1, 2. Ki asignacion Jehova a duna Moises, y kico Jehova a primintie?

IMAGINA bo cu bo tin cu presenta dilanti di e gobernante di mas poderoso na mundo pa papia den nomber di Dios su pueblo. Con lo bo sinti bo? Probablemente lo bo ta nervioso y kisas lo bo no por ni papia. Awor, con lo bo prepara bo mes? Y como representante di e Dios Todopoderoso, kico bo por haci pa bo palabranan por tin mas peso?

² Esey tabata loke Moises a pasa aden. Bijbel ta bisa cu Moises “tabata masha humilde, mas cu tur homber cu tabatin riba superficie di Tera.” (Num. 12:3) Pero toch Jehova a mand’e cerca Farao, kende tabata un homber arogante y sin respet. Jehova a bisa Moises pa e ordena Farao pa laga Dios su pueblo, e miyones di Israelitanan, haya libertad pa nan por a bandona e pais. (Exo. 5:1, 2) Ta di compronde cu Moises a puntra Jehova: “Ta ken mi ta pa mi lo a bay cerca Farao y saca e yiunan di Israel for di Egipto?” Probablemente Moises a sinti cu e no ta capacita pa papia cu Farao. Pero Jehova a bis’e cu lo e no ta su so. Jehova a sigur’e: “Lo mi ta cu bo.”—Exo. 3:9-12.

3, 4. (a) Di kico Moises tabatin miedo? (b) Den ki sentido nos tambe lo por haya nos cu desafio similar na esun cu Moises a confronta?

³ Di kico Moises tabatin miedo? Probablemente e tabata pensa cu Farao lo a rechas’e y keda sin haci caso di dje como  representante di Jehova Dios. Moises tabatin miedo tambe cu su mes hendenan lo no a kere cu ta Jehova a nombr’e pa libra nan for di Egipto. Pesey, Moises a bisa Jehova: “Supone cu nan no kier kere mi, ni tende na loke mi ta bisa. Supone cu nan bisa: ‘SEÑOR no a aparece na bo.’”—Exo. 3:15-18; 4:1.

⁴ Awor kico di anos? Ta berdad cu kisas nunca nos lo tin cu presenta dilanti di un gobernante importante. Pero kico si bo tin dificultad pa papia tocante Dios y tocante su Reino cu hende den bo teritorio? E contesta cu Jehova a duna Moises y loke a sosode despues ta siña nos un les hopi importante. Pesey, laga nos wak kico nos por siña for di e experencia di Moises.

5. Kico Jehova a duna Moises, y con esaki a dun’e curashi? (Wak e prome plachi.)

⁵ Ora Moises a bisa Jehova cu e tabatin miedo cu hende lo no a tum’e na serio, Dios a prepar’e pa e por a enfrenta loke tabata sper’e cu exito. E relato na Exodo ta bisa cu Jehova a puntr’e: “Kico bo tin den bo man?” Moises a contesta: “Un bara.” Jehova a bis’e: “Bent’e abou na suela.” Moises “a bent’e abou na suela y el a bira un colebra, y Moises a huy p’e.” Pero Jehova a bisa Moises: “Saca bo man gar’e na su rabo.” Moises a saca su man y a gara e colebra, y e colebra a bira un bara den su man. E ora ey, Jehova Dios a bis’e cu esaki ta “pa nan kere cu SEÑOR ... a aparece na bo.” (Exo. 4:2-5) Si, Jehova a uza su poder y a laga un bara sin bida bira un colebra bibo. Cu e milager aki Moises por a proba cu en berdad e tabata un representante di Dios y cu Dios a dun’e autoridad. Jehova a bis’e: “Y bo mester coge e bara aki den bo man, cu cual bo ta haci e señalnan.” (Exo. 4:17) Cu e simbolo di autoridad ey den su man, Moises a haya e curashi cu e tabatin mester pa bay papia cu Farao y cu e pueblo di Dios.—Exo. 4:29-31; 7:8-13.

6. (a) Kico nos tin den nos man mayoria di biaha cu nos ta duna testimonio na un persona, y dicon? (b) Splica dicon Pablo a bisa cu “e palabra di Dios ta bibo y poderoso.”

⁶ Awor kico di anos? Kico nos tin den nos man ora nos ta papia cu hende tocante e mensahe di Bijbel? Mayoria di biaha, nos tin nos Bijbel y nos ta cla pa uz’e. Aunke algun hende ta pensa cu Bijbel ta djis un buki, e ta mucho mas cu esey. E ta e Palabra inspira di Jehova pa medio di cua Jehova ta papia cu nos. (2 Ped. 1:21) Bijbel ta contene Dios su promesanan y ta revela na nos kico e Reino di Dios lo haci. Apostel Pablo a skirbi: “E palabra di Dios ta bibo y poderoso.” (Lesa Hebreonan 4:12.) Dicon Pablo a bisa esey? Pasobra Jehova su promesanan no ta promesanan bashi: Jehova semper ta percura pa nan cumpli. (Isa. 46:10; 55:11) Unabes un persona compronde esaki encuanto e Palabra di Jehova, loke e ta lesa den Bijbel por tin gran influencia riba dje.

7. Con nos por “maneha e palabra di e berdad corectamente”?

⁷ Jehova a duna nos su Palabra, Bijbel, cu ta bibo. Cu ne, nos por duna prueba cu e mensahe cu nos ta predica ta confiabel y cu e ta bin di Dios. Pesey, ora Pablo tabata entrena Timoteo, el a anim’e pa “maneha e palabra di e berdad corectamente.” (2 Tim. 2:15) Awor, con anos por aplica Pablo su conseho? Scogiendo textonan apropia pa lesa, cu por touch curason di e personanan cu ta scucha nos. Y e tratadonan cu nos a haya na aña 2013 ta specialmente prepara pa yuda nos haci esey.

8. Kico un superintendente di sirbishi a bisa di nos tratadonan nobo?

⁸ Tur e tratadonan tin e mesun estilo. Pues, unabes nos sa con pa uza un, nos sa  con pa uza tur. Y nan ta facil pa uza. Un superintendente di sirbishi na Hawai, Merca, a skirbi: “Nos no por a imagina nos mes con eficaz e tratadonan aki lo a resulta den sirbishi di cas pa cas y ora di predica na luganan publico.” Dicon e tratadonan aki ta asina eficaz y facil pa uza? Segun e ruman, e manera cu e tratadonan ta hinca den otro ta anima hopi hende pa expresa nan mes. Debi cu riba nan portada tin un pregunta y su posibel contestanan, un doño di cas lo no mester tin miedo cu e por duna un contesta robes. Y hopi bes, esaki ta hiba na combersacionnan interesante.

9, 10. (a) Con nos tratadonan ta yuda nos uza Bijbel? (b) Cua tratado abo tabatin mas exito cu ne, y dicon?

⁹ Cada tratado ta contene un texto biblico, cu a ser scogi cuidadosamente, cu nos por lesa pa e doño di cas. Tuma, por ehempel, e tratado Sufrimento Lo Caba Algun Dia? Ora nos haci e doño di cas e pregunta ey, e por contesta sea “si”, “no” of “kisas.” Sea loke sea su contesta, bay di biaha na e siguiente pagina parti paden y bis’e: “Esaki ta loke Bijbel ta bisa.” Despues, lesa Revelacion 21:3 y 4.

¹⁰ Nos por uza e mesun metodo aki ora di laga e tratado Kico Abo Ta Pensa di Bijbel? No ta importa cua di e tres contestanan e doño di cas scoge. Bay di biaha na e siguiente pagina parti paden y bis’e: “Bijbel ta bisa cu ‘henter e Scritura ta inspira di Dios.’” Despues, bo por bisa: “Y bo sa, e texto di Bijbel aki ta bisa algo mas.” Despues, habri bo Bijbel y lesa 2 Timoteo 3:16 y 17.

11, 12. (a) Con bo por uza e tratadonan nobo pa haci bo sirbishi mas placentero? (b) Con e tratadonan aki por yuda bo prepara pa haci rebishita?

¹¹ Dependiendo di e manera cu e doño di cas reacciona, nos por determina cuanto informacion mas di e tratado nos por trata. Pero sea loke sea e caso, nos por tin e satisfaccion di a laga e tratado den man di e persona na nos prome bishita y di a lesa for di e Palabra di Dios p’e maske ta un of dos versiculo so. Y na un otro ocasion, nos por bolbe pa sigui cu e combersacion.

¹² Parti patras di cada tratado, bou di e subtema “Algo pa Pensa Ariba”, tin un pregunta y textonan di Bijbel cu bo por trata na e siguiente bishita. Por ehempel, e tratado Kico Bo Ta Pensa Lo Sosode den  Futuro? tin e siguiente pregunta cu bo por trata na bo proximo bishita: “Con Dios lo cambia nos mundo den un mihor luga di biba?” Y e textonan di Bijbel cu bo por uza ta Mateo 6:9 y 10 y Daniel 2:44. E tratado Di Berdad Hende Morto Por Bolbe Biba? tin e siguiente pregunta: “Dicon nos ta bira bieu y muri?” E textonan cu bo por uza ta Genesis 3:17-19 y Romanonan 5:12.

13. Splica con nos por uza e tratadonan pa cuminsa estudio di Bijbel.

¹³ E tratadonan aki ta prepara specialmente pa yuda nos cuminsa estudio di Bijbel. Ora un persona scan e codigo QR cu tin parti patras di e tratado, e ta ser dirigi mesora na un pagina riba nos website cu ta anim’e pa cuminsa un curso di Bijbel. E tratadonan ta hala atencion tambe na e foyeto Dios Tin Bon Noticia pa Nos! y ta resalta un les specifico den e foyeto aki. Por ehempel, e tratado Bou di Control di Ken Mundo Ta en Realidad? ta anima hende pa lesa les 5 di e foyeto. E tratado Kico Ta e Clave pa Felicidad den Famia? ta anima hende pa lesa les 9. E tratadonan aki a ser prepara specialmente pa yuda nos uza Bijbel na nos prome bishita y ora nos ta haci rebishita. Di e manera aki, nos por cuminsa mas estudio di Bijbel. Kico mas nos por haci pa uza e Palabra di Dios na un manera mas eficaz den sirbishi?

14, 15. Con bo por imita Pablo su ehempel den sirbishi?

¹⁴ Pablo su deseo sincero tabata pa compronde e manera di pensa di “mas tanto hende posibel” cu e topa den sirbishi. (Lesa 1 Corintionan 9:19-23.) Dicon? E tabata kier “gana Hudiu ..., gana esnan cu ta bou di ley ..., esnan sin ley ... [y] hende debil.” Si, e kier a predica na “tur sorto di hende” pa e por a yuda sikiera algun di nan haya salbacion. (Echo. 20:21) Con nos por imita Pablo su ehempel ora nos ta prepara pa comparti e berdad cu “tur sorto di hende” den nos teritorio?—1 Tim. 2:3, 4.

¹⁵ Tur luna Nos Ministerio di Reino ta duna sugerencia cu nos por uza pa presenta nos mensahe. Purba di uza e sugerencianan aki. Pero kico si e hendenan den bo teritorio ta interesa den otro topico? E ora ey, ta bon pa prepara presentacionnan cu ta trata topiconan cu lo interesa nan. Con bo por haci esey? Wel, cuminsa pensa riba e hendenan den bo teritorio y riba loke mas ta interesa nan. Despues, pensa riba un texto biblico cu lo por yuda nan. Un superintendente di circuito a splica kico e y su esposa ta haci pa nan uza Bijbel mas tanto posibel den sirbishi. El a bisa: ‘Mayoria di doño di cas ta laga nos lesa un texto di Bijbel pa nan si nos ta breve y al caso. Pesey, nos ta percura pa nos tin nos Bijbel habri y, despues di cuminda e doño di cas, nos ta lesa e texto pa nan.’ Den e siguiente paragrafnan, nos lo trata algun topico, pregunta y texto di Bijbel cu a duna bon resultado den sirbishi. Kisas bo por uza algun di nan den bo teritorio.

16. Splica con lo bo por uza Isaias 14:7 den sirbishi.

¹⁶ Si bo ta biba den un area caminda tin hopi violencia y crimen, lo bo por puntra un persona: “Bo ta kere cu algun dia nos lo lesa riba e prome pagina di corant: ‘Henter e Tera ta na paz. Hende ta dal grito di alegria’? Esaki ta loke Bijbel ta bisa na Isaias 14:7. Anto bo sa, Bijbel ta contene hopi promesa di Dios tocante e periodo di paz cu lo bin pronto.” Despues, puntra e persona si bo por lesa un di e promesanan ey p’e for di Bijbel.

17. Con nos por uza Mateo 5:3 den un combersacion?

 ¹⁷ Den e area caminda bo ta biba ta dificil pa hende gana nan pan di cada dia? Si ta asina, lo bo por cuminsa bo presentacion cu e siguiente pregunta: “Cuanto placa un hende mester gana pa su famia por ta feliz?” Despues di scucha e persona su contesta, bo por bis’e: “Tin hopi hende cu ta gana mucho mas cu esey y toch nan famia no ta feliz. Kico hende tin mester anto pa nan ta realmente feliz?” E ora ey, lesa Mateo 5:3 y ofrece e persona un estudio di Bijbel.

18. Con nos por uza Jeremias 29:11 pa consola hende?

¹⁸ Tin hende den bo teritorio cu ta sufri debi na un of otro tragedia cu a sosode recientemente? Lo bo por cuminsa bo presentacion bisando: “Mi a bin bishita bo pa duna bo un poco consuelo.” (Lesa Jeremias 29:11.) Despues, bo por bisa: “Bo a ripara kico ta e tres cosnan cu Dios kier pa nos tin? ‘Paz’, ‘un futuro’ y ‘un speransa.’ No ta dushi pa sa cu Dios kier pa nos ta feliz? Pero esey ta posibel?” E ora ey, bay na e les corespondiente den e foyeto Bon Noticia.

19. Splica con nos por uza Revelacion 14:6 y 7 ora nos topa hende religioso.

¹⁹ Bo ta biba den un area caminda tin hopi hende religioso? Si esey ta e caso, kisas bo por cuminsa bo combersacion bisando: “Si un angel mester papia cu bo, lo bo scuch’e? (Lesa Revelacion 14:6, 7.) E angel den e texto aki ta bisa nos pa ‘teme Dios.’ Kico bo ta pensa? No ta importante pa nos haya sa di cua Dios e ta papiando? E angel mes ta duna nos un indicacion di ken e ta papiando ya cu el a referi na Esun ‘cu a traha cielo y Tera.’ Ken e Dios ey ta?” Despues, lesa Revelacion 4:11, cu ta bisa: “Bo ta digno, Jehova, nos Dios, di ricibi alabanza pa bo gloria, honor y poder, pasobra ta abo a crea tur cos.” Despues, ofrece e persona pa bo bin bek pa splica mas tocante Jehova Dios.

20. (a) Con nos por uza Eclesiastes 12:1 pa papia cu un hoben tocante nos Creador? (b) Cua texto abo a uza den sirbishi cu a duna bon resultado?

²⁰ Pa cuminsa un combersacion cu un hoben, kisas bo por bisa: “Mi kier a lesa un texto di Bijbel pa bo cu ta specialmente importante pa hobennan. (Lesa Eclesiastes 12:1.) E texto aki ta anima hobennan pa nan corda riba nan Creador. Awor, pa nos por corda riba nos Creador, nos mester siña conoc’e, no ta berdad? Con nos por siña conoc’e? Permiti mi mustra bo esey den Bijbel.”

21, 22. (a) Con un texto di Bijbel bon scogi por cambia bida di un persona? (b) Kico abo ta determina pa haci den sirbishi?

²¹ Nos no sa ki efecto un texto di Bijbel por tin riba un persona. Wak por ehempel loke a pasa na Australia. Dos ruman testigo di Jehova a bati na porta di un mucha muher hoben, y un di nan a puntr’e: “Bo sa con e nomber di Dios ta?” Despues, nan a lesa Salmo 83:18 p’e. E mucha muher a bisa: “Mi a keda sorprendi! Despues cu nan a bay, mi a core 56 kilometer pa bay un libreria pa busca e nomber den otro traduccionnan di Bijbel y den un diccionario. Ora mi a keda convenci cu e nomber di Dios ta Jehova, mi a puntra mi mes ta cuanto cos mas lo tin cu mi no sa.” Un poco tempo despues, e cu su futuro esposo a cuminsa studia Bijbel y despues di un tempo nan a batisa.

²² No tin duda, e Palabra di Dios tin poder pa cambia bida di hende. Con asina? Un persona cu ta lesa Bijbel por cultiva fe fuerte den Jehova su promesanan. Y e fe aki lo motiv’e pa aplica loke e ta siña. (Lesa 1 Tesalonicensenan 2:13.) E mensahe di Bijbel ta mas poderoso cu cualkier cos cu nos por bisa pa touch curason di un persona. Pesey, ta masha importante pa nos uza e Palabra di Dios mas tanto posibel den nos sirbishi. Corda, e ta bibo!