1. Dicon nos mester haci nos maximo esfuerso pa cuida nos amistad cu Jehova?

BO TA un testigo di Jehova batisa? Si ta asina, bo tin algo hopi valioso: un amistad personal cu Dios. Pero e amistad ey ta ser ataca pa e mundo di Satanas, y tambe e por ser debilita pa motibo di nos mes imperfeccionnan. Tur cristian ta enfrenta e situacion dificil aki. Pesey, nos mester haci nos maximo esfuerso pa cuida nos amistad cu Jehova.

2. (a) Ki ora bo por bisa cu bo tin un amistad, of bon relacion, cu un persona? (Wak nota.) (b) Kico nos tin cu haci pa fortalece nos amistad cu Jehova?

² Con real Jehova ta pa bo? Bo ta sinti cu e ta un berdadero Amigo pa bo? Lo bo kier fortalece bo amistad, of relacion, cu ne? Santiago 4:8 ta bisa kico bo mester haci: “Hala cerca Dios, y lo e hala cerca boso.” Tuma nota cu e texto aki ta papia di dos accion, un di nos parti y un di parti di Jehova: nos ta dal paso pa acerca Dios, y e ora ey e ta acerca nos. * Mas nos haci esaki, mas real Jehova lo bira pa nos y mas cera nos  amistad cu ne ta bira. E ora ey nos lo tin e mesun confianza cu Hesus tabatin ora el a bisa: “Esun cu a manda mi ta existi di berdad, y ... ami conoc’e.” (Juan 7:28, 29) Pero ki pasonan concreto nos por dal pa hala mas cerca Jehova?

3. Con nos por comunica cu Jehova?

³ Pa nos por tin un amistad mas cera cu Dios, nos mester comunica cu ne regularmente. Pero con nos por haci esey? Wel, con bo ta mantene comunicacion cu un amigo of amiga cu ta biba leu? Boso ta skirbi otro y kisas hopi biaha ta papia cu otro na telefon. Con nos por papia cu Jehova? Nos tin cu haci oracion regularmente. (Lesa Salmo 142:2.) Y nos ta laga Jehova papia cu nos, ora cu regularmente nos ta lesa su Palabra skirbi, Bijbel, y medita riba loke nos a lesa. (Lesa Isaias 30:20, 21.) Den e articulo aki nos lo bay wak cu ora nos ta scucha y papia cu Jehova e ta bira mas real pa nos y esey lo fortalece nos amistad cu ne.

4, 5. Duna un ehempel con Jehova ta papia cu bo mediante su Palabra.

⁴ Nos sa cu Bijbel ta contene e mensahe di Dios pa hende en general. Pero Bijbel lo por yuda abo hala mas cerca Dios? Si! Con asina? Segun cu bo ta lesa y studia Bijbel, wak con bo ta reacciona riba su consehonan. Pensa tambe riba maneranan cu bo por pone e consehonan ey na practica den bo bida. Ta asina bo ta laga Jehova papia cu bo mediante su Palabra skirbi. Anto e ta bira un Amigo intimo cu semper ta yuda bo, y lo bo sinti bo mas cerca dje.—Heb. 4:12; Sant. 1:23-25.

⁵ Por ehempel, con bo ta sinti bo ora bo lesa y medita riba e conseho di Hesus pa “stop di montona tesoro riba Tera”? Si ya caba bo ta poniendo e Reino na prome luga, e conseho aki ta laga bo sinti comosifuera Jehova ta elogia bo. Di otro banda, si bo ta mira cu bo tin cu simplifica bo bida pa dedica mas tempo na e Reino, e ora ey ta comosifuera Jehova ta uza e conseho aki pa yuda bo compronde kico abo tin cu haci pa bo por hala mas cerca dje.—Mat. 6:19, 20.

6, 7. (a) Kico ta pasa cu nos amor pa Jehova y su amor pa nos ora nos ta studia Bijbel? (b) Cu ki meta nos mester haci estudio personal?

⁶ Ora nos ta studia Bijbel, nos ta haya sa kico ta e cambionan cu nos por haci pa sirbi Jehova mihor. Pero tambe nos ta  haya mas aprecio pa Jehova su bunita personalidad y pa e bon cosnan cu e ta haci, y esey ta pone nos stim’e mas hopi ainda. Y ora Jehova ta mira cuanto nos ta stim’e, su amor pa nos tambe ta crece y nos amistad cu ne ta bira mas fuerte.—Lesa 1 Corintionan 8:3.

⁷ Pero si nos kier pa Jehova ta un berdadero amigo pa nos, ta hopi importante pa nos studia Bijbel cu e meta corecto. Hesus a bisa: “Pa haya bida eterno, nan tin cu siña conoce bo, e unico Dios berdadero, y esun cu bo a manda, Hesucristo.” (Juan 17:3) Ta berdad cu ora nos ta lesa Bijbel, nos ta siña hopi cos nobo y interesante, pero, manera Hesus a bisa, nos meta principal mester ta pa siña “conoce” Jehova mihor.—Lesa Exodo 33:13; Sal. 25:4.

8. (a) Kico un hende lo por puntra su mes si e lesa e relato di 2 Reynan 15:1 te cu 5? (b) Si nos conoce Jehova bon, kico nos lo pensa di e manera cu e ta actua?

⁸ Ora nos siña conoce Jehova bon, manera un amigo intimo, nos lo no bira preocupa si tin biaha nos no ta compronde dicon el a actua na un cierto manera den algun relato di Bijbel. Por ehempel, 2 Reynan 15:1 te cu 5 ta bisa cu e nacion di Juda tabata adora diosnan falso. A pesar di esey, Rey Azarias a sigui “haci bon den bista di [Jehova].” Sinembargo, Jehova a castiga Azarias cu lepra, y “e tabata un leproso te dia di su morto.” Pero dicon? E parti aki di e relato no ta bisa. Acaso Jehova a castiga Azarias sin un bon motibo? No. Si nos conoce Jehova bon, nos sa cu su disciplina semper ta corecto, pasobra e ta corigi hende manera mester ta, esta, “cu husticia.” (Jer. 30:11) Pesey, aunke kisas nos no sa dicon Jehova a castiga Azarias, nos por ta sigur cu su huicio tabata husto.

9. Con Bijbel ta yuda nos compronde dicon Jehova a castiga Azarias cu lepra?

⁹ Sinembargo, den e caso di Rey Azarias Bijbel ta duna nos mas detaye den un otro texto. E cos ta cu Rey Azarias tabata conoci tambe como Rey Uzias. (2 Rey. 15:7, 32) E relato paralelo na 2 Cronicanan 26:3 te cu 5 y 16 te cu 21 ta splica nos cu aunke Uzias pa un tempo a haci loke tabata bon den bista di Jehova, mas despues den su bida “su curason a bira asina orguyoso” cu esaki a hiba na su ruina. El a purba di haci algo cu ta sacerdote so tabatin mag di haci. Ora cu 81 sacerdote a purba di par’e, con el a reacciona? Su orguyo a pon’e bira “masha rabia” cu e sacerdotenan. E detayenan adicional aki ta yuda nos compronde awor dicon Jehova a castig’e cu lepra.

10. (a) Dicon nos no tin nodi haya un splicacion di delaster un cos cu Jehova haci? (b) Con nos por tin mas confianza cu Jehova semper ta haci loke ta husto?

¹⁰ Kico nos kier mustra cu e informacion cu nos a caba di trata? Wel, e relato di Rey Azarias ta duna nos suficiente detaye cu ta yuda nos compronde dicon Jehova a castig’e. Pero, supone cu Bijbel no a duna tur e detayenan ey, manera sa sosode den otro relatonan cortico. Kico nos lo a haci? Nos lo cuminsa puntra nos mes si loke Jehova a haci ta husto? Of nos lo pensa cu nos tin suficiente informacion den Bijbel cu ta garantisa nos cu Jehova semper ta haci loke ta husto? (Deu. 32:4) Mas mihor nos conoce Jehova, mas nos lo stim’e y confi’e. Nos lo ta convenci cu semper e ta haci loke ta husto, y nos lo no tin nodi haya un splicacion di delaster un cos cu e haci. Segun cu nos ta studia Bijbel y medita riba loke nos ta lesa, Jehova ta bira mas real pa nos y nos  confianza den dje ta sigui crece. (Sal. 77:12, 13) Y como resultado, nos amistad cu ne lo bira mas fuerte.

11-13. Dicon bo ta sigur cu Jehova ta scucha oracion? (Wak e prome plachi.)

¹¹ Oracion ta laga nos hala mas cerca Jehova. Nos por alab’e, gradicie y pidie conseho. (Sal. 32:8) Pero pa nos por tin un berdadero amistad cu Jehova, nos mester ta convenci cu e ta scucha oracion.

¹² Tin hende ta kere cu e unico beneficio di oracion ta cu e ta laga bo sinti bo mihor. Nan ta bisa cu si un hende haci oracion tocante un problema y esaki keda soluciona esey no ta pasobra Dios a scucha e oracion. Mas bien, ta pasobra e oracion a yuda e persona pone su pensamentonan na ordo, identifica e problema y haya un solucion. Ta berdad cu oracion por produci e beneficionan ey, pero con bo por ta sigur cu Jehova realmente ta scucha bo oracionnan?

¹³ Pensa riba esaki: Prome cu Hesus a bin riba Tera, el a mira Jehova contesta oracion di Su sirbidornan. Anto ora Hesus tabata riba Tera, el a uza oracion pa comunica cu su Tata y cont’e su sintimento- y pensamentonan. Un biaha, el a hasta haci oracion henter anochi. (Luc. 6:12; 22:40-46) Lo el a haci esey si e tabata pensa cu Jehova no ta scuch’e? Lo el a siña su siguidornan pa haci oracion si esey tabata simplemente un terapia cu lo a laga nan sinti nan mihor? Claro cu no. Hesus tabata convenci cu oracion ta un medio real pa papia cu Jehova. Na un ocasion, el a bisa: “Tata, mi ta gradici bo cu bo a tende mi. Mi sa cu semper bo ta tende mi.” Nos tambe por tin e mesun confianza cu Jehova ta scucha nos oracion.—Juan 11:41, 42; Sal. 65:2.

14, 15. (a) Dicon ta bon pa nos pidi cosnan specifico den nos oracion? (b) Con oracion a yuda un ruman muher haya un amistad mas fuerte cu Jehova?

¹⁴ No ta semper bisto kico Jehova su contesta riba nos oracionnan ta. Pero si nos ta pidie cosnan specifico ora nos ta papia cu ne, lo ta mas facil pa nos mira su  contesta, y e ta bira mas real pa nos. Ademas, si nos ta conta Jehova tur loke ta preocupa nos, nos lo sinti nos mas cerca dje.

¹⁵ Un prueba di esey ta e experencia di Kathy. * E no tabata gusta sirbishi di veld, pero toch e tabata bay regularmente. El a conta: “Mi no tabata gusta sirbishi di veld. Y ora mi bisa cu mi no tabata gust’e, mi kiermen cu mi no tabata gust’e at all. Ora m’a baha cu pensioen, un anciano a anima mi pa bira pionero; el a hasta duna mi e papel pa yena pa bira pionero. Mi a dicidi di haci esey, pero tambe m’a cuminsa pidi Jehova tur dia pa yuda mi pa mi siña gusta e trabou di predica.” Jehova a contesta su oracion? Kathy a bisa: “Ya mi tin tres aña ta traha pionero. Como cu mi ta pasa mas tempo den sirbishi y ta siña for di e otro rumannan, mi a mehora mi habilidad di predica. Awor, mi no gusta predica, mi stim’e. Ademas, mi amistad cu Jehova ta mas fuerte cu nunca.” Bo a tuma nota ki efecto e oracionnan di Kathy tabatin riba su amistad cu Jehova?

16, 17. (a) Kico nos mester haci pa nos amistad cu Jehova sigui crece? (b) Kico nos lo trata den e siguiente articulo?

¹⁶ Nos amistad cu Jehova por sigui crece durante henter nos bida. Pero manera nos a wak den e articulo aki, p’e hala cerca nos, nos tin cu haci nos parti prome y hala cerca dje. Pues, nos mester percura pa semper nos keda den comunicacion cu nos Dios: lesa y studia Bijbel y haci oracion. Cu ki resultado? Nos relacion cu Jehova lo bira mas y mas fuerte, y cu su yudansa nos lo por supera e problemanan cu ta presenta den bida.

¹⁷ Pero tin biaha problemanan ta keda persisti a pesar di nos oracionnan sincero. Na momentonan asina, nos confianza den Jehova por tambalia. Kisas nos ta cuminsa puntra nos mes si Jehova realmente ta scucha nos oracionnan of si ainda e ta considera nos como su amigo. Kico nos por haci pa nos no stop di confia den dje? Con nos por sa si di berdad ainda e ta nos Amigo? E siguiente articulo lo contesta e preguntanan ey.