TABATA aña 1923. E sala di concierto di e Conservatorio pa Drama y Musica na São Paulo tabata yen yen di hende. George Young, kende tabatin un stem fuerte, a duna un bon discurso, cu nan a traduci frase pa frase na Portugues. Y e textonan di Bijbel tabata ser proyecta na Portugues riba pantaya. E 585 personanan cu tabata presente tabata scucha cu hopi atencion. Y como cherry riba e bolo, nan a parti 100 foyeto chikito na Portugues titula Miyones di Hende na Bida Awor Lo No Muri Nunca! Fuera di e foyetonan na Portugues, nan a parti algun na Ingles, Aleman y Italiano. Ruman Young su discurso tabata un exito! Un boca a bisa otro, y dos dia despues, e sala tabata yen yen atrobe pa un otro discurso. Pero con bin Ruman Young a duna e discursonan aki?

Na aña 1867, Sarah Bellona Ferguson cu su famia a emigra di Merca pa Brazil. Na 1899, Sarah su ruman homber a bin Brazil cu algun literatura biblico for di Merca. Despues cu Sarah a lesa algun di esakinan, el a keda convenci cu el a haya e berdad. Y como cu e tabata gusta lesa, el a cuminsa abona riba E Toren di Vigilancia na Ingles. El a keda asina impresiona cu e mensahe di Bijbel cu el a skirbi Ruman C. T. Russell un carta den cua el a papia di su mes como ‘un prueba bibo cu niun hende no ta asina leu cu e berdad di Bijbel no por alcans’e.’

Sarah Ferguson tabata haci su best pa comparti loke el a siña for di Bijbel cu otro hende, pero semper e tabata puntra su mes ken lo a sigui yuda e y su famia y e otro bon hendenan na Brazil. Na 1912, Betel na Brooklyn a manda bis’e cu un hende ta bin São Paulo cu miles di e tratado Unda e Mortonan Ta? na Portugues. Na 1915, el a skirbi un carta y a puntra: “Kico lo para di Brazil y henter Sur America?” Dicon? Pasobra semper e tabata haya straño cu hopi Studiante di Bijbel tabata kere cu pronto Dios lo a tuma nan den cielo. Segun su carta, “si tene cuenta cu Sur America ta abarca un gran parti di mundo,  ta facil pa compronde cu ainda tin mas fruta pa cosecha.” Si, e trabou di cosecha no a caba ainda!

Alrededor di aña 1920, ocho nabegante hoben di Brazil a asisti varios biaha na nos reunionnan di congregacion na New York mientras nan barco di guera tabata den reparacion; nan a siña di e speransa cu Bijbel ta duna. Ora nan a bolbe Rio de Janeiro, nan a comparti loke nan a siña cu otro hende. Pesey, un poco tempo despues, na maart 1923, ora George Young, kende tabata un peregrino, esta, un superintendente biahero, a yega Rio de Janeiro, el a haya varios hende interesa. Y el a haci areglo pa varios di nos publicacionnan ser traduci na Portugues. Poco despues, Ruman Young a biaha bay São Paulo, un stad cu tabatin casi 600.000 habitante e tempo ey. Ta eynan el a duna e discurso cu nos a menciona na comienso di e articulo aki y parti varios ehemplar di e foyeto Miyones di Hende na Bida Awor Lo No Muri Nunca! Ruman Young a bisa: “Como cu mi tabata mi so, mi mester a depende completamente riba propaganda den corant.” Y el a bisa tambe cu esakinan tabata “e prome discursonan publico cu un representante di I.B.S.A. a duna na Brazil y cu nan a haci propaganda p’e.” *

Un informe tocante Brazil, den E Toren di Vigilancia di 15 di december 1923 (na Ingles), a bisa: “Ora nos pensa con e trabou a cuminsa eynan dia prome di juni sin ningun literatura, ta remarcabel con Señor a bendiciona e trabou.” E informe a sigui bisa cu e discursonan cu Ruman Young a duna na São Paulo tabata solamente 2 di e 21 discursonan publico cu el a duna di 1 di juni pa 30 di september. E asistencia total tabata 3.600 persona. E mensahe di Reino a sigui plama gradualmente na Rio de Janeiro. Y den apenas un par di luna, mas cu 7.000 di nos publicacionnan, traduci na Portugues, a ser distribui! Ademas, na 1923 a publica e prome edicion di E Toren di Vigilancia na Portugues; e prome edicion tabata esun di november-december.

George Young a busca contacto cu Sarah Ferguson y, segun E Toren di Vigilancia, ora Sarah a yega unda e ruman tabata reuni, pa un momento el a keda boca habri. Despues, el a coy Ruman Young su man tene, wak e serio den su cara y finalmente el a bis’e: “Bo ta un peregrino di berdad?” Sarah y cuater di su yiunan a batisa poco despues. Sarah a warda 25 aña prome cu e por a batisa! Segun E Toren di Vigilancia di 1 di augustus 1924 (na Ingles), tabatin 50 hende cu a batisa na Brazil, y mayoria di nan tabata di Rio de Janeiro.

Awe, un 90 aña despues, nos no tin nodo di puntra: “Kico lo para di Brazil y henter Sur America?” Awendia, mas cu 760.000 testigo di Jehova ta predica e bon noticia na Brazil. Den henter Sur America, e mensahe di Reino ta ser predica na Portugues, Spaño y na hopi idioma indigena. Loke Sarah Ferguson a bisa na 1915 tabata berdad: “Tin mas fruta pa cosecha.”—For di nos archivo na Brazil.