1, 2. (a) Ken su casamento lo causa alegria den cielo? (b) Ki preguntanan ta lanta?

PREPARACION di un casamento semper ta tuma tempo. E casamento cu nos ta bay papia di dje ta un casamento masha special—e casamento di un rey. Preparacion pa e casamento aki ta tumando luga casi 2.000 aña caba. Bo por imagina bo esey? Awor si e tempo pa e bruidegom uni cu su bruid ta yegando. Pronto musica alegre lo yena palacio di e Rey y multitud di bos celestial lo canta: “Alaba Jah! Pasobra Jehova nos Dios, e Todopoderoso, a cuminsa reina como rey. Laga nos alegra y keda masha contento y dun’e gloria, pasobra e ora pa e casamento di e Lamchi a yega, y su bruid a prepara su mes caba pa e casamento.”—Rev. 19:6, 7.

² Sin duda, “e Lamchi” cu e texto aki ta papia di dje ta Hesucristo. (Juan 1:29) Con e bruidegom aki ta bisti pa su casamento? Ken ta su bruid? Con e bruid ta ser prepara pa e matrimonio? Na ki tempo e casamento aki lo tuma luga? E casamento aki lo causa gran alegria den cielo. Pero, kico di e personanan cu tin speransa di biba pa semper riba tera? Nan ­tambe lo alegra? Nos ta ansioso pa haya contesta pa e preguntanan aki, pesey laga nos sigui analisa Salmo 45.

3, 4. (a) Kico e salmista a bisa tocante e pañanan di casamento di e Bruidegom, y kico ta hacie mas y mas feliz? (b) Ken “e yiu muhernan di reynan” y “e reina” cu ta alegra cu e Bruidegom ta simbolisa?

³ Lesa Salmo 45:8 y 9. E Bruidegom, kende ta Hesucristo, ta bisti su paña real pa e casamento. Su pañanan tin un fragancia dushi manera di e “mihor specerijnan” tal como mirra y casia. Esakinan ta algun di e specerijnan cu nan tabata uza pa traha e zeta santo di ungimento cu nan ­tabata uza na Israel.—Exo. 30:23-25.

⁴ E dushi musica celestial cu ta yena e palacio ta pone e Bruidegom sintie mas y mas feliz segun cu e dia di su casamento ta yega cerca. E “reina” tambe ta comparti e goso di e Bruidegom. E reina ta simbolisa e parti celestial di Jehova su organisacion, cu ta consisti di e angelnan santo, cu Bijbel ta referi na dje tambe como e “yiu muhernan di reynan.” Ta masha emocionante pa tende bosnan celestial declara: “Laga nos alegra y keda masha contento ... pasobra e ora pa e casamento di e Lamchi a yega”!

5. Ken lo bira “esposa di e Lamchi”?

⁵ Lesa Salmo 45:10 y 11. Nos a identifica e Bruidegom, pero ken ta su bruid? E bruid no ta un persona literal; e ta simbolisa tur e 144.000 cristiannan ungi cu ta forma e congregacion ungi cu Hesucristo ta dirigi. (Lesa Efesionan 5:23, 24.) Ta e cristiannan ungi aki lo bay reina hunto cu Cristo den su Reino Mesianico. (Luc. 12:32) Nan ta “sigui e Lamchi unda cu e bay.” (Rev. 14:1-4) Nan ta bira “esposa di e Lamchi” y lo biba hunto cu ne den cielo.—Rev. 21:9; Juan 14:2, 3.

6. Dicon Bijbel ta referi na e unginan como “yiu muher di rey”, y dicon nan a haya instruccion pa ‘lubida nan pueblo’?

⁶ Bijbel ta referi na e futuro bruid aki no solamente como “yiu muher” pero tambe como “yiu muher di rey.” (Sal. 45:13) Ken ta e otro “rey” aki cu Salmo 45:13 ta papia di dje? Jehova naturalmente, pasobra ta Jehova a adopta e cristiannan ungi como su ‘yiunan.’ (Rom. 8:15-17) Y como cu e unginan tin cu bira un bruid celestial, nan a haya instruccion pa ‘lubida nan pueblo y cas di nan tata [terenal].’ Nan tin cu keda cu nan “mente fiha riba e cosnan di ariba, no riba e cosnan cu ta riba tera.”—Col. 3:1-4.

7. (a) Con Cristo ta preparando su futuro bruid? (b) Con e bruid ta mira su futuro Bruidegom?

⁷ Cristo tin siglonan ta prepara su futuro bruid pa nan matrimonio celestial. Apostel Pablo a bisa cu Cristo “a stima e congregacion y a entrega su bida p’e, pa e por santific’e door di purific’e cu e baño di awa pa medio di e palabra, pa e por presenta e congregacion na su mes den su splendor, sin mancha, sin plooi ni nada parecido, pa e congregacion por ta santo y sin defecto.” (Efe. 5:25-27) Pablo a skirbi e cristiannan ungi na Corinto di antiguedad: “Mi ta profundamente interesa den boso, pasobra ami personalmente a priminti boso den matrimonio na un esposo, esta, Cristo, y mi kier presenta boso como un birgen puro na dje.” (2 Cor. 11:2) Hesucristo, e Bruidegom, ta balora e bunitesa spiritual di su futuro bruid. E bruid, na su turno, ta ‘buig dilanti’ di su futuro esposo y ta acept’e boluntariamente como su “señor.”

8. Dicon ta apropia cu Bijbel ta bisa cu e bruid ta “den tur su gloria”?

⁸ Lesa Salmo 45:13 y 14a. “Den tur su gloria”, e bruid ta presenta pa e casamento  real. Si, e ta masha bunita “dorna pa su bruidegom.” Revelacion 21:2 ta compara e bruid cu un stad, Jerusalem Nobo, y ta bisa cu e tin “e gloria di Dios.” E stad celestial aki ta briya manera ‘un piedra masha precioso, si, manera un piedra di yaspe cu ta briya cla manera cristal.’ (Rev. 21:10, 11) Manera nos a mira, e buki di Revelacion ta describi e splendor di Jerusalem Nobo na un manera masha bunita. (Rev. 21:18-21) No ta nada straño cu e salmista a bisa cu e bruid aki ta “den tur su gloria”! No por ta otro, pasobra ta den cielo e casamento aki lo tuma luga.

9. Ken ta e “rey” cu nan ta hiba e bruid cerca dje, y con e bruid ta bisti?

⁹ Nan ta hiba e bruid pa su Bruidegom, kende ta e Rey di e Reino Mesianico. El a prepara su bruid, purificand’e “cu e baño di awa pa medio di e palabra.” E bruid ta “santo y sin defecto.” (Efe. 5:26, 27) Anto e bruid mester ta apropiadamente bisti pa e ocasion. Y esey ta e caso tambe pasobra su bisti ta “geweef cu hilo di oro”, y cu su “paña tur borda” nan ta ‘hib’e cerca e rey.’ Pa e casamento cu e Lamchi, ta ‘permiti e bruid bisti linen fini, briyante y limpi; pasobra e linen fini ta representa e echonan husto di e santonan.’—Rev. 19:8.

10. Na ki tempo e casamento di e Lamchi lo tuma luga?

¹⁰ Lesa Revelacion 19:7. Na ki tempo e casamento di e Lamchi lo tuma luga? Maske Revelacion 19:7 ta bisa cu e bruid ta “prepara su mes” pa e casamento, e versiculonan cu ta sigui no ta describi e casamento mes. Nan ta duna un descripcion bibo di e ultimo fase di e tribulacion grandi. (Rev. 19:11-21) Acaso esaki ta nifica cu e casamento lo tuma luga prome cu e Rey completa su victoria? No. E visionnan den e buki di Revelacion no ta skirbi den orden cronologico. Salmo 45 ta mustra cu e casamento real aki lo tuma luga despues cu Hesucristo, e Rey, faha su spada y derota su enemigonan.—Sal. 45:3, 4.

11. Den ki orden Cristo lo derota su enemigonan?

¹¹ A base di loke Bijbel ta bisa, nos por conclui cu e sucesonan lo tuma luga den e siguiente orden: Prome, “e gran prostituta”, Babilonia e Grandi, cu ta simbolisa e imperio mundial di religion falso, lo ser elimina completamente. (Rev. 17:1, 5, 16, 17; 19:1, 2) Despues, Cristo lo destrui e resto di Satanas su mundo malbado na Armagedon, “e guera cu lo tuma luga riba e gran dia di Dios.” (Rev. 16:14-16; 19:19-21) Finalmente, e Rey-Guerero lo completa su victoria, tirando Satanas y su demoñonan den abismo, unda nan lo ta inactivo, comosifuera morto.—Rev. 20:1-3.

12, 13. (a) Na ki tempo e casamento di e Lamchi lo tuma luga? (b) Ken ta esnan cu lo alegra den cielo debi na e casamento di e Lamchi?

¹² Durante Cristo su presencia, cristiannan ungi cu keda fiel te na morto ta ser ­resucita pa biba den cielo. Poco despues di e destruccion di Babilonia e ­Grandi, Hesus lo tuma e resto di e 144.000 rumannan ungi pa nan ta den cielo hunto cu ne. (1 Tes. 4:16, 17) Consecuentemente, prome cu e guera di Armagedon cuminsa, tur e personanan cu ta forma e “bruid” lo ser tuma den cielo. Despues di Armagedon, e casamento di e Lamchi lo tuma luga. Esey lo ta sin duda un ocasion masha gososo! Revelacion 19:9 ta bisa: “Feliz ta esnan invita na e bankete di casamento di e Lamchi.” Si, e bruid lo ta realmente feliz. E Bruidegom tambe lo ta sumamente feliz ya cu tur e miembronan cu ta forma e 144.000 ta hunto cu ne. Manera Bijbel ta bisa na un manera simbolico, nan ta  come y bebe hunto cu Hesus na mesa den su Reino. (Luc. 22:18, 28-30) Pero no ta e bruid y e Bruidegom so ta alegra cu nan casamento.

¹³ Manera nos a lesa anteriormente, bosnan den cielo lo canta: ‘Laga nos alegra y keda masha contento y duna [ Jehova] gloria, pasobra e ora pa e casamento di e Lamchi a yega, y su bruid a prepara su mes caba pa e casamento.’ (Rev. 19:6, 7) Awor, kico di Jehova su sirbidornan riba tera? Nan tambe lo celebra?

14. Ken ta “e birgennan” cu Salmo 45 ta papia di dje?

¹⁴ Lesa Salmo 45:12, 14b y 15. Profeta Zacarias a bisa cu den e ultimo dianan hende di rond mundo lo ta contento di por sirbi Jehova hunto cu e resto di Israel spiritual. El a skirbi: “Den e dianan ey dies homber for di tur e nacionnan lo coge bisti di un Hudiu tene, bisando: ‘Laga nos bay cu boso, pasobra nos a tende cu Dios ta cu boso.’” (Zac. 8:23) Salmo 45:12 ta referi na e ‘dies hombernan’ simbolico aki como “e yiu muher di Tiro” y “e riconan den e pueblo.” Nan ta duna e resto di e rumannan ungi regalo y ta traha duro pa apoya nan y alabes nan ta busca yudansa di e rumannan aki pa sirbi Jehova. Desde 1935 padilanti, e resto di e rumannan ungi a guia miyones di hende “na husticia”: Nan a siña nan e berdad tocante Jehova. (Dan. 12:3) E compañeranan leal aki di e rumannan ungi a purifica nan mes: Nan a elimina tur lastro di religion falso for di nan bida. Ta pesey Bijbel ta yama e compañeranan aki di e bruid ‘birgen.’ Nan a dedica nan bida na Jehova y a proba cu nan ta siguidornan leal di Hesucristo, e Rey.

15. Con e compañeranan ‘birgen’ ta yuda e rumannan ungi cu ainda ta riba tera?

 ¹⁵ E resto di e rumannan ungi ta masha contento cu e yudansa cu nan compañeranan ‘birgen’ ta duna nan den e trabou di predica ‘e bon noticia di Reino’ celosamente den henter tera. (Mat. 24:14) No ta “e spirito y e bruid” so “ta sigui bisa: ‘Bin!’” E hendenan cu tende e yamada ey tambe ta bisa: “Bin!” (Rev. 22:17) Si, e ‘otro carnenan’ a tende e rumannan ungi bisa “Bin!”, pesey nan a uni cu nan pa invita hende di rond mundo pa “Bin!”—Juan 10:16.

16. Ki privilegio Jehova a duna e otro carnenan?

¹⁶ E rumannan ungi ta stima nan compañeranan y nan ta contento cu Jehova, Tata di e Bruidegom, a duna e otro carnenan tambe e privilegio di alegra ora e casamento di e Lamchi tuma luga. Manera Bijbel a profetisa, cu goso y alegria, e compañeranan ‘birgen’ ta ser hiba paden. Si, e otro carnenan, kendenan tin e speransa di biba pa semper riba tera, lo alegra hunto cu henter universo ora e matrimonio di e Lamchi tuma luga den cielo. Pesey mes e buki di Revelacion ta bisa cu e “multitud grandi” ta “para dilanti di e trono y dilanti di e Lamchi.” Nan ta rindi sirbishi sagrado na Jehova den e patio terenal di Jehova su gran tempel spiritual.—Rev. 7:9, 15.

17, 18. Ki beneficio e casamento di e Lamchi lo trece, y tata di ken Cristo lo bira durante su Reinado di Mil Aña?

¹⁷ Lesa Salmo 45:16. E compañeranan ‘birgen’ di Cristo su bruid celestial lo haya mas motibo ainda pa alegra ora nan mira e beneficionan cu e casamento aki lo trece den e mundo nobo. Hesucristo, e Rey, lo dirigi su atencion na tera y resucita su “tatanan” terenal. Debi na esaki, nan lo bira su “yiunan” terenal. (Juan 5:25-29; Heb. 11:35) Hesus lo nombra algun di e ‘yiu’ hombernan aki como “prins den henter e pais”, of tera. Y sin duda Cristo lo nombra algun di e ancianonan fiel di nos tempo tambe pa dirigi asunto den e mundo nobo.—Isa. 32:1.

¹⁸ Durante su Reinado di Mil Aña, Cristo lo bira tata di otro hende tambe. Con asina? Wel, tur hende cu haya bida eterno ta haya esaki pasobra nan a pone fe den Hesus su sacrificio di rescate. (Juan 3:16) Di e manera ey, Cristo ta bira nan “Tata Eterno.”—Isa. 9:6, 7.

19, 20. Ki efecto e sucesonan asombroso registra na Salmo 45 tin riba tur cristian berdadero di awe?

¹⁹ Lesa Salmo 45:1 y 17. No tin duda, e sucesonan registra na Salmo 45 mester interesa tur cristian. E rumannan ungi cu ainda ta riba tera ta masha contento cu pronto nan lo ser reuni den cielo hunto cu nan rumannan y nan Bruidegom, Hesucristo. E otro carnenan ta sinti nan motiva pa bira mas sumiso na nan glorioso Rey. Ademas, nan ta contento cu nan a haya e privilegio di por ta compañero di e rumannan ungi cu ta riba tera ainda. Despues di nan matrimonio, Cristo y su bruid lo bendiciona tera su habitantenan ricamente.—Rev. 7:17; 21:1-4.

²⁰ Sin duda, nos ta ansioso pa mira cumplimento di e ‘bon palabranan’, of bon noticia, tocante e Rey di e Reino Mesianico. Pero segun cu nos ta warda, nos ta sinti nos motiva pa sigui haci e Rey su nomber conoci pa asina yuda otronan “recorda” su nomber. Laga nos ta entre esnan cu ta “alaba”, of honra, e Rey “pa semper y semper.”