1. (a) Kico sirbidornan di Dios tabata sa semper? (b) Dicon nos awe mester ta bon entrena? (c) Kico nos lo trata den e articulo aki?

SEMPER sirbidornan di Dios tabata sa cu ta hopi importante pa nan ta bon entrena of capacita pa nan por tin exito. Por ehempel, patriarca Abraham “a mobilisa su hombernan entrena” pa bay rescata Lot, y nan a logra esey tambe. (Gen. 14:14-16) Den tempo di Rey David tabatin cantante pa alaba Jehova den tempel, y nan tur tabata “instrui pa canta.” (1 Cro. 25:7) Awe, nos ta bringando un guera spiritual contra Satanas y su siguidornan. (Efe. 6:11-13) Tambe nos ta haciendo nos maximo esfuerso pa alaba Jehova y papia cu otro hende tocante su nomber. (Heb. 13:15, 16) Pa nos por tin exito den tur esey, nos mester ta bon entrena, mescos cu e sirbidornan di Dios di pasado. Jehova a encarga e ancianonan di congregacion cu e responsabilidad di entrena otronan pa bira capaz. (2 Tim. 2:2) Den e articulo aki nos lo bay trata algun metodo cu ancianonan cu experencia ta uza pa siña mas ruman homber bira capaz pa cuida e tou di Dios.

2. Prome cu un anciano cuminsa instrui un ruman homber, kico kisas lo e tin cu haci, y dicon?

² Nos por compara un anciano cu un cunukero. Prome cu e  cunukero cuminsa sembra, kisas e tin cu duna e tera vitamina pa e bira mas productivo. Mescos tambe, prome cu un anciano cuminsa siña un ruman homber cu menos experencia algo nobo, kisas e anciano lo tin cu nutri e curason di e ruman cu pasashinan di Bijbel. Asina e curason di e ruman lo ta mihor prepara pa acepta e instruccion cu e ta bay haya.—1 Tim. 4:6.

3. (a) Con e anciano por uza e palabranan di Hesus na Marco 12:29 y 30 ora e ta combersa cu un ruman homber? (b) Con e ruman lo sintie ora e tende e anciano haci oracion p’e?

³ Ta importante pa e anciano sa cuanto efecto e berdad ta haci riba curason di e ruman homber. Lo e por puntr’e: Con bo dedicacion na Jehova a cambia e manera cu bo ta hiba bo bida? E pregunta ey lo duna e anciano oportunidad pa combersa cu ne y splic’e con nos por sirbi Jehova cu henter nos curason. (Lesa Marco 12:29, 30.) Kisas na final di e combersacion, lo bo por haci un oracion y pidi Jehova duna e ruman su spirito santo pa yud’e progresa. Ora e ruman tende bo haci oracion p’e, esey sigur lo anim’e hopi.

4. (a) Menciona algun relato biblico cu un anciano por uza pa stimula e crecemento spiritual di un ruman. (b) Cu ki meta un anciano mester entrena un ruman homber?

⁴ Ora bo cuminsa entrena e ruman, analisa hunto cu ne algun relato biblico cu lo yud’e mira e importancia di ta cla pa yuda, confiabel y humilde. (1 Rey. 19:19-21; Neh. 7:2; 13:13; Echo. 18:24-26) E cualidadnan ey ta mes importante pa e ruman cu vitamina ta pa tera, pasobra nan ta stimula crecemento spiritual. Jean-Claude, un anciano di Francia, a bisa: “Ami ta entrena un ruman cu e meta di yud’e bira un homber spiritual. Mi ta busca oportunidad pa nos por lesa textonan cu ta ‘habri su wowo’ pa e ‘cosnan maraviyoso’ cu tin den e Palabra di Dios.” (Sal. 119:18) Den ki otro manera un anciano por fortalece un ruman homber?

5. (a) Dicon ta importante pa papia tocante metanan spiritual cu e ruman hombernan? (b) Dicon ancianonan mester cuminsa entrena e rumannan for di tempo cu nan ta jong? (Wak nota.)

⁵ Puntra e ruman homber kico ta su metanan spiritual. Si e no tin niun meta specifico na mente, yud’e pone un meta cu ta rasonabel y alcansabel. Bo por cont’e di un meta cu abo a pone y con bo a sinti bo ora cu bo a logr’e. Lag’e mira bo entusiasmo. Aunke esaki por parce un metodo simpel, e ta duna bon resultado. Victor, un anciano y pionero di Africa, a conta: “Tempo mi tabata jong, un anciano a haci mi algun pregunta bon pensa tocante mi metanan. E preguntanan ey a yuda mi cuminsa pensa seriamente riba mi sirbishi na Jehova.” Ancianonan cu experencia ta bisa cu ta importante pa cuminsa entrena e ruman hombernan for di ora nan ta jong ainda, asina cu nan yega edad di teenager. Kico nos por haci? Por duna nan tareanan den congregacion cu ta cuadra cu nan edad. Y kico nos ta logra cu esaki? Wel, esey por yuda e mucha hombernan sigui concentra riba nan metanan segun cu nan ta bira mas grandi y ta haya nan cu yen di distraccion.—Lesa Salmo 71:5, 17. *

6. Ki metodo importante Hesus tabata uza pa entrena su discipelnan?

 ⁶ No djis bisa e ruman kico e tin cu haci. Splic’e tambe pakico ta importante pa e haci esaki; esey lo stimula su deseo pa sirbi. Asina bo ta imita e Gran Maestro, Hesus. E tabata bisa su apostelnan e motibo pakico nan mester haci cierto cos. Por ehempel, el a manda nan: “Bay, y haci hende di tur nacion mi discipel.” Pero prome cu esey, el a bisa nan pakico nan mester a obedec’e: “Mi a ricibi tur autoridad den cielo y riba Tera.” (Mat. 28:18, 19) Con bo por imita e manera cu Hesus a entrena su discipelnan?

7, 8. (a) Con ancianonan por imita e ehempel di Hesus ora di entrena un ruman homber? (b) Dicon ta asina importante pa elogia e ruman? (c) Ki sugerencianan lo por yuda ancianonan entrena otro ruman? (Wak e cuadro “Con pa Entrena Mas Ruman Homber pa Bira Capaz.”)

⁷ Splica e ruman e motibonan biblico pakico bo ta pidie haci cierto cos. Asina bo ta siñ’e haci cosnan a base di principio biblico y no djis pasobra esey ta un regla. Por ehempel, supone cu bo ta pidi un ruman homber pa tene e entrada di Salon di Reino limpi y sin obstaculo. Lo bo por mustr’e Tito 2:10 y splic’e cu su trabou ta haci e mensahe di Reino mas atractivo. Tambe bo por lag’e pensa riba con su trabou ta beneficia e rumannan di edad den congregacion. Combersacionnan asina lo yud’e compronde cu, aunke ta importante pa cumpli cu instruccion, e punto principal ta pa haci cos cu ta beneficia hende. Ora e mira con e rumannan ta beneficia di su trabou, lo e sintie feliz cu e ta util pa e congregacion.

⁸ Ademas, no lubida di elogia e ruman pa e esfuerso cu e ta haci pa sigui bo sugerencianan. Dicon ta importante pa bo haci esey? Pa e mesun motibo cu bo mester muha un mata: pa e crece. Elogio sincero ta yuda e ruman crece den su sirbishi na Jehova.—Compara cu Mateo 3:17.

9. (a) Ki otro desafio ancianonan den paisnan mas rico tin? (b) Dicon e berdad no ta na prome luga den bida di algun ruman homber jong?

⁹ Ancianonan den paisnan mas rico tin un otro desafio: con pa motiva hobennan batisa cu ta den nan 20 of 30 aña di edad pa haci mas den congregacion. Nos a entrevista algun anciano cu experencia di 20 pais desaroya pa nan bisa nos dicon nan ta kere cu algun ruman homber jong ta core pa responsabilidad den congregacion. E motibo cu mas e ancianonan a menciona ta cu nan mayornan no a motiva nan pa pone metanan spiritual for di tempo cu  nan ta mucha. Tambe, aunke algun di e hobennan ey tabatin e deseo di haci mas pa e Reino, nan mayornan a anima nan pa nan alcansa metanan profesional na luga di esey, sea estudio avansa of un carera den mundo. Pues, e berdad nunca tabata na prome luga den nan bida.—Mat. 10:24.

10, 11. (a) Con un anciano pocopoco por yuda un ruman cambia su manera di pensa? (b) Cua pasashinan di Bijbel un anciano lo por analisa cu e ruman, y dicon? (Wak nota.)

¹⁰ Si un ruman homber no ta parce mucho interesa pa haci mas den congregacion, ta posibel pa cambia su manera di pensa; pero esey lo tuma tempo y pasenshi. Mescos cu un cunukero pocopoco por yuda un mata bay den e direccion corecto segun cu e ta crece, asina un anciano pocopoco por yuda un ruman mira cu e tin cu cambia su actitud y acepta mas responsabilidad den congregacion. Pero con e por haci esey?

¹¹ E anciano mester dedica tempo pa bira amigo di e ruman. Laga e ruman sa cu e congregacion tin mester di dje y, segun tempo ta pasa, rasona cu ne riba cierto versiculo di Bijbel. Yud’e reflexiona riba su bida for di dia cu el a dedica su mes na Jehova. (Ecl. 5:4; Isa. 6:8; Mat. 6:24, 33; Luc. 9:57-62; 1 Cor. 15:58; 2 Cor. 5:15; 13:5) Kisas bo por puntr’e: Kico bo a priminti Jehova ora bo a dedica bo mes na dje? Purba di yega na su curason cu e siguiente preguntanan: Con bo ta kere Jehova a sintie dia cu bo a batisa? (Prov. 27:11) Con Satanas lo a sintie? (1 Ped. 5:8) No lubida cu un of mas pasashi di Bijbel bon scogi por yega te den fondo di e ruman su curason y motiv’e pa cambia.—Lesa Hebreonan 4:12. *

12, 13. (a) Ki actitud Eliseo a demostra durante su entrenamento? (b) Con Jehova a recompensa Eliseo pa su fieldad?

¹² Pero kico di boso, hobennan, cu e congregacion tin asina tanto mester di dje? Ki actitud boso mester tin pa boso por tin exito den boso sirbishi na Jehova? Pa contesta e pregunta ey, laga nos analisa e bida di Eliseo, un sirbidor di Dios di pasado.

¹³ Rond di 3.000 aña pasa, profeta Elias a invita Eliseo pa bira su ayudante. Mesora e hoben a acepta e invitacion, y fielmente el a haci tareanan humilde pa e profeta. (2 Rey. 3:11) Despues di mas o menos seis aña, Eliseo tabata bon entrena. Anto el a haya sa cu e trabou cu su maestro tabata haci den Israel tabata a punto di yega na su fin. Tres biaha e profeta a pidi su ayudante pa stop di sirbie, pero cada biaha Eliseo a nenga, bisando: “Lo mi no laga bo.” E tabata determina pa keda cu su mentor mas tanto tempo posibel. Jehova a mira e fieldad y lealtad di Eliseo y como recompensa a lag’e mira e manera espectacular cu Elias a ser hiba den un warwaru.—2 Rey. 2:1-12.

14. (a) Con hobennan por imita Eliseo? (b) Dicon ta asina importante pa un hoben ta fiel y cumpli sin falta cu su tareanan?

¹⁴ Como hoben, con abo por imita Eliseo? Acepta di buena gana cualkier tarea cu bo haya pa haci, aunke ta un tarea humilde. Considera bo maestro como un amigo, y lag’e sa cu bo tin hopi aprecio pa e esfuerso cu e ta haci pa siña bo. E manera cu bo ta reacciona ta bis’e, na moda di papia: “Lo mi no laga bo; mi kier sigui siña di bo.” Pero mas cu tur cos, cumpli sin falta cu bo tareanan. Dicon esaki ta importante? Pasobra asina bo ta demostra cu bo ta fiel y confiabel, y e ancianonan por mira cu bo  ta e tipo di persona cu Jehova lo kier duna mas responsabilidad den congregacion.—Sal. 101:6; lesa 2 Timoteo 2:2.

15, 16. (a) Con Eliseo a mustra respet pa su maestro? (Wak e prome plachi.) (b) Dicon Eliseo a gana e confianza di e otro profetanan?

¹⁵ E relato di Eliseo ta siña nos un cos mas: con rumannan cu ta ser entrena por mustra respet pa ancianonan cu experencia. Despues cu Elias y Eliseo a bishita un grupo di profeta na Jerico, nan dos a cana bay Riu Jordan. Eynan, “Elias a coge su mantel y a dobl’e y a dal riba e awanan; y esakinan a parti.” Nan dos a crusa e riu riba tera seco y a sigui “cana ta papia.” Ta bisto cu Eliseo no a pensa cu ya e tabata sa tur cos. El a sigui scucha y siña for di su maestro te ora cu esaki a ser hiba den e warwaru. Ora Eliseo a bay bek na Riu Jordan, el a dal riba e awanan cu e mantel di Elias y a bisa: “Unda SEÑOR, e Dios di Elias, ta?” Anto e awa di e riu a bolbe parti.—2 Rey. 2:8-14.

¹⁶ Bo a ripara cu e prome milager di Eliseo tabata precies mescos cu e ultimo milager di Elias? Kico nos por siña for di esaki? Aparentemente, Eliseo no a pensa cu, como cu awor ta e ta na luga di Elias, e tin cu cuminsa cambia e manera di haci cos di biaha. En bes di esey, el a dicidi di sigui cu su trabou di profeta na e manera cu Elias tabata haci esaki. Asina el a mustra respet pa su maestro, y esey a yud’e gana e confianza di e otro profetanan. (2 Rey. 2:15) Al final, Eliseo a sirbi 60 aña como profeta y Jehova a dun’e e poder pa haci hopi mas milager cu Elias. Kico ta e les pa rumannan cu ta ser entrena awe?

17. (a) Con e rumannan cu ta haya entrenamento awe por imita e actitud di Eliseo? (b) Cu tempo, con Jehova lo por uza algun di e rumannan aki?

¹⁷ Ora bo haya mas responsabilidad den congregacion, no sinti cu bo tin cu cuminsa cambia cos mesora. No tin nodi haci cosnan na un manera completamente diferente for di loke e otro rumannan tabata haci prome. No mester cambia cos djis pasobra bo tin gana di haci esey. E motibo pa haci cambio mester ta pasobra e congregacion tin mester di esey of pasobra e organisacion di Jehova a duna instruccion pa haci esaki. Eliseo a gana e confianza di e otro profetanan y a mustra respet pa su maestro door di sigui uza e metodonan di Elias. Bo tambe por gana e confianza di e rumannan y mustra respet pa bo maestronan door di sigui uza e metodonan biblico di e ancianonan cu mas experencia. (Lesa 1 Corintionan 4:17.) Claro cu segun cu bo ta gana experencia, lo bo por haci e cambionan cu falta pa bo congregacion por sigui progresa pareu cu e organisacion di Jehova. Cu tempo, lo por pasa cu bo mescos cu a pasa cu Eliseo: Jehova por uza bo pa haci “obranan mas grandi” cu bo maestronan.—Juan 14:12.

18. Dicon ta asina importante pa yuda mas ruman homber bira capaz?

¹⁸ Nos ta spera cu e sugerencianan aki y esnan di e articulo anterior lo motiva ancianonan pa traha tempo pa yuda mas ruman homber bira capaz. Tambe nos ta pidi Jehova pa laga mas ruman homber mustra cu nan ta dispuesto pa ricibi entrenamento y uza loke nan ta siña pa yuda cuida e carnenan di Jehova. Nos ta sigur cu esaki lo fortalece e congregacionnan rond mundo y lo duna cada un di nos e forsa necesario pa keda fiel durante e sucesonan impactante cu ta na caminda.