1, 2. Con Hesus a demostra su gran amor pa hende?

E EHEMPEL di mas grandi y completo di Jehova su sabiduria tabata e creacion di su prome Yiu. E Yiu aki tabata e personificacion di sabiduria, Dios su “trahador experto.” Nos por imagina nos con feliz y satisfecho Hesus lo mester a sintie ora cu su Tata “a establece e cielonan” y “a marca e fundeshinan di Tera.” Pero di tur loke Dios a crea, e cos cu mas Hesus tabata encanta cu ne tabata “e yiunan di hende”, esta, humanidad. (Prov. 8:22-31) Si, hasta prome cu Hesus a bin na mundo, e tabatin un cariño special pa hende.

² Mas despues, Hesus a duna prueba di su amor y lealtad na Dios y tambe di su gran amor pa “e yiunan di hende” ora cu boluntariamente “el a entrega tur loke e tabatin” p’e bira hende. El a haci esey pa asina e por a percura un “rescate a cambio di hopi hende.” (Flp. 2:5-8; Mat. 20:28) Esta grandi su amor pa hende tabata! Tempo cu Hesus tabata riba Tera Dios a dun’e e poder pa haci milager. Cu e poder ey el a demostra cuanto e ta stima hende y a duna un muestra di e cosnan maraviyoso cu lo e haci den futuro na un escala mundial.

3. Kico nos ta bay analisa den e articulo aki?

 ³ Ora Hesus a bin na Tera, el a “declara e bon noticia di e Reino di Dios.” (Luc. 4:43) E tabata sa cu e Reino aki lo a santifica e nomber di su Tata y lo a soluciona e problemanan di hende unabes pa semper. Ora nos lesa tocante Hesus su actividad di predica, nos ta mira cu el a haci hopi milager cu a demostra su interes sincero den hende. Dicon esaki ta importante pa nos? Pasobra loke el a haci ta yuda nos mira futuro cu optimismo y confianza. Laga nos analisa cuater di su milagernan.

4. Describi Hesus su encuentro cu un leproso.

⁴ Ora cu Hesus tabatin un tempo ta predica caba el a bay Galilea. Eynan el a topa un homber cu un maleza teribel: lepra. (Mar. 1:39, 40) Lucas, kende tabata dokter, a bisa cu e homber tabata “tur na lepra”, loke ta indica cu e maleza tabata den un estado hopi avansa. (Luc. 5:12) E relato ta sigui bisa: “Ora [e leproso] a mira Hesus, el a tira su curpa abou y a rog’e: ‘Señor, si bo kier, bo por cura mi.’” E homber ey tabata sa sigur cu Hesus tabatin e poder pa cur’e, pero loke e tabata kier a sa ta si Hesus tabatin e deseo di haci esey. Con Hesus lo a reacciona riba e peticion sincero aki? Kico Hesus a sinti ora el a mira e homber aki cu probablemente lo tabata tur desfigura? Hesus lo a haci manera e fariseonan, kendenan tabata desprecia hende cu tabata sufri di lepra? Kico abo lo a haci?

5. Dicon Hesus kier a cura e leproso?

⁵ Aparentemente, e leproso aki no a grita: “Impuro! Impuro!”, manera Ley di Moises a stipula. (Lev. 13:43-46) Pero Hesus no a rabia cu ne. Mas bien, el a concentra riba e homber su problema, riba su necesidad. Aunke nos no sa kico Hesus tabata pensa, nos sa si kico e tabata sinti. Conmovi pa compasion, Hesus a haci algo increibel. El a saca su man, mishi cu e leproso y a bis’e cu un stem firme, pero cariñoso: “Mi kier. Sea cura.” Y mesora “e lepra a kita for di dje.” (Luc. 5:13) Jehova a duna Hesucristo e poder no solamente p’e haci un milager asina, sino tambe pa Hesus demostra cuanto e tabata stima hende.—Luc. 5:17.

6. (a) Kico ta remarcabel di e manera cu Hesus tabata cura e hendenan? (b) Kico nos ta siña for di e milagernan di Hesus?

⁶ Cu e poder di Dios, Hesucristo a haci milagernan asombroso. E no a cura lepra so, sino tambe hopi otro maleza mas. Bijbel ta bisa cu “e multitud a keda asombra ora nan a mira e mudonan papia, e cohonan cana bon y e ciegonan mira.” (Mat. 15:31) Awe, dokternan sa haci transplante di organo pa yuda nan pashentnan, pero Hesus no tabatin nodi haci esey. E por a cura cualkier organo y cualkier parti di e curpa cu tabata malo. Anto e por a haci esey di biaha. Tin biaha hasta el a cura hende cu tabata hopi leu for di dje. (Juan 4:46-54) Kico nos ta siña for di e ehempelnan asombroso aki? Wel, Hesus, cu awor ta nos Rey den cielo, tin tanto e poder como e deseo di cura tur maleza pa semper. Ora nos mira con el a trata e hendenan cu el a cura, nos ta keda mas convenci ainda cu den e mundo nobo e profecia aki lo cumpli: “E lo tin compasion di e pober y di esun den necesidad.” (Sal. 72:13) Pronto Hesus lo cumpli cu e deseo di su curason ora e cura tur esnan cu ta sufri.

7, 8. Splica kico Hesus a haci prome cu el a topa e homber malo na e tanki di awa di Betzata.

⁷ Algun luna despues di a cura e leproso, Hesus a biaha for di Galilea pa Judea, caminda el a sigui predica e bon noticia di e Reino di Dios. Cu e mensahe cu e tabata proclama y cu su actitud bondadoso, lo e mester a cambia bida di miles di hende. Ta bisto cu Hesus kier a declara e bon noticia na hende pober, papia di libertad cu esnan oprimi y consola esnan di curason kibra.—Isa. 61:1, 2; Luc. 4:18-21.

⁸ Den e luna di nisan, Hesus a bay Jerusalem pa celebra e Pasco Hudiu di acuerdo cu e mandamento di Ley. E stad tabata yen yen di hende cu a bin pa e fiesta special aki. Net pa noord di e tempel tabatin un tanki di awa conoci como Betzata, y eynan Hesus a topa un homber malo cu no por a cana.

9, 10. (a) Dicon asina tanto hende tabata bay e tanki di awa di Betzata? (b) Ki milager Hesus a haci na e tanki di awa? (Wak e prome plachi.) (c) Kico nos ta siña for di e relato aki?

⁹ Masha hopi hende malo tabata bay Betzata. Dicon? Pasobra nan tabata kere cu nan lo por a cura milagrosamente si nan baha den e tanki di awa ora cu e awa tabata troebel. Imagina bo e escena: e luga tabata patapata di hende cu tabata warda ansiosamente riba un milager pa nan cura. Nan tabata angustia y sin speransa. Pero kico Hesus tabata haci na e tanki di awa ey siendo cu e tabata un homber perfecto sin niun problema di salud? Compasion a conmove Hesus pa bay cerca un homber cu tabatin 38 aña malo. E tabata malo for di prome cu Hesus a bin riba Tera.—Lesa Juan 5:5-9.

¹⁰ Bo por imagina bo e desesperacion den cara di e homber ora cu Hesus a puntr’e si e kier bira bon? Claro cu e kier a cura. Pero con? E no tabatin niun hende pa yud’e baha den e tanki di awa. E ora ey Hesus a mand’e haci algo imposibel: coy su cama y cana. Con e homber a reacciona? El a lanta para, coy su cama y cuminsa cana. Esta un demostracion maraviyoso di loke Hesus lo haci den e mundo nobo! Tambe e milager aki ta mustra cu Hesus a actua cu compasion. El a busca e persona cu mas tabatin mester di yudansa. Kico nos por siña for di esaki? Den e trabou di predica nos mester sigui busca personanan cu ta deprimi pa motibo di e cosnan teribel cu ta pasa den mundo.

11. Con Marco 5:25 pa 34 ta mustra cu Hesus a sinti compasion pa hende malo?

¹¹ Lesa Marco 5:25 pa 34. Un muher tabatin 12 aña ta sufri di un situacion bergonsoso. Su maleza a afecta tur aspecto di su bida. E no por a bay ni sikiera e tempel pa adora Dios. “El a sufri masha na man di hopi dokter y a gasta tur loke e tabatin, sin cu esey a yud’e; al contrario, ta pio so el a bira.” Pero un dia, el a pensa di haci algo otro. El a tende di un tal Hesus cu tabata cura hende, di manera cu el a busca un chens pa yega cerca dje. El a pasa meymey di e multitud y a mishi cu Hesus su paña. (Lev. 15:19, 25) Ora Hesus a sinti cu poder a sali for di dje, el a puntra ta ken a mishi cu ne. E muher tabata “morto spanta y tabata tembla; el a bin y a cay na rudia dilanti di Hesus y a confesa tur cos.” Ora Hesus a realisa cu ta su Tata, Jehova, a cura e  muher, el a bis’e cariñosamente: “Mi yiu, bo fe a cura bo. Bay na paz, sea salud y cu e maleza penoso aki no molestia bo mas.”

12. (a) A base di loke nos a analisa te awor, con lo bo describi Hesus? (b) Con nos por imita e ehempel di Hesus?

¹² Esta bunita pa mira cuanto amor Hesus tin pa hende, specialmente pa esnan enfermo! Satanas, en cambio, kier convence nos cu niun hende no stima nos y cu nos no bal nada. Pero e milagernan di Hesus a demostra bon cla cu di berdad e ta stima nos y ta interesa den nos problemanan. Sin duda, nos tin e mihor Rey y Sumo Sacerdote cu nos por imagina. E ta cariñoso y ta pone su mes na luga di otro hende. (Heb. 4:15) Kisas no ta facil pa nos compronde e sintimentonan di hende cu ta sufri di maleza cronico, specialmente si nos mes nunca a pasa den dje. Pero nos por corda cu aunke Hesus nunca a bira malo, toch el a tene compasion cu hende enfermo. Di mes manera laga nos haci nos best pa pone nos mes na luga di personanan cu tin problema di salud.—1 Ped. 3:8.

13. Kico e resureccion di Lazaro ta siña nos tocante e personalidad di Hesus?

¹³ Hesus tabata sinti hopi duele ora e tabata mira hende sufri. Por ehempel, ora el a mira e dolor di e famia y amigonan di Lazaro, “el a suspira profundamente y a keda masha conmovi.” (Lesa Juan 11:33-36.) Y aunke Hesus tabata sa cu lo e bay resucita Lazaro, toch el a yora. E no tabatin berguensa di expresa su sintimentonan. E hendenan cu tabata para wak por a mira cuanto cariño  e tabatin pa Lazaro y su famia. E tabata stima su amigo asina tanto cu el a uza e poder cu Jehova a dun’e pa resucita Lazaro.—Juan 11:43, 44.

14, 15. (a) Kico ta mustra cu Jehova kier caba cu sufrimento? (b) Kico ta interesante tocante e palabra Griego pa “graf”?

¹⁴ Bijbel ta describi Hesus como e “copia exacto” di Jehova su personalidad. (Heb. 1:3) Pues, su milagernan ta siña nos cu su Tata tambe kier elimina maleza, dolor y morto. Den pasado, Hesus a resucita djis un par di hende. Pero pronto e y su Tata lo resucita hopi hende mas, manera e mes a declara: “Lo yega e ora cu tur esnan cu ta den graf ... lo sali afo.”—Juan 5:28, 29.

¹⁵ E palabra Griego traduci como “graf” ta bin di un verbo Griego cu ta nifica “corda.” Esaki ta un palabra apropia, pasobra Dios Todopoderoso, Esun cu a crea e universo inmenso, ta corda delaster un detaye di nos sernan keri cu a muri: nan personalidad, nan cualidadnan, nan bida. (Isa. 40:26) Jehova no solamente por corda esnan cu a muri, pero e y su Yiu kier corda nan tambe. E resureccionnan menciona den Bijbel ta djis un muestra di loke lo tuma luga na escala mundial den e mundo nobo.

16. Ki oportunidad cristiannan cu keda fiel te na fin lo tin?

¹⁶ Si nos keda fiel te na fin, nos por ta testigo di un di e milagernan di mas grandi di tur tempo: pasa bibo door di e tribulacion grandi. Anto esey no ta tur. Poco despues di Armagedon, nos lo mira mas milager tuma luga: tur hende lo tin un salud perfecto. (Isa. 33:24; 35:5, 6; Rev. 21:4) Bo por imagina bo ta mira e hendenan rond di bo benta nan bril afo, nan garoti, kruk, rolstoel y tambe nan aparato di oido? Ta bon mes cu Jehova ta restaura salud di e sobrevivientenan di Armagedon, ya cu lo tin hopi trabou pa haci. Cu entusiasmo, nan lo pone man na obra y transforma e planeta cu Dios a duna nos den un bunita paradijs.—Sal. 115:16.

17, 18. (a) Dicon Hesus a haci milager? (b) Dicon nos mester haci tur loke nos por pa drenta den e mundo nobo cu Dios a priminti?

¹⁷ Ta un gran animacion pa e sirbidornan di Dios awe, cu ta forma parti di e “multitud grandi”, lesa con Hesus a cura hende enfermo. E milagernan ey ta reforsa nan confianza cu pronto tur nan dolornan lo disparce. (Rev. 7:9) Nan ta mustra tambe cuanto amor y cariño e Yiu di Dios tin pa hende. (Juan 10:11; 15:12, 13) Ademas, Hesus su gran compasion ta un muestra di e amor profundo cu Jehova tin pa cada un di su sirbidornan.—Juan 5:19.

¹⁸ Nos ta biba den un mundo yen di dolor, sufrimento y morto. (Rom. 8:22) Nos tin mester di e mundo nobo cu Dios a priminti, caminda nos tur lo ser cura completamente di tur maleza. Malakias 4:2 ta bisa cu hende cu ser cura lo “bula rond manera bishenan for di stal.” Nan lo ta feliz y contento di a ser libra for di imperfeccion. Si di berdad nos tin fe den e promesanan di Jehova y nos ta aprecia nan, nos lo haci tur loke nos por pa nos wak e mundo nobo cu nos propio wowo. E repaso aki di e milagernan cu Hesus a haci ta anima nos hopi, ya cu nan ta un muestra chikito di e curacion permanente cu hende lo haya bou di su Reino Mesianico.