NOS Creador a duna hende un regalo masha valioso: boluntad liber. Ademas, e ta bendiciona esnan cu sin interes personal ta uza nan boluntad liber pa promove adoracion berdadero, pa santifica su nomber santo y pa apoya su magnifico proposito. Jehova no kier pa nos obedec’e djis pasobra nos tin miedo di dje of ta sinti nos obliga. Mas bien, e ta keda contento ora nos ta sirbie pasobra nos ta stim’e y ta agradecido na dje.

Por ehempel, tempo cu e Israelitanan tabata den e desierto di Sinai, Jehova a duna nan instruccion pa construi un luga di adoracion. El a bisa nan: “Tuma for di meymey di boso un ofrenda pa SEÑOR; esun cu su curason ta dispuesto, lag’e hiba esaki como ofrenda pa SEÑOR.” (Exo. 35:5) Cada Israelita por a duna loke e tabata por. Y cada contribucion boluntario—sin importa kico of cuanto e tabata—por a ser uza pa cumpli cu e boluntad di Dios. Con e Israelitanan a reacciona?

“Tur hende cu su curason tabata conmov’e”, esta cu tabatin un curason dispuesto, a duna ofrenda boluntario. Boluntariamente, homber y muher a trece algo pa e trabou di Jehova. Nan a trece: borstspeld, renchi di horea, renchi di seyo, oro, plata, brons, hilo blauw, purpura y escarlata, lino fini, lana di cabrito, cuero di carne chubato tiña cora, cuero di dolfijn, palo di acacia, piedra precioso y varios tipo di zeta. Finalmente, e material cu nan a duna “tabata suficiente, y mas cu suficiente, pa tur e trabou cu mester a wordo haci.”—Exo. 35:21-24, 27-29; 36:7.

Loke a haci Jehova mas contento no tabata e ofrendanan mes, sino e generosidad di e hendenan cu a apoya adoracion berdadero mediante nan donacionnan. E pueblo hasta a sinti nan conmovi pa duna di nan tempo y a contribui cu nan trabou. E relato ta bisa cu “tur e muhernan experto tabata hila cu nan man.” Si, ‘tur e muhernan cu nan curason tabata conmove nan tabata hila lana di cabrito.’ Ademas, Jehova a duna Bezaleel ‘sabiduria, comprondemento y conocemento den tur obra.’ Pues en realidad, Jehova a duna Bezaleel y Aholiab e capacidad pa haci tur trabou cu el a asigna nan.—Exo. 35:25, 26, 30-35.

Ora Jehova a anima e Israelitanan pa contribui, e tabatin tur confianza cu tur hende cu ‘curason dispuesto’ lo a apoya adoracion berdadero. Y Jehova, na su turno, a bendiciona e hendenan aki ricamente, dunando nan guia y felicidad. Di e manera ey, Jehova a demostra cu, ora e bendiciona su sirbidornan cu ta generoso, e ta haci sigur cu nan tin tanto e medio como e capacidad necesario pa cumpli cu su boluntad. (Sal. 34:9) Pues, si nos ta sirbi Jehova sin interes personal, nos por ta sigur di su bendicion.