1, 2. (a) Kico segun Hesus tabata e di dos mandamento di mas grandi di Ley? (b) Ki preguntanan e articulo aki lo contesta?

UN BIAHA un fariseo a puntra Hesus: “Maestro, cua ta e mandamento di mas grandi di Ley?” Manera nos a mira den e articulo anterior, Hesus a contest’e cu “e mandamento di mas grandi y esun di prome” ta: “Stima Jehova bo Dios cu henter bo curason, cu henter bo alma y cu henter bo mente.” Anto Hesus a agrega: “E di dos, igual cu ne, ta esaki: ‘Stima bo prohimo mescos cu bo mes.’”—Mat. 22:34-39.

² Hesus a bisa cu nos tin cu stima nos prohimo mescos cu nos ta stima nos mes. Pesey ta bon pa nos puntra nos mes: Ken realmente ta nos prohimo? Con nos por mustra amor pa prohimo? E articulo aki lo contesta e preguntanan ey.

3, 4. (a) Ki ilustracion Hesus a conta pa contesta e homber cu a puntra ken realmente tabata su prohimo? (b) Con e Samaritano a yuda e homber cu nan a atraca, maltrata y laga casi morto? (Wak e prome plachi.)

³ Un homber a yega di puntra Hesus: “Ken realmente ta mi prohimo?” Hesus a contest’e pa medio di e ilustracion di e bon  Samaritano y a siñ’e kico ta nifica stima su prohimo. (Lesa Lucas 10:29-37.) El a cont’e di un Hudiu cu nan a atraca, maltrata y laga casi morto benta riba caminda. Anto a pasa un sacerdote Israelita y un Levita. Nan a saca man pa yuda e homber manera lo bo por a spera di nan? No. Ora nan a mir’e, nan a pas’e bay sin haci nada p’e. Ta un Samaritano, esta, un homber cu tabata di un pueblo cu tabata respeta Ley di Moises pero cu Hudiunan a desprecia, a yud’e.—Juan 4:9.

⁴ Pa cura e heridanan di e Hudiu, e Samaritano a basha zeta y biña riba nan. Despues, el a hiba e homber na un posada y a duna e doño dos denario pa cuid’e. E dos denarionan aki tabata ekivalente na mas of menos dos dia di salario. (Mat. 20:2) Pues ta facil pa mira ken realmente tabata e berdadero prohimo di e homber herida. Sin duda, e ilustracion di Hesus ta siña nos pa mustra amor y compasion na nos prohimo.

5. Con sirbidornan di Jehova a mustra amor na nan prohimo despues di un desaster natural?

⁵ Den e “ultimo dianan” critico aki, hopi biaha ta dificil pa haya hende compasivo manera e bon Samaritano. Mayoria di hende ta feroz, nan no tin compasion cu otro ni amor pa loke ta bon. (2 Tim. 3:1-3) Prueba di esey ta ora horcan Sandy a asota un area di New York na october 2012 y causa hopi destruccion. Hopi hende no tabatin coriente, calefaccion y otro cosnan necesario. Tabata tristo pa mira con algun hende tabata plunder cas di e victimanan aki. Testigonan di Jehova si tabata diferente. Nan a organisa un programa pa yuda nan rumannan y tambe otro hende den e area ey. Nan a haci esey pasobra cristiannan berdadero ta stima nan prohimo. Den ki otro maneranan nos por mustra amor pa prohimo?

6. Ki yudansa for di Bijbel nos por duna nos prohimo?

⁶ Duna yudansa for di Bijbel. Den nos trabou di predica, nos ta duna nos prohimo “consuelo for di e Scritura.” (Rom. 15:4) Sin duda, nos ta mustra amor pa prohimo ora nos ta uza Bijbel pa papia cu hende tocante e bon noticia di e Reino di Dios. (Mat. 24:14) Ta un gran honor pa hiba e mensahe di Reino cu ta bin di “e Dios cu ta duna speransa”!—Rom. 15:13.

7. Kico ta e Regla di Oro y dicon ta bon pa nos siguie?

⁷ Sigui e Regla di Oro. Esaki ta un siñansa universal cu Hesus a duna den su Sermon Riba Sero: “Tur loke boso kier pa hende haci cu boso, boso tambe mester haci cu nan. De echo, esaki ta esencia di e siñansanan di Ley y e Profetanan.” (Mat. 7:12) Ora nos ta trata otro hende manera Hesus a conseha, nos ta cumpliendo cu e spirito tras di e “Ley” (Genesis te Deuteronomio) y “e Profetanan” (e bukinan profetico di e Scritura Hebreo). Jehova a duna su pueblo e instruccionnan aki pasobra e tabata stima nan y tabata kier pa nan stima otro. Awe tambe, Jehova ta spera di nos cu nos ta stima nos prohimo. Den e buki di Isaias, Jehova a bisa: “Mantene huicio y haci husticia ... Bendiciona ta e hende cu ta haci esaki.” (Isa. 56:1, 2) Pues, si nos ta stima nos prohimo y ta trat’e na un manera husto, Jehova ta bendiciona nos.

8. Dicon nos tin cu stima nos enemigonan y kico por sosode si nos haci esey?

⁸ Stima bo enemigonan. Hesus a bisa: “Boso a tende den pasado: ‘Stima bo prohimo y odia bo enemigo.’ Ma ami ta bisa boso: Sigui stima boso enemigonan y haci oracion pa esnan cu ta persigui boso, pa boso por demostra cu boso ta yiu di boso  Tata cu ta den cielo.” (Mat. 5:43-45) Apostel Pablo a duna un conseho similar ora el a bisa: “Si bo enemigo tin hamber, dun’e di come; si e tin sed, dun’e algo di bebe.” (Rom. 12:20; Prov. 25:21) Segun e Ley di Moises, si un Israelita a mira animal di su enemigo atrapa bou di su carga, e mester a yuda su enemigo libra e animal. (Exo. 23:5) Trahando hunto asina, hende cu antes tabata enemigo di otro por a bira bon amigo. Mescos ta conta pa nos tempo. Ora nos ta trata nos enemigonan cu amor, incluso hende cu ta persigui nos, esey ta suavisa nan curason y pone nan actitud pa cu nos cambia. Y ken sa cu algun di nan por hasta acepta e berdad y bira cristian.

9. Kico Hesus a bisa tocante haci paz cu nos ruman?

⁹ “Haci tur boso esfuerso pa ta na paz cu tur hende.” (Heb. 12:14) Esaki naturalmente ta inclui nos rumannan, pasobra Hesus a bisa: “Si bo trece bo ofrenda na altar, y eynan bo corda cu bo ruman tin algo contra bo, laga bo ofrenda eynan, dilanti di altar, y bay. Haci paz cu bo ruman prome, y despues, ora bo bin bek, duna bo ofrenda.” (Mat. 5:23, 24) Si nos tin problema cu un ruman, Jehova lo bendiciona nos ora nos dal paso mesora pa haci paz cu nos ruman y asina demostra cu nos ta stima nos ruman.

10. Dicon nos no mester husga otro?

¹⁰ No husga otro. Hesus a bisa: “Stop di husga, pa boso no ser husga, pasobra cu e huicio cu boso ta husga, boso lo ser husga, y cu e midi cu boso ta midi, nan lo midi pa boso. Pakico anto bo ta wak e splinter den wowo di bo ruman ma no ta tuma nota di e balki den bo mes wowo? Of con bo por bisa bo ruman: ‘Laga mi saca e splinter for di bo wowo’, mientras cu tin un balki den bo mes wowo? Hipocrita! Saca e balki for di bo mes wowo prome; e ora ey lo bo mira cla con pa saca e splinter for di wowo di bo ruman.” (Mat. 7:1-5) E les cu nos ta siña aki ta cu nos no mester critica otro hende pa nan fayonan chikito, pasobra nos tambe ta comete fayo, anto grandi.

11, 12. Den ki manera special nos ta mustra amor na nos prohimo?

¹¹ Hesus a siña nos un manera masha special pa mustra amor pa prohimo:  predicando e bon noticia di Reino. (Luc. 8:1) El a encarga su siguidornan pa “haci hende di tur nacion [su] discipel.” (Mat. 28:19, 20) Si nos ta cumpli cu e encargo aki, nos ta purba di yuda nos prohimo pa bandona e caminda hancho cu ta hiba na destruccion y cana riba e caminda smal cu ta hiba na bida. (Mat. 7:13, 14) Sin duda, Jehova lo bendiciona e esfuersonan ey.

¹² Mescos cu Hesus, nos ta yuda hende bira consciente cu nan tin un necesidad spiritual. (Mat. 5:3) Y segun cu nos ta comparti “e bon noticia di Dios” cu esnan cu ta reacciona faborablemente, nos ta yuda nan satisface e necesidad ey. (Rom. 1:1) Nos ta siña nan cu pa medio di Hesucristo nan por reconcilia cu Dios y haya su aprobacion. (2 Cor. 5:18, 19) Pues, ora nos ta predica e bon noticia, nos realmente ta mustra amor na nos prohimo na un manera masha special.

13. Con bo ta mira e obra di proclama e Reino?

¹³ Ora nos ta haci rebishita y ta dirigi estudio di Bijbel na un manera eficaz, nos ta haya e satisfaccion di por yuda hende biba na harmonia cu e normanan husto di Dios. Algun di nan lo tin cu haci cambio grandi den nan bida. (1 Cor. 6:9-11) Ta emocionante pa mira con Dios ta yuda hende cu ta “dispuesto pa acepta e berdad cu ta hiba na bida eterno” haci e cambionan necesario y bira amigo di dje. (Echo. 13:48) Hopi di nan kisas no tabatin ningun speransa, ma awor nan ta feliz; of talbes nan tabatin hopi ansiedad, pero awor nan tin confianza den nos Tata celestial. Ta bunita pa mira e progreso spiritual cu e personanan aki ta haci! Bo no ta haya cu ta un bendicion pa mustra amor pa prohimo den e manera special aki como proclamador di Reino?

14. Menciona cu bo mes palabra algun aspecto di amor cu 1 Corintionan 13:4-8 ta papia di dje.

¹⁴ Si nos ta aplica loke Pablo a bisa relaciona cu amor den nos trato cu nos prohimo, nos por evita hopi problema, nos lo ta feliz y nos lo haya e bendicion di Dios. (Lesa 1 Corintionan 13:4-8.) Laga nos repasa brevemente kico Pablo a bisa tocante amor y mira con nos por aplica su palabranan den nos trato cu otro hende.

15. (a) Dicon nos mester tin pasenshi y mustra bondad? (b) Pakico nos no mester ta jaloers ni cana broma?

¹⁵ “Amor tin pasenshi y ta bondadoso.” Mescos cu Dios a mustra pasenshi y bondad den su trato cu hende imperfecto, nos tambe mester tin pasenshi cu otro hende y trata nan cu bondad ora nan faya cu nos y papia malo cu nos. “Amor no ta jaloers.” Pues, si di berdad nos ta stima nos rumannan, nos lo no cudisha loke nan tin, ni e privilegionan cu nan tin den congregacion. Ademas, si nos amor ta sincero, nos lo no cana broma ni halsa nos mes. Al fin y al cabo, “un mirada orguyoso, un curason halsa, y e lampi di e malbado ta pica.”—Prov. 21:4.

16, 17. Con nos mester trata nos prohimo segun 1 Corintionan 13:5 y 6?

¹⁶ Amor lo yuda nos comporta nos na un manera decente. Nos lo no gaña nos prohimo, hort’e ni haci nada cu ta viola e ley- y principionan di Jehova. Ademas, amor lo impulsa nos pa busca no solamente nos mes interesnan, sino tambe esnan di otro hende.—Flp. 2:4.

¹⁷ Amor sincero no ta rabia lihe y “no ta keda corda e malo cu hende a hacie.” Pues, nos no ta traha un lista di delaster cos malo cu otro hende haci cu nos. (1 Tes. 5:15) Si nos ta carga rencor, nos no por  agrada Dios. De echo, nos rabia lo ta manera un candela cu por lanta un ora pa otro y haci nos mes y otro hende daño. (Lev. 19:18) Ta mihor pordona y lubida. Ademas, amor no ta “alegra cu inhusticia.” Pues, si un persona cu ta odia nos ser maltrata of sufri un inhusticia, nos no ta alegra.—Lesa Proverbionan 24:17, 18.

18. Kico 1 Corintionan 13:7 y 8 ta siña nos tocante amor?

¹⁸ Pablo a bisa tambe cu amor “ta wanta tur cos.” Pesey, si un hende ofende nos pero ta pidi despensa, amor ta motiva nos pa pordon’e. Pablo a bisa tambe cu amor ta “kere tur cos.” Nos ta kere tur cos cu ta para den e Palabra di Dios y ta agradecido pa e alimento spiritual cu nos ta ricibi di Jehova su organisacion. Amor ta ‘spera tur loke’ Bijbel ta priminti y ta motiva nos pa papia cu otro hende di e speransa cu nos tin. (1 Ped. 3:15) Y ora nos ta pasa den situacionnan dificil, nos ta haci oracion y spera riba e mihor resultado posibel. Amor ta “soporta tur cos”, sea cu otro hende a peca contra nos of nos ta pasa den persecucion of otro pruebanan. Finalmente, Pablo a sigura nos, “amor no ta caba nunca.” Hende obediente na Dios lo sigui mustra amor pa tur eternidad.

19, 20. Ki conseho biblico mester motiva nos pa sigui mustra amor pa prohimo?

¹⁹ Si nos ta haci loke Bijbel ta bisa, semper nos lo stima nos prohimo mescos cu nos mes. Esey ta encera mustra amor na tur hende, no solamente na esnan di nos rasa of cultura. Nos mester corda tambe cu Hesus a bisa: “Stima bo prohimo mescos cu bo mes.” (Mat. 22:39) Tanto Dios como Cristo ta spera di nos cu nos ta stima nos prohimo. Si nos no ta sigur kico pa haci den un situacion cu ta envolve nos prohimo, laga nos pidi Dios guia nos pa medio di su spirito. Si nos haci esey, Jehova lo bendiciona nos y yuda nos trata nos prohimo cu amor.—Rom. 8:26, 27.

²⁰ E mandato pa nos stima nos prohimo mescos cu nos mes yama “e ley noble.” (Sant. 2:8) Den e Ley di Moises, Jehova a duna su pueblo hopi mandamento cu a siña nan pa stima nan prohimo. Mas despues, Jehova a inspira Pablo pa skirbi: “Cualkier otro mandamento cu tin—ta keda resumi den e palabra aki: ‘Stima bo prohimo mescos cu bo mes.’ Un hende cu tin amor no ta haci malo cu su prohimo; pesey amor ta cumplimento di ley.” (Rom. 13:8-10) Pues, nos tin cu sigui mustra amor pa prohimo.

21, 22. Dicon nos tin cu stima Dios y nos prohimo?

²¹ Ora nos ta medita riba e motibonan pakico nos tin cu stima nos prohimo, ta bon pa nos reflexiona riba loke Hesus a bisa di su Tata: “E ta laga su solo sali riba mal hende y bon hende y ta laga awa cay riba hende husto y inhusto.” (Mat. 5:43-45) Kico esaki ta siña nos? Nos tin cu mustra amor na nos prohimo, sea cu e ta husto of inhusto. Y manera nos a bisa anteriormente, un manera importante pa mustra amor na nos prohimo ta di comparti e mensahe di Reino cu ne. Si nos prohimo acepta e bon noticia cu un curason sincero, hopi bendicion ta ward’e!

²² Nos tin hopi motibo pa stima Jehova cu henter nos curason, alma y mente. Nos a mira tambe cu nos por mustra amor pa prohimo den varios forma. Ora nos ta stima Dios y nos prohimo, nos ta obedeciendo e dos mandamentonan di mas grandi. Y riba tur cos, nos lo agrada Jehova, nos amoroso Tata celestial.