1. Ki situacion tristo hende ta confronta awe?

NUNCA Jehova tabata kier pa hende bira bieu y sufri. Al contrario, su proposito tabata pa tur hende, tanto homber como muher, disfruta di salud perfecto y biba den Paradijs. Pero realidad ta cu awe “henter creacion hunto ta sigui keha y ta keda den dolor.” (Rom. 8:22) Con bo ta kere Dios ta sinti ora e mira hende sufri pa motibo di pica cu nan a hereda? Como si fuera esey no ta basta, hopi hende di edad avansa ta ser neglisha net na e momento cu mas nan tin mester di yudansa.—Sal. 39:5; 2 Tim. 3:3.

2. Dicon nos ta contento cu nos rumannan di edad den congregacion?

² Como e pueblo di Jehova, nos ta masha contento cu nos rumannan di edad den congregacion. Nos ta beneficia di nan sabiduria y ta siña di nan ehempel di fe. Kisas un of mas di e rumannan aki ta nos mes famia. Pero, sea cu nan ta nos famia of no, nos ta interesa den nan bienestar. (Gal. 6:10; 1 Ped. 1:22) Pesey, ta bon pa nos analisa con Dios ta mira nos rumannan di edad avansa. Nos lo mira tambe ki responsabilidad miembronan di famia y congregacion tin pa cu rumannan di edad.

3, 4. (a) Kico e escritor di Salmo 71 a roga Jehova? (b) Kico rumannan di edad por pidi Jehova Dios?

³ E escritor di Salmo 71:9 a roga Dios: “No benta mi afo den  tempo di biehes; no bandona mi ora mi forsa ta faya.” Ta parce cu e salmo aki ta un continuacion di Salmo 70, cu tin como introduccion: “Di David.” Pues, probablemente ta David a haci e peticion cu nos ta lesa na Salmo 71:9. For di David su hubentud te na su biehes, el a sirbi Dios, y Jehova a uz’e pa haci cosnan grandi. (1 Sam. 17:33-37, 50; 1 Rey. 2:1-3, 10) Asina mes, David a sinti necesidad di pidi Jehova pa sigui bendicion’e y cuid’e.—Lesa Salmo 71:17, 18.

⁴ Awe, hopi di nos rumannan ta manera David. A pesar di edad avansa y “dianan malo”, nan ta sigui alaba Dios lo mihor cu nan por. (Ecl. 12:1-7) Den varios aspecto di bida, incluso nan sirbishi cristian, hopi di nan kisas no por haci mes tanto cu nan tabata haci antes. Pero nan tambe por roga Jehova pa sigui bendiciona nan y cuida nan. Y e rumannan fiel aki por ta sigur cu Dios lo contesta nan oracionnan. Al fin y al cabo, nan oracionnan ta expresa e mesun inkietudnan cu David a expresa bou di inspiracion divino.

5. Con Jehova ta mira rumannan di edad?

⁵ Bijbel ta mustra bon cla cu Jehova ta balora rumannan di edad masha hopi y cu ta su boluntad pa su sirbidornan honra e rumannan aki. (Sal. 22:24-26; Prov. 16:31; 20:29) Por ehempel, Levitico 19:32 ta bisa: “Lanta para pa esun cu tin cabey blanco, honra e anciano y teme bo Dios; Ami ta SEÑOR.” Si, tempo cu e palabranan aki a ser skirbi, e responsabilidad di honra rumannan di edad tabata algo serio, y te awe ta asina. Pero ta ken tin e responsabilidad di cuida nan?

6. Ki ehempel encuanto cuido di mayornan Hesus a pone?

⁶ E Palabra di Dios ta bisa nos: “Honra bo tata y bo mama.” (Exo. 20:12; Efe. 6:2) Hesus a enfatisa e importancia di e mandamento aki ora el a condena e fariseo- y escribanan, kendenan a nenga di percura pa nan mayornan. (Mar. 7:5, 10-13) Hesus mes a pone un bon ehempel. Por ehempel, ora e tabata a punto di muri na staca, el a pidi discipel Juan, kende tabata su bon amigo, pa cuida su mama. E tempo ey probablemente su mama tabata viuda.—Juan 19:26, 27.

7. (a) Ki principio encuanto cuido di mayornan apostel Pablo a duna? (b) Den ki contexto Pablo a papia e palabranan ey?

⁷ Jehova a inspira apostel Pablo pa skirbi cu cristiannan mester percura pa nan famia. (Lesa 1 Timoteo 5:4, 8, 16.) Laga nos analisa e contexto di loke Pablo a bisa Timoteo akinan. Pablo tabata splica ken lo por a haya yudansa financiero di congregacion y ken no. Pablo a mustra bon cla cu ta yiunan, nietonan of otro famia den e berdad tabatin e responsabilidad primario di percura pa nan famianan di edad, cu ta viuda. Esey lo a libra e congregacion di un carga financiero innecesario. Awe ta mescos: Un manera cu cristiannan por demostra “devocion na Dios” ta di percura materialmente pa nan famianan den necesidad.

8. Dicon ta bon cu Bijbel no ta duna instruccion specifico encuanto cuido di mayornan di edad avansa?

⁸ Simplemente bisa, cristiannan adulto tin e obligacion di percura pa e necesidadnan material di nan mayornan. Aunke Pablo tabata papia di famianan cristian, cristiannan mester percura tambe pa nan mayornan cu no ta den e berdad. Pero e manera cu yiunan ta percura pa nan mayornan por varia pasobra no ta tur situacion ta mescos. Necesidad, condicion fisico y caracter di tanto e yiunan como e mayornan por ta distinto. Algun mayor di edad tin varios yiu, mientras cu otronan tin un yiu so. Tin mayor por haya yudansa di gobierno, mientras cu otronan no. Ademas, loke e mayornan ta prefera of desea tambe por ta  distinto. Pesey, no ta sabi ni amoroso pa critica e manera cu un persona ta percura pa su famianan di edad avansa. Al fin y al cabo, Jehova por bendiciona cualkier decision cu nos tuma basa riba Bijbel y pone cu cosnan ta cana bon, mescos cu e ta haciendo pa Su pueblo desde tempo di Moises.—Num. 11:23.

9-11. (a) Ki decision dificil algun ruman sa haya nan confronta cu ne? (Wak e prome plachi.) (b) Dicon yiunan adulto no mester ta pura pa stop cu nan sirbishi di tempo completo? Duna un ehempel.

⁹ Ora yiunan ta biba leu for di nan mayornan, por ta dificil pa nan duna nan mayornan e cuido necesario. Por sosode cu diripiente yiunan mester bay bishita nan mayornan, debi cu kisas un di nan su salud a bay atras diripiente pa motibo di un caida, weso cu a kibra of cualkier otro emergencia. Despues, e mayornan kisas mester di yudansa pa un tempo cortico of un tempo mas largo. *

¹⁰ Sirbidornan di tempo completo cu ta sirbi Jehova leu fo’i cas por haya nan confronta cu decisionnan hopi dificil. Nos rumannan cu ta sirbi por ehempel como betelita, misionero of superintendente biahero ta balora nan asignacion y ta considera esaki como un bendicion di Jehova. No obstante, si nan mayornan bira malo, kisas nan prome reaccion ta: ‘Nos tin cu laga nos asignacion y bay cuida nos mayornan.’ Pero prome cu un ruman tuma un decision asina, lo ta sabi pa e haci oracion y haci sigur si su mayornan ta desea pa e haci esey of si esey ta necesario. Nos no mester ta mucho pura pa entrega nos privilegionan di sirbishi, y tin biaha esey no ta necesario tampoco. Podise e mayor su problema cu salud ta algo temporal, y algun ruman den su congregacion mes lo ta dispuesto pa yuda.—Prov. 21:5.

¹¹ Tuma por ehempel e caso di un pareha di edad na Japon. Nan tabatin dos yiu homber cu tabata sirbi Jehova leu for di cas. E yiu mas jong tabata misionero na Sur America y e otro tabata traha na nos sede mundial, na Brooklyn, New York. Ora nan mayornan di edad tabatin mester di yudansa, e dos ruman hombernan aki hunto cu nan casa a bay bishita nan mayornan na Japon pa wak kico nan por a yuda cu ne. Poco tempo despues, e pareha cu tabata biba na Sur America a hasta cuminsa pensa seriamente pa bandona nan asignacion y bay Japon bek. Pero nan a haya un yamada di e coordinador di e cuerpo di anciano di e congregacion di e mayornan. E ancianonan a papia tocante e asunto y tabata kier pa e pareha keda den nan asignacion mas tanto posibel. E ancianonan a balora loke e pareha aki tabata haci pa Jehova y tabata determina pa yuda cu e cuido di e mayornan. Henter e famia a aprecia e yudansa amoroso aki masha hopi!

12. Kico famianan cristian mester haci sigur di dje ora di dicidi con pa percura pa nan mayornan?

¹² Sea cual sea e manera cu famianan cristian scoge pa percura pa nan mayornan di edad avansa, tur esnan envolvi mester haci sigur cu nan decisionnan ta honra e nomber di Dios. Hamas nos kier ta manera e lidernan religioso den tempo di Hesus. (Mat. 15:3-6) Mas bien, nos kier pa nos decisionnan honra Dios y e congregacion cristian.—2 Cor. 6:3.

13, 14. Con Bijbel ta mustra cu congregacion tambe mester yuda cuida nos rumannan di edad avansa?

¹³ No ta tur congregacion por yuda sirbidornan di tempo completo manera e ehempel cu nos a caba di trata a mustra. No obstante, Bijbel ta mustra cu congregacionnan  mester haci tur loke nan por pa yuda rumannan di edad avansa. Bijbel ta mustra cu den e congregacion di Jerusalem di prome siglo “no tabatin ningun hende den necesidad.” Con bin? Acaso tur e rumannan tabata hende rico? No. Al contrario, algun tabata pober. Pero e congregacion tabata parti e placa cu nan tabata ricibi na contribucion entre esnan den necesidad. (Echo. 4:34, 35) Sinembargo, mas despues a surgi un problema serio den e congregacion ey. Algun di e viudanan tabata ser neglisha ora e discipelnan tabata parti “cuminda di tur dia.” Pesey, e apostelnan a encarga algun homber di bon reputacion pa haci sigur cu e viudanan tabata haya loke nan tabatin mester. (Echo. 6:1-5) Ta berdad cu e “partimento di cuminda di tur dia” tabata un areglo temporal pa yuda e personanan cu a bira cristian na Pentecoste di aña 33 di prome siglo, kendenan a keda Jerusalem un tempo pa progresa den sentido spiritual. No obstante, e decision cu e apostelnan a tuma ta mustra bon cla cu congregacionnan por yuda cuida rumannan di edad.

¹⁴ Manera nos a menciona anteriormente, Pablo a duna Timoteo instruccion cu ta indica ki ora un congregacion por yuda cubri necesidad di viudanan cristian. (1 Tim. 5:3-16) Jehova a inspira Santiago tambe pa skirbi cu cristiannan tin e obligacion di percura pa e huerfanonan, viudanan y otro miembronan di congregacion cu ta den situacion dificil. (Sant. 1:27; 2:15-17) Apostel Juan a puntra: “Esun cu tin e recursonan di e mundo aki pa sostene bida y ta mira su ruman den necesidad, ma ta cera su curason p’e, por bisa cu e tin amor pa Dios?” (1 Juan 3:17) Pues, si tur cristian tin e obligacion di yuda nan ruman den necesidad, no ta logico cu henter e congregacion tambe mester haci esey?

15. Ki factornan mester tene cuenta cu ne ora di percura cuido pa rumannan di edad avansa?

¹⁵ Den algun pais, gobierno ta percura pensioen di biehes, ayudo social y cuido na cas pa ciudadanonan di edad. (Rom. 13:6) Pero tin pais cu no tin e beneficionan aki. Pues, e yudansa cu famianan of congregacion mester duna rumannan di edad avansa ta depende di cada situacion. Por ehempel, cristiannan cu ta biba leu for di nan mayornan kisas lo no por yuda nan mayornan manera nan kier. Den un caso asina, ta bon pa nan papia cu e ancianonan di e congregacion na cua nan mayornan ta asisti pa haci sigur cu e cuerpo ta na altura di e circunstancianan di e  famia. Kisas e ancianonan lo por pone e mayornan na altura di cualkier yudansa cu nan lo por haya di gobierno. E ancianonan por haya sa tambe di cierto asuntonan cu nan por pone e yiunan na altura di dje, manera por ehempel cu e mayornan no ta habri nan recibonan of uza nan remedinan. Ora tin bon comunicacion entre e yiunan y ancianonan, nan por yega na solucionnan practico y evita cu e situacion di e mayornan ta empeora. Si, yiunan cu ta biba leu lo sinti nan mas trankil ora tin hende den cercania cu por yuda nan mayornan di edad y cu por tene nan na altura di e situacion di nan mayornan.

16. Con algun cristian ta yuda nan rumannan di edad den congregacion?

¹⁶ Debi na amor y cariño pa rumannan di edad, algun cristian ta uza nan energia y tempo pa haci loke nan por pa cuida e rumannan aki. Nan ta haci esfuerso extra pa mustra interes den rumannan di edad den congregacion. Algun ruman ta parti e trabou aki entre nan y nan ta tuma turno pa yuda e rumannan di edad avansa. Kisas e circunstancianan di e rumannan cu ta ofrece nan mes pa yuda no ta permiti nan traha den sirbishi di tempo completo. Pesey, nan ta contento cu nan por yuda esnan cu si ta haciendo esey keda den nan asignacion. Ki un bunita ehempel di generosidad e rumannan aki ta pone! Pero e echo cu congregacion ta yuda no ta absolve e yiunan di e responsabilidad di percura pa nan mayornan te caminda nan por.

17, 18. Ki actitud ta haci dunamento di cuido placentero?

¹⁷ Tanto e rumannan di edad avansa como esnan cu ta duna cuido por haci un situacion mas facil si nan ta haci nan best pa desplega un actitud positivo. Den algun caso, biehes por pone un hende bira desanima of hasta deprimi. Pesey, e dunado di cuido mester haci su maximo esfuerso pa honra y anima un ruman asina; e por haci esey mediante un combersacion ameno y edificante. Nos rumannan di edad avansa cu tin hopi aña ta sirbi Jehova fielmente merece elogio. Jehova no ta lubida loke e rumannan aki a haci den su sirbishi, y nos tampoco.—Lesa Malakias 3:16; Hebreonan 6:10.

¹⁸ Ademas, ora personanan di edad y esnan cu ta cuida nan tin un sentido di humor, lo bira mucho mas facil pa cumpli cu e tareanan di tur dia. (Ecl. 3:1, 4) Hopi ruman di edad avansa ta haci nan best pa nan no ta mucho exigente. Nan ta consciente cu si nan ta cariñoso, nan lo por haya mas bishita y atencion. Hopi biaha bo ta tende hende cu bishita un ruman di edad bisa: “M’a bay pa anim’e, pero ta e a anima mi.”—Prov. 15:13, 17:22.

19. Kico por yuda rumannan di edad y rumannan mas hoben keda fuerte den situacion dificil?

¹⁹ Nos tur ta anhela e dia cu hende lo ta perfecto y cu lo no tin sufrimento mas. Mientrastanto, Jehova su sirbidornan mester keda cu nan bista fiha riba e futuro eterno. Fe den e promesanan di Dios ta yuda nos keda fuerte den situacion dificil. Debi na e fe ey, “nos no ta entrega; pasobra maske e hende cu nos ta di pafo ta caba na nada, siguramente e hende cu nos ta di paden ta renoba su mes dia tras dia.” (2 Cor. 4:16-18; Heb. 6:18, 19) Awor, kico mas lo por yuda nos cumpli cu nos responsabilidad di cuida rumannan di edad avansa? E siguiente articulo lo duna algun sugerencia practico.