1. Den ki periodo di tempo nos ta biba?

AWE nos ta biba den “temponan critico, dificil pa trata cu ne.” Segun Bijbel, for di aña 1914 nos ta biba den “e ultimo dianan”, e periodo di tempo di mas malo den historia. (2 Tim. 3:1-5) Ademas, e Palabra di Dios a profetisa cu e situacion mundial lo sigui empeora pasobra “hende malbado y gañadonan lo bay di malo pa pio.”—2 Tim. 3:13.

2. Cu kico hopi hende ta entretene nan mes awe? (Wak e prome plachi.)

² Hopi hende ta entretene nan mes cu cosnan violento, inmoral of cu cosnan cu tin di haber cu magia y demonismo. Por ehempel, Internet, television, pelicula, buki y revista ta haci comosifuera no tin nada malo den violencia y inmoralidad. Ademas, comportacion cu un tempo tabata inaceptabel awor ta completamente normal y hasta a bira legal den algun pais. Pero esey no kiermen cu Dios ta acepta e tipo di conducta ey.—Lesa Romanonan 1:28-32.

3. Kico mundo ta pensa di hende cu ta biba na harmonia cu e normanan di Dios?

³ Den e prome siglo, e cristiannan tabata evita di entretene  nan mes cu cosnan violento y inmoral, ya cu nan tabata biba na harmonia cu e normanan di Dios. Esaki a pone hende critica nan y persigui nan. Apostel Pedro a skirbi: “Nan ta keda straño cu boso no ta sigui anda cu nan den nan bagamunderia, y pesey nan ta papia malo di boso.” (1 Ped. 4:4) Awe ta mescos. Como cu nos tambe ta biba na harmonia cu e normanan di Dios, hende en general ta haya cu nos ta straño. Pero esaki no ta straña nos, pasobra Bijbel ta bisa cu “tur hende cu ta desea di biba cu devocion na Dios como discipel di Cristo Hesus tambe lo ser persigui.”—2 Tim. 3:12.

4. Dicon Bijbel ta bisa nos pa no stima mundo?

⁴ Bijbel ta conseha hende cu kier haci e boluntad di Dios pa “no stima mundo ni e cosnan cu tin den mundo.” (Lesa 1 Juan 2:15, 16.) Tur loke tin den mundo ta bou di control di Satanas, “e dios di e mundo aki.” Esey ta inclui organisacionnan religioso, politico, comercial y medionan di comunicacion. (2 Cor. 4:4; 1 Juan 5:19) Como cristian, nos no kier pa mundo contamina nos, pesey nos tin cu wak bon cu ken nos ta anda. Dios su Palabra inspira ta spierta nos: “No laga hende gaña boso. Mal compania ta daña bon custumber.”—1 Cor. 15:33.

5, 6. Nos mester evita di anda cu ken, y dicon?

⁵ Si nos kier keda cu nos bon custumbernan, nos no por tin amistad cu hende cu ta haci malo, y esey ta conta no solamente pa personanan pafo di congregacion pero tambe esnan paden. Nos no mester anda cu miembronan di congregacion cu deliberadamente ta desobedece e leynan di Jehova. Pues si un cristian comete un pica serio y no arepenti, nos ta kibra amistad cu ne.—Rom. 16:17, 18.

⁶ Si nos tin un bon amistad cu hende cu no ta sirbi Jehova, por sosode cu nos ta bay haci mescos cu nan djis pa nan acepta nos. Por ehempel, si nos ta amigo di personanan inmoral, nos por cay den e tentacion pa comete inmoralidad. Esey a pasa cu algun ruman, y mester a expulsa nan pasobra nan no a arepenti. (1 Cor. 5:11-13) Y si nan no bolbe cerca Jehova, nan situacion lo por bira manera apostel Pedro a describi.—Lesa 2 Pedro 2:20-22.

7. Ken nos mester scoge como amigo intimo?

⁷ Aunke nos ta trata di ta amabel cu tur hende, nos no mester bira amigo intimo di hende cu no ta obedece e leynan di Dios. Pesey, lo ta robes pa un cristian soltero cuminsa date of sali cu un persona cu no ta un fiel sirbidor batisa di Jehova y kende no ta respeta Su normanan halto. Ta hopi mas importante pa nos keda fiel na Jehova y haya su aprobacion cu ser acepta pa hende cu no stim’e. Nos amigonan intimo mester ta hende cu ta haci e boluntad di Dios. Hesus a bisa: “Esun cu ta haci e boluntad di Dios ta mi ruman homber, mi ruman muher y mi mama.”—Mar. 3:35.

8. Ki efecto mal compania tabatin riba e nacion di Israel?

⁸ Mal compania ta hiba na desaster, manera e caso di e nacion di Israel di antiguedad ta demostra. Despues cu Jehova a libra nan for di Egipto, el a dirigi nan na e Tera Priminti y a duna nan un spiertamento relaciona cu e hendenan cu tabata biba eynan. El a bisa nan: “No adora nan diosnan, ni sirbi nan, ni haci conforme nan echonan. Bo mester derota  nan completamente y kibra nan pilarnan sagrado na pida pida. Ma sirbi SEÑOR boso Dios.” (Exo. 23:24, 25) Sinembargo, mayoria di Israelita no a haci caso di e instruccionnan di Dios y a bira infiel. (Sal. 106:35-39) Pa e motibo ey, siglonan despues, Hesus a bisa nan: “Dios lo bandona boso tempel!” (Mat. 23:38) Jehova a rechasa e nacion di Israel y a scoge un pueblo nobo: e congregacion cristian.—Echo. 2:1-4.

9. Dicon nos tin cu tene cuidou cu loke nos ta scoge pa lesa, scucha y wak?

⁹ Si nos no tene cuidou cu loke nos ta lesa, scucha y wak, nos por daña nos relacion cu Jehova. Gran parti di loke medionan di comunicacion y e mundo di entretenimento ta produci ta promove e idea- y metanan di Satanas y, ta mas cu claro cu esakinan no ta fortalece nos fe den Dios ni den su promesanan. Pues, nos tin cu tene masha cuidou cu loke nos ta scoge pa lesa, scucha y wak pa nos no entretene nos mes cu cosnan cu ta lanta “deseonan mundano.”—Tito 2:12.

10. Kico lo bay pasa cu e mundo di entretenimento?

¹⁰ Pronto e dia lo yega cu nos lo no tin cu tene cuidou mas cu loke e mundo di entretenimento ta ofrece, ya cu e mundo di Satanas—di cua e ta forma parti—lo ser elimina. Bijbel ta bisa: “Mundo ta pasa bay y tambe su deseonan, ma esun cu ta haci e boluntad di Dios ta keda pa semper.” (1 Juan 2:17) Un escritor di salmo tambe a bisa algo similar: “Hacidonan di maldad lo wordo corta kita afo; ma esnan cu spera riba SEÑOR lo hereda e Tera. Ma e humildenan lo hereda e Tera, y lo deleita nan mes den paz abundante.” Cuanto tempo esey lo dura? E mesun salmo ta contesta: “E hustonan lo hereda e Tera, y lo biba den dje pa semper.”—Sal. 37:9, 11, 29.

11. Con Jehova ta yuda nos keda fiel na dje?

¹¹ E organisacion di Jehova, na contraste cu mundo, ta produci informacion cu ta siña nos tur loke nos mester sa pa nos logra haya bida eterno. Hesus a bisa den un oracion na Jehova: “Pa haya bida eterno, nan tin cu siña conoce bo, e unico Dios berdadero, y esun cu bo a manda, Hesucristo.” (Juan 17:3) Jehova ta uza su organisacion pa duna nos cuminda spiritual na abundancia pa asina nos por siña conoc’e. Nos tin revista, foyeto, buki, video y website cu ta yuda nos sirbi Jehova. Tambe, tur siman e organisacion ta prepara varios reunion pa mas cu 110.000 congregacion rond mundo. Na e reunionnan ey, y tambe na asamblea y congreso, nos ta uza publicacionnan basa riba Bijbel cu ta fortalece nos fe den Jehova y den loke el a priminti.—Heb. 10:24, 25.

12. Kico Bijbel kiermen cu casa “basta ta den Señor”?

¹² Un cristian mester wak bon ken e ta scoge como amigo, y esey ta mas importante ainda ora cu e kier casa. E Palabra di Dios ta spierta nos: “No uni cu hende cu no ta creyente. Pasobra ki relacion husticia tin cu maldad? Of kico luz tin en comun cu scuridad?” (2 Cor. 6:14) Bijbel ta bisa bon cla cu si un testigo di Jehova ta desea di casa, e por haci esey “basta ta den Señor.” Es decir, e por casa solamente cu un otro Testigo dedica y batisa cu ta biba na harmonia cu e normanan di Bijbel. (1 Cor. 7:39) Esun cu sigui e conseho aki ta haya algo masha valioso:  un compañero of compañera cu lo yud’e keda fiel na Dios.

13. Ki mandato relaciona cu casamento Jehova a duna e nacion di Israel?

¹³ Jehova sa kico ta mihor pa su sirbidornan, y semper el a bisa na un manera cla kico e ta pensa di matrimonio. Por ehempel, wak e mandato cu el a duna e nacion di Israel relaciona cu e nacionnan bisiña cu no tabata adora Jehova: “No kasa ku nan tampoko; no kasa boso yu muhénan ku nan yu hòmbernan, ni laga boso yu hòmbernan kasa ku nan yu muhénan, pasobra nan yu muhénan ta kapas di pone boso yu hòmbernan bira lomba pa SEÑOR, di manera ku nan ta bai sirbi otro dios. E ora ei SEÑOR su rabia lo lanta kontra boso i kaba ku boso lihé.”—Deu. 7:3, 4, BPK.

14, 15. Kico a pasa cu Salomon pasobra el a desobedece e mandato di Jehova?

¹⁴ Salomon, yiu homber di David, ta un ehempel tristo di loke por pasa ora un hende no haci caso di Dios su mandato y casa toch cu un persona cu no ta sirbi Jehova. (Ecl. 4:13) Un poco tempo despues cu Salomon a bira Rey di Israel, el a pidi Dios dun’e sabiduria, y Jehova a contesta su oracion. Rey Salomon a bira asina sabi cu su fama a plama tur caminda, y e reina di Seba a dicidi di bishit’e pa wak cu su mes wowo si tabata berdad loke e hendenan tabata bisa. Na ki conclusion e reina a yega? Sorprendi, el a bisa: “Mira, ni mitar nan no a conta mi. Den sabiduria y prosperidad bo ta surpasa e palabranan cu mi a tende.”—1 Rey. 10:7.

¹⁵ Sinembargo, a pesar di tur loke Jehova a haci pa Salomon, el a desobedece su mandato pa no casa cu hende di e nacionnan bisiña, personanan cu no tabata adora Jehova. Salomon a “stima hopi muher stranhero”, y cu tempo e tabatin 700 esposa y 300 concubina. Kico tabata e resultado? Ora el a bira bieu, su esposanan pagano “a haci su curason desvia pa sigui tras di otro diosnan ... y Salomon a haci loke tabata malo den bista di SEÑOR.” (1 Rey. 11:1-6) Pues, e muhernan ey tabata mal compania pa Salomon y esey a afect’e, ya cu e no a keda fiel na Jehova. Esey ta un spiertamento masha cla pa cristiannan cu tin pensa di casa cu un persona cu no stima Jehova.

16. Kico Bijbel ta conseha sirbidornan di Jehova cu ta casa cu hende cu no ta creyente?

¹⁶ Kico si bo tabata casa caba ora bo a siña conoce Jehova? Bijbel ta bisa: “Boso, esposanan, sea sumiso na boso esposo, ya cu si tin algun cu no ta obedece e palabra, boso por gana nan na e fe pa medio di boso conducta sin papia ni un pia di palabra.” (1 Ped. 3:1) Aunke e palabranan ey ta dirigi na esposanan cristian cu ta casa cu un persona cu no ta sirbi Jehova, nan ta conta tambe pa esposo cristian. E conseho di Bijbel ta hopi cla: Sea un bon casa, y haci esfuerso pa pone e normanan di Jehova na practica den bo matrimonio. Y manera a yega di pasa hopi biaha, por sosode cu ora bo casa tuma nota di e cambionan den bo conducta, esey ta yud’e acepta e berdad.

17, 18. (a) Kico a yuda Noe sobrevivi e Diluvio? (b) Kico a yuda e cristiannan di e prome siglo sobrevivi e destruccion di Jerusalem?

¹⁷ Pues, mal compania ta daña bon custumber. En cambio, bon compania por yuda nos keda fiel na Jehova. Pensa riba e ehempel di Noe, kende tabata biba den un mundo malo. Bijbel ta bisa cu den su tempo “maldad di hende tabata grandi  riba Tera, y cu tur intencion di e pensamentonan di [nan] curason tabata continuamente maldad so.” (Gen. 6:5) Pa e motibo aki, Jehova a dicidi di trece e Diluvio pa caba cu e mundo malo ey. Pero Noe tabata diferente. Bijbel ta bisa cu e tabata “un homber husto” cu a “cana cu Dios.”—Gen. 6:7-9.

¹⁸ Noe no a busca compania di hende cu no tabata stima Jehova. E cu e shete miembronan di su famia a tene nan mes ocupa cu e trabou cu Dios a duna nan pa haci, y esey a inclui trahamento di e arca. Tambe Noe tabata “un predicador di husticia.” (2 Ped. 2:5) Noe su predicacion, su trabou riba e arca y e bon asociacion cu su famia a ten’e ocupa haciendo cosnan cu a agrada Dios. Cu ki resultado? Noe cu su esposa y nan tres yiunan cu nan esposanan a sobrevivi e Diluvio. Nos mester ta masha agradecido na nan cu nan a keda fiel y a scoge e bon compania di otro, ya cu ta for di nan nos tur a bin. E cristiannan di e prome siglo tambe ta un bon ehempel pa nos. Nan a sobrevivi e destruccion di Jerusalem na aña 70 pasobra nan a tene nan mes separa for di hende cu no tabata stima Jehova.—Luc. 21:20-22.

19. Kico nos mester haci pa nos por keda fiel na Jehova?

¹⁹ Como sirbidor di Jehova, laga nos imita e bon ehempel di Noe cu su famia y e cristiannan obediente di e prome siglo. Nos mester keda separa for di e mundo malo aki. Laga nos busca e compania di e tantisimo rumannan fiel cu tin rond di nos, kendenan ta haci nan esfuerso pa sigui e guia di Dios. Esey lo yuda nos “para firme den fe” durante e temponan dificil aki cu nos ta bibando aden. (1 Cor. 16:13; Prov. 13:20) Anto djis pensa riba e futuro maraviyoso cu ta spera nos. Si nos tene cuidou cu ken nos ta anda den e ultimo dianan aki, nos lo por sobrevivi e fin di e mundo malbado aki y biba pa semper den Jehova su mundo nobo di husticia.