1, 2. Kico ta haci nos celebro unico?

E CELEBRO ta algo unico. Por ehempel, como hende nos tin e capacidad pa siña un idioma y esey ta permiti nos lesa, skirbi, papia, compronde loke nos ta scucha, haci oracion y canta cantica di alabanza na Jehova. Un linguista a bisa: “E capacidad cu un mucha tin pa siña un idioma ta un caracteristica cu ser humano so tin.”

² E capacidad aki ta un regalo di Dios. (Sal. 139:14; Rev. 4:11) Nos celebro ta unico den un otro sentido. Diferente for di bestia, nos a ser crea “segun e imagen di Dios.” Nos tin boluntad liber y nos por scoge pa uza nos habilidad di siña idioma pa duna gloria na Dios.—Gen. 1:27.

3. Ki regalo precioso Jehova a duna nos cu por haci nos sabi?

³ E Creador di idioma a duna tur esnan cu kier ador’e un regalo precioso: Bijbel. E ta disponibel sea completo of en parte na mas cu 2.800 idioma. Ora bo studia e buki sagrado aki, bo ta yena bo mente cu Dios su pensamento. (Sal. 40:5; 92:5; 139:17) Esey lo yuda bo medita riba cosnan cu “por haci bo sabi pa salbacion.”—Lesa 2 Timoteo 3:14-17.

4. (a) Kico meditacion ta nifica? (b) Ki preguntanan nos lo considera?

 ⁴ Ora un persona ta medita, e ta reflexiona of pensa profundamente riba algo. (Sal. 77:12; Prov. 24:1, 2) Lo por tin algo mihor pa medita riba dje cu Jehova y Hesus? (Juan 17:3) Pero, kisas nos ta puntra nos mes: Ki conexion tin entre lesa y medita? Ki oportunidad nos tin pa medita, y con nos por disfruta di esaki?

5, 6. Kico lo yuda bo compronde y corda mihor loke bo ta lesa?

⁵ Nos celebro por haci cosnan maraviyoso, tin biaha, sin cu nos ta consciente di esaki. Por ehempel, hala rosea, cana, core bais y type sin wak ta cosnan cu nos ta haci automaticamente, sin pensa. Algo asina por pasa cu nos tambe ora nos ta lesa. Pesey ta importante pa nos haci esfuerso pa compronde loke nos ta lesa. Ora bo ta yegando na fin di un paragraf of ora bo ta yegando un subtema nobo, lo ta bon pa bo para un rato y pensa riba loke bo a caba di lesa. Asina bo por haci sigur cu bo a compronde loke bo a lesa. Distraccion y falta di concentracion por pone nos cuminsa pensa riba otro cos, y esey por pone cu nos no ta beneficia di nos lesamento. Con nos por evita pa esaki pasa cu nos?

⁶ Investigacionnan ta mustra cu ora un persona lesa na bos halto mientras cu e ta studia, lo e corda mas mihor loke el a siña. Esun cu a crea nos celebro sa esey. Pesey el a instrui Josue pa “medita” riba e buki di Ley, of segun e nificacion di e palabra aki na Hebreo “les’e den un tono abou.” (Lesa Josue 1:8.) Lo bo ripara cu si bo lesa Bijbel den un tono abou, bo lo compronde mihor loke bo ta lesa. Ademas, esaki lo yuda bo concentra mihor.

7. Ki ora ta e mihor momento pa medita riba e Palabra di Dios? (Wak e prome plachi.)

⁷ Meditacion no ta bay mesun facil cu lesamento, e ta rekeri esfuerso y concentracion. Pesey como cu nos tin un celebro imperfecto, nos tin e tendencia di haci loke ta mas facil y loke ta rekeri menos esfuerso. Pues, e mihor momento pa nos medita ta ora nos no ta mucho cansa. Tambe nos mester busca un luga trankil y sin distraccion. Pa e salmista David, e mihor momento pa medita tabata anochi riba su cama. (Sal. 63:6) Hesus, kende tabatin un mente perfecto, tabata sa cu ora bo medita y haci oracion den un luga trankil, esey ta trece beneficio.—Luc. 6:12.

8. (a) Kico mas nos por medita riba dje? (b) Con Jehova ta sinti ora nos ta tuma tempo pa papia tocante dje?

⁸ Un manera importante cu nos por medita ta ora nos ta reflexiona riba loke nos ta lesa den Bijbel. Pero kico mas nos por medita riba dje? Por ehempel, ora nos ta observa e maraviyanan di creacion, nos por para un rato y medita riba loke nos ta mira. Sin duda esaki lo motiva bo pa alaba Jehova pa su bondad. Y si bo ta cu un otro persona, papia cu ne tocante bo sintimento di aprecio pa Jehova. (Sal. 104:24; Echo. 14:17) Bo ta kere cu Jehova ta aprecia ora nos ta pensa riba dje, haci oracion na dje y papia di dje? Laga nos wak kico Bijbel ta contesta.  Relaciona cu e tempo critico cu nos ta bibando aden, Bijbel ta bisa: “E ora ey esnan cu a teme SEÑOR a papia cu otro, y SEÑOR a presta atencion y a tende esaki, y un buki di memoria a wordo skirbi su dilanti pa esnan cu ta teme SEÑOR y cu ta [medita riba] su nomber.”—Mal. 3:16.

9. (a) Kico Pablo a bisa Timoteo pa medita riba dje? (b) Con nos por aplica Pablo su conseho ora nos ta prepara pa bay sirbishi?

⁹ Apostel Pablo a bisa Timoteo pa medita riba e efecto cu su palabranan, conducta y siñansa tin riba otro hende. (Lesa 1 Timoteo 4:12-16.) Mescos cu Timoteo, nos tambe tin hopi cosnan spiritual cu nos por medita riba dje. Por ehempel, nos mester tuma tempo pa medita ora nos ta prepara pa dirigi un estudio di Bijbel. Cu cada studiante na mente nos mester pensa riba pregunta di punto di bista of ilustracion cu por yuda e studiante haci progreso. Si nos haci esaki, nos lo fortalece nos mes fe y nos lo dirigi estudio di Bijbel cu hopi mas entusiasmo y na un manera mas efectivo. Nos por haci mescos ora nos ta prepara pa sali den sirbishi. (Lesa Esdras 7:10.) E buki di Echonan por yuda nos haya mas entusiasmo pa bay sirbishi. Algo cu tambe por yuda nos cu e trabou di predica ta ora nos medita riba e versiculonan di Bijbel cu nos kier uza y e publicacionnan cu nos kier laga e dia ey. (2 Tim. 1:6) Pensa riba e hendenan den nos teritorio y kico lo interesa nan. E tipo di preparacionnan aki lo yuda nos predica na un manera mas efectivo “cu demostracion di e spirito y di e poder” di e Palabra di Dios.—1 Cor. 2:4.

10. Ki oportunidad mas nos tin pa medita riba cosnan spiritual?

 ¹⁰ Abo ta haci nota durante discurso publico, asamblea y congreso? Si esey ta e caso, tuma tempo pa repasa bo notanan. Esaki ta un bon oportunidad pa medita riba loke bo a siña di Dios su palabra y su organisacion. Ademas, E Toren di Vigilancia y ¡Despertad! cu nos ta haya tur luna y e publicacionnan cu nos ta haya na congreso, constantemente ta duna nos informacion nobo pa nos pensa riba dje. Ora bo lesa e Anuario, lo ta bon pa bo stop un rato y medita riba e experencia cu bo a caba di lesa, asina e informacion lo yega na bo curason. Lo ta bon pa bo marca e puntonan importante of haci nota na banda, pasobra esey lo yuda bo ora bo ta prepara pa haci rebishita, pastoreo of duna un discurso. Mas importante ainda, e manera aki di medita lo duna nos e oportunidad pa beneficia plenamente di e informacion y gradici Jehova pa tur e bon cosnan cu e ta siña nos.

11. Cua ta e publicacion di mas importante cu nos por medita riba dje, y con esey lo yuda nos? (Wak e nota.)

¹¹ Naturalmente, Bijbel ta e publicacion di mas importante cu nos por medita riba dje. Imagina bo cu bo ta den un situacion unda bo no por tin un Bijbel. * Den un caso asina, bo por medita riba bo textonan faborito y canticanan cu bo ta corda for di cabes. (Echo. 16:25) Y spirito santo lo yuda bo corda loke bo a siña.—Juan 14:26.

12. Ki schedule di lesa Bijbel bo por sigui?

¹² Abo tin un schedule pa lesa Bijbel? Kisas bo por purba e siguiente sugerencianan. Bo por dedica algun dia den siman na lesa y medita riba e lesamento di Bijbel pa e Scol di Ministerio Teocratico. Riba otro dianan bo por medita riba loke Hesus a haci y bisa. Sin duda e Evangelionan, cu ta papia di Hesus su bida, ta entre e bukinan mas conoci di Bijbel. (Rom. 10:17; Heb. 12:2; 1 Ped. 2:21) Nos tin hasta un publicacion cu ta papia tocante Hesus su bida riba Tera den un orden cronologico. E publicacion aki por yuda bo lesa y medita riba e Evangelionan.—Juan 14:6.

13, 14. Dicon ta asina importante pa medita riba cosnan spiritual, y kico esey lo motiva nos pa haci?

¹³ Nos lo bira spiritualmente maduro si nos medita riba cosnan spiritual. (Heb. 5:14; 6:1) Si nos no tuma tempo pa pensa riba Jehova y Hesus, pocopoco nos lo por aleha for di Dios of hasta perde nos relacion cu ne. (Heb. 2:1; 3:12) Hesus a bisa cu pa nos por “retene” e Palabra di Dios, nos mester scuch’e of acept’e cu “un curason honesto y bon.” (Luc. 8:15, BS) Si nos no haci esey, facilmente nos lo por “laga inkietud, rikesa y placer di e bida aki distrai [nos]”, y nunca nos lo alcansa madurez.—Luc. 8:14.

¹⁴ Pesey, laga nos sigui medita riba e Palabra di Dios. Esaki lo yuda nos refleha Jehova su gloria, y imita su  cualidadnan y personalidad. (2 Cor. 3:18) Esta un gran privilegio nos tin di por siña conoce Jehova y refleha su gloria pa tur eternidad!—Ecl. 3:11.

15, 16. (a) Con nos por beneficia door di medita riba cosnan spiritual? (b) Dicon tin biaha ta dificil pa medita, pero pakico nos mester persevera den esaki?

¹⁵ Door di sigui medita riba cosnan spiritual nos lo mantene nos entusiasmo pa e berdad. Pues nos lo ta un fuente di animacion pa nos rumannan y esnan interesa cu nos ta topa den sirbishi. Ora nos medita profundamente riba e sacrificio di rescate di Hesus, cual ta e regalo di mas grandi cu Dios a duna nos, esey lo yuda nos aprecia e privilegio di tin un relacion intimo cu Jehova. (Rom. 3:24; Sant. 4:8) Un ruman di Sur Africa cu yama Mark, cu a pasa tres aña den prizon pa motibo di su neutralidad cristian a bisa: “Meditacion ta manera un aventura. Mas nos medita riba cosnan spiritual, mas cos nobo nos lo descubri tocante nos Dios, Jehova. Tin biaha, ora mi ta sinti mi un tiki desanima of preocupa tocante e futuro, mi ta coy mi Bijbel y medita riba un relato. Esey ta pone mi sinti mihor.”

¹⁶ Ta berdad cu tin biaha ta hopi dificil pa medita riba cosnan spiritual door cu tin asina tanto distraccion den e mundo aki. Un otro ruman di Africa cu yama Patrick a bisa: “Mi mente ta manera un mailbox cu ta yen di informacion cu mi tin cu pasa door di dje tur dia. Tin informacion cu ta importante y tin cu no ta importante. Mientras mi ta repasa e informacion cu tin den mi mente, mayoria di biaha mi ta haya cu mi mente ta yena cu ‘preocupacionnan.’ Den un caso asina, mi tin cu haci oracion prome pa mi por haya paz mental pa mi por medita bon. Aunke esey ta rekeri esfuerso, mi ta hala mas cerca di Jehova. Di e manera ey mi por compronde e berdad mas mihor.” (Sal. 94:19) No tin duda cu esnan cu ta “analisa e Scritura tur dia” y medita riba dje lo haya hopi beneficio.—Echo. 17:11.

17. Ki ora abo ta medita?

¹⁷ Tin hende ta lanta trempan pa asina nan por lesa, medita y haci oracion. Otronan ta haci esaki durante nan lunch break. Kisas bo ta haya mihor pa haci esey atardi of prome cu bo bay drumi. Algun hende ta lesa Bijbel tanto mainta como anochi. Pues no ta importa ki ora nos ta lesa Bijbel, nos mester les’e “di dia y anochi”, esta, regularmente. (Jos. 1:8) Pa nos haci esey, nos mester dedica menos tempo na cosnan cu ta menos importante pa asina nos por tin mas tempo pa medita riba e Palabra di Dios tur dia.—Efe. 5:15, 16.

18. Kico Bijbel ta bisa tocante esnan cu ta medita riba e Palabra di Dios diariamente y cu ta aplica loke nan ta siña?

¹⁸ Bijbel ta priminti cu Jehova lo bendiciona esnan cu ta haci esfuerso pa medita y aplica loke nan ta siña. (Lesa Salmo 1:1-3.) Hesus a bisa: “Mas feliz ta esnan cu ta tende e palabra di Dios y ta cumpli cu ne.” (Luc. 11:28) Pero e cos di mas importante ta pa medita tur dia riba cosnan spiritual. Esey lo yuda nos honra Jehova, e Creador di nos maraviyoso celebro, kende lo recompensa nos cu felicidad awor y bida eterno den su mundo nobo.—Sant. 1:25; Rev. 1:3.