1, 2. Dicon Dios mester a proteha e descendiente di e muher?

E PROME profecia den Bijbel, esta, e promesa cu Jehova a haci den Hofi di Eden, ta di sumo importancia pa cumplimento di Su proposito. Ora Jehova a haci e promesa ey, el a bisa: “Lo mi pone enemistad entre abo [esta, Satanas] y e muher, y entre bo simia y su simia.” Awor, te con leu e enemistad aki lo a yega? Jehova a bisa: “E [simia di e muher] lo herida bo cabes, y abo [esta, Satanas] lo herida su hilchi di pia.” (Gen. 3:15) E enemistad entre Satanas y e muher lo ta asina fuerte cu Satanas lo a haci tur su posibel pa destrui e simia, of descendiente, di e muher.

² Pesey, no ta nada straño cu e salmista a haci oracion pa e pueblo di Dios. El a bisa: “Mira, bo enemigonan ta borota; y esnan cu ta odia bo a halsa nan mes. Nan ta traha plannan astuto contra bo pueblo, y ta conspira hunto contra esnan cu bo ta proteha. Nan a bisa: ‘Laga nos ban caba cu nan como nacion.’” (Sal. 83:2-4) Satanas su meta tabata pa corumpi of caba cu e personanan cu a forma e liña di descendencia di e simia. Pesey, pa proteha e descendiente di e muher y pa  garantisa cu Su proposito pa cu Tera lo cumpli, Jehova mester a cera mas pacto.

3, 4. (a) Na ki tempo e pacto di Ley a drenta na vigor, y kico e nacion di Israel a bay di acuerdo pa haci? (b) Kico e pacto di Ley mester a preveni?

³ Cu tempo, e descendientenan di Abraham, Isaak y Jacob a multiplica y bira miyones. Y Jehova a haci nan un nacion—e nacion di Israel di antiguedad. Jehova a cera un pacto special cu nan pa medio di Moises y a duna nan e Ley. Y nan a bay di acuerdo pa cumpli cu e Ley. Bijbel ta bisa: “[Moises] a coge e buki di alianza y a les’e pa e pueblo tende, y nan a bisa: ‘Tur loke SEÑOR a bisa, nos lo haci, y nos lo ta obedecido!’ Asina Moises a coge e sanger y a sprengo esaki riba e pueblo, y a bisa: ‘Mira e sanger di e alianza cu SEÑOR a cera cu boso conforme tur e palabranan aki.’”—Exo. 24:3-8.

⁴ Na aña 1513 prome cu Cristo, e pacto di Ley a drenta na vigor na Sero Sinai. Pa medio di e pacto aki, e nacion di Israel di antiguedad a bira un pueblo masha special. Dios a bira ‘nan Hues, Dunador di Ley y Rey.’ (Isa. 33:22) Historia di Israel ta mustra kico ta pasa ora hende obedece of desobedece e normanan husto di Dios. E Ley a prohibi e Israelitanan di casa cu pagano y di adora diosnan falso. Di e manera ey, e Ley lo a preveni cu e liña di descendencia di Abraham lo a ser contamina.—Exo. 20:4-6; 34:12-16.

5. (a) Ki oportunidad e pacto di Ley a duna Israel? (b) Dicon Dios a rechasa Israel?

⁵ E pacto di Ley a inclui tambe e areglo pa nombra sacerdotenan pa sirbi na Israel. E sacerdotenan ey a prefigura un grupo di sacerdote cu den futuro lo a trece beneficio mas grandi pa humanidad. (Heb. 7:11; 10:1) Pues, mediante e pacto di Ley, Israel tabatin e privilegio y e oportunidad unico di bira ‘un reino di sacerdote’, basta nan a obedece e leynan di Jehova. (Lesa Exodo 19:5, 6.) Pero Israel no a obedece Dios su leynan. Nan no a acepta e Mesias, e parti principal di Abraham su descendiente; mas bien, nan a rechas’e. Pesey, Dios tambe a rechasa nan.

6. Kico tabata e proposito di e Ley?

⁶ E echo cu e nacion di Israel no a keda fiel na Jehova y consecuentemente no a bira un reino di sacerdote no a nifica cu e Ley tabata deficiente. E proposito di e Ley tabata pa proteha e descendiente di e muher y yuda hende identifica e Mesias. Pues, unabes cu Cristo a yega y a ser identifica, e Ley a cumpli cu su proposito. Pesey, Bijbel ta bisa cu “Cristo ta  fin di Ley.” (Rom. 10:4) Pero e pregunta ta awor: Ken lo forma parti di un reino di sacerdote? Wel, Jehova Dios a cera un otro pacto pa forma un nacion nobo.

7. Kico Jehova a profetisa pa medio di Jeremias?

⁷ Hopi tempo prome cu e pacto di Ley a yega na su fin, Jehova a profetisa pa medio di profeta Jeremias cu lo El a cera “un alianza nobo” cu e nacion di Israel. (Lesa Jeremias 31:31-33.) E alianza, of pacto, ey lo tabata diferente for di e pacto di Ley den e sentido cu no tabata necesario mas pa haci sacrificio di bestia pa hende haya pordon di pica. Pero con esey tabata posibel?

8, 9. (a) Kico a bira posibel pa medio di e sanger di Hesus? (b) Ki oportunidad e personanan den e pacto nobo ta haya? (Wak e prome plachi.)

⁸ Siglonan despues, dia 14 di nisan di aña 33 di prome siglo, Hesus a institui e Cena di Señor. Relaciona cu e copa di biña, Hesus a bisa su 11 fiel apostelnan: “E copa aki ta representa e pacto nobo a base di mi sanger cu lo mi drama pa boso.” (Luc. 22:20) Y segun e relato di Mateo, Hesus a bisa: “Esaki ta representa mi ‘sanger di e pacto’, cu lo mi drama pa pordon di pica di hopi hende.”—Mat. 26:27, 28.

⁹ Pues, e pacto nobo a bira valido ora Hesus a drama su sanger precioso como sacrificio. Hesus su sanger a haci posibel tambe pa hende haya pordon di pica. Hesus no ta forma parti di e pacto nobo pasobra e no tin pica, pues e no tin mester di pordon. Pero Dios ta uza e sacrificio di Hesus na beneficio di humanidad. Ademas, e ta uza su spirito santo pa ungi algun persona fiel pa asina adopta nan como “yiu.” (Lesa Romanonan 8:14-17.) Y como cu Dios ta considera e cristiannan ungi como personanan liber di pica, den un sentido nan ta manera su Yiu Hesus, kende no tin pica. E cristiannan ungi lo bira “heredero hunto cu Cristo.” Ademas, nan lo tin e privilegio cu e nacion di Israel a perde, esta, di bira ‘un reino di sacerdote.’ Relaciona cu e ‘herederonan hunto cu Cristo’, apostel Pedro a bisa: “Boso ta ‘un rasa scogi, sacerdotenan cu ta sirbi como rey, un nacion santo, un pueblo pa un propiedad special, pa boso proclama tur caminda e cualidadnan excelente’ di esun cu a yama boso for di scuridad na su luz maraviyoso.” (1 Ped. 2:9) Pues, e pacto nobo ta hopi importante. E ta habri caminda pa Hesus su discipelnan bira e parti secundario di Abraham su descendiente, of simia.

10. Na ki tempo e pacto nobo a drenta na vigor, y dicon ta te na e tempo ey?

¹⁰ Awor, na ki tempo e pacto nobo a drenta na vigor? Esaki no a drenta na vigor durante e Cena di Señor. Dicon no? Pa e por a drenta na vigor, Hesus mester a drama su sanger y presenta e balor di esaki na Jehova den cielo. Ademas, esnan cu mester a bira “heredero hunto cu Cristo” mester a ser ungi cu spirito santo. Pues, e pacto nobo a drenta na vigor na Pentecoste di aña 33 di prome siglo ora Hesus su fiel discipelnan a ser ungi cu spirito santo.

11. Con e pacto nobo a haci posibel pa tanto Hudiu como personanan cu no ta Hudiu forma parti di Israel spiritual, y cuanto persona ta den e pacto nobo?

¹¹ For di momento cu Jehova a anuncia pa medio di Jeremias cu lo El a cera un pacto nobo cu Israel, esey a nifica cu lo a  yega un tempo cu e pacto di Ley lo no ta vigente mas. Y e pacto di Ley a yega su fin ora e pacto nobo a drenta na vigor. (Heb. 8:13) E pacto nobo a habri caminda pa tanto Hudiu como personanan cu no ta Hudiu bira heredero di e Reino di Dios pasobra awor hende tabata ser circuncida di curason, “pa medio di spirito, y no pa medio di un ley skirbi.” (Rom. 2:29) Desde e tempo ey, Dios ta pone su leynan ‘den nan mente y skirbi nan riba nan curason.’ (Heb. 8:10) Ta 144.000 persona ta forma parti di e pacto nobo. Nan ta forma e nacion nobo cu ta ser yama “e Israel di Dios”, of Israel spiritual.—Gal. 6:16; Rev. 14:1, 4.

12. Ki diferencia tin entre e pacto di Ley y e pacto nobo?

¹² Kico ta e diferencia entre e pacto di Ley y e pacto nobo? Pa cuminsa, Jehova a cera e pacto di Ley cu e nacion di Israel y e pacto nobo el a cera cu Israel spiritual. Moises tabata mediador di e pacto di Ley y Hesus ta e Mediador di e pacto nobo. Ambos pacto a bira valido mediante dramamento di sanger: e pacto di Ley mediante sanger di bestia y e pacto nobo mediante e sanger di Hesus. Bou di e pacto di Ley, e nacion di Israel tabatin Moises como nan lider, mientras cu e personanan den e pacto nobo tin Hesus, e Cabes di e congregacion, como nan Lider.—Efe. 1:22.

13, 14. (a) Ki relacion tin entre e pacto nobo y e Reino? (b) Kico ta necesario pa Israel spiritual por goberna hunto cu Cristo den cielo?

¹³ Awor, ki relacion tin entre e Reino di Dios y e pacto nobo? Wel, e pacto nobo ta produci un nacion santo cu tin e privilegio di bira rey y sacerdote den e Reino celestial. E nacion ey ta e parti secundario di Abraham su descendiente. (Gal. 3:29) Pues, e pacto nobo ta confirma cu e pacto cu Dios a cera cu Abraham lo bira realidad.

¹⁴ Pero tin un aspecto di e Reino cu ainda mester ser estableci. Ta berdad cu e pacto nobo ta produci Israel spiritual y ta duna garantia cu su miembronan, esta e unginan, lo bira “heredero hunto cu Cristo.” Sinembargo, mester a cera un otro acuerdo, of pacto, pa nan por uni cu Hesus den cielo y fungi como rey y sacerdote.

15. Ki pacto Hesus a cera cu su fiel apostelnan?

¹⁵ Despues di a institui e Cena di Señor, Hesus a cera un pacto cu su fiel discipelnan, e pacto di Reino. (Lesa Lucas 22:28-30.) Distinto for di e otro pactonan, cu Jehova a cera, ta Hesus a cera e pacto aki. Pues, esaki ta un acuerdo personal entre Hesus y su siguidornan ungi. Ora Hesus a bisa: “Mescos cu mi Tata a cera un pacto cu mi”, aparentemente e tabata referi na e pacto cu Jehova a cera cu ne pa e ta “un sacerdote pa semper na e manera di Melkisedek.”—Heb. 5:5, 6.

16. Ki privilegio e pacto di Reino ta duna cristiannan ungi?

¹⁶ E 11 fiel apostelnan a ‘keda leal na Hesus durante [tur] su pruebanan.’ E pacto di Reino a sigura nan cu nan lo a sinta riba trono pa sirbi como rey y sacerdote hunto cu Hesus den cielo. Pero no ta e 11 personanan ey so a haya e privilegio ey. Hesus a aparece na apostel Juan den un vision y a bisa: “Lo mi laga esun cu sali victorioso sinta hunto cu mi riba mi trono, mescos cu ami a vence y a sinta hunto cu mi Tata riba su trono.” (Rev. 3:21) Pues, Hesus a cera e pacto di Reino cu e 144.000 cristiannan ungi. (Rev. 5:9, 10; 7:4) E pacto  aki ta duna nan e derecho di goberna hunto cu ne den cielo. Ta mescos cu ora un bruid casa cu un rey cu ta na mando; debi na esey, e tambe ta haya derecho pa goberna hunto cu e rey. En realidad, Bijbel ta referi na e cristiannan ungi como “e bruid” di Cristo, “un birgen puro” comprometi pa casa cu Cristo.—Rev. 19:7, 8; 21:9; 2 Cor. 11:2.

17, 18. (a) Duna un resumen breve di e seis pactonan cu nos a trata. (b) Dicon nos por tin fe cu e Reino lo cumpli cu Dios su proposito?

¹⁷ Tur e pactonan cu nos a trata den e dos articulonan aki, di un of otro manera, ta relaciona cu e Reino di Dios. (Wak e cuadro “E Manera Cu Dios Lo Cumpli cu Su Proposito den e articulo anterior.”) E pactonan aki ta duna garantia solido cu e Reino di Dios lo cumpli cu Dios su proposito. Pues, nos por tin fe, of pleno confianza, cu Dios lo uza e Reino Mesianico pa cumpli cu su proposito pa cu Tera y humanidad.—Rev. 11:15.

¹⁸ No tin duda, e Reino ta e unico solucion pa hende su problemanan. Nos tin pleno confianza cu lo e trece bendicionnan eterno pa humanidad. Pesey, laga nos sigui predica cu celo y conta hende e maraviyoso berdad aki!—Mat. 24:14.