1. Con e buki di Levitico por yuda nos?

JEHOVA ta spera di tur su sirbidornan cu nan ta santo, es decir, limpi den sentido spiritual, moral y fisico. Bijbel ta papia masha hopi tocante santidad, pero e cualidad aki ta ser menciona mas tanto den e buki di Levitico. Pues, un mihor comprondemento di e buki aki lo yuda nos sa con nos por ta santo.

2. Kico nos ta haya den e buki di Levitico?

² E buki di Levitico, skirbi door di profeta Moises, ta forma parti di “henter e Scritura” cu ta probechoso pa siña hende. (2 Tim. 3:16) Den e idioma original di Bijbel, e nomber di Jehova ta aparece un dies biaha den cada capitulo di e buki aki. Pesey, un analisis di Levitico lo duna nos e forsa necesario pa no haci nada cu lo daña e nomber di Dios. (Lev. 22:32) E echo cu e buki bes tras bes ta ripiti e frase ‘ami ta Jehova’ ta laga nos corda riba e importancia di obedece Dios. Den e articulo aki y esun siguiente, nos lo descubri algun hoya spiritual valioso den e buki di Levitico cu lo yuda nos keda limpi y santo.

3, 4. Kico e labamento di Aaron y su yiu hombernan cu awa a representa? (Wak e prome plachi.)

³ Lesa Levitico 8:5 y 6. Jehova a scoge Aaron pa sirbi como sumo sacerdote di Israel, y su yiu hombernan mester a sirbi  como sacerdote. Aaron a representa Hesucristo y e yiunan di Aaron a representa e siguidornan ungi di Hesus. Acaso e labamento di Aaron cu awa a representa un purificacion di Hesus? No. Hesus no tabatin mester di purificacion pasobra e tabata un hende sin pica y “sin mancha.” (Heb. 7:26; 9:14) Sinembargo, e condicion limpi di Aaron despues cu a laba su curpa a representa Hesus su condicion limpi y husto dilanti di Dios. Awor, kico e labamento di e yiunan di Aaron cu awa a representa?

⁴ E labamento di e yiunan di Aaron a representa e proceso di purificacion cu e hendenan scogi pa sirbi como sacerdote den cielo mester somete nan mes na dje. Acaso e purificacion ey ta referi na e bautismo di e unginan? No, pasobra bautismo no ta laba, of kita, pica. Mas bien, bautismo ta simbolisa cu un persona a dedica su bida pa sirbi Dios incondicionalmente. Con e unginan ta ser purifica anto? Pablo a bisa cu ta “pa medio di e palabra”, pues nan mester aplica e siñansanan di Cristo plenamente den nan bida. (Efe. 5:25-27) Asina, pa medio di e Palabra di Dios, nan ta ser santifica y laba. Pero kico di e ‘otro carnenan’?—Juan 10:16.

5. Dicon nos por bisa cu e Palabra di Dios ta purifica e otro carnenan tambe?

⁵ E yiunan di Aaron no a representa e “multitud grandi” di otro carne di Hesus. (Rev. 7:9) Pero asina mes, e personanan batisa ey tambe ta bira limpi y santo pa medio di e Palabra di Dios. Con? Wel, ora e personanan cu tin e speransa di biba riba Tera lesa loke Bijbel ta bisa tocante e balor y poder di e sanger cu Hesus a drama, nan ta pone fe den e palabranan ey. Ademas, esaki ta motiva nan pa ‘rindi sirbishi sagrado na Jehova di dia y anochi.’ (Rev. 7:13-15) Purificacion di e unginan y e otro carnenan ta un proceso continuo. Como resultado, nan ta comporta nan mes tur momento na un manera excelente. (1 Ped. 2:12) Jehova ta keda hopi contento ora e mira con limpi y uni e unginan y e otro carnenan ta, ya cu nan ta obedece nan Wardador, Hesus, y ta siguie fielmente.

6. Dicon nos tin cu examina nos mes regularmente?

⁶ Kico e echo cu e sacerdotenan di Israel mester tabata fisicamente limpi ta nifica pa nos awe como sirbidornan di Jehova? Hopi hende cu nos ta studia Bijbel cu ne ta ripara cu nos luganan di adoracion ta limpi y cu nos ta hende limpi cu ta bisti decente. Pero e condicion limpi di e sacerdotenan ta yuda nos realisa tambe cu ken cu kier subi ‘bay na e sero di Jehova’, es decir, cu kier uni nan mes na adoracion berdadero, mester tin un “curason puro.” (Lesa Salmo 24:3, 4; Isa. 2:2, 3.) Pues, Jehova kier pa nos ador’e cu un mente limpi, un curason limpi y tambe cu un curpa limpi. Pa logra esaki, nos tin cu examina nos mes regularmente, y tin biaha nos ta ripara cu nos tin cu haci cambionan drastico pa nos por ta santo. (2 Cor. 13:5) Por ehempel, un sirbidor di Jehova batisa cu deliberadamente ta wak pornografia mester puntra su mes: ‘Mi ta demostra cu mi ta santo?’ Anto e tin cu busca yudansa pa stop cu e practica sushi ey.—Sant. 5:14.

7. Na harmonia cu Levitico 8:22 pa 24, ki ehempel Hesus a pone?

⁷ Durante instalacion di e sacerdocio di Israel, Moises mester a pone sanger di un chubato di carne na e horea drechi, duim drechi y dede grandi di e pia drechi di Sumo Sacerdote Aaron y di su yiu hombernan. (Lesa Levitico 8:22-24.) Esaki a nifica cu e sacerdotenan lo a haci nan best pa cumpli obedientemente cu nan debernan. Asina tambe Hesus, nos Sumo Sacerdote,  a pone ehempel perfecto pa e unginan y e otro carnenan. Su horeanan tabata cla pa scucha e guia di Dios. El a uza su mannan pa cumpli cu e boluntad di Jehova, y su pianan no a desvia niun momento for di e caminda corecto.—Juan 4:31-34.

8. Kico tur sirbidor di Jehova mester haci?

⁸ Sea cu nos ta un cristian ungi of ta forma parti di e otro carnenan, nos tur mester imita e ehempel di integridad di Hesus, nos Sumo Sacerdote. Y nos tur mester cumpli obedientemente cu e instruccionnan di Jehova cu tin den Bijbel, pasobra nos no kier “haci e spirito santo di Dios tristo.” (Efe. 4:30) Nos mester ta determina pa ‘haci e camindanan cu nos ta cana ariba stret.’—Heb. 12:13.

9. Kico tres ruman cu ta traha estrechamente cu miembronan di e Cuerpo Gobernante a bisa, y con nan comentarionan por yuda bo sigui demostra cu bo ta santo?

⁹ Laga nos considera e comentarionan di algun ruman homber cu tin e speransa di biba riba Tera y cu tin hopi aña ta traha estrechamente cu miembronan di e Cuerpo Gobernante. Un di e ruman hombernan a bisa: “En berdad esaki ta un gran privilegio, pero de bes en cuando e asociacion estrecho cu e rumannan aki a laga mi mira cu maske nan ta ungi cu spirito santo, nan ta keda hende imperfecto. Toch, mi a haci mi best a traves di tur e añanan aki pa obedece e rumannan cu Jehova a nombra pa dirigi su organisacion.” Un otro ruman homber a bisa: “Textonan di Bijbel manera 2 Corintionan 10:5, cu ta anima nos pa ‘obedece Cristo’, a yuda mi pa ta obedecido y pa coopera cu e rumannan cu ta supervisa e obra. Y mi ta haci esaki cu henter mi curason.” Un di tres ruman homber a bisa: “Si un hende ta stima loke Jehova ta stima, ta odia loke e ta odia y constantemente ta busca su guia y kier haci loke ta agrad’e, e lo obedece su organisacion y e personanan cu e ta uza pa cumpli cu su proposito riba Tera.” E ruman aki ta corda con impresiona e tabata cu e ehempel di Ruman Nathan Knorr, kende despues a bira un miembro di e Cuerpo Gobernante. Ora cu den e Watch Tower di 1925 a sali algun punto nobo den e articulo “Nacemento di e Nacion”, Ruman Knorr a acepta nan di biaha maske algun ruman a cuestiona e puntonan aki. Ta bon pa nos medita riba e comentarionan di e rumannan aki, ya cu esey por yuda nos mira cu ora nos obedece Dios nos ta demostra cu nos ta santo.

10. Dicon ta importante pa nos obedece Dios su ley tocante sanger?

¹⁰ Lesa Levitico 17:10 y 14. Jehova a bisa e Israelitanan cu nan no tabatin mag di come “sanger di ningun sorto di carni.” Cristiannan tambe a haya e mandamento pa abstene di sanger, sea di hende of di bestia. (Echo. 15:28, 29) Hasta ora nos ta den un situacion cu nos bida ta na peliger, nos ta determina pa no entrega ora cu hende cu no conoce Jehova y cu no ta interesa den obedec’e ta roga nos of exigi di nos pa desobedece Jehova. Nos ta stima Jehova y kier obedec’e. Pa nada di mundo nos lo no kier haci algo cu lo pone Dios rechasa nos y saca nos for di su congregacion. Nos sa cu algun hende lo haci bofon di nos pasobra nos ta abstene di sanger, pero nos ta scoge pa obedece Dios. (Judas 17, 18) Kico lo yuda nos keda determina pa no come sanger ni acepta transfusion di sanger?—Deu. 12:23.

11. Dicon nos por bisa cu e Dia di Expiacion anual no tabata djis un ritual?

¹¹ E instruccionnan cu Jehova a duna e sumo sacerdote di Israel tocante kico pa haci cu e sanger di bestia riba e Dia di Expiacion ta yuda nos compronde Dios su punto di bista di sanger. Mester a uza sanger solamente pa un proposito special, esta, pa haya pordon di pica (expiacion) ya asina  e Israelitanan por tabatin un bon relacion cu Dios. Tur aña riba e dia ey, e sacerdote mester a spart e sanger di un toro y di un cabrito dilanti di e tapadera, of propiciatorio, di e arca di pacto. (Lev. 16:14, 15, 19) Pa medio di e sanger ey, Jehova lo a pordona e picanan di e Israelitanan. Ademas, Jehova a decreta cu ora un homber mata un bestia pa come, e mester a basha su sanger abou y tap’e cu tera, “pasobra pa loke ta bida di tur carni, su sanger ta identifica cu su bida.” (Lev. 17:11-14) Acaso tur esaki tabata djis un ritual insignificante? No. E uzo di sanger riba Dia di Expiacion, y tambe e mandamento pa basha sanger riba tera, ta na harmonia cu e mandamento cu Jehova a duna Noe y su descendientenan cientos di aña prome, esta, cu nan no tabatin mag di come sanger. (Gen. 9:3-6) Pues, Jehova Dios a prohibi hende di uza sanger pa sostene bida. Kico esaki ta nifica pa cristiannan?

12. Segun e carta di Pablo na e cristiannan Hebreo, ki relacion tin entre sanger y pordon?

¹² Apostel Pablo a skirbi e cristiannan Hebreo tocante e poder cu sanger tin pa purifica. El a splica: “Segun Ley, casi tur cos ta ser purifica cu sanger, y a menos cu drama sanger no tin pordon.” (Heb. 9:22) Pero Pablo a indica cu e balor di sacrificio di bestia tabata temporal. El a bisa cu e sacrificionan aki simplemente a recorda e Israelitanan cu nan tabata pecador y cu nan tabatin mester di un sacrificio mucho mas grandi pa elimina pica completamente. Si, e Ley tabata solamente “un sombra di e cosnan bon cu lo a bin, no e realidad mes.” (Heb. 10:1-4) Pues, con pordon di pica na un manera permanente lo a bira posibel?

13. Kico e echo cu Hesus a presenta e balor di su sanger na Jehova ta nifica pa bo?

¹³ Lesa Efesionan 1:7. Boluntariamente, Hesus a ‘entrega su mes pa nos’ y a ofrece su bida como un sacrificio pa tur hende. Esey tin un gran nificacion pa tur cu ta stim’e y ta stima su Tata. (Gal. 2:20) Sinembargo, ta loke Hesus a haci despues di su morto y resureccion ta loke realmente ta libra nos y haci pordon di pica posibel. En realidad, Hesus a cumpli cu loke a ser  prefigura den e Ley di Moises riba Dia di Expiacion. Riba e dia ey, e sumo sacerdote tabata hiba un poco di e sanger di e bestianan di sacrificio den e Santisimo di e tabernakel—y mas despues den e tempel di Salomon—y present’e dilanti di Dios. Tabata comosifuera el a drenta den presencia di Dios. (Lev. 16:11-15) Di mes manera, Hesus, despues di su resureccion, a drenta den cielo y a presenta e balor di su sanger humano na Jehova. (Heb. 9:6, 7, 11-14, 24-28) Nos ta masha agradecido cu el a haci esey! Danki na nos fe den e balor di e sanger drama ey, Dios ta pordona nos di nos picanan y nos por disfruta di un consenshi limpi.

14, 15. Dicon ta importante pa nos compronde Jehova su ley tocante sanger y obedec’e?

¹⁴ Bo ta compronde mas mihor awor dicon Jehova a duna ordo pa nos no come “sanger di ningun sorto di carni”? (Lev. 17:10, 14) Bo ta compronde pakico sanger ta asina sagrado pa Dios? Basicamente, e ta considera sanger igual cu bida. (Gen. 9:4) Sin duda, lo bo kier tin Dios su punto di bista di sanger y obedece su mandamento di abstene for di sanger. E unico manera cu nos por tin paz cu Dios ta si nos tin fe den e sacrificio di rescate di Hesus y ta compronde e balor special cu sanger tin pa nos Creador.—Col. 1:19, 20.

¹⁵ En realidad, cualkier un di nos por haya nos confronta inesperadamente cu e cuestion di sanger. Of kisas inespera un miembro di famia of un amigo stima tin cu dicidi si e ta acepta un transfusion di sanger of no. Durante un crisis asina, mester dicidi tambe tocante fraccionnan di sanger of tratamentonan medico cu ta envolve uzo di sanger. Niun di nos hamas lo kier acepta algo cu Jehova su Palabra ta condena y asina haci Jehova su curason tristo. Pesey, ta masha importante pa nos haci oracion na Jehova, haci investigacion y tuma un decision prome cu presenta un emergencia. Si nos haci esey, nos lo tin e forsa pa tuma un posicion firme y abstene di sanger. Awe, hopi dokter y otro personanan cu ta mira transfusion di sanger como un manera pa salba bida ta haci yamada riba hende pa duna sanger. Pero como e pueblo santo di Jehova, nos sa cu ta e, como Creador, tin e derecho di bisa con mester uza sanger, y den su bista ‘sanger di tur sorto di carni’ ta sagrado. Pues, nos mester ta determina pa obedece su ley tocante sanger. Pa medio di nos conducta santo, nos ta lag’e mira cu nos ta aprecia profundamente e balor di e sanger di Hesus: E unico sanger cu ta haci posibel cu nos por haya pordon di pica y bida eterno.—Juan 3:16.

16. Dicon e pueblo di Jehova mester ta santo?

¹⁶ Ora Jehova a libera e Israelitanan for di sclavitud na Egipto, el a bisa nan: “Ami ta SEÑOR, kende a saca boso for di tera di Egipto, pa ta boso Dios; pesey, sea santo, pasobra ami ta santo.” (Lev. 11:45) Jehova tabata kier pa e pueblo di Israel ta santo pasobra e mes ta santo. Anto como testigo di Jehova, nos awe tambe mester ta santo. E buki di Levitico ta mustra esey bon cla.

17. Kico bo ta pensa di e buki di Levitico?

¹⁷ Sin duda, bo a beneficia di nos consideracion di algun punto for di e buki di Levitico. Casi sigur bo a haya mas aprecio pa e buki inspira aki di Bijbel. Despues cu bo a medita riba algun punto valioso cu tin den Levitico, lo bo a haya un comprondemento mas mihor di e motibonan pakico nos mester ta santo. Pero, ki otro joyas spiritual nos por haya den e buki inspira aki di e Palabra di Dios? Kico mas nos por siña for di dje pa asina sirbi Jehova na un manera santo? Nos lo trata esey den e siguiente articulo.