MI TATA a nace na Graz, Austria, na aña 1899, pues e tabata un hoben ora Prome Guera Mundial a cuminsa. Pero asina cu Segundo Guera Mundial a cuminsa na aña 1939, el a ser recluta pa forma parti di e ehercito di Alemania. Y na aña 1943 el a muri den bataya na Rusia. Lamentablemente, asina mi a perde mi tata ora cu mi tabatin apenas dos aña di edad. Nunca mi tabatin e oportunidad di conoc’e y mi tabata sinti su falta masha hopi mes, specialmente ora mi a cuminsa bay scol y a realisa cu mayoria di e otro mucha hombernan na mi scol tabatin un tata. Pero tempo cu mi tabata teenager, mi a haya un gran consuelo ora mi a siña conoce nos Tata celestial, un Tata cu no por muri.—Hab. 1:12, BPK.

Tempo cu mi tabatin shete aña di edad, mi a bira miembro di e organisacion Boy Scouts (Padvinderij pa Mucha Homber). Boy Scouts ta un organisacion mundial cu a ser funda na 1908 na Gran Britania. Su fundador tabata Robert Stephenson Smyth Baden-Powell, un teniente general di e ehercito di Gran Britania. Na aña 1916 el a funda e seccion di Welpen pa muchanan mas chikito, esta, di mi edad.

Mi tabata gusta e weekendnan cu nos tabata bay campa den cunucu. Nos tabata drumi den tent, bisti uniform y marcha riba zonido di drumband. Mi tabata gusta pasa tempo hunto cu e otro padvindernan; anochi nos tabata canta rond di kampvuur y hunga den mondi. Ademas, nos a siña hopi cos tocante naturaleza y esaki a siña mi aprecia e obranan di nos Creador.

Miembronan di Boy Scouts ta ser anima pa haci un bon obra tur dia y pa saluda otro cu e siguiente palabranan: “Semper Prepara.” Mi tabata gusta e lema aki. Nos grupo tabatin mas cu shen mucha homber; mas o menos mitar di nan tabata catolico, e otro mitar tabata protestant y tabatin un budista.

Desde 1920, cada tanto aña tin Jamboree, un encuentro internacional pa padvinder. Na 1951, mi a asisti na e di shete Jamboree na Bad Ischl, Austria. Y na augustus 1957, mi a asisti na e di nuebe Jamboree na Sutton Park, cerca di Birmingham, Inglatera. Na e ultimo evento aki tabatin mas o menos 33.000 padvinder presente; nan a bin for di 85 pais. Ademas, un 750.000 persona a bin bishita nos na e Jamboree, incluso Reina Elizabeth di Inglatera. Mi tabata sinti comosifuera mi tabata forma parti di un hermandad mundial. Pero mi no tabatin ni e minimo idea cu pronto lo mi a cera conoci cu un hermandad mucho mas mihor, cu ta consisti di hende cu ta stima Dios.

Den lente di 1958, ora mi tabata cerca di caba mi stage como waiter na Grand Hotel Wiesler di  Graz, Austria, Rudolf Tschiggerl, un compañero di trabou y pastry chef, a duna mi testimonio informal. Esaki tabata e prome biaha cu mi a tende di e berdad. El a bisa mi cu e doctrina di Trinidad no ta un siñansa biblico. Mi a bis’e cu e tabata robes y mi kier a demostr’e esey. Rudolf tabata bon hende y mi kier a convence pa e bira catolico bek.

Rudolf, kende nos tabata yama Rudi, kier a duna mi un Bijbel. Pero mi a bis’e cu mi ta acept’e solamente si ta un Bijbel catolico. Pues, el a trece uno pa mi. Ora mi a cuminsa les’e, mi a ripara cu Rudi a pone un tratado di Sociedad Watchtower den dje. Mi no a gusta cu el a haci esaki pasobra mi a pensa cu e informacion den e tratado lo tabata formula di un manera cu ta parce corecto pero cu en realidad ta informacion falso. Sinembargo, mi tabata dispuesto si pa papia tocante Bijbel cu ne. Rudi a demostra sabiduria, y e no a ofrece mi ningun literatura mas. Durante tres luna largo nos tabata combersa de bes en cuando tocante Bijbel. Hopi bes, e combersacionnan aki tabata dura te anochi laat.

Despues cu mi a caba mi stage na e hotel, mi mama a paga pa mi bay siña maneho di hotel. Pues, mi a muda bay Bad Hofgastein, un pueblo den un vaye den Alpen, caminda e scol tabata situa. Como cu e scol tabatin un combenio cu Grand Hotel na Bad Hofgastein, tabatin biaha cu mi tabata traha eynan pa mi haya mas experencia.

Rudi a manda mi adres nobo pa e sucursal na Viena, y sucursal a manda Ilse Unterdörfer y Elfriede Löhr, * dos ruman muher misionero, bishita mi. Un dia e recepcionista di e hotel a yama mi y bisa mi cu den un auto pafo tabatin dos señora cu kier a papia cu mi. Mi a keda sorprendi pasobra mi no tabata conoce nan. Pero mi a bay pafo pa wak ken nan tabata. Despues, mi a haya sa cu e dos rumannan aki tabata transporta literatura biblico clandestinamente na Nazi Alemania tempo cu e trabou tabata prohibi. Prome cu Segundo Guera Mundial a cuminsa, Gestapo—polis secreto di Alemania—a aresta nan y a manda nan e campo di concentracion di Lichtenburg. Despues, durante e guera, nan a transferi nan pa e campo di Ravensbrück, cerca di Berlin.

E ruman muhernan aki tabatin mas o menos e edad di mi mama, pues mi tabatin hopi respet pa nan. Pesey, mi no tabata kier pa nan perde nan tempo combersando cu mi pa despues, kisas despues di algun siman of luna, mi bisa nan cu mi no ta interesa. Pues, mi a pidi nan si nan por a djis trece un lista pa mi di tur e textonan di Bijbel cu ta mustra cu sucesion apostolico, esta, e siñansa catolico cu ta bisa cu apostel Pedro tabata e prome papa y cu tur e otro papanan a haya nan autoridad for di dje, ta falso. Y mi a bisa nan cu lo mi bay cu e lista aki cerca e pastoor local y papia cu ne tocante e asunto. Mi a pensa cu di e manera ey lo mi a haya sa kico ta e berdad.

Iglesia Catolico Romano ta malinterpreta loke Hesus a bisa na Mateo 16:18 y 19; nan ta uza e palabranan aki pa apoya e siñansa di sucesion apostolico. Iglesia Catolico ta siña hende tambe cu papa no ta faya den asuntonan di doctrina ora e ta papia ex cathedra, esta, ora e ta eherce su funcion oficial. Mi a kere esaki. Pesey, mi a kere cu e doctrina di Trinidad mester ta berdad pasobra ta papa, kende e catoliconan ta yama Tata Santo, a bisa cu e ta berdad. Pero si papa por comete fayo, anto e doctrina ey tambe por ta falso. No ta nada straño cu e siñansa di sucesion apostolico ta e siñansa di mas importante pa hopi catolico. Dicon? Pasobra tur nan otro siñansanan ta depende di si e siñansa aki e ta berdad of no.

Ora mi a bay cerca e pastoor, e no por a contesta mi preguntanan. Pero el a duna mi un buki cu ta papia di sucesion apostolico pa mi bay cas cu ne. Mi a les’e, pero mi a bolbe cerca e pastoor cu mas pregunta. Finalmente, como cu e no por a contesta mi preguntanan, el a bisa mi: “Mi no por convence bo ni abo no por convence mi. ... Mi ta desea bo tur cos bon.” E no kier a papia cu mi mas.

Despues di esey, mi tabata cla pa cuminsa studia Bijbel cu Ilse y Elfriede. Nan a siña mi hopi cos tocante e berdadero Tata Santo den cielo, cu ta Jehova Dios. (Juan 17:11) E tempo ey no tabatin un congregacion den e area ey, pues e dos ruman muhernan aki tabata tene e reunionnan na cas di un famia cu a mustra interes den e berdad. Un par di hende so tabata asisti. Y como cu no tabatin ningun ruman homber batisa pa dirigi, nan dos tabata haci e partinan. De bes en cuando, un ruman homber di un otro pueblo tabata bin duna un discurso publico den un luga cu nan tabata huur.

Ilse y Elfriede a cuminsa studia Bijbel cu mi na october 1958, y tres luna despues, na januari 1959, mi a batisa. Prome cu mi a batisa, mi a puntra nan si mi por a bay di cas pa cas hunto cu nan pa mi wak con nan tabata haci e trabou di predica. (Echo. 20:20) Despues di a bay un biaha cu nan, mi a puntra nan si mi por a haya mi mes teritorio pa mi predica. Nan a duna mi un pueblito y mi so tabata bay predica di cas pa cas y rebishita e hendenan cu a mustra interes. E prome ruman homber cu mi a bay den sirbishi cu ne tabata e superintendente di circuito cu a bin bishita nos despues.

Na 1960, despues cu mi a caba e scol pa maneho di hotel, mi a regresa mi pueblo y a purba di siña mi famianan e berdadnan di Bijbel. Aunke algun di nan ta mustra interes, te awe niun di nan no a bin den e berdad.

Durante aña 1961, sucursal tabata manda carta na e congregacionnan pa anima e rumannan pa pensa riba e trabou di pionero. Como cu mi tabata jong y bon di salud, mi a pensa cu mi no tabatin motibo pa keda sin traha pionero. Pero mi tabata pensa cu pa traha pionero mi tabatin mester di un auto. Pesey, mi a puntra Kurt Kuhn, e superintendente di circuito, kico e ta pensa di mi plan pa traha un par di luna mas pa mi por cumpra un auto. Su contesta tabata: “Hesus y su apostelnan tabatin mester di auto pa bay den sirbishi di tempo completo?” Esey tabata tur loke mi tabatin mester! Mi a plania pa cuminsa traha pionero mas pronto posibel. Pero como cu mi tabata traha 72 ora pa siman den restaurant di un hotel, mi mester a haci algun cambio.

 Mi a puntra mi hefe si mi por a cuminsa traha 60 ora en bes di 72. El a bisa si y a sigui paga mi e mesun salario. Un poco tempo despues, mi a puntr’e si mi por a traha 48 ora pa siman. El a bay di acuerdo cu esey tambe y a sigui paga mi e mesun salario. Despues mi a puntr’e si mi por a traha 36 ora pa siman, 6 dia trahando 6 ora pa dia. El a bay di acuerdo cu esey tambe. Y sorprendentemente, mi a sigui haya e mesun salario! Ta parce cu mi hefe no kier a perde mi. Cu e orario ey, mi a cuminsa traha pionero regular. E tempo ey, un pionero mester a traha 100 ora pa luna.

Cuater luna despues, mi a ser nombra como pionero special y como sirbidor di congregacion den un congregacion chikito na Spittal an der Drau, un stad den e provincia Carinthia. E tempo ey, pioneronan special mester a traha 150 ora pa luna. Mi no tabatin un compañero pionero, pero mi tabata aprecia e yudansa cu mi tabata ricibi di un ruman muher cu yama Gertrude Lobner, kende tabata sirbi como assistent di e sirbidor di congregacion. *

Na aña 1963, mi a haya invitacion pa sirbi como superintendente di circuito. Tin biaha mi mester a biaha cu trein di un congregacion pa otro cargando maletanan pisa. Mayoria di ruman no tabatin auto, pues ningun hende no por a busca mi na stacion di trein. Y pa e rumannan no pensa cu mi tabata show off, mi no tabata coy taxi; en bes di esey, mi tabata cana bay cas di e rumannan caminda mi mester a keda.

Na 1965, tempo cu mi tabata soltero ainda, mi a haya invitacion pa asisti na e di 41 klas di e Scol di Galaad. Hopi di mi compañeronan di klas tambe tabata soltero. Pa mi gran sorpresa, ora nos a gradua, mi a haya asignacion pa regresa mi pais Austria y sigui sirbi como superintendente di circuito. Pero prome cu mi a bandona Merca, mi a haya e peticion pa traha hunto cu un superintendente di circuito pa cuater siman. Mi a aprecia hopi cu mi por a traha hunto cu Anthony Conte, un ruman amoroso cu tambe ta stima sirbishi di veld y cu tabatin bastante exito den sirbishi. Nos a sirbi hunto na New York, den e area di Cornwall.

Ora mi a regresa Austria, mi a ser asigna na un circuito caminda mi a topa Tove Merete, un ruman muher soltero hopi bunita. El a lanta den e berdad for di tempo cu e tabatin cinco aña di edad. Ora e rumannan puntra con nos a topa otro, nos ta haci wega y bisa: “Ta sucursal a percura pa esey.” Nos a casa un aña despues, na april 1967, y hunto nos a sigui traha den e trabou di superintendente biahero.

E siguiente aña, mi a realisa cu mediante Jehova su bondad inmereci, el a adopta mi como su yiu spiritual. Asina mi a cuminsa un relacion special cu mi Tata celestial y cu tur e otro rumannan ungi cu di acuerdo cu Romanonan 8:15 “ta grita: ‘Aba, Tata!’”

Ami cu Merete a sigui den e trabou di circuito y di districto te na 1976. Tabatin biaha durante winter cu nos mester a drumi den cambernan cu temperatura bou di cero y sin calefaccion. Un biaha,  ora nos a spierta nos a ripara cu e parti ariba di nos laken tabata stijf y blanco, gevries debi na nos rosea. Finalmente, nos a dicidi di biaha cu un calefaccion electrico chikito pa asina anochi nos por a mantene e temperatura na un grado soportabel. Na algun luga, pa uza baño anochi nos mester a cana den sneeuw bay den un baño pafo, caminda biento friu tabata pasa. Ademas, nos no tabatin un apartamento di nos mes, pesey, generalmente riba dialuna, nos tabata keda den e mesun cas cu nos a keda e siman prome. Anto diamars nos tabata bay e siguiente congregacion.

Mi ta contento di por bisa cu durante tur e añanan ey mi casa stima tabata un gran apoyo pa mi. E ta stima sirbishi di veld, y nunca mi no tabatin cu anim’e pa sali den sirbishi. E tambe ta stima e rumannan y ta hopi interesa den hende. Mi casa tabata un gran yudansa.

Na 1976 nos a haya invitacion pa bay sirbi na e sucursal di Austria na Viena y mi a ser nombra como miembro di Comite di Sucursal. E tempo ey, e sucursal na Austria tabata supervisa e trabou di predica den varios pais na Oost Europa y tabata percura discretamente pa e rumannan na e paisnan ey ricibi literatura. Ruman Jürgen Rundel tabata dirigi e trabou aki y mi tabatin e privilegio di traha hunto cu ne. Despues mi a haya e privilegio di por a supervisa e departamento di traduccion cu tabata traduci literatura na dies idioma cu hende tabata papia na Oost Europa. Jürgen cu su casa, Gertrude, a sigui sirbi fielmente como pionero special na Alemania. Na 1978, e sucursal na Austria a cuminsa uza e sistema di fotocompocision y tabata imprimi revista na seis idioma riba un imprenta offset chikito. Ademas, nos tabata manda revista pa abonadonan den diferente pais. Otto Kuglitsch, kende awor ta sirbi na e sucursal na Alemania hunto cu su casa, Ingrid, ta esun cu tabata encarga cu e tarea aki.

E rumannan na Oost Europa tambe tabata produci literatura na nan pais; nan tabata uza mashin di stencil of film pa imprimi literatura. No obstante, nan tabatin mester di yudansa di nan rumannan di otro pais. Jehova a proteha nan actividadnan; y nos cu tabata na sucursal a haya hopi amor pa e rumannan cu a sigui sirbi Jehova fielmente pa hopi aña bou di circunstancianan dificil tempo cu e trabou tabata prohibi.

Na 1989, mi tabatin e privilegio di bay Rumania hunto cu Ruman Theodore Jaracz, kende tabata miembro di e Cuerpo Gobernante. E meta di e bishita aki tabata pa yuda un grupo grandi di ruman bin bek den e organisacion di Jehova. Desde 1949, pa varios motibo e rumannan aki a separa nan mes for di e organisacion y a bay forma nan mes congregacionnan. Pero nan a sigui predica y a batisa hende cu a acepta e mensahe. Nan a hasta bay prizon pasobra nan a keda neutral mescos cu e rumannan cu si a keda den e organisacion di Jehova. E tempo ey, ainda e trabou tabata prohibi na Rumania. Pesey, nos a reuni den secreto na cas di Ruman Pamfil Albu hunto cu cuater anciano clave y e representantenan di e Comite di Pais di Rumania cu e sede mundial a nombra. Nos a bay tambe cu un interprete for di Austria, Rolf Kellner.

E di dos anochi di deliberacion, Ruman Albu a convence su cuater compañeronan anciano pa uni cu nos ora el a bisa nan: “Si nos no hacie awor, kisas nunca mas nos no ta haya un otro oportunidad.” Despues di esaki, alrededor di 5.000 ruman a bolbe na e organisacion. Esey tabata un victoria pa Jehova y un derota pa Satanas!

Na final di 1989, prome cu comunismo a cay na Oost Europa, Cuerpo Gobernante a pidi ami cu mi casa pa nos muda bay e sede mundial na New York. Esaki tabata un sorpresa pa nos. Nos a cuminsa sirbi na Betel di Brooklyn na juli 1990. Na 1992, mi a ser nombra como assistent di e Comite di Sirbishi di e Cuerpo Gobernante, y desde juli 1994, mi tin e privilegio di sirbi como miembro di e Cuerpo Gobernante.

Hopi tempo pasa mi tabata sirbi como waiter den hotel. Awor mi tin e privilegio di por yuda prepara y distribui cuminda spiritual pa nos hermandad mundial. (Mat. 24:45-47) Ora mi wak bek riba mi 50 añanan den sirbishi special di tempo completo, e unico cos cu mi por bisa ta cu mi ta hopi agradecido na Jehova. Mi ta sinti mi masha feliz mes ora mi mira con Jehova a bendiciona nos hermandad mundial. Mi ta gusta bay nos asambleanan internacional caminda nos ta siña tocante nos Tata celestial, Jehova, y tocante e berdad di Bijbel.

Pesey, mi ta haci oracion pa miyones di hende mas cuminsa studia Bijbel, acepta e berdad, y sirbi Jehova den union cu nos hermandad mundial. (1 Ped. 2:17) Ademas, mi ta anhela pa e dia yega cu for di cielo mi por mira con e resureccion riba Tera lo tuma luga pa porfin mi mira mi tata biologico. Mi ta spera cu e, mi mama y mi otro famianan stima lo kier adora Jehova den Paradijs.