1, 2. Kico superintendentenan di circuito a ripara den hopi congregacion?

E SUPERINTENDENTE DI CIRCUITO tabata casi cla pa conclui e reunion cu e ancianonan. El a wak e rumannan y a sinti un cariño profundo pa e hombernan diligente aki; algun di nan por tabata su tata. Pero tabatin un asunto importante cu tabata preocup’e. El a puntra nan: “Rumannan, kico boso a haci pa entrena mas ruman homber pa carga responsabilidad den congregacion?” Nan tur a keda keto, ya cu nan ta corda cu durante su bishita anterior el a anima nan pa dedica mas tempo na esey. Finalmente, un di e ancianonan a admiti: “Francamente bisa, nos no a haci mucho cos.” E otro ancianonan a bisa mescos.

² Si bo ta un anciano, probablemente bo tambe a yega di haya bo cu e situacion ey. Rond mundo superintendentenan di circuito a ripara cu den hopi congregacion tin e necesidad pa ancianonan dedica mas tempo na entrena e rumannan—sea ruman jong of hende grandi—pa bira capaz pa yuda cuida e tou. Pero esaki por ta dificil pa algun anciano. Dicon?

3. (a) Con Bijbel ta mustra cu ta importante pa entrena otro hende? (b) Dicon nos tur mester ta interesa den e entrenamento aki? (Wak nota.) (c) Dicon pa algun anciano kisas ta dificil pa entrena otro ruman?

 ³ Como anciano, sin duda bo sa cu ta importante pa dedica tempo na entrena ruman homber. * Tambe bo sa cu tin mester di mas ruman homber pa tene e congregacionnan actual spiritualmente fuerte y pa por forma congregacion nobo den futuro. (Lesa Isaias 60:22.) Ademas, Bijbel ta bisa cu ancianonan mester “siña ... otro hende.” (Lesa 2 Timoteo 2:2.) Pero mescos cu e ancianonan menciona den e introduccion, kisas toch ta dificil pa bo haya e tempo pa haci esey. Y esaki ta di compronde. Bo tin cu dedica tempo na bo famia, na trabou, na responsabilidadnan di congregacion y na otro asuntonan urgente. Cu tanto cos di haci, por parce cu simplemente no ta resta tempo pa entrena e ruman hombernan den congregacion. Sinembargo, laga nos ban wak dicon ta asina importante pa saca tempo pa haci esey.

4. Dicon tin biaha ancianonan ta pospone e entrenamento di ruman homber?

⁴ Dicon algun anciano tin problema pa haya tempo pa entrena mas ruman homber? Kisas nan ta pensa: “Mi sa cu entrenamento ta importante, pero tin otro asuntonan di congregacion cu ta mas urgente y cu no por warda. Si mi pospone e entrenamento pa un tempo, e congregacion ta sigui funciona.” Pero e pensamento aki ta corecto? Berdad cu tin cosnan cu mester di bo atencion di biaha. Pero ora bo ta tarda pa entrena otro ruman homber, bo por perhudica e bienestar spiritual di e congregacion.

5, 6. (a) Kico nos por siña for di e ehempel di un chauffeur cu no tin tempo pa cambia azeta di su auto? (b) Con nos por compara esaki cu e entrenamento den congregacion?

⁵ Pensa riba e ehempel aki: Un chauffeur sa cu pa cuida su motor y pa su auto core bon, e mester cambia azeta cu regularidad. Pero kisas e ta haya cu ta mas urgente pa yena gasolin den tanki cu cambia azeta, ya cu sin gasolin, e auto no ta core. Si e ta hopi ocupa, lo e por pensa: Mi no tin nodi cambia azeta mesora. E auto ta sigui core toch, por lo menos pa un tempo mas. Pero kico ta e peliger? Si e chauffeur sigui pospone e cambiamento di azeta, tardi of trempan, e motor ta kima. Ora esey sosode, lo e tin cu gasta hopi tempo y placa pa drecha e auto. Kico nos ta siña for di e ehempel aki?

⁶ Ancianonan tin hopi tarea importante cu nan mester atende di biaha, sino e congregacion ta keda perhudica. Pues, mescos cu e chauffeur den e ehempel ta haci sigur di pone gasolin den e tanki, asina ancianonan tambe tin cu “haci sigur kico ta e cosnan mas importante” y atende nan di biaha. (Flp. 1:10) Pero algun anciano ta asina ocupa cu asuntonan urgente cu kisas nan ta neglisha di entrena otro ruman homber. Ta comosifuera nan ta blo pone gasolin so den e auto pero no ta cambia su azeta. Pero si ancianonan sigui pospone e entrenamento necesario, tardi of trempan, e congregacion lo no tin suficiente ruman homber capacita pa atende tur loke tin cu haci.

7. Con nos mester mira ancianonan cu ta saca tempo pa entrena mas ruman homber?

⁷ E les ta hopi cla: No pensa cu entrenamento ta un tarea di menos importancia.  Ancianonan cu ta interesa den e futuro di nan congregacion ta saca tempo pa entrena e ruman hombernan cu tin menos experencia. Di e manera ey nan ta duna prueba cu nan ta bon mayordomo y un bendicion pa henter e congregacion. (Lesa 1 Pedro 4:10.) Pero con e congregacion ta beneficia?

8. (a) Kico ta motiva ancianonan pa entrena mas ruman homber? (b) Ki responsabilidad urgente ancianonan cu a bay yuda congregacionnan na otro pais tin? (Wak e cuadro “ Un Trabou Urgente.”)

⁸ Tur anciano, hasta esnan cu tin mas experencia, tin cu reconoce humildemente cu segun cu nan edad ta subi nan lo no por sigui haci e mesun cantidad di trabou cu nan ta haciendo awor pa e congregacion. (Mik. 6:8) Ademas, nan mester ta realistico y tene cuenta cu di un dia pa otro sucesonan inespera por trece un cambio den nan circunstancianan y pone cu nan no por atende nan responsabilidadnan di congregacion. (Ecl. 9:11, 12, NW; Sant. 4:13, 14) Pues, un interes sincero den e bienestar di e carnenan di Jehova ta motiva anciano pa comparti cu ruman homber mas hoben e experencia cu nan a acumula den transcurso di añanan.—Lesa Salmo 71:17, 18.

9. Dicon entrenamento di mas ruman homber ta sumamente importante?

⁹ Un otro motibo pakico anciano cu ta entrena otro ruman homber ta un bendicion pa e tou ta pasobra nan ta yuda fortalece e defensanan di e congregacion. Con asina? Wel, e entrenamento cu nan ta duna ta pone cu lo tin mas ruman homber cu ta cla pa yuda e congregacion keda uni y fiel na Dios, tanto awor como den futuro cercano. No lubida cu ta bay bin temponan hopi dificil: e tribulacion grandi ta cerca. (Eze. 38:10-12; Mik. 5:5, 6) Pues, ancianonan stima, nos kier pidi boso pa saca tempo regularmente pa entrena mas ruman homber pa bira capaz. Cuminsa cu esey for di awor.

10. Con un anciano por saca tempo pa entrena otro ruman homber?

¹⁰ Claro cu nos ta compronde cu boso programa ta yen caba, ya cu boso tin actividadnan importante di congregacion pa atende. Pero kisas boso tin cu uza parti di e tempo ey pa duna entrenamento. (Ecl. 3:1) Esey lo no ta tempo perdi, sino mas bien, un bon inversion di boso tempo y lo beneficia e congregacion den futuro.

11. (a) Kico ta remarcabel di e sugerencianan tocante entrenamento cu algun anciano di diferente pais a duna? (b) Segun Proverbionan 15:22, dicon ta bon pa analisa e sugerencianan di otro anciano?

¹¹ Hopi anciano di diferente pais ta dedica tempo na entrena otro ruman homber pa bira capaz y cu bon resultado. Recientemente, nos a puntra algun di nan con nan ta haci esey. * Aunke nan circunstancianan ta hopi distinto for di otro, toch nan conseho tabata casi mescos. Kico esaki ta indica? Wel, mescos cu den tempo di apostel Pablo, e entrenamento basa riba Bijbel ta funciona pa rumannan “tur caminda den tur congregacion.” (1 Cor. 4:17) Pesey den e articulo aki y esun siguiente, nos lo analisa algun di e sugerencianan cu e ancianonan ey a duna.—Prov. 15:22.

12. Kico ta e prome cos cu un anciano mester haci, y dicon?

¹² Kico ta e prome cos cu un anciano  mester haci? Wel, mescos cu un cunukero tin cu prepara, of cultiva, e tera prome cu e cuminsa sembra, asina tambe un anciano tin cu prepara e curason di e ruman prome cu e cuminsa siñ’e habilidadnan nobo. Dicon esaki ta importante? Pasobra esey lo motiva e ruman pa siña. Con e anciano ta prepara e tera? E por imita e ehempel di un bon maestro di pasado, esta, profeta Samuel.

13-15. (a) Ki tarea profeta Samuel a haya? (b) Con Samuel a cumpli cu su tarea? (Wak e prome plachi.) (c) Dicon e relato di Samuel mester interesa ancianonan awe?

¹³ Mas cu 3.000 aña pasa, Jehova a bisa profeta Samuel: “Mañan na e mesun ora aki lo mi manda un homber for di e tera di Benjamin cerca bo, y lo bo ungie pa ta prins di mi pueblo Israel.” (1 Sam. 9:15, 16) Samuel ya tabata di edad avansa, y el a realisa cu lo e no por a sigui como lider di e nacion di Israel mas. A yega e momento pa un otro hende tuma su luga y Jehova tabata kier p’e ungi e lider nobo. Probablemente Samuel a puntra su mes: Con mi por prepara e homber ey pa e trabou aki? Wel, el a traha un plan con pa haci esey.

¹⁴ E siguiente dia, Samuel a topa Saul, y Jehova a bisa e profeta: “Ata e homber.” Di biaha Samuel a haci manera el a plania, esta, el a crea un bon oportunidad p’e por a papia cu Saul: El a invita Saul cu su sirbidor na un comemento y a duna nan e mihor luga di sinta. Tambe el a duna Saul e mihor pida carni y a bis’e: “Come, pasobra el a wordo aparta pa bo pa e ocasion aki.” Despues di e comemento, nan dos a cana bay Samuel su cas. Na caminda, nan tabatin un dushi combersacion. Samuel kier a haci bon uzo di e ambiente agradabel cu e bon cuminda y e canamento a crea. Ora nan a yega cas, nan a bay riba dak y a sigui papia te ora nan a bay drumi. Su mañan, Samuel a ungi Saul, sunch’e y dun’e mas instruccion. Despues di esey, el a manda Saul bay, bon prepara pa e sucesonan cu lo a sigui.—1 Sam. 9:17-27; 10:1.

¹⁵ Samuel mester a ungi Saul pa bira lider di un nacion. Claro cu esey no ta mescos cu entrena un ruman homber pa bira anciano of sirbidor ministerial den congregacion. Pero toch ancianonan awe por siña varios les importante for di e manera cu Samuel a prepara e curason di Saul. Laga nos analisa dos di nan.

16. (a) Con Samuel a sintie ora cu Israel a pidi pa haya un rey? (b) Cu ki actitud Samuel a cumpli cu e mandato di Jehova pa ungi Saul?

¹⁶ Siña otro hende di buena gana. Na prome instante, ora Samuel a tende cu e Israelitanan tabata kier un rey humano, el a keda hopi decepciona y a sinti cu e pueblo a rechas’e. (1 Sam. 8:4-8) E tabata asina contra pa cumpli cu nan peticion cu Jehova mester a bis’e tres biaha pa haci loke nan a pidie. (1 Sam. 8:7, 9, 22) A pesar di tur cos, Samuel no a bira jaloers riba e homber cu lo a tuma su luga como lider ni a rabia cu ne. Ora Jehova a bis’e pa bay ungi Saul, el a obedece di buena gana, no djis pasobra e mester a haci esey, sino pasobra e tabata stima Jehova.

17. Con ancianonan awe ta imita e actitud di Samuel, y ki satisfaccion esey ta duna nan?

¹⁷ Mescos cu Samuel, awe ancianonan cu experencia ta trata e rumannan cu nan ta entrena na un manera bondadoso. (1 Ped. 5:2) E ancianonan aki ta dispuesto pa siña otro ruman homber, ya cu nan no tin miedo di comparti algun di nan privilegionan den congregacion cu nan. Nan no ta mira e rumannan ey como rival, sino mas bien, como compañero di trabou cu lo yuda nan atende e necesidadnan di nan  congregacion. (2 Cor. 1:24; Heb. 13:16) Esta dushi e ancianonan aki ta sinti ora nan ta mira con e rumannan cu nan a entrena ta uza nan habilidadnan na beneficio di e congregacion!—Echo. 20:35.

18, 19. (a) Con un anciano por prepara e curason di e ruman cu e ta bay entrena? (b) Dicon ta importante pa un anciano dal e pasonan ey?

¹⁸ Sea un amigo, no djis un maestro. E dia cu Samuel a topa Saul, e profeta lo por a saca su butishi, bira basha poco azeta riba cabes di Saul y mand’e bay. E Rey nobo lo tabata ungi si, pero lo e no tabata prepara pa dirigi e pueblo di Dios. En bes di haci esey, Samuel a tuma su tempo pa prepara Saul su curason. Prome cu el a ungi Saul, nan a come hunto, cana hunto trankil asina, papia basta rato y hasta tuma un bon sosiego. Pues, Samuel a warda e momento oportuno pa ungi e Rey nobo.

¹⁹ Awe ta mescos. Prome cu un anciano cuminsa entrena un ruman, e mester crea un ambiente agradabel y haci esfuerso pa bira amigo di e ruman. E pasonan specifico cu un anciano ta tuma pa crea un ambiente trankil y amistoso ta varia di un pais pa otro, ya cu esey ta depende di e custumber- y circunstancianan local. Pero sin importa unda bo ta biba, si abo—como un anciano hopi ocupa—ta saca tempo pa dedica na un ruman homber, lo e realisa cu e ta importante pa bo. (Lesa Romanonan 12:10.) Ruman hombernan na tur parti di mundo lo ta hopi agradecido pa e atencion y cariño cu boso como anciano ta duna nan.

20, 21. (a) Con lo bo describi un bon maestro? (b) Kico nos lo trata den e siguiente articulo?

²⁰ Ancianonan, corda: Un bon maestro ta un persona cu no solamente ta gusta entrena otro hende, pero tambe ta stima e persona cu e ta entrena. (Compara cu Juan 5:20.) Dicon esaki ta importante? Pasobra un ruman homber ta ripara di biaha si realmente bo ta interesa den dje y, como resultado, lo e ta mas dispuesto pa siña for di bo. Pesey, ancianonan stima, boso mester ta maestro y amigo.— Prov. 17:17; Juan 15:15.

²¹ Despues cu un anciano a prepara e curason di un ruman, e por pasa pa e siguiente etapa: yuda e ruman obtene e habilidadnan necesario. Ki metodonan e anciano por uza pa logra esey? Nos lo trata esaki den e siguiente articulo.