1. Dicon e manera cu nos ta trata hende den sirbishi ta importante? Duna un ehempel. (Wak e prome plachi.)

UN PAR di aña pasa, ora un pareha cristian na Fidji tabata invita hende pa e Conmemoracion di e morto di Cristo, awa a cuminsa yobe. Net na momento ey, nan tabata combersando cu un señora pafo di su cas. E ruman homber a fia e señora un paraplu y e cu su esposa a uza un otro. E pareha a keda hopi contento ora cu nan a mira e señora na Memorial. Mas despues, e señora a bisa cu e no ta corda mucho di loke e Testigonan a papia cu ne ora nan a bishit’e. Pero loke a impresion’e ta e manera cu nan a trat’e, y pesey el a bay Memorial. Con bin e bunita resultado aki? E pareha a sigui un conseho di Hesus cu a bira hopi famoso.

2. Kico ta e Regla di Oro, y kico nos tin cu haci pa por sigui esaki?

² Cua conseho di Hesus e pareha a sigui? Wel, e asina yama Regla di Oro cu nos ta haya na Mateo 7:12, cu ta bisa: “Tur loke boso kier pa hende haci cu boso, boso tambe mester haci cu nan.” Awor, kico nos tin cu haci pa nos por sigui e conseho ey? Basicamente, nos tin cu haci dos cos: Prome, puntra bo mes: ‘Si ami tabata den sapato di e persona ey, con lo mi tabata kier pa  hende trata mi?’ Di dos, haci bo maximo esfuerso pa trata e persona asina.—1 Cor. 10:24.

3, 4. (a) Splica dicon no ta ora nos ta trata cu nos rumannan den fe so nos mester sigui e conseho di Hesus. (b) Kico nos lo trata den e articulo aki?

³ Hopi bes, nos ta sigui e conseho famoso aki di Hesus ora nos ta trata cu nos rumannan den fe. Pero ta nos rumannan so nos mester trata asina? No! Ora Hesus a duna e conseho aki, e tabata papiando di e manera cu nos mester trata hende en general, incluso nos enemigonan. (Lesa Lucas 6:27, 28, 31, 35.) Awor, si hasta nos enemigonan nos mester trata bon, kico di hende cu lo ta “dispuesto pa acepta e berdad cu ta hiba na bida eterno”? Nos no tin mucho mas motibo ainda pa sigui e conseho aki ora nos ta predica na nan?—Echo. 13:48.

⁴ Pesey, laga nos trata cuater pregunta cu nos tin cu tene na mente si nos kier tin exito den sirbishi. Ora nos ta den sirbishi, nos mester puntra nos mes: ‘Ken e persona cu mi ta papiando cu ne ta? Unda mi ta papiando cu ne?’ Ademas, nos por puntra: ‘Ki ora ta mihor pa papia cu hende? Y con mi mester papia cu nan?’ Manera nos lo mira, e preguntanan aki por yuda nos saca afo con hende cu nos ta duna testimonio lo kier pa nos trata nan. Di e manera ey, nos por trata nan na e mihor manera posibel.—1 Cor. 9:19-23.

5. Ki preguntanan nos tin cu haci nos mes?

⁵ Cada hende cu nos topa den sirbishi ta un persona riba su mes cu su propio circunstancianan, background y problemanan. (2 Cro. 6:29) Ora bo ta purba di comparti e bon noticia cu un persona, puntra bo mes: ‘Si ami tabata e persona ey, con lo mi tabata kier ser trata? Lo mi gusta pa hende saca nan conclusion tocante mi persona of husga mi sin cu nan conoce mi? Of lo mi a prefera pa nan siña conoce mi como persona?’ E preguntanan aki por yuda nos trata cada hende como un persona riba su mes.

6, 7. Kico nos mester haci si un persona cu nos topa den sirbishi ta parce rabia of ta trata nos malo?

⁶ Ningun hende no kier tin mal nomber. Laga nos duna un ehempel: Como cristian, nos tur ta haci nos best pa sigui e conseho di Bijbel cu ta bisa “laga boso palabranan semper ta cu gracia.” (Col. 4:6) Pero como cu nos ta imperfecto, tin biaha nos ta bisa algo cu nos ta lamenta despues. (Sant. 3:2) Por ehempel, si nos tabatin un mal dia, por sosode cu nos ta papia malo cu un persona. Si esey sosode, nos lo no kier pa e persona cana bisa cu nos tin mal manera; mas bien, nos lo kier pa e compronde cu esey no ta nos custumber. Awor, nos tambe no mester mustra e mesun comprondemento ey pa otro hende?

⁷ Pesey, ora bo topa un persona den sirbishi cu ta parce rabia of ta trata bo malo, lo bo no tin cu dun’e beneficio di duda? Kisas e tin hopi presion na trabou of na scol? E tin problema serio cu salud? Den hopi caso, doñonan di cas cu na prome instante a trata testigonan di Jehova malo ta reacciona bon ora e Testigonan trata nan cu suavidad y respet.—Prov. 15:1; 1 Ped. 3:15.

8. Dicon nos mester papia cu “tur sorto di hende” tocante e mensahe di Reino?

⁸ Den sirbishi nos ta topa tur sorto di hende. Den e ultimo añanan, esclavo fiel a publica mas cu 60 experencia den E Toren di Vigilancia, den e serie “Bijbel Ta Cambia Bida di Hende.” Anteriormente algun di e hendenan den e experencianan aki tabata ladron, burache, miembro di gang of adicto na droga; otronan tabata politico, lider religioso, hende cu tabata core tras di un carera of hende cu tabatin un bida inmoral.  Sinembargo, nan tur a tende e bon noticia, a acepta un estudio di Bijbel, a haci cambio den nan bida y a bin den e berdad. Pesey, nunca nos mester asumi cu cierto hendenan lo no acepta e mensahe di Reino. (Lesa 1 Corintionan 6:9-11.) Al contrario, nos mester ta consciente cu “tur sorto di hende” por bin den e berdad.—1 Cor. 9:22.

9. Dicon nos mester respeta cas di hende?

⁹ Hopi bes nos ta bay na cas di e hendenan pa papia cu nan. (Mat. 10:11-13) Nos cas ta importante pa nos; nos kier pa e ta un luga caminda nos tin nos privacidad y ta sinti nos safe. Pesey, nos ta aprecia ora hende ta mustra respet pa nos cas y otro propiedad cu nos tin. Pues, ora nos ta den sirbishi, nos tambe mester mustra respet pa cas di otro hende.—Echo. 5:42.

10. Con nos por evita cu hende den sirbishi ta rabia cu nos?

¹⁰ Como cu nos ta biba den un tempo pesta cu crimen, hopi doño di cas no ta confia hende straño. (2 Tim. 3:1-5) Nos tin cu tene cuidou pa nos no haci nan mas desconfia. Con asina? Wel, supone cu bo a yega na un cas y ta yama pero niun hende no ta sali. Kisas bo por haya gana di habri cura, cana drenta, wak den bentana of cana rond di e cas pa wak unda e doño di cas ta. Un doño di cas lo gusta pa bo haci esey? Kico e bisiñanan lo pensa? Ta berdad cu nos kier haci e trabou di predica cabalmente. (Echo. 10:42) Si, ta bon cu nos ta ansioso pa haya tur hende. (Rom. 1:14, 15) Pero ta sabi pa evita tur loke por pone hende den nos teritorio rabia. Apostel Pablo a skirbi: “Nos no kier haci nada cu ta duna otro hende motibo pa trompica, pa hende no critica nos sirbishi.” (2 Cor. 6:3) Si nos ta mustra respet pa cas y otro propiedad di hende den nos teritorio, nan por sinti nan atrai na e berdad.—Lesa 1 Pedro 2:12.

11. Dicon nos ta keda contento ora otro hende ta tene cuenta cu nos programa?

¹¹ Mayoria di nos tin un bida druk. Pesey, pa nos por cumpli cu nos obligacionnan, nos ta pone prioridad y ta plania bon con nos ta uza nos tempo. (Efe. 5:16; Flp. 1:10) Y si algo inespera cambia nos programa, nos por sinti nos malo. Pesey nos ta aprecia ora otro hende ta tene cuenta cu nos programa y ta compronde ora nos no por dedica mucho tempo na nan. Awor, teniendo cuenta cu e conseho cu Hesus a duna na Mateo 7:12, con nos lo por mustra respet pa e hendenan cu nos ta predica na dje?

12. Con nos por sa ki ora ta mihor pa predica den nos teritorio?

¹² Nos tin cu purba di saca afo ki ora ta mihor pa predica den nos teritorio. Un manera cu nos por haci esey ta di puntra nos mes: ‘Ki ora generalmente hende den nos teritorio sa ta na cas? Ki ora nan lo ta mas dispuesto pa scucha nos?’ Unabes nos sa contesta pa e preguntanan ey, ta bon pa nos adapta nos programa pa nos por predica durante e oranan ey. Na algun parti di mundo, ta mihor pa bay di cas pa cas atardi of atardi laat. Si esey ta e caso caminda bo ta biba, lo bo por ahusta bo programa pa bo por predica tambe durante e oranan ey? (Lesa 1 Corintionan 10:24.) Nos por ta sigur cu Jehova lo bendiciona cualkier sacrificio cu nos ta haci pa predica durante e oranan cu ta cumbini e hendenan den nos teritorio.

13. Con nos por mustra respet pa un doño di cas?

¹³ Con mas nos por mustra respet pa e hendenan cu nos ta predica na dje? Por ehempel, ora nos haya un persona cu  kier scucha nos, nos mester dun’e un bon testimonio pero nos no mester abusa di su hospitalidad y keda papia mucho largo cu ne. Kisas e doño di cas a plania pa haci algo otro cu ta importante p’e. Si e bisa cu e ta ocupa, nos por bis’e cu nos lo ta breve, y nos mester cumpli cu nos palabra. (Mat. 5:37) Na final di nos combersacion, ta bon pa nos puntra e persona ki dia nos lo por bolbe cerca dje. Algun publicador tabatin bon resultado ora nan a bisa: “Mi tin gana di bolbe pa nos por sigui combersa. Ta mihor mi yama bo of manda un mensahe prome cu mi bin?” Ora nos ta adapta nos programa na e hendenan den nos teritorio, nos ta sigui e ehempel di Pablo, kende ‘no tabata busca su mes beneficio, sino mas bien di e mayoria a fin cu nan por haya salbacion.’—1 Cor. 10:33.

14-16. (a) Dicon nos mester laga e doño di cas sa kico ta e proposito di nos bishita? Ilustra. (b) Ki metodo un superintendente biahero tabatin bon resultado cu ne?

¹⁴ Imagina bo cu un dia bo ta ricibi un yamada di un persona cu bo no conoce. E persona aki ta puntra bo ki tipo di cuminda bo ta gusta. Bo ta cuminsa puntra bo mes ta ken e persona aki ta y kico e kier realmente. Pa decencia, kisas bo ta combersa un rato cu ne pero despues, probablemente, bo ta termina e combersacion. Awor imagina bo cu e persona cu ta yama ta identifica su mes. E ta bisa bo cu e ta traha riba tereno di nutricion y, na un manera bondadoso, e ta bisa bo cu e tin algun informacion util pa bo. Probablemente lo bo ta mas dispuesto pa scuch’e ya cu nos  tur ta gusta pa hende laga nos sa ken nan ta y kico ta nan proposito. Awor, con nos por trata hende cu nos topa den sirbishi cu e mesun cortesia of respet?

¹⁵ Den hopi teritorio, nos mester laga e doño di cas compronde bon cla kico ta e proposito di nos bishita. Ta berdad cu nos tin informacion cu ta valioso pa e doño di cas. Pero imagina bo cu bo no ta identifica bo mes ni ta bisa kico ta e proposito di bo bishita y diripiente bo ta cuminsa bo presentacion di e siguiente manera: “Si Señora por a soluciona un di e problemanan cu mundo ta enfrenta, cua di nan Señora lo a soluciona?” Nos sa cu e proposito di e pregunta ey ta pa saca afo kico e persona ta pensa pa nos por cuminsa papia tocante Bijbel. Sinembargo, e doño di cas lo por puntra su mes: ‘Ta ken e hende straño aki ta, y pakico e ta haci mi e pregunta aki?’ Pa esey no sosode, nos tin cu percura pa e doño di cas sintie trankil. (Flp. 2:3, 4) Con nos por haci esey?

¹⁶ Un superintendente biahero ta hacie asin’aki: Despues di cuminda e doño di cas y introduci su mes, e ta bis’e: “Awe nos ta duna tur hende den e area aki e tratado aki: Bo Kier Haya Sa e Berdad? E ta contesta seis pregunta cu hopi hende ta haci. Ata bo ehemplar aki.” E ruman a bisa cu ta parce cu mayoria di hende ta sinti nan mas trankil ora nos laga nan sa kico ta e proposito di nos bishita. Asina ta mas facil pa cuminsa un combersacion. Despues, e superintendente biahero ta puntra e persona: “Bo a yega di pensa riba un di e preguntanan aki?” Si e doño di cas scoge un pregunta, e ruman ta habri e tratado y ta trata e contesta cu Bijbel ta duna riba e pregunta ey. Si no ta asina, e ruman mes ta scoge un pregunta y sigui cu e combersacion pa e doño di cas no sintie malo. Claro cu tin hopi manera pa cuminsa un combersacion. Den algun area, kisas e doñonan di cas ta spera mas cu djis un saludo prome cu nos bisa kico ta e proposito di nos bishita. Pues, si nos kier pa hende scucha nos cu smaak, nos tin cu adapta nos presentacion na nan.

17. Segun e articulo aki cua ta algun manera cu nos por sigui e Regla di Oro?

¹⁷ Pues, cua ta algun manera cu nos por sigui e Regla di Oro ora nos ta den sirbishi? Wel, nos ta trata cada hende como un persona riba su mes. Nos ta mustra respet pa cas y otro propiedad di e hendenan. Nos ta haci esfuerso pa participa den sirbishi ora nos tin mas chens di haya hende na cas y ora nan tin tempo pa scucha nos. Ademas, nos ta introduci nos mensahe na un manera cu hende den nos teritorio ta haya gana di scucha nos.

18. Kico ta e beneficionan di trata hende den teritorio manera nos kier pa nan trata nos?

¹⁸ E echo cu nos ta trata hende den nos teritorio manera nos kier pa nan trata nos tin hopi beneficio. Si, ora nos ta trata hende na un manera bondadoso y ta tene cuenta cu nan sintimentonan, nos ta laga nos luz briya, nos ta mustra cu nos ta sigui principionan biblico y ta duna gloria na nos Tata celestial. (Mat. 5:16) Ademas, e manera respetuoso cu nos ta trata hende por atrae nan na e berdad. (1 Tim. 4:16) Y sea cu hende ta acepta e berdad of no, nos lo tin e satisfaccion cu nos ta haciendo nos best pa cumpli cu nos sirbishi cabalmente. (2 Tim. 4:5) Pesey, nos tur mester imita apostel Pablo, kende a skirbi: “Mi ta haci tur cos pa causa di e bon noticia, pa mi por compartie cu otro hende.” (1 Cor. 9:23) Pa nos logra esey, laga nos semper trata hende den sirbishi manera nos kier pa nan trata nos.