NOS ta bibando den e tempo di mas dificil cu humanidad a yega di conoce. (2 Tim. 3:1-5) Diariamente nos amor pa Jehova y nos determinacion pa biba na harmonia cu su normanan husto ta ser poni na prueba. Hesus a profetisa di e tempo dificil aki y a sigura su siguidornan cu nan lo ricibi e animacion necesario pa por persevera te na fin. (Mat. 24:3, 13; 28:20) Y pa fortalece su siguidornan, el a nombra un esclavo fiel pa duna nan “cuminda na e debido tempo.”—Mat. 24:45, 46.

For di tempo cu e esclavo fiel a ser nombra na 1919, miyones di ‘sirbidor di cas’ di tur idioma a bin den e organisacion di Dios y ta ricibi cuminda spiritual. (Mat. 24:14; Rev. 22:17) Sinembargo, no ta tur loke e esclavo fiel ta publica ta disponibel na tur idioma. Ademas, no ta tur hende tin acceso na nos publicacionnan cu ta disponibel den forma electronico. Pesey, nan no por wak e videonan ni lesa e articulonan cu ta ser publica unicamente riba e website jw.org. Awor, esey ta nifica cu algun ruman ta perdiendo cuminda spiritual pa keda spiritualmente fuerte? Pa nos por yega na e conclusion corecto, nos mester contesta cuater pregunta importante.

Ora Satanas a purba di pone Hesus cay den tentacion p’e laga piedra bira pan, Hesus a contest’e: “Hende no mester biba di pan so, sino tambe di tur palabra cu ta sali for di boca di Jehova.” (Mat. 4:3, 4) Y Jehova su palabranan ta den Bijbel. (2 Ped. 1:20, 21) Pesey, e ingrediente principal di nos cuminda spiritual ta Bijbel.—2 Tim. 3:16, 17.

Jehova su organisacion a percura pa e Traduccion di Mundo Nobo di e Santo Scritura ta disponibel den mas cu 120 idioma, sea completo of en parte. Y tur aña, mas idioma ta bin acerca. Ademas di e traduccion ey, tin miles di miyones di ehemplar di otro versionnan di Bijbel disponibel, sea completo of en parte, den miles di idioma. E logro asombroso aki ta na harmonia cu Jehova su boluntad pa “tur sorto di hende ser salba y yega na un conocemento exacto di e berdad.” (1 Tim. 2:3, 4) Y como cu “tur cos ta sunu y habri dilanti” di Jehova, nos por ta sigur cu e lo hala of atrae tur hende cu ta “consciente di nan necesidad spiritual” na su organisacion y percura pa nan haya cuminda spiritual.—Heb. 4:13; Mat. 5:3, 6; Juan 6:44; 10:14.

Pa un persona por tin un fe fuerte, no solamente e tin cu lesa Bijbel, pero tambe e tin cu compronde loke e ta lesa y aplica loke e ta siña. (Sant. 1:22-25) Un eunuco di Etiopia cu a biba den prome siglo a compronde esaki. E tabata lesando e Palabra di Dios ora cu Felipe a puntr’e: “Bo ta compronde tur loke bo ta lesa?” El a contesta Felipe: “Con mi por compronde si ningun hende no guia mi?” (Echo. 8:26-31) E ora ey, Felipe a yuda e eunuco haya conocemento exacto di e Palabra di Dios. Loke e eunuco a siña a conmov’ele asina tanto cu el a batisa. (Echo. 8:32-38) Di mes manera, nos publicacionnan basa riba Bijbel ta yuda nos haya conocemento exacto di e berdad. Nan ta conmove nos curason y ta motiva nos pa aplica loke nos ta siña.—Col. 1:9, 10.

Mediante e publicacionnan, sirbidornan di Jehova ta haya un abundancia di cos spiritual pa nan, na moda di papia, come y bebe. (Isa. 65:13) E Toren di Vigilancia, por ehempel, ta disponibel na mas cu 210 idioma. E ta splica profecianan di Bijbel, e ta aumenta nos comprondemento di berdadnan profundo di Bijbel y ta motiva nos pa biba na harmonia cu principionan di Bijbel. E revista ¡Despertad! ta disponibel na mas o menos 100 idioma; esaki ta yuda nos siña mas tocante e bunita creacion y con nos por aplica conseho practico cu nos ta haya den Bijbel. (Prov. 3:21-23; Rom. 1:20) Bo sa na cuanto idioma e esclavo fiel ta percura publicacionnan basa riba Bijbel? Den mas cu 680 idioma! Abo ta aparta tempo pa lesa Bijbel tur dia? Bo ta lesa tur e revista- y publicacionnan cu ta disponibel den bo idioma?

Ademas, e organisacion di Jehova ta percura boskeho pa e discursonan cu nos ta tende na nos reunion-, asamblea- y congresonan. Bo ta disfruta di e discurso-, drama-, demostracion- y entrevistanan cu ta ser presenta na e reunionnan ey? No tin duda, Jehova ta percura un tremendo bankete pa nos!—Isa. 25:6.

Claro cu no, nos no mester keda sorprendi si tin biaha algun sirbidor di Jehova ta ricibi mas alimento spiritual cu otronan. Dicon no? Pasobra den e prome siglo e apostelnan, por ehempel, a ricibi mas instruccion cu hopi di e otro discipelnan. (Mar. 4:10; 9:35-37) Esaki no ta nifica cu e otro discipelnan tabata malnutri den sentido spiritual, pasobra nan a ricibi loke nan tabatin mester.—Efe. 4:20-24; 1 Ped. 1:8.

Ta bon pa nos corda tambe cu mayoria di e cosnan cu Hesus a papia y haci ora e tabata riba Tera no ta skirbi den Bijbel. Apostel Juan a skirbi: “De echo, tin hopi cos mas cu Hesus a haci, y mi ta supone cu si un dia mester skirbi nan en detaye, mundo mes lo no por contene e rolnan ey.” (Juan 21:25) Y aunke Hesus su discipelnan den prome siglo tabatin mas informacion tocante Hesus cu nos tin awe, nos no ta haya falta di cuminda spiritual. Dicon no? Pasobra Jehova ta percura pa nos haya suficiente conocemento tocante Hesus pa nos por sigui su pasonan.—1 Ped. 2:21.

Pensa tambe riba e cartanan cu e apostelnan a manda pa e congregacionnan den prome siglo. Tin por lo menos un carta di Pablo cu no ta den Bijbel. (Col. 4:16) Awor, e echo cu nos no tin e carta ey, ta nifica cu nos no tin suficiente cuminda spiritual? No, pasobra Jehova sa kico nos tin mester y e ta duna nos suficiente alimento spiritual pa nos por keda spiritualmente fuerte.—Mat. 6:8.

Awendia, tin algun Testigo cu tin mas cuminda spiritual na nan disposicion cu otronan. Abo ta papia un idioma den cua no tin hopi publicacion disponibel? Si esey ta e caso, no preocupa pasobra Jehova ta percura pa bo tambe. Studia e publicacionnan cu tin na bo disposicion y, si ta posibel, asisti na e reunionnan den un idioma cu bo ta compronde. Di e manera ey, bo por ta sigur cu Jehova lo yuda bo keda spiritualmente fuerte.—Sal. 1:2; Heb. 10:24, 25.

Riba nos website, nos ta publica nos revistanan y otro publicacionnan pa studia Bijbel. Riba e website tin tambe informacion pa yuda parehanan casa, mayornan, teenagernan y muchanan mas chikito. Famianan ta beneficia masha hopi ora nan ta analisa e informacionnan aki durante nan Adoracion Como Famia. Ademas, nos website ta duna informacion tocante programanan special, manera graduacion di Galaad y e reunion anual; e ta tene henter nos hermandad na altura di desasternan natural y di asuntonan legal cu tin efecto riba e pueblo di Jehova. (1 Ped. 5:8, 9) E website ta un bon medio tambe pa predica e bon noticia hasta den paisnan caminda nos trabou ta restringi of prohibi.

Sinembargo, nos por keda spiritualmente fuerte sea cu nos tin acceso na nos website of no. E esclavo fiel ta traha duro pa produci suficiente informacion imprimi pa e “sirbidornan di cas” por ta bon alimenta den sentido spiritual. Pesey, bo no mester sinti bo obliga di cumpra un aparato electronico djis pa bo haya acceso na jw.org. Tin ruman cu a tuma iniciativa pa print cierto informacion cu ta ser publica riba nos website y ta duna esaki personalmente na esnan cu no tin acceso na Internet; pero e congregacionnan no tin obligacion di haci esaki.

Nos ta masha contento cu Hesus ta cumpli cu su promesa y ta percura pa nos haya loke nos tin mester pa keda spiritualmente fuerte. Si, nos por tin confianza cu Jehova lo sigui percura pa nos haya cuminda spiritual na e “debido tempo” te na fin di e mundo malbado aki.