experto den gañamento. (1 Tim. 2:14; 1 Juan 5:19) Mas cerca e fin di e mundo malbado aki yega, mas furioso Satanas ta bira pasobra e sa cu “a ked’e masha poco tempo.” (Rev. 12:12) Pesey, nos por spera cu e personanan cu ta bou di influencia di Satanas ta sigui bin cu mas mentira pa purba di gaña specialmente e sirbidornan di Jehova.

² Tin biaha, medionan di comunicacion ta publica mitar berdad of mentiranan flagrante tocante Jehova su sirbidornan y nan creencianan. Si, hende sa uza corant, programa di television y Internet pa plama mentira. Y algun hende cu ta core kere e mentiranan aki sin haci sigur cu nan ta berdad ta keda confundi of hasta ta rabia.

3. Kico por yuda nos contraresta engaño?

³ Nos ta masha contento cu nos tin e Palabra di Dios, cu ta probechoso pa “rectifica cosnan”; e ta yuda nos contraresta e mentiranan di nos enemigo Satanas. (2 Tim. 3:16, nota) For di e palabranan cu apostel Pablo a skirbi na e cristiannan na Tesalonica, nos por compronde cu algun di nan a ser engaña. El a urgi nan pa “no perde cabes mucho lihe”, of manera Beibel na papiamentu koriente ta bisa, pa nan ‘no laga nada kita nan lihé fo’i skel.’ (2 Tes. 2:1, 2) Awor, ki les nos por saca for di Pablo su spiertamento amoroso, y con nos por aplica esakinan den nos bida?

4. Ki spiertamento relaciona cu “e dia di Jehova” Pablo a duna e cristiannan na Tesalonica, y con nos ta ser spierta awe?

⁴ Den Pablo su prome carta na e congregacion di  Tesalonica, el a hala atencion na e binida di “e dia di Jehova.” E no tabata kier pa su rumannan ta mal prepara pa e dia ey ni confundi. Pesey, el a urgi nan pa como ‘yiunan di luz’, nan ‘keda lanta y mantene nan sano huicio.’ (Lesa 1 Tesalonicensenan 5:1-6.) Awe nos ta spera riba e destruccion di Babilonia e Grandi, e imperio mundial di religion falso. Esaki lo ta comienso di e gran dia di Jehova. Nos ta contento cu nos sa con Jehova ta bay cumpli cu su proposito. Ademas, mediante e congregacion cristian, regularmente nos ta haya recordatorionan oportuno cu ta yuda nos mantene nos sano huicio. Si nos ta haci caso di e spiertamentonan aki, esaki por yuda fortalece nos determinacion pa rindi ‘sirbishi sagrado na Dios cu nos capacidad di pensa.’—Rom. 12:1.

5, 6. (a) Kico Pablo a splica den su di dos carta na e Tesalonicensenan? (b) Kico Dios lo haci pronto mediante Hesus, y kico nos mester puntra nos mes?

⁵ Djis despues cu Pablo a manda su prome carta pa e cristiannan na Tesalonica, el a manda su di dos carta. Den esaki el a hala atencion na e binidero tribulacion ora cu Señor Hesus lo ehecuta e huicio di Dios riba “esnan cu no conoce Dios y riba esnan cu no ta obedece e bon noticia.” (2 Tes. 1:6-8) Loke awe ta capitulo 2 di e carta aki ta mustra cu ora algun hende den e congregacion ey a tende cu e binida di e dia di Jehova tabata masha cerca, nan a haya miedo y a keda perturba. (Lesa 2 Tesalonicensenan 2:1, 2.) E cristiannan di prome siglo no tabatin pleno comprondemento di e manera cu Jehova lo cumpli cu su proposito. Y Pablo a admiti esaki ora el a skirbi: “Nos tin conocemento parcial y nos ta profetisa parcialmente; pero ora loke ta completo yega, loke ta parcial lo yega na su fin.” (1 Cor. 13:9, 10) No obstante, e spiertamentonan cu Pablo, apostel Pedro y otro fiel ruman hombernan ungi di e tempo ey a skirbi bou di inspiracion a yuda e cristiannan keda cu un fe firme.

⁶ Por ehempel, pa corigi loke e cristiannan tabata pensa, Jehova a inspira Pablo pa splica cu apostasia na gran escala y “e homber di maldad” mester a bin prome cu e dia di Jehova. * Despues di esey, na  Jehova su debido tempo, Señor Hesus lo caba cu “e homber di maldad” y tur esnan cu esaki a gaña. Apostel Pablo a mustra cu nan lo haya e castigo aki pasobra “nan no a acepta pa stima e berdad.” (2 Tes. 2:3, 8-10) Pesey, ta bon pa nos puntra nos mes: ‘Cuanto ami ta stima e berdad? Mi ta al dia cu nos comprondemento biblico? Mi ta lesa y studia e revista aki y tur otro publicacion basa riba Bijbel cu e esclavo fiel ta percura pa e pueblo di Dios mundialmente?’

7, 8. (a) Ki peliger e prome cristiannan a confronta? (b) Kico specialmente ta un peliger pa berdadero cristiannan awe?

⁷ Nos tin cu admiti cu no ta e apostatanan y nan siñansanan so ta forma un peliger pa cristiannan. Den un carta na Timoteo, Pablo a skirbi cu “amor pa placa ta raiz di tur sorto di cos perhudicial” y cu “algun hende cu a cay pa e amor aki a desvia for di fe y a causa nan mes hopi dolor.” (1 Tim. 6:10) Un otro peliger cu constantemente ta menasa cristiannan ta “e obranan di carni.”—Gal. 5:19-21.

⁸ Pero apostel Pablo a spierta e cristiannan na Tesalonica enfaticamente di e peliger di e hombernan cu, den un otro carta, el a yama “apostelnan falso.” Si, entre e cristiannan na Tesalonica tabatin hombernan cu tabata “troce e berdad pa pone e discipelnan bay nan tras.” (2 Cor. 11:4, 13; Echo. 20:30) Mas despues, Hesus a elogia e congregacion na Efeso pasobra nan no a “tolera mal hende.” Nan a pone e hendenan ey “na prueba” y a haya sa cu nan ta apostel falso y mentiroso. (Rev. 2:2) Den su di dos carta na e Tesalonicensenan, Pablo a duna e siguiente conseho: “Nos ta duna boso instruccion, rumannan, den nomber di nos Señor Hesucristo, pa boso kita pia for di tur ruman cu ta hiba un bida desordena.” Despues, el a menciona specificamente cristiannan cu “no kier traha.” (2 Tes. 3:6, 10) Si for di un hende cu no kier a traha mes nan tabatin cu kita pia, of keda leu, cuanto mas esey lo mester tabata e caso cu hende cu cuminsa comporta nan mes manera apostata? Si, asociacion estrecho cu hende asina tabata masha peligroso den e tempo ey y e cristiannan no mester a anda cu personanan asina. Esey ta conta pa nos awe tambe.—Prov. 13:20.

9. Dicon nos mester tene cuidou ora un persona cuminsa specula of critica otro sirbidor di Jehova?

⁹ E tribulacion grandi y e fin di e mundo malbado aki ta masha cerca. Pues, e spiertamentonan cu e cristiannan a ricibi for di Jehova den prome siglo ta hasta mas importante awe. Y nos no kier “acepta Dios su bondad inmereci y keda sin cumpli cu su proposito.” Esey por pone nos perde e oportunidad di biba pa semper, sea den cielo of riba tera. (2 Cor. 6:1) Pesey, nos mester tene cuidou ora un persona cu ta asisti na nos reunionnan cuminsa specula riba cosnan cu Bijbel no ta splica of critica otronan cu ta sirbi Jehova.—2 Tes. 3:13-15.

10. Na ki siñansanan Pablo a urgi e cristiannan na Tesalonica pa pega?

¹⁰ Pablo a urgi su rumannan na Tesalonica pa “para firme” y pega na loke nan a siña. (Lesa 2 Tesalonicensenan 2:15; wak nota.) Na cua siñansanan, of “tradicionnan”, Pablo a manda nan pega? Eseynan sigur no tabata loke religion falso tabata siña hende como e berdad di Bijbel. Mas bien, Pablo tabata referi na e siñansanan di Hesus y loke Dios a inspira e y  otronan pa skirbi y siña hende. Hopi di e siñansanan aki a bira parti di e Scritura. Pablo a elogia su rumannan den e congregacion na Corinto, pasobra nan ‘a corda riba dje den tur cos y a tene duro na e tradicionnan, manera el a pasa esakinan pa nan.’ (1 Cor. 11:2) Como cu e siñansanan aki a bin di Jehova y di su Yiu, hende por a pone confianza den nan.

11. Con engaño por afecta un persona?

¹¹ Ora Pablo a skirbi su carta na e Hebreonan, el a hala atencion na dos manera cu un cristian por perde su fe y stop di para firme. (Lesa Hebreonan 2:1; 3:12.) El a uza e verbonan “drif bay” y “aleha for di.” Un boto por drif bay for di canto di lama sin cu hende ta ripara esey na prome instante. Y pocopoco, e por drif bay mas y mas leu. Di otro banda, un hende mes por pusha su boto for di canto. Tur e dos situacionnan aki ta ilustra loke por pasa ora un persona permiti su mes ser engaña y laga su confianza den e berdad mengua.

12. Kico ta e cosnan cu por afecta nos relacion cu Jehova awe?

¹² Kisas algun di e cristiannan na Tesalonica a permiti otronan gaña nan. Y kico di nos awe? Tin masha hopi cos cu por kita nos tempo. Pensa riba e cantidad di tempo cu hende ta gasta pa mantene contacto cu amigonan via retnan social, pa lesa y contesta mensahe via medionan electronico, practica un hobby y pa keda al dia cu resultadonan di deporte. Tur e actividadnan aki por distrai un cristian y mengua su celo. Anto kico por ta e resultado? Su oracionnan sincero ta mengua, e ta dedica menos tempo na estudio di Bijbel, na e trabou di predica of e ta cuminsa falta reunion. Awor, kico nos por haci pa nos no kita lihe fo’i skel?

13. Manera Bijbel a profetisa, ki actitud hopi hende tin, y con nos por proteha nos fe?

¹³ Un cos cu sigur por yuda nos ta si nos keda corda cu nos ta bibando den “e ultimo dianan” y cu asociacion cu hende cu no ta reconoce esey por ta peligroso. Relaciona cu e tempo aki, apostel Pedro a skirbi: “Lo tin hacido di bofon cu ta actua segun nan propio deseonan y cu ta bisa den forma di cherche: ‘El a priminti cu lo e bin, pero unda su binida a keda? Figura bo, for di dia cu nos antepasadonan a bay sosega, tur cos ta sigui exactamente manera nan tabata for di cuminsamento di creacion.’” (2 Ped. 3:3, 4) Si nos ta lesa Bijbel tur dia y studi’e regularmente, esaki lo yuda nos keda corda cu nos ta bibando den “e ultimo dianan.” E apostasia cu Bijbel a profetisa di dje a cuminsa hopi tempo pasa y te awe e ta sigui. Si, “e homber di maldad” ta existi ainda y ta sigui opone e sirbidornan di Dios. Pesey, awor mas cu nunca, nos mester keda alerta y consciente cu e dia di Jehova ta cerca.—Sof. 1:7.

14. Con e trabou di predica ta proteha nos?

¹⁴ Experencia ta mustra cu un manera importante cu nos por evita cu nos ta kita fo’i skel ta di predica e bon noticia regularmente. Pues, ora Cristo Hesus, e Cabes di e congregacion cristian, a manda su siguidornan pa haci discipel di hende di tur nacion y siña nan haci tur loke el a siña nan, e tabata dunando un conseho cu lo a proteha su siguidornan. (Mat. 28:19, 20) Pero, pa nos por cumpli cu su mandato, nos mester predica cu entusiasmo. Bo ta kere cu e cristiannan di Tesalonica lo a sinti nan bon si nan tabata predica y siña hende na un manera rutinario djis pasobra nan a sinti cu nan tabata obliga di  haci esey? Corda cu Pablo a bisa nan pa ‘no paga e candela di spirito santo ni trata profecia cu desprecio.’ (1 Tes. 5:19, 20) Anto e profecianan cu nos ta studia y ta splica hende ta hopi interesante, no ta berdad?

15. Menciona algun cos cu nos por haci durante nos Adoracion Como Famia.

¹⁵ Ta logico cu nos kier yuda nos famia mehora nan predicacion. Pa logra esey, hopi ruman ta uza un parti di nan Adoracion Como Famia pa prepara pa sirbishi. Kisas boso por prepara pa rebishita hende cu a mustra interes. Preguntanan cu boso por pensa riba ta entre otro: Ki topico lo bo papia riba dje na e siguiente bishita? Kico bo por bisa pa sigui lanta e persona su interes? Ki ora ta mihor pa haci rebishita? Tin hopi ruman tambe cu ta uza un parti di nan Adoracion Como Famia pa prepara pa e reunionnan di congregacion asina nan por ta na altura di loke lo ser trata na e reunionnan ey. Abo por haci mas pa participa? Wel, ora bo ta participa durante e reunionnan, bo ta fortalece bo fe, y esaki ta evita cu bo ta ser kita fo’i skel. (Sal. 35:18) Si, Adoracion Como Famia ta evita cu nos ta cuminsa specula of duda.

16. Kico ta motiva cristiannan ungi pa mantene nan capacidad di pensa y no laga nada kita nan fo’i skel?

¹⁶ A traves di añanan, Jehova a bendiciona su pueblo cu mas y mas comprondemento di profecia di Bijbel. Esaki ta duna nos e confianza cu tin un maraviyoso recompensa ta spera nos. E cristiannan ungi tin e speransa di uni cu Cristo den cielo. Esaki sigur ta motiva nan pa sigui haci esfuerso pa nada no kita nan fo’i skel. Loke Pablo a bisa e cristiannan na Tesalonica ta conta pa nan tambe. El a bisa nan: “Nos ta sinti nos obliga di gradici Dios pa boso, rumannan stima pa Jehova, ya cu debi na boso fe den e berdad, el a scoge boso ..., santificando boso cu su spirito.”—2 Tes. 2:13.

17. Ki animacion nos ta haya na 2 Tesalonicensenan 3:1-5?

¹⁷ Hende cu tin e speransa di biba pa semper riba tera tambe ta haci esfuerso pa nada no kita nan fo’i skel. Si abo tin e speransa di biba pa semper riba tera, haci caso di e animacion amoroso cu Pablo a duna su compañeronan ungi na Tesalonica. (Lesa 2 Tesalonicensenan 3:1-5.) Nos mester ta hopi agradecido pa e palabranan amoroso ey. Si, e cartanan na e cristiannan na Tesalonica ta spierta nos seriamente pa no specula ni kere den ideanan cuestionabel. Y como cu nos ta bibando asina cerca di e fin, nos ta hopi contento cu e spiertamentonan aki.