PERO, francamente, mi no a sinti mi malo cu ta un par di hende so tabata presente. Semper mi tabata un hende hopi timido. Tempo cu mi tabata jong, mi tabata sconde ora hende bin di bishita na nos cas, aunke tabata hende cu mi conoce.

Y toch, pa straño cu por parce, pa cumpli cu mayoria di mi asignacionnan den e organisacion di Jehova, mi tabatin cu papia cu hopi hende, tanto amigo como hende desconoci. Pero semper mi tabatin un lucha cu timidez y falta di confianza den mi mes. Pues, mi no por tuma credito pa niun exito cu mi tabatin cumpliendo cu mi asignacionnan. Al contrario, mi a mira cu di berdad Jehova ta cumpli cu su promesa, cu ta bisa: “Lo mi fortalece bo, si, lo mi yuda bo, si, lo mi sostene bo cu mi man drechi di husticia.” (Isa. 41:10) Un di e maneranan principal cu Jehova a yuda mi ta mediante rumannan den congregacion. Laga mi conta tocante algun di nan. Mi ta cuminsa for di tempo cu mi tabata mucha.

Riba un bunita diadomingo mainta den decada 1940, Ruman Elsie Huntingford a yama na porta di nos boerderij na zuidwest Ontario. Mi mama a bay atende cu ne mientras cu ami y mi tata—cu tambe tabata timido—a keda sinta paden ta scucha. Como cu nos a kere cu  Ruman Huntingford tabata cana bende cos y cu Mama lo a cumpra algo cu nos no tabatin mester, Tata a lanta bay bisa e ruman cu nos no ta interesa. E ora ey, Ruman Huntingford a puntra: “Boso no ta interesa den un estudio di Bijbel?” Tata a respond’e: “Esey si nos ta interesa den dje.”

Wel, Ruman Huntingford no por a scoge un mihor momento pa bishita nos. Dicon? Pasobra e tempo ey mi mayornan a caba di bandona Iglesia Uni di Canada, di cua nan tabata miembro hopi activo. Pero con bin nan a tuma e decision ey? Wel, e pastoor di e iglesia tabata pone den lobby di e edificio un lista cu nomber di tur e hendenan cu ta duna contribucion; e secuencia di e nombernan tabata segun e montante cu nan a duna. Awor, como cu mi mayornan no tabatin mucho entrada, generalmente nan nomber tabata casi te abou riba e lista, anto e lidernan di e iglesia tabata presiona nan pa duna mas. Comosifuera no tabata suficiente, un otro pastoor a admiti abiertamente cu e no tabata siñando e hendenan loke e realmente tabata kere pa e no perde su trabou. Ta pesey mes nos a dicidi di bandona e iglesia. Pero nunca nos a stop di busca un manera pa satisface nos necesidad spiritual.

Como cu e tempo ey e trabou di predica di e Testigonan tabata prohibi na Canada, Ruman Huntingford tabata uza solamente Bijbel y algun anotacion cu e tabatin den un buki preto chikito pa studia cu nos. Ora el a realisa cu nos lo no a traicion’e y denunci’e na e autoridadnan, el a ofrece nos literatura basa riba Bijbel. Despues di cada estudio di Bijbel, nos tabata sconde e publicacionnan aki bon. *

Ruman Huntingford a sigui predica e bon noticia celosamente a pesar di oposicion y prueba. Su entusiasmo a impresiona mi y motiva mi pa scoge pa e berdad. Un aña despues cu mi mayornan a batisa, mi tambe a simbolisa mi dedicacion na Jehova. Mi a batisa cu 17 aña, dia 27 di februari di aña 1949, den un baki di metal cu cunukeronan tabata uza pa duna bestia awa. Despues di esey, mi meta tabata pa drenta sirbishi di tempo completo.

Mi tabata duda pa cuminsa traha mesora como pionero. Pa un tempo, mi a traha na un banco y na un oficina pasobra mi tabata convenci cu mi mester a gana poco placa pa mi por a sostene mi mes ora mi  cuminsa traha pionero. Pero como cu mi tabata hoben y sin experencia, mi tabata gasta e placa manera mi cobra. Un ruman homber cu yama Ted Sargent a anima mi pa tene curashi y pone fe den Jehova. (1 Cro. 28:10) Su animacion a pone cu mi a cuminsa traha pionero na november 1951. Mi tabatin solamente 40 dollar, un bais segunda mano y un maletin nobo. Pero Jehova semper a percura pa mi tabatin loke mi tabatin mester. Mi ta hopi contento cu Ted a anima mi pa cuminsa traha pionero! Esey a hiba na mas bendicion.

Un atardi na final di augustus 1952, mi a haya un yamada di telefon for di Toronto. E sucursal di testigonan di Jehova na Canada a invita mi pa cuminsa sirbi na Betel na september. Nunca prome mi a bishita e sucursal. Y aunke mi tabata un persona timido, mi tabata ansioso pa bay Betel pasobra algun pionero a conta mi hopi cos maraviyoso tocante Betel. Manera mi a yega, mi a sinti mi na cas.

Dos aña despues cu mi a yega Betel, mi a reemplasa Bill Yacos den un congregacion na Toronto. Bill tabata sirbidor di congregacion (loke nos ta yama awe coordinador di cuerpo di anciano). E tempo ey, mi tabatin solamente 23 aña di edad. Mi a sinti mi manera un simpel mucha di cunucu. Pero Ruman Yacos humildemente a siña mi kico mi mester a haci. Y Jehova a yuda mi.

Ruman Yacos—un ruman homber yen, curpa chikito, kende semper tabatin un smile riba su cara—semper tabata mustra interes den hende. E tabata stima e rumannan, y nan tambe tabata stim’e. Regularmente e tabata bishita e rumannan na nan cas, y no solamente ora nan tabatin problema. Bill Yacos a anima mi pa haci mescos y pa traha hunto cu e rumannan den sirbishi di veld. El a bisa mi: “Ken, laga e rumannan mira cu bo ta interesa den nan. Esey lo cubri un multitud di pica.”

Desde januari 1957, Jehova a yuda mi na un manera hopi special. E luna ey mi a casa cu Evelyn, un graduado di e di 14 klas di e Scol di Galaad. Prome cu nos a casa, Evelyn tabata sirbi na un provincia di habla Frances na Quebec. E tempo ey, gran parti di Quebec tabata bou di dominio di Iglesia Catolico. Pues, Evelyn tabatin un asignacion hopi dificil pa cumpli cu ne, pero el a keda leal na Jehova y a sigui cumpli cu su asignacion.

Y Evelyn semper a apoya mi lealmente. (Efe. 5:31) De echo, su lealtad a ser poni na prueba poco despues cu nos a casa! Ta asina cu nos tabatin plan di bay Florida, Merca, poco despues cu nos casa. Pero un dia despues di nos casamento, sucursal a pidi mi pa asisti na un reunion cu lo a dura henter un siman na Betel di Canada. E reunion aki lo a cambia nos plannan. Pero ami cu Evelyn tabata cla pa cumpli cu tur loke Jehova pidi nos. Pesey, nos a cancela nos luna de miel. Durante e siman ey, Evelyn a traha den sirbishi den un teritorio cerca di e sucursal. Aunke e teritorio tabata hopi distinto for di esnan na Quebec, el a persevera.

Na final di e siman, mi a ricibi un gran sorpresa: Nan a nombra mi como superintendente di circuito na e parti noord di Ontario. Imagina bo! Un homber  di apenas 25 aña di edad, recien casa y sin experencia. Pero cu pleno confianza den Jehova, nos a cuminsa nos biahe. Anochi, den pleno winter, nos a subi un trein na Canada, hunto cu algun superintendente biahero experencia cu tabata regresando cas pa sigui cumpli cu nan asignacion. Nan a anima nos hopi! Un ruman homber a hasta insisti pa nos tuma e cabina cu cama cu el a reserva pa su mes di manera cu nos no mester pasa henter anochi sinta den stoel. E siguiente dia, precies 15 dia despues cu nos a casa, nos a bishita e grupo chikito na Hornepayne, e grupo cu mi a papia di dje anteriormente.

Pero tabatin mas cambio ta spera ami cu Evelyn. Por ehempel, na final di aña 1960, tempo cu mi tabata haci e trabou di sirbidor di districto, mi a haya invitacion pa asisti na e di 36 klas di e Scol di Galaad. Esaki tabata un curso di dies luna na Brooklyn, New York, cu lo a cuminsa na februari 1961. Mi tabata hopi entusiasma cu e invitacion pero alabes un poco tristo cu Evelyn no a ser invita. Mescos cu tabata e caso cu e otro esposanan den e mesun situacion, Evelyn mester a declara por escrito cu e ta bay di acuerdo pa nos keda separa for di otro pa por lo menos dies luna. Evelyn a yora, pero nos a bay di acuerdo cu lo mi a bay e scol. Evelyn a keda contento pasobra e tabata sa cu lo mi a ricibi entrenamento valioso na e Scol di Galaad.

Mientrastanto, Evelyn tabata yuda na e sucursal di Canada. E tabatin e privilegio special di comparti un camber cu un ruman muher ungi hopi stima, Margaret Lovell. Ta claro cu ami cu Evelyn tabata sinti otro su falta hopi. Pero cu Jehova su yudansa, nos a logra custumbra y cumpli cu nos asignacionnan temporal. E echo cu Evelyn tabata dispuesto pa sacrifica e tempo cu nos por tabata hunto cu otro pa asina nos por ta personanan mas util pa Jehova y su organisacion a conmove mi hopi.

Despues cu mi tabatin mas o menos tres luna na Galaad, Ruman Nathan Knorr, kende e tempo ey tabata dirigi e obra mundial di predica, a propone mi algo extraordinario. El a puntra mi si mi kier a stop cu e Scol di Galaad y bay Canada bek pa sirbi temporalmente na e sucursal como instructor di e Scol di Ministerio di Reino. Ruman Knorr a bisa mi si cu mi no ta obliga di acepta e proposicion; si mi kier mi ta caba e curso di e Scol di Galaad y sigui despues como misionero. Pero el a bisa tambe cu si mi acepta pa bay Canada bek, kisas nunca mas lo mi haya un invitacion pa asisti na e Scol di Galaad y cu, kisas cu tempo, nan lo por pidi mi pa bay traha bek den teritorio na Canada. Pero el a laga pa mi mes dicidi kico mi kier haci, naturalmente despues cu mi papia cu mi esposa.

Pero como cu mi tabata sa caba con Evelyn ta pensa tocante asignacionnan teocratico, mesora mi a bisa Ruman Knorr cu “nos ta cla pa haci tur loke Jehova su organisacion pidi nos.” Semper nos tabata pensa cu nos mester ta cla pa bay unda cu Jehova su organisacion manda nos, sin importa nos preferencianan.

Pues, na april 1961, mi a bandona Brooklyn y regresa Canada pa duna les na e Scol di Ministerio di  Reino. Mas despues, nos a cuminsa sirbi como betelita. Y pa mi sorpresa, mi a ricibi un invitacion pa asisti na e di 40 klas di e Scol di Galaad, cu lo a cuminsa na 1965. Atrobe Evelyn mester a skirbi un carta pa bisa cu e ta bay di acuerdo pa nos keda algun luna separa for di otro. Pero algun siman despues, nos a haya e grato noticia cu Evelyn tambe por a asisti na e scol hunto cu mi.

Despues cu nos a yega scol di Galaad, Ruman Knorr a bisa nos cu studiantenan cu ta inscribi den e klas di habla Frances, manera tabata e caso cu nos, lo a ser manda Africa. Pero ora nos a gradua, nos a haya e asignacion pa bay Canada bek. Mi a ser nombra como e superintendente nobo di e sucursal (awor coordinador di Comite di Sucursal). Mi tabatin solamente 34 aña di edad. Y mi a recorda Ruman Knorr cu mi ta “hopi jong.” Pero el a anima mi y a duna mi confianza. For di principio, mi a haci esfuerso pa consulta cu rumannan maduro, cu tabatin mas experencia na Betel, prome cu mi a tuma cualkier decision di peso.

Na Betel, mi a haya hopi oportunidad maraviyoso pa siña for di otronan. Mi tabatin hopi respet y admiracion pa e otro miembronan di e Comite di Sucursal. Mi a siña masha hopi tambe for di varios ruman, tanto hoben como adulto, kendenan di un of otro manera tabatin contacto cu nos na sucursal of den e varios congregacionnan cu nos a yega di sirbi.

Betel a duna mi e oportunidad tambe di siña otronan y fortaleza nan fe. Apostel Pablo a bisa Timoteo: “Sigui den e cosnan cu bo a siña.” Ademas, Pablo a bis’e: “E cosnan cu bo a tende cerca mi, y cu a keda confirma pa hopi testigo, confia nan na hombernan fiel, kendenan na nan turno lo ta adecuadamente capacita pa siña nan na otro hende.” (2 Tim. 2:2; 3:14) Mi tin 57 aña ta sirbi na Betel, y algun ruman sa puntra mi kico mi a siña durante e añanan ey. Mi contesta simpel ta: “Ser semper dispuesto y cla pa haci tur loke Jehova su organisacion kier pa bo haci y depende riba Jehova pa su yudansa.”

Ta comosifuera ta ayera mi a yega Betel, siendo un hoben sin experencia y timido. Pero, a traves di tur e añanan aki, Jehova a ‘sostene mi cu su man drechi.’ Y specialmente pa medio di yudansa oportuno di nos bondadoso rumannan den fe, Jehova ta sigui sigura mi: “No tene miedo, lo mi yuda bo.”—Isa. 41:13.