1, 2. (a) Menciona algun di e responsabilidadnan di un wardador di carne di Israel di antiguedad. (b) Den ki sentido mayornan ta manera wardador di carne?

WARDADORNAN DI CARNE den Israel di antiguedad tabatin un bida duro. Nan tabatin cu traha pafo, den solo cayente of den friu, y tambe proteha nan tou contra ladron y bestia salbahe. Ademas, nan tabata samina e carnenan regularmente, y si un carne tabata malo of herida, nan tabata dun’e e cuido necesario. Nan tabata specialmente pendiente di e lamchinan ya cu nan tabata mas delicado cu carne adulto.—Gen. 33:13.

² Den algun aspecto, mayornan cristian ta manera wardador di carne. Nan tin cu demostra e mesun cualidadnan cu un bon wardador di carne tin pa por cumpli cu nan responsabilidad di lanta nan yiunan “den e disciplina di Jehova y inculca su manera di pensa den nan.” (Efe. 6:4) Acaso esey ta un tarea facil? No! Muchanan tin cu lucha contra nan propio inclinacionnan imperfecto. Pa colmo, nan ta ser bombardia cu ideanan cu Satanas ta promove. (2 Tim. 2:22; 1 Juan 2:16) Si bo tin yiu, con bo por pastorea nan? Laga nos analisa tres cos cu bo por haci  pa yuda bo yiunan: (1) conoce nan, (2) alimenta nan y (3) guia nan.

3. Kico ‘conoce e condicion’ di bo yiunan ta encera?

³ Un bon wardador ta samina cada carne bon pa haci sigur cu e ta bon di salud. Den un sentido figurativo, bo por haci mescos cu bo yiunan. Bijbel ta bisa: “Sea sigur cu bo conoce condicion di bo tounan di carne.” (Prov. 27:23) Pa bo haci esaki, bo mester sa kico bo yiunan ta haci, ta pensa y ta sinti. Con bo por logra esey? Bo tin cu papia hopi cu bo yiunan.

4, 5. (a) Kico mayornan por haci pa nan yiunan papia tocante loke nan ta pensa y sinti? (Wak e prome plachi.) (b) Kico abo a haci pa bo yiunan por papia mas facil cu bo?

⁴ Algun mayor a ripara cu ora nan yiunan bira teenager, ta bira mas dificil pa comunica cu nan ya cu teenagernan tin e tendencia di isola nan mes y kisas no gusta papia tocante loke nan ta pensa of sinti. Si esey pasa cu bo yiunan, kico bo por haci? En bes di obliga bo yiu homber of bo yiu muher pa tin combersacionnan largo y formal cu bo, purba di papia cu ne na momentonan relaha, of informal. (Deu. 6:6, 7) Podise lo bo tin cu haci extra esfuerso pa boso haci cosnan hunto. Boso por bay cana of bay keiro un rato den auto, hunga un wega of traha hunto riba algo cu mester haci na cas. Na momentonan informal asina un adolescente por sinti su mes mas comodo y lo ta mas dispuesto pa expresa su mes.

⁵ Pero kico si ainda bo yiu no kier papia? Wel, purba di haci algo otro. Por ehempel, en bes di djis puntra bo yiu muher: “Con a bay awe?”, cont’e con a bay cu abo y kico abo a haci riba e dia ey. Lo e por sinti su mes mas comodo e ora ey pa papia tocante con su dia a bay. Of pa bo por sa kico e ta pensa di un tema, no puntr’e mucho stret: “Kico abo ta pensa di e tema aki?” Mas bien, bo por puntr’e: “Kico bo amiganan ta pensa di e tema aki?” Despues bo por puntr’e ki conseho lo e duna su amiganan.

6. Con bo por laga bo yiunan sinti cu bo tin tempo pa nan y cu bo ta dispuesto pa scucha nan?

⁶ Claro cu si bo kier pa bo yiunan comunica cu bo, nan tin cu sinti cu bo tin tempo pa nan y cu bo ta dispuesto pa scucha nan. Si tur ora bo ta parce ocupa, nan lo no conta bo nan problemanan. Awor con bo por mustra bo yiu cu bo ta dispuesto pa scuch’e? No djis bisa: “Bo por papia cu mi ki ora cu bo kier.” Bo yiunan teenager mester sinti cu bo ta tuma nan problemanan na serio y cu lo bo no reacciona na un manera exagera ora nan conta bo algo. Hopi mayor ta pone bon ehempel den esaki. Kayla, un mucha muher di 19 aña, a bisa: “Mi por papia tur cos cu mi tata. E no ta interumpi mi ora mi ta papia ni e no ta husga mi; e ta gewoon scucha. Anto despues, semper e ta duna mi hopi bon conseho.”

7. Con mayornan por ta balansa ora di papia tocante temanan delicado, manera salimento cu e sexo opuesto, cu nan yiunan sin fada nan?

⁷ Hasta ora bo tin cu papia tocante temanan delicado—por ehempel tocante salimento cu e sexo opuesto—tene cuidou pa bo no enfatisa e peligernan so y lubida di siña nan e manera corecto di mira e asunto. Un ehempel: Supone cu bo ta bay come na un restaurant y bo ta ripara cu tras di tur cuminda riba e menu nan a pone un spiertamento tocante e posibilidad di shiwata. Kico lo bo haci? Casi sigur bo ta bay for di eynan y busca un otro restaurant. Algo similar por sosode cu bo yiunan si nan bin cerca bo pa conseho, y e unico cos cu tin riba bo “menu” ta un lista di spiertamento. Esey por fada nan, y nan lo stop di pidi bo conseho. (Lesa Colosensenan 3:21.) Na luga di haci esey, trata di ta balansa. Un ruman muher hoben cu yama Emily a bisa: “Ora mi mayornan ta papia  cu mi tocante salimento cu mucha homber, nan no ta haci comosifuera esaki ta algo malo; nan kier enfatisa cu ta algo bunita pa siña conoce un persona y con importante ta pa haya un bon hende pa casa cu ne. Esaki a yuda mi sinti mi comodo pa papia cu nan tocante e tema ey. Eigenlijk, si mi kier cuminsa cu un relacion cu un mucha homber, lo mi kier pa nan sa esey, en bes di haci cos scondi.”

8, 9. (a) Dicon ta bon pa scucha bo yiu cu pasenshi sin interumpie? (b) Abo tabatin exito den scucha bo yiunan?

⁸ Di acuerdo cu loke Kayla a bisa, mustra bo yiunan cu bo ta dispuesto pa scucha nan door di tene pasenshi cu nan ora nan ta conta bo algo. (Lesa Santiago 1:19.) Katia, un mama soltera, a admiti: “Antes mi no tabatin niun tiki pasenshi cu mi yiu muher. Mi no tabata dun’e chens di caba di papia. Sea mi tabata mucho cansa pa scuch’e of simplemente mi no tabata kier p’e cansa mi cabes. Awor cu m’a cambia mi actitud, mi yiu muher tambe a cambia su actitud. Awor e ta mucho mas habri pa papia cu mi.”

⁹ Algo similar a pasa cu Ronald. El a conta: “Na prome instante, ora el a bisa mi cu e tabata gusta un mucha homber na scol, mi a bira furioso. Pero mi a corda con rasonabel y cu cuanto pasenshi Jehova ta trata cu su sirbidornan, y m’a pensa cu ta mihor mi duna mi yiu muher un chens di expresa su mes prome cu mi corigie. Mi ta contento cu mi a haci esey. Pa prome biaha m’a compronde kico mi yiu muher ta sinti. Ora el a caba di papia, m’a ripara cu tabata mas facil pa mi papia cu ne cu cariño. Pa mi sorpresa, el a acepta mi conseho, y el a bisa mi cu e ta bay haci su best pa mehora su comportacion.” Si bo ta combersa regularmente cu bo yiunan, bo tin mas chens di haya sa kico realmente nan ta pensa y sinti. E ora ey lo bo por tin mas influencia riba e decisionnan cu nan ta tuma den bida. *

10, 11. Con bo por yuda bo yiunan pa nan no desvia for di e berdad?

¹⁰ Un bon wardador sa cu cualkier carne por desvia for di e tou. Kisas e carne ta cuminsa come yerba cu ta keda un poco mas leu for di e tou. Anto pocopoco e ta keda bay mas leu te cu e ta perde. Asina por  pasa cu mucha tambe. Nan por cuminsa desvia pocopoco for di e berdad. Kisas mal compania of entretenimento degrada ta atrae nan. (Prov. 13:20) Kico bo por haci pa evita cu esey ta sosode?

¹¹ Si bo ripara algun punto debil den bo yiunan, no perde tempo. Yuda nan di biaha pa nan mehora den e aspectonan ey. Refina tambe e bon cualidadnan cristian cu nan tin. (2 Ped. 1:5-8) Boso Adoracion Como Famia ta un bon ocasion pa haci esey. Ora Nos Ministerio di Reino di october 2008 a describi e areglo di Adoracion Como Famia, e articulo a bisa: “Un animacion ta bay na cabesnan di famia pa tuma e responsabilidad cu nan tin dilanti di Jehova na serio pa percura pa e famia tin un programa di estudio di Bijbel riba un base regular y cu nan lo por saca beneficio for di dje.” Abo ta probecha plenamente di e areglo bondadoso aki pa pastorea bo yiunan? Bo por ta sigur cu bo yiunan ta aprecia e esfuerso cu bo ta haci pa yuda nan den sentido spiritual.—Mat. 5:3; Flp. 1:10.

12. (a) Con hobennan ta beneficia di Adoracion Como Famia cu ta tuma luga riba un base regular? (Wak tambe e cuadro “ Nan Ta Aprecia Esey.”) (b) Con abo personalmente a beneficia di boso Adoracion Como Famia?

¹² Wak kico un teenager cu yama Carissa a bisa tocante e manera cu e programa di Adoracion Como Famia a beneficia su famia. El a bisa: “Mi ta gusta cu nos tur por sinta hunto y papia. Esaki ta yuda pa nos tin un bon relacion cu otro y nos ta keda cu bunita recuerdo. Mi tata ta percura pa semper nos tin nos Adoracion Como Famia. Ta un animacion pa mira cu e ta tuma esaki realmente na serio, y esaki ta pone cu ami tambe kier tuma esey na serio. Tambe esey ta duna mi mas motibo pa respet’e como tata y como mi cabes spiritual.” Un ruman muher hoben cu yama Brittney a bisa: “E Adoracion Como Famia a yuda mi pa mi por tin un mihor relacion cu mi mayornan. Esey ta laga mi mira cu nan ta interesa den mi problemanan y cu nan ta preocupa pa mi. Esaki ta yuda nos pa nos ta un famia fuerte y uni.” Ta bisto anto cu un di e cosnan principal cu por haci bo un bon wardador ta ora bo ta alimenta bo yiunan den sentido spiritual. Si, siña nan stima Jehova, specialmente mediante e Adoracion Como Famia. *

13. Con mayornan por motiva nan yiunan pa sirbi Jehova?

¹³ Un bon wardador ta uza su staf of baston pa dirigi y defende su tou. Un di su metanan principal ta pa guia e carnenan na “un bon luga di yerba berde.” (Eze. 34:13, 14) Como mayor, bo tambe tin e mesun meta spiritual? Bo por guia bo yiunan pa sirbi Jehova y yuda nan sinti manera e escritor di salmo cu a bisa: “Pa haci bo boluntad, o mi Dios, ta un delicia pa mi; bo Ley ta den mi curason.” (Sal. 40:8) Yiunan cu desaroya e tipo di aprecio ey lo kier dedica nan bida na Jehova y batisa. Claro cu pa nan dal e paso importante ey, nan mester ta suficiente madura y nan mester tin e deseo sincero di sirbi Jehova.

14, 15. (a) Kico mester ta e meta di mayornan cristian? (b) Dicon algun teenager kisas ta expresa duda den e berdad?

¹⁴ Pero kico bo por haci si bo yiunan no ta parce di mehora den nan relacion cu Jehova, y kisas hasta ta cuestiona loke testigonan di Jehova ta kere? Wel, pone como meta pa yuda nan haya amor pa Jehova y tambe aprecio pa tur loke el a haci pa nan. (Rev. 4:11) E ora ey, ora nan ta asina leu, nan por dicidi pa nan mes si nan lo adora Jehova.

¹⁵ Pero kico si bo yiunan cuminsa expresa duda tocante e berdad? Con bo por  pastorea nan y yuda nan mira cu sirbi Jehova realmente ta e mihor manera di biba y cu lo haci nan feliz pa semper? Wel, purba di saca afo kico ta e motibo cu nan tin duda. Por ehempel, di berdad bo yiu homber no ta di acuerdo cu loke Bijbel ta bisa, of ta djis curashi e falta pa defende e berdad dilanti di otro mucha? Di berdad bo yiu muher ta duda cu e normanan di Dios ta sabi, of e ta djis sintie su so y rechasa pa otro mucha?

16, 17. Con mayornan por yuda nan yiunan cultiva un amistad personal cu Jehova?

¹⁶ Pero con bo por yuda bo yiu supera su dudanan tocante e berdad? Un sugerencia cu hopi mayor tabatin bon resultado cu ne ta esun di saca afo kico nan yiu ta pensa door di haci e siguiente preguntanan: “Bo ta haya cu ta facil of dificil pa ta un cristian? Kico bo ta kere ta e beneficionan? Ki sacrificionan bo tin cu haci? Bo no ta haya cu e sacrificionan ta poco na comparacion cu e tantisimo beneficionan cu nos ta haya awor y esnan cu nos lo haya den futuro?” Claro cu bo mester haci e preguntanan aki cu bo mes palabra y cu un tono sincero y cariñoso. No haci esaki comosifuera ta un interogacion of cu bo ta acusa nan di algo. Durante e combersacion, lo bo por analisa Marco 10:29 y 30. Kisas algun hoben por pone riba papel e pro- y contranan di ser un cristian. Podise ora nan mira esey riba papel, nan lo ripara kico ta e berdadero causa di nan dudanan y esey lo yuda nan haya un solucion pa eseynan. Di otro banda, bo a studia e buki Bijbel Ta Siña y “Amor di Dios” cu bo yiunan? Si nos ta haci esey cu hende interesa, cuanto mas nos tin cu haci esey cu nos yiunan.

¹⁷ Tardi of trempan, bo yiunan lo tin cu dicidi pa nan mes si nan lo sirbi Jehova of no. No pensa cu nan lo sigui loke abo ta kere automaticamente. Bo yiunan mester cultiva un amistad personal cu Jehova. (Prov. 3:1, 2) Kico si ta parce cu bo yiu tin problema pa haci esey? Dicon bo no ta bay bek cu ne na e cosnan basico? Yud’e analisa loke e ta kere cu preguntanan manera: ‘Con ami por sa cu Dios ta existi? Kico ta convence mi cu Jehova Dios realmente ta interesa den mi? Dicon mi ta kere cu e normanan di Jehova realmente ta bon pa mi?’ Mustra cu bo ta un bon wardador y guia bo yiunan cu pasenshi. Yuda nan comproba pa nan mes cu sirbi Jehova ta e mihor cos cu nan por haci cu nan bida. *—Rom. 12:2.

18. Con mayornan por imita Jehova, e Gran Wardador?

¹⁸ Tur cristian berdadero kier imita e Gran Wardador, Jehova. (Efe. 5:1; 1 Ped. 2:25) Principalmente mayornan mester conoce e condicion di nan tou, esta, nan yiunan precioso. Nan tin cu haci tur loke nan por pa guia nan yiunan na e bendicionnan eterno cu Jehova tin prepara pa nan. Pues, mayornan, pastorea boso yiunan: Siña nan pa stima Jehova.