1, 2. (a) Con bo ta imagina bo cu bo bida lo ta den e mundo nobo? (Wak e prome plachi.) (b) Kico ta loke lo duna nos e alegria di mas grandi den e mundo nobo?

“LOKE REALMENTE TA BIDA.” Riba kico bo ta pensa ora bo lesa e palabranan ey? Segun apostel Pablo, ta “bida eterno” ta loke realmente ta bida. (Lesa 1 Timoteo 6:12, 19.) Pa mayoria di nos, esey ta e bida cu Dios a priminti di duna nos den Paradijs y cu lo dura pa eternidad. Esaki ta e bida cu lo haci nos realmente feliz y ta pesey nos ta asina ansioso p’e yega. Casi nos no por imagina nos con lo ta pa lanta tur mainta cu bon salud, feliz y contento, si, sin ningun dolor. (Isa. 35:5, 6) Esta dushi lo ta pa pasa tempo hunto cu bo famia- y amigonan, incluso esnan cu a ser resucita! (Juan 5:28, 29; Echo. 24:15) Ademas, nos lo tin chens di siña toca un instrumento, siña con pa diseña nos mes cas, siña mas tocante ciencia of profundisa nos mes riba cualkier otro tereno cu nos gusta.

² Nos ta spera ansiosamente riba tur e bon cosnan ey, pero loke lo duna nos e alegria di mas grandi ta di por sirbi Jehova. Esta feliz nos lo ta cu Jehova su nomber y reputacion a ser limpia di tur reproche y cu tur hende lo acept’e como nan  Soberano! (Mat. 6:9, 10) Lo ta masha emocionante pa mira cu porfin Jehova su proposito original pa humanidad y pa e Tera ta cumpli. Anto corda cu e tempo ey lo ta hopi mas facil pa hala cerca Jehova, segun cu pocopoco nos ta bira perfecto.—Sal. 73:28; Sant. 4:8.

3. Nos mester prepara for di awor pa kico?

³ Nos tin sigur cu Jehova lo haci tur e cosnan maraviyoso aki, pasobra Hesus a bisa cu “pa Dios tur cos ta posibel.” (Mat. 19:25, 26) Pero si nos kier biba den e mundo nobo ey—no djis durante e Reinado di Mil Aña di Cristo, sino pa semper—nos tin cu dal paso awor pa “haya un gara firme” riba e bida eterno. Nos tin cu biba pendiente di e fin di e mundo malbado aki, y nos mester prepara for di awor pa e bida den e mundo nobo. Con nos por haci esey?

4. Ilustra con nos por prepara for di awor pa biba den e mundo nobo.

⁴ Con nos por prepara for di awor pa biba den Paradijs? Wel, imagina cu bo tin cu bay biba na un otro pais. Con lo bo prepara pa e cambio ey? Kisas lo bo cuminsa siña e idioma y e custumbernan di e pais. Podise lo bo purba algun cuminda tipico di eynan. Talbes bo ta hasta cuminsa biba comosifuera ta eynan bo ta caba. Tur esey lo yuda bo ora bo yega den e pais, ya cu lo bo tin menos problema pa adapta. Mescos ta conta pa Paradijs: Nos por prepara for di awor p’e mundo nobo y purba di biba comosifuera nos ta eynan caba. Laga nos analisa algun manera cu nos por haci esaki.

5, 6. Dicon for di awor nos mester custumbra di obedece e instruccionnan di Jehova cu nos ta haya mediante su organisacion?

⁵ Den e mundo aki, Satanas a convence mayoria di hende cu nan por haci loke nan kier y cu nan no tin cu duna cuenta na ningun hende, mucho menos na Dios. Kico tabata e resultado di e spirito di independencia aki? Hopi sufrimento y infelicidad. (Jer. 10:23) Esta diferente bida lo ta den e mundo nobo! Eynan, nos tur lo obedece Jehova y respeta su derecho di bisa nos kico pa haci.

⁶ Lo ta un placer den e mundo nobo pa sigui e instruccionnan di Jehova, comberti e Tera den un bunita paradijs y siña e hendenan cu resucita. Pero kico si e rumannan cu ta dirigi e organisacion ta manda nos haci un trabou cu nos no gusta dje hopi ey? Con nos lo reacciona? Nos lo sigui nan instruccion y haci nos esfuerso pa cumpli cu ne lo mihor cu nos por y hasta purba di disfruta di e tarea? Casi sigur nos tur lo contesta cu si. Pesey ta asina importante pa for di awor nos custumbra di obedece e instruccionnan cu nos ta haya di Jehova mediante su organisacion. Asina nos ta prepara nos mes pa biba den e mundo nobo.

7, 8. (a) Dicon nos mester coopera cu e organisacion di Jehova? (b) Ki cambionan algun ruman mester a haci? (c) Nos por tin sigur di kico den e mundo nobo?

⁷ Si nos kier ta prepara pa biba den e mundo nobo, nos tin cu siña for di awor pa keda contento cu loke nos tin y pa coopera cu otro y cu e organisacion di Jehova. Por ehempel, kisas nos ta haya un asignacion nobo di sirbishi. Laga nos acept’e gustosamente y cumpli cu ne cu entusiasmo. Si nos siña haci esey awor, nos lo haci mescos den Paradijs. (Lesa Hebreonan 13:17.) Den tempo di e Israelitanan, nan a tira lot pa parti e Tera Priminti. (Num. 26:52-56; Jos. 14:1, 2) Kisas den Paradijs nos tambe lo ser asigna unda pa biba, y por ta esey no ta caminda  nos a pensa. Pero si nos a siña coopera, nos lo keda satisfecho y nos lo sirbi Jehova felizmente, sin importa unda nos ta biba.

⁸ Lo ta un privilegio grandi pa biba den Paradijs bou di mando di e Reino. Pesey lo ta bale la pena pa nos haci tur nos esfuerso awor pa coopera cu e organisacion di Jehova y cumpli cu e asignacionnan cu nos haya. Claro cu nos circunstancia por cambia. Por ehempel, algun betelita di Merca a haya e asignacion nobo pa bay traha den veld y awor ta disfruta di hopi bendicion den otro formanan di sirbishi di tempo completo. Algun superintendente di circuito tambe a haya un otro asignacion debi na edad y otro factornan, y awor nan ta pionero special. Si nos siña pa ta contento cu loke nos tin y pidi Dios yuda nos duna lo mihor cu nos por den su sirbishi, nos lo ta feliz y nos lo disfruta di hopi bendicion a pesar di e temponan critico cu nos ta biba aden. (Lesa Proverbionan 10:22.) Y kico di nos speransa pa futuro? Podise nos a pensa caba unda nos lo tin gana di biba. Pero kico si e organisacion di Jehova pidi nos bay biba un otro caminda? Nos por tin sigur cu e tempo ey lo no importa unda nos ta biba ni ki asignacion nos tin, ya cu nos lo ta asina agradecido cu nos ta biba den Paradijs cu nos lo ta superfeliz.—Neh. 8:10.

9, 10. (a) Dicon nos lo mester tene pasenshi den e mundo nobo? (b) Con nos por demostra for di awor cu nos tin pasenshi?

⁹ Den e mundo nobo lo tin biaha cu nos mester tin pasenshi. Por ehempel, supone cu nos tende cu tin famia ta hopi contento pasobra nan famia- y amigonan a resucita. En cambio, nos tin cu warda ainda pa nos hendenan resucita. Kico nos lo haci? Nos lo alegra hunto cu e otro famianan y warda cu pasenshi riba nos beurt? (Rom. 12:15) Si for di awor nos siña warda cu pasenshi pa e promesanan di Jehova cumpli, den futuro lo ta mas facil pa nos tene pasenshi.—Ecl. 7:8.

¹⁰ Tambe nos mester tene pasenshi ora bin cambio den nos forma di compronde berdadnan cu tin den Bijbel; esey ta un otro manera pa prepara pa biba den e mundo nobo. Con nos ta reacciona ora tin algo cu nos no ta compronde? Nos ta dedica tempo pa studia e informacion nobo y ta haci esfuerso pa acepta e cambionan? Den tal caso lo ta mas facil pa nos acepta e instruccionnan nobo cu Jehova lo duna den Paradijs.—Prov. 4:18; Juan 16:12.

11. Dicon nos mester siña pordona otro for di awor?

¹¹ Un otro cos cu lo yuda nos bon den e mundo nobo ta ora nos ta cla pa pordona. Dicon? Pasobra nos imperfeccionnan lo no disparce di un dia pa otro durante e Reinado di Mil Aña di Cristo. Lo tuma tempo pa nos tur—husto y inhusto—bira perfecto. (Echo. 24:15) Nos lo por resolve nos diferencianan e tempo ey y trata otro cu cariño? Si for di awor nos siña pordona otro libremente y haci esfuerso pa nos por tin un bon relacion cu otro, den Paradijs lo ta hopi mas facil pa haci mescos.—Lesa Colosensenan 3:12-14.

12. Dicon nos mester prepara for di awor pa biba den e mundo nobo?

¹² Ta probabel cu den e mundo nobo nos lo no haya semper loke nos ta desea na e momento cu nos ta desea di haya esey. Nos lo mester tin un actitud agradecido y keda contento den cualkier situacion cu nos ta aden, segun cu nos ta beneficia di Jehova su gobernacion amoroso. Eigenlijk, den Paradijs nos lo tin mester di tur e cualidadnan cu Jehova ta siña nos cultiva aworaki. Si nos custumbra di biba  aworaki manera nos lo bay biba na e tempo ey, nos lo cultiva cualidadnan cu nos lo tin mester pa eternidad. Di e manera ey “e mundo binidero” ta bira mas real pa nos. (Heb. 2:5; 11:1) Ademas, asina nos ta demostra cu di berdad nos kier biba den un mundo caminda husticia ta reina. Bo ta mira dicon ta asina importante pa prepara bon pa bida eterno den e mundo nobo di Dios?

13. Kico lo ta na prome luga den e mundo nobo?

¹³ Laga nos wak un manera mas cu nos por prepara pa bida den e mundo nobo. Aunke den e tempo ey nos lo tin un abundancia di cuminda y di tur otro necesidad fisico riba Tera, loke lo haci nos mas feliz ta e echo cu nos necesidadnan spiritual ta ser satisface y cu nos lo tin un amistad perfecto cu Jehova. (Mat. 5:3) Actividadnan spiritual lo ta na prome luga y lo ta un placer di por ta ocupa den e sirbishi di Jehova. (Sal. 37:4) Si for di awor asuntonan spiritual ta na prome luga, nos lo ta bon prepara pa biba den e mundo nobo.—Lesa Mateo 6:19-21.

14. Ki metanan spiritual por yuda hobennan prepara pa bida eterno?

¹⁴ Kico nos por haci pa sirbi Jehova cu mas goso? Entre otro, pone metanan spiritual. Por ehempel, si bo ta jong y bo tin pensa di drenta sirbishi di tempo completo, busca articulonan cu ta papia tocante e diferente opcionnan cu tin y pone un di nan como bo meta. * Dicon bo no ta papia cu un ruman cu a sirbi Jehova pa hopi aña den sirbishi di tempo completo? E experencia y entrenamento teocratico cu bo ta haya den sirbishi di tempo completo sigur lo yuda bo sigui sirbi Jehova den e mundo nobo.

15. Menciona algun meta spiritual cu nos lo por pone.

¹⁵ Tin hopi meta mas cu nos por pone den e sirbishi di Jehova. Por ehempel, nos por purba di bira mas habil den un cierto aspecto di sirbishi. Tambe nos por dedica tempo na studia principionan di Bijbel pa asina nos por compronde nan mihor y sa con pa pone nan na practica den nos bida. Kico di mehora nos partinan, nos discursonan of nos comentarionan na reunion? Esakinan ta djis algun idea. E punto ta cu ora nos ta pone meta spiritual, nos lo tin mas entusiasmo pa actividadnan teocratico y esaki lo yuda  nos prepara nos mes pa biba den e mundo nobo.

16. Dicon nos por bisa cu e mihor manera di biba cu tin ta door di sirbi Jehova?

¹⁶ Kisas un hende ta puntra: Si mi dedica tur mi tempo na prepara pa e mundo nobo di Dios, lo mi no perde e chens di tin un mihor bida aworaki? Claro cu no! E mihor manera di biba cu tin ta door di sirbi Jehova, pasobra ta asina el a crea nos y esey ta loke ta haci nos mas feliz. Nos no ta sirbie obliga ni djis pa sobrevivi e tribulacion grandi, ya cu nos sa cu un bida sin Jehova ta un bida bashi. No tin nada mas mihor cu ricibi su guia den nos bida y sinti su amor. (Lesa Salmo 63:1-3.) Claro cu nos no tin cu warda te ora Paradijs yega pa nos por disfruta di e bendicionnan cu Jehova tin pa hende cu ta sirbie cu henter nan curason; nan ta disponibel for di awor. En realidad, tin algun di nos cu ya pa hopi aña ta cosecha e bendicionnan ey y nos sa di experencia cu no tin nada otro cu lo por a duna nos mas satisfaccion.—Sal. 1:1-3; Isa. 58:13, 14.

17. Ki luga nos interesnan personal y placer lo tin den Paradijs?

¹⁷ Den e mundo nobo lo tin tempo pa haci e cosnan cu mas nos ta gusta. En realidad, Jehova a crea nos cu e deseo di alcansa nos logronan personal y di disfruta di bida plenamente, y e ta priminti cu lo e “satisface e deseo di tur ser bibo.” (Sal. 145:16; Ecl. 2:24) Sosiego, placer y interesnan personal tin nan luga awe, pero nos lo disfruta mas di nan si nos pone nos relacion cu Jehova na prome luga. Asina tambe lo ta den Paradijs. Pues, lo ta sabi di nos parti pa sigui busca prome e Reino y concentra riba e beneficionan cu nos ta haya door di sirbi Dios.—Mat. 6:33.

18. Con nos ta mustra cu nos ta preparando nos mes pa biba den Paradijs?

¹⁸ Den Paradijs, nos lo ta hopi feliz mes, mucho mas di loke nos por imagina nos mes. Laga nos prepara nos mes for di awor y asina demostra cuanto gana nos tin di biba eynan. Con? Door di haci esfuerso pa desaroya e cualidadnan cu Jehova kier pa nos tin, door di predica e Reino cu entusiasmo y door di pone adoracion di Jehova na prome luga. Pronto e mundo nobo lo ta un realidad, y Jehova lo cumpli cu tur su promesanan. Pesey, laga nos biba comosifuera nos ta eynan caba.