Algun sirbidor di Dios cu ta soltero a bisa algo similar. Nan sa cu Jehova kier pa su sirbidornan casa “basta ta den Señor”, es decir, casa solamente cu cristiannan berdadero. (1 Cor. 7:39) Pues, dicon tin ruman ta haci e comentarionan ey?

Algun ruman ta bisa cu tin mas ruman muher soltero cu ruman homber soltero. Berdad esey ta e caso den hopi pais. Considera dos ehempel: Na Korea, 57 porciento di Testigo soltero ta ruman muher y 43 porciento ta ruman homber. Y na Colombia, 66 porciento di Testigo soltero ta ruman muher y 34 porciento ta ruman homber.

Den algun pais tin e custumber cu mayornan cu no ta Testigo kisas ta exigi un suma grandi di placa of regalo hopi caro pa un hende casa cu nan yiu muher. Y ruman hombernan cu ta hiba un bida simpel no por afford e regalonan ey. Debi na esey, algun ruman muher ta sinti cu lo ta hopi dificil pa nan casa “den Señor.” *

Si bo a yega di sinti asina, bo por ta sigur cu Jehova sa di bo situacion y ta compronde precies con bo ta sinti.—2 Cro. 6:29, 30.

Jehova ta bisa den su Palabra cu nos mester casa solamente den Señor pasobra e sa kico ta bon pa nos. Jehova no solamente kier proteha nos di e dolor di un mal decision, sino tambe e kier pa nos ta feliz. Den tempo di Nehemias, hopi Hudiu tabata casa cu stranhero cu no a adora Jehova. Kico Nehemias  a haci? El a referi na e caso di Salomon pa yuda nan corigi nan actitud. El a bisa nan cu aunke Jehova tabata stima Salomon, “e muhernan stranhero a haci hasta Salomon comete pica.” (Neh. 13:23-26) Pues, si Jehova ta manda nos casa solamente cu hende cu ta sirbie ta pasobra e kier pa cosnan bay bon cu nos. (Sal. 19:7-10; Isa. 48:17, 18) Nos ta hopi agradecido cu Jehova a duna nos conseho cu ta amoroso y confiabel. Ora nos obedece Jehova como nos Gobernante Soberano, nos ta reconoce cu e tin e derecho di bisa nos kico pa haci.—Prov. 1:5.

Ta claro cu lo bo no kier “forma un yugo desigual”, es decir, casa cu un hende cu no ta stima Jehova. E persona ey lo por pone bo stop di sirbi Dios. (2 Cor. 6:14, nota) Dios su conseho semper ta funciona, y awe hopi cristian a tuma e decision sabi pa obedece Jehova. Pero tin otronan cu no a haci esey.

Un ruman muher na Australia cu yama Maggy * a splica kico a pasa ora el a cuminsa sali cu un mucha homber cu no tabata Testigo: “Mi tabata perde hopi reunion djis pa mi ta hunto cu ne. Mi relacion cu Jehova a bay hopi atras.” Un otro ruman muher na India cu yama Ratana a cuminsa date un compañero di klas cu a cuminsa studia Bijbel. Pero cu tempo e mucha homber a demostra cu e motibo pakico e tabata studia ta p’e por a cuminsa un relacion amoroso cu Ratana. Lamentablemente, Ratana a stop di sirbi Jehova y a join un otro religion p’e por a casa cu e mucha homber.

Un otro ehempel ta di un ruman na Camerun cu yama Ndenguè. E tabatin 19 aña ora el a casa cu un homber cu no tabata Testigo. Prome cu nan a casa, su futuro esposo a primintie cu e lo por a sigui sirbi Jehova sin problema. Pero dos siman despues di nan casamento, e esposo a prohibie di bay reunion. Ndenguè a bisa: “Mi tabata sinti mi mi so y m’a yora hopi. Anto m’a realisa cu mi no tabatin control mas riba mi bida. Mi tabata sinti mi hopi culpabel pa esey.”

Ta berdad cu tin rumannan cu a casa cu hombernan cu ta amabel y rasonabel aunke nan no ta Testigo. Pero hasta si bo esposo ta cariñoso, con e echo cu bo a casa cu un hende cu no ta creyente lo afecta bo relacion cu Jehova? Con lo bo sinti ora bo corda cu bo no a haci caso di e conseho di Jehova? Ademas, con Jehova lo sintie cu e decision cu bo a tuma?—Prov. 1:33.

Rond mundo, ruman homber y muher a obedece e conseho di Jehova pa casa “basta ta den Señor”, y nan ta convenci cu esey tabata e mihor decision cu nan a tuma. Rumannan cu ta soltero ta determina pa casa cu un persona den e pueblo di Dios pasobra nan kier haci Jehova su curason contento. Tuma, por ehempel, Michiko, un ruman muher soltero na Japon. Su famia a purba di convenc’e pa casa cu un persona cu no tabata Testigo, pero e tabata determina pa obedece Dios. Ademas, tabata duro pa e mira algun di su amiganan casa cu rumannan di congregacion, mientras cu e tabata soltera keto bay. Con el a supera e situacion ey? El a conta: “Cada bes mi tabata corda mi mes cu nos felicidad no ta depende di si nos ta casa of no, sino di sirbi Jehova, e ‘Dios feliz.’ Mi ta sigur tambe cu Jehova ta duna nos e deseonan di nos curason. Pues, si nos kier casa pero nos no por haya un persona cu ta sirbi Jehova, ta mihor pa nos keda soltero pa aworaki.” (1 Tim. 1:11) Cu tempo, Michiko a casa cu un bon ruman, y e ta contento cu el a scucha Jehova y warda.

Algun ruman homber tambe a warda te ora nan a haya e persona adecuado pa casa cu ne. Por ehempel, esey tabata e caso cu Bill di Australia. El a admiti cu tabatin biaha cu el a sintie atrai na hende muher cu no tabata Testigo. Pero semper el a percura pa no bira mucho familiar cu nan. Dicon? Pasobra e no kier a “forma un yugo desigual” cu un hende cu no ta creyente. A traves di añanan, e tabata interesa den algun ruman muher, pero nan no tabata interesa den dje. Bill a warda 30 aña prome cu el a haya un ruman muher cu tabatin e mesun metanan cu ne. Con e ta sintie awor? El a bisa: “Mi no ta lamenta cu m’a warda asina tanto pa casa.”  El a sigui splica: “Mi ta sinti mi bendiciona, pasobra ami cu mi casa ta bay sirbishi hunto, studia hunto y adora Dios hunto. Ademas, e amigonan di mi esposa awor ta mi amigonan tambe, pasobra nos tur ta forma parti di e pueblo di Jehova. Nos ta uza principionan di Bijbel pa mehora nos matrimonio.”

Kico bo por haci segun cu bo ta confia den e conseho di Jehova y ta warda riba un casa cu ta sirbie? Bo por pensa riba e motibo pakico bo no ta casa ainda. Si e motibo principal ta pasobra bo kier obedece e mandamento di Jehova di casa “basta ta den Señor”, nos kier encomenda bo pa esey. Bo por ta sigur cu Jehova ta contento cu bo determinacion pa obedece su Palabra. (1 Sam. 15:22; Prov. 27:11) Kico mas bo por haci? Sigui papia cu Jehova regularmente den oracion y cont’e precies con bo ta sinti. (Sal. 62:8) Bo relacion cu Jehova lo bira mas fuerte si bo ta haci esfuerso pa resisti e tentacionnan di mundo y mal deseo. Bo por ta sigur cu e Dios Haltisimo ta preocupa pa tur su sirbidornan fiel. No lubida nunca cu bo ta un persona valioso den su bista. E ta interesa den bo necesidadnan y bo deseonan. Pero kico si bo deseo di casa ainda ta hopi fuerte? Aunke Jehova no ta priminti niun hende un casa, e sa kico ta mihor pa bo y con pa satisface bo necesidad.—Sal. 145:16; Mat. 6:32.

Tin biaha bo por sinti manera David, kende a bisa: “Contesta mi lihe, o SEÑOR, mi spirito ta desmaya; no sconde bo cara pa mi.” (Sal. 143:5-7, 10) No entrega na momentonan asina. Tene pasenshi y warda te ora cu Jehova mustra bo kico e kier pa bo haci. Pues, tuma tempo pa lesa su Palabra y medita riba loke bo ta lesa. Asina lo bo compronde mihor kico Jehova ta spera di bo y lo bo mira con el a yuda su sirbidornan di pasado. Si bo scucha Jehova, lo bo tin e confianza pa sigui obedec’e.

Kico mas bo por haci pa bo ta feliz y productivo mientras cu bo ta soltero? Bo por uza e tempo ey pa haci bo relacion cu Jehova mas fuerte y pa haya un bon reputacion. Tambe bo por trata di ta mas generoso y prudente. Haci esfuerso pa bo ta un hende agradabel pa trata cu ne, un persona trahador y leal na Jehova. Asina lo bo ta mihor prepara pa bo por tin un matrimonio feliz. (Gen. 24:16-21; Ruth 1:16, 17; 2:6, 7, 11; Prov. 31:10-27) Busca prome e Reino. Participa plenamente den e trabou di predica y den otro actividadnan cristian. Esey lo proteha bo y asina bo ta evita di tuma decisionnan cu no ta sabi. Bill, cu nos a menciona anteriormente, ta bisa tocante e tempo cu e kier a casa: “Mi a uza e tempo den Jehova su sirbishi trahando pionero. E añanan a pasa masha lihe.”

Si, ainda ta realistico pa casa solamente “den Señor.” Ora bo ta obedece e mandamento ey, lo bo honra Jehova y lo bo ta feliz. Bijbel ta bisa: “Felis ta un hòmber ku rèspèt pa SEÑOR, ku ta stima su mandatonan di henter su kurason. Rikesa i bonansa ta biba den su kas, e bon ku e ta hasi lo keda pa semper.” (Sal. 112:1, 3, BPK) Pues, sea determina pa pega na e mandamento divino di casa “basta ta den Señor.”