Situacionnan dificil por afecta nos profundamente. Nan por tormenta nos mentalmente, caba cu nos energia y pone nos cuminsa mira bida na un manera negativo. Rey David di Israel di antiguedad a hay’e cu hopi situacion dificil den bida. Con el a trata cu e situacionnan aki? Den un salmo conmovedor, David a bisa: “Cu mi bos mi ta sclama na SEÑOR; cu mi bos mi ta haci suplica na SEÑOR. Mi ta desahoga mi curason su dilanti; mi ta haci mi angustia conoci su dilanti. Ora mi spirito tabata desmaya den mi, abo tabata conoce mi berea.” Si, humildemente David a acerca Jehova pa yudansa.—Sal. 142:1-3.

Den un otro salmo, David a canta: “Un cos mi a desea di SEÑOR, esey lo mi busca: cu mi por keda den e cas di SEÑOR tur e dianan di mi bida, pa contempla e bunitesa di SEÑOR, y pa medita den su tempel.” (Sal. 27:4) Maske David no tabata un levita, purba di visualis’e para pafo di e patio santo, banda di e tabernakel, e centro di adoracion berdadero. E tabata asina agradecido na Jehova cu e kier a pasa e resto di su bida na e tabernakel, of e tempel, ‘contemplando e bunitesa di Jehova.’

E palabra Hebreo cu a ser traduci como “bunitesa” ta referi na Jehova Dios su grandeza y gloria, caracteristicanan bunita pa medita riba dje. David semper a balora e areglo, of sistema, cu Dios a establece pa hende por rindi adoracion aceptabel na Dje, y pesey e tabata medita riba e areglo aki. Ta bon pa nos puntra nos mes: ‘Mi ta sinti mescos cu David a sinti?’

Den nos tempo, Dios su areglo pa rindi adoracion aceptabel na dje no ta basa riba un tempel literal. Mas bien, e ta encera Dios su gran tempel spiritual; esaki ta Jehova su areglo sagrado pa rindi adoracion aceptabel na dje. * Si nos ta “medita” riba e areglo aki, nos tambe por ‘contempla e bunitesa di Jehova.’

Laga nos papia un rato tocante e altar pa ofrenda kima cu tabata fura cu koper (NW) y cu tabata situa dilanti di e entrada di e tabernakel. (Exo. 38:1, 2; 40:6) E altar ey a simbolisa Dios su boluntad pa acepta Hesus su curpa humano como sacrificio. (Heb. 10:5-10) Bo ta compronde kico esey ta nifica pa nos? Apostel Pablo a skirbi: “Tempo nos tabata enemigo di Dios nos a reconcilia cu ne pa medio di e morto di su Yiu.” (Rom. 5:10) Pues, si nos pone fe den Hesus su sacrificio, nos por tin e aprobacion di Dios y disfruta di e confianza cu E tin cu su amigonan. Si, nos lo tin un amistad, of ‘comunion, intimo cu Jehova.’—Sal. 25:14.

Ademas, debi cu Jehova ta ‘pordona nos picanan’, nos ta sinti nos “refresca.” (Echo. 3:19) Nos por compara nos situacion cu esun di un prizonero cu a haya pena di morto pero cu ta sinti duele di e cosnan malo cu el a comete den pasado y cu ta haciendo cambionan drastico durante e tempo cu e ta warda pa su sentencia ser ehecuta. Y un hues bondadoso ta mira e cambionan aki y ta sintie motiva pa haci e carchi di castigo di e homber aki limpi y ta kita e castigo di morto. Bo por imagina bo con alivia y contento e prizonero aki lo sintie? Jehova ta mescos cu e hues ey; e ta mustra fabor na hende cu arepenti y ta kita nan sentencia di morto.

David por a tuma nota di varios aspecto di adoracion berdadero cu tabata tuma luga na e cas di  Jehova. Esakinan tabata, entre otro, e reunimento di multitud di Israelita na e tent di reunion, lesamento y dunamento di splicacion di e Ley di Moises, kimamento di sencia y e sirbishi sagrado cu e sacerdotenan y e levitanan tabata rindi na Dios. (Exo. 30:34-38; Num. 3:5-8; Deu. 31:9-12) Tur e aspectonan aki cu a tuma luga den Israel di antiguedad ta representa algo den nos tempo.

Mescos cu den pasado, nos tambe ta sinti “ki bon y ki dushi ta pa rumannan biba hunto den harmonia!” (Sal. 133:1) Actualmente, nos “hermandad” mundial ta consisti di miyones di ruman. (1 Ped. 2:17) Na nos reunionnan, nos ta lesa y splica e Palabra di Dios. Mediante su organisacion, Jehova ta percura un bon programa di instruccion spiritual pa nos. Ademas, nos tin un abundancia di literatura biblico cu nos por uza pa nos estudio personal of durante nos anochi di Adoracion Como Famia. Un miembro di e Cuerpo Gobernante a remarca: ‘E echo cu mi ta medita riba Jehova su Palabra y su nificacion y ta haci esfuerso pa compronde loke mi ta lesa ta yena mi bida cu rikesa spiritual y satisfaccion.’ Si, ‘conocemento por ta agradabel na nos alma.’—Prov. 2:10.

Awe tambe Jehova su sirbidornan ta acerc’e diariamente den oracion. Pa Jehova, e oracionnan sincero aki ta manera aroma di sencia dushi. (Sal. 141:2) Ta masha dushi pa sa cu Jehova ta scucha nos cu masha placer ora nos ta acerc’e humildemente den oracion! Si, esey ta agradabel na nos alma.

Moises a resa pidi Dios: “Laga e gracia di Señor nos Dios keda riba nos, y confirma e obra di nos mannan.” (Sal. 90:17) Si, si nos ta cumpli cu nos trabou di predica celosamente, Jehova ta bendiciona nos trabou. (Prov. 10:22) Kisas, nos a yuda varios hende haya e berdad. Podise nos tin varios aña ta predica e bon noticia fielmente a pesar di apatia, maleza, dolor emocional of oposicion. (1 Tes. 2:2) No obstante, nos ta “contempla e bunitesa di SEÑOR” y ta realisa cu nos Tata celestial ta balora nos esfuersonan inmensamente.

David a canta: ‘[Jehova] ta e porcion di mi herencia y mi copa. E liñanan a cay pa mi den luganan placentero; bunita ta e herencia cu ta toca mi.’ (Sal. 16:5, 6) David tabata contento cu su “porcion”, esta, e bon relacion cu e tabatin cu Jehova y e privilegio di por sirbie. Ta berdad cu nos tambe por pasa den situacion dificil mescos cu David. Pero, nos tin tambe un abundancia di bendicion spiritual. Pesey, laga nos ta contento cu nos tin e berdad y sigui “medita” semper riba Jehova su tempel spiritual.