1, 2. Kico Dios a haci den tempo biblico, y kico algun hende lo por puntra nan mes ora nan ta malo?

BO A yega di puntra bo mes: Lo mi bira bon bek? Of por ta bo a yega di puntra bo mes si un miembro di famia cu bo ta stima of un amigo lo recupera di su maleza. Esey ta un preocupacion normal ora un hende ta enfrenta problema serio di salud. Tabatin dos Rey den tempo di e profetanan Elias y Eliseo cu a expresa e mesun tipo di preocupacion ey. Rey Ocozias, yiu di Acab cu Jezabel, a cay masha duro mes y a puntra su mes si un dia e lo recupera. Mas despues, Rey Ben-adad di Siria tabata hopi malo y a puntra: “Lo mi recupera di e maleza aki?”—2 Rey. 1:2; 8:7, 8.

² Claro cu nos ta spera cu tur cos ta bay bon cu nos y nos sernan keri. Toch, hopi hende sa puntra nan mes kico Dios lo haci pa yuda nan. Durante e tempo di e Reynan ey, de bes en cuando Dios tabata haci milager cu ta envolvi bida y salud di hende. Pa medio di su profetanan, Jehova a hasta resucita hende. (1 Rey. 17:17-24; 2 Rey. 4:17-20, 32-35) Tin motibo pa kere cu e lo haci algo asina den nos tempo tambe?

3-5. Ki poder Dios y Hesus tin, y ki pregunta esey ta lanta?

 ³ No tin duda cu Dios por tin influencia riba un persona su salud. Bijbel ta confirma esey. Tin biaha, e tabata castiga hende cu maleza, manera farao den tempo di Abraham y despues Miriam ruman di Moises. (Gen. 12:17; Num. 12:9, 10; 2 Sam. 24:15) Dios a spierta e Israelitanan cu si nan no keda fiel, e lo afligi nan cu “tur maleza y tur plaga.” (Deu. 28:58-61) Di otro banda, Jehova por kita of preveni maleza. (Exo. 23:25; Deu. 7:15) Tambe, e por cura hende. Despues cu Job tabata asina malo cu e kier a muri, Dios a cur’e.—Job 2:7; 3:11-13; 42:10, 16.

⁴ Sin duda Dios tin e poder pa interveni y cura un persona cu ta malo. Esey ta e caso cu su Yiu tambe. Bijbel ta bisa cu milagrosamente Hesus a cura hende cu lepra, epilepsia y hende ciego of paralitico. (Lesa Mateo 4:23, 24; Juan 9:1-7) Ta hopi animante pa sa cu e milagernan cu Hesus a haci ta un muestra di loke e lo haci na un escala grandi den e mundo nobo. E tempo ey “ningun habitante lo no bisa: ‘Mi ta malo.’”—Isa. 33:24.

⁵ Acaso nos por spera cu Dios of Hesus lo cura nos milagrosamente den nos tempo si nos bira hopi malo? Kico nos mester tene cuenta cu ne ora di scoge tratamento medico?

6. Kico nos sa tocante e “don di cura hende” cu algun cristian di prome siglo tabatin?

⁶ Bijbel ta mustra cu den prome siglo Dios a duna algun cristian ungi e poder pa haci milager. (Echo. 3:2-7; 9:36-42) Dios a duna nan “diferente tipo di don”, entre nan tabatin e “don di cura hende.” (1 Cor. 12:4-11) Pero e don aki y otronan, manera e don pa papia otro idioma y profetisa, lo a stop di existi. (1 Cor. 13:8) Y esey ta exactamente loke a pasa. Pues, den nos tempo, nos no tin ningun motibo pa spera cu Dios milagrosamente lo cura nos of esnan cu nos ta stima.

7. Con Salmo 41:3 ta anima nos?

⁷ Sinembargo, si nos ta malo, nos por depende riba Dios pa consuelo, sabiduria y apoyo, mescos cu e cristiannan berdadero den pasado. Rey David a skirbi: “Bendiciona ta esun cu ta corda riba e pobernan; SEÑOR lo libr’e den e dia di angustia. SEÑOR lo proteh’e y ten’e na bida.” (Sal. 41:1, 2) Nos sa cu den tempo di Rey David hende cu a mustra consideracion pa esnan pober no a biba pa semper. Pues, David no tabata kiermen cu un persona asina cu a mustra consideracion lo keda na bida milagrosamente y asina haya bida eterno. Loke nos por compronde for di e palabranan inspira ey ta cu Dios lo yuda esnan leal cu ta mustra consideracion. Con? David ta splica: “SEÑOR lo sosten’e riba su cama di maleza; den su enfermedad abo ta restaur’e hacie salud.” (Sal. 41:3) Pues, un persona cu a mustra consideracion na un hende pober por tabata sigur cu Dios tabata consciente di dje y di loke el a haci. Tambe Jehova a traha nos di tal manera cu nos curpa por recupera bek.

8. Segun Salmo 41:4, kico David a puntra Jehova pa haci p’e ora cu e tabata hopi malo?

⁸ David a papia di su propio experencia ora el a bisa: “O SEÑOR, tene misericordia di mi; cura mi alma, pasobra mi a peca contra bo.” (Sal. 41:4) Kisas David a skirbi esey durante e tempo cu Absalon a purba di kita e trono for di dje ora cu e tabata malo y no por a trata cu e situacion. Aunke cu Dios a pordon’e, David  no a lubida e pica cu el a comete cu Betsabe y e consecuencianan cu esey a trece cu ne. (2 Sam. 12:7-14) Asina mes, David tabata sigur cu Dios lo sosten’e riba su cama di maleza. Acaso David a spera cu Jehova lo haci un milager pa cur’e y prolonga su bida?

9. (a) Con e situacion di David tabata otro for di esun di Rey Ezekias? (b) Kico David por a spera di Jehova?

⁹ Añanan despues, Dios a dicidi di cura Rey Ezekias, kende “a bira malo pa muri.” Dios a interveni, pero esey tabata algo fuera de lo comun. Ezekias a recupera y a biba pa 15 aña mas. (2 Rey. 20:1-6) Di otro banda, David no a pidi Dios pa cur’e milagrosamente. Tur cos ta mustra cu David a pidi Jehova pa yud’e mescos cu E ta yuda un persona cu mustra consideracion na esnan pober. Y esey tabata e caso tambe ora cu e tabata riba su “su cama di maleza.” Como cu Dios a pordona David su pica, e por a pidi Dios pa consol’e y apoy’e. Ademas, el a pidi pa Jehova yuda su curpa recupera. (Sal. 103:3) Nos tambe por haci esey.

10. Ki conclusion nos por saca di e experencianan di Trofimo y Epafrodito?

¹⁰ Jehova no a cura David milagrosamente ni alarga su bida. Esey tabata e caso cu Trofimo tambe, kende tabata un colaborador di Pablo. Nos sa cu na cierto ocasion Jehova a duna Pablo poder pa cura hende. (Lesa Echonan 14:8-10.) Pablo a cura e “tata di Publio [kende] tabata drumi malo cu keintura y diarea.” Pablo a “haci oracion, pone man riba dje y cur’e.” (Echo. 28:8) Pero, Pablo no a haci mescos pa Trofimo, kende a compañ’e den un di su biahenan como misionero. (Echo. 20:3-5, 22; 21:29) Ora Trofimo a bira malo y no por a sigui cu Pablo, e apostel no a cur’e; el a lag’e na Mileto pa e recupera. (2 Tim. 4:20) Asina tambe, ora cu Epafrodito a bira “malo casi pa muri”, no tin indicacion cu Pablo a uza poder milagroso pa cura su bon amigo.—Flp. 2:25-27, 30.

11, 12. (a) Dicon Lucas por a yuda Pablo? (b) Kico ta indica cu Lucas a studia pa bira dokter?

¹¹ “Lucas, e dokter stima”, cu a skirbi e buki di Echonan, tambe a biaha cu Pablo. (Col. 4:14; Echo. 16:10-12; 20:5, 6) Nos por imagina cu Lucas a yuda Pablo y otronan ora nan a bira malo durante nan biahe como misionero. (Gal. 4:13) Lucas por a duna yudansa medico cu ta na harmonia cu loke Hesus a bisa: “Hende cu ta bon di salud no tin mester di dokter, ma hende malo si.”—Luc. 5:31.

¹² Bijbel no ta bisa unda Lucas a studia pa bira dokter. Loke si e ta bisa ta cu Pablo a manda cumindamento di parti di Lucas pa e cristiannan na Colosas. Pues, ta posibel cu Lucas a haya entrenamento na un scol di medicina na Laodicea, un stad cu ta keda cerca di Colosas. En todo caso, Lucas no tabata djis un hende cu ta gusta duna conseho tocante asuntonan medico, e tabata un dokter. Esaki tabata bisto den e terminonan medico cu el a uza den su Evangelio y e buki di Echonan. Nos por mira esey tambe den e detayenan cu el a revela di e relatonan unda Hesus a cura hende.

13. Kico nos mester corda prome cu nos duna of acepta conseho tocante salud?

¹³ Nos no ta biba den tempo cu nos rumannan por uza “don di cura hende” pa yuda nos. Pero algun ruman cu bon intencion ta duna conseho tocante asuntonan di salud. Tin di nan  simplemente ta ofrece sugerencianan practico. Pablo a haci esey ora Timoteo tabatin problema di stoma, kisas pasobra e awa tabata contamina. * (Lesa 1 Timoteo 5:23.) Sinembargo, esey ta hopi diferente for di esnan cu ta pone presion riba rumannan pa tuma cierto medicina natural, remedi of sigui un dieet cu kisas no ta traha mes of pio ainda por haci nan daño. Tin ora, nan ta purba di bisa bo algo manera: “Un miembro di mi famia tabatin e mesun maleza cu bo, pero el a bira bon despues cu el a tuma ...” Nos mester corda cu hasta si hopi hende a uza un cierto remedi of tratamento toch e por tin cierto riesgonan.—Lesa Proverbionan 27:12.

14, 15. (a) Di ki situacion algun hende ta probecha di dje? (b) Con Proverbionan 14:15 por yuda nos ora nos ta haya conseho encuanto salud?

¹⁴ Como cristian nos tin e deseo normal pa ta saludabel pa asina nos por disfruta di bida y participa plenamente den sirbishi na Jehova. Pero nos a hereda imperfeccion y pesey nos por bira malo. Ora nos haya problema di salud, por tin varios tipo di tratamento. Cada persona tin e derecho pa scoge ki tratamento e lo acepta. Lamentablemente, den e mundo cruel aki tin hende golos cu ta mira maleza di otronan como un oportunidad pa gana placa. Kisas nan ta bisa cu hopi hende a uza e tratamento ey y nan a bira bon. Otronan ta purba di bende bo remedinan caro pa asina nan gana hopi placa. Y si nos ta malo, nos por ta dispuesto pa purba cualkier cos cu por yuda nos bira bon y biba mas largo. Pero nos no mester lubida e conseho cu nos ta haya den e Palabra di Dios: “Hende sin eksperensia ta kere tur kos ku bis’é, hende sabí mes ta pensa.”—Prov. 14:15, BPK.

¹⁵ E hende sabi lo ta cauteloso pa kere loke un persona bis’e of recomend’e, specialmente si e persona no tin un entrenamento adecuado. Un persona asina ta rasona: Nan ta bisa cu e vitamina, remedi di tera of dieet ta yuda hende, pero, mi ta sigur cu di berdad el a yuda nan? Hasta si el a yuda otro hende, con mi por sa si e lo yuda mi? Mi mester haci mas investigacion of hasta puntra un persona cu ta cualifica pa yuda mi cu mi problema di salud?—Deu. 17:6.

16. Ki preguntanan por yuda nos uza “sano huicio” ora un persona recomenda nos un cierto tratamento of remedi?

¹⁶ E Palabra di Dios ta anima nos pa “biba cu sano huicio ... den e tempo aki.” (Tito 2:12) “Sano huicio” lo yuda nos pa ta cauteloso ora ta trata di metodonan pa diagnostica maleza of terapia cu ta parce straño of misterioso. Lo ta bon pa puntra nos mes: E persona cu nos ta consulta por splica na un manera satisfactorio con e test of tratamento ta traha? Dokternan ta reconoc’e como algo cu por cura hende? (Prov. 22:29) Kisas un hende ta bisa nos cu nan a descubri un cura nobo na un luga leu y exotico cu e mundo di medicina mes no sa di dje ainda. Pero tin echonan cu ta duna prueba cu e ta cura hende? Tin hende ta hasta ofrece tratamento cu ta uza un ingrediente secreto of forsa desconoci. Esey por ta hopi peligroso. Corda cu Dios a spierta nos contra “e uzo di poder magico” y medio spiritista.—Isa. 1:13, NW; Deu. 18:10-12.

17. Ki deseo rasonabel nos tur tin?

¹⁷ E cuerpo gobernante di prome siglo a manda un carta importante pa e congregacionnan. Despues di a menciona loke e rumannan mester a evita, e carta a conclui cu e palabranan aki: “Si boso evita e cosnan aki cuidadosamente, lo bay bon cu boso. Tur cos bon!” (Echo. 15:29) Den algun idioma nan a traduci e palabranan di e versiculo aki como “bon salud pa boso”, y por nifica tambe “sea fuerte.” Siguramente nos tur kier ta saludabel y fuerte pa nos por sirbi Jehova plenamente.

18, 19. Riba kico nos por spera ansiosamente den e mundo nobo?

¹⁸ Tanten cu e sistema aki sigui existi, nos lo tin cu sigui lucha cu maleza pasobra nos ta imperfecto. Nos no por spera cu Dios lo cura nos milagrosamente den nos tempo. Sinembargo, Revelacion 22:1 y 2 ta mustra cu lo bay tin un tempo unda cu tur hende lo cura completamente. Den un vision apostel Juan a mira “un riu di awa di bida” y “palo di bida” cu tin blachinan “pa cura e nacionnan.” Esaki no ta referi na ningun remedinan natural den nos tempo of den futuro. Mas bien, e texto aki ta mustra cu mediante Hesus, Jehova lo duna bida eterno na hende obediente. Esey ta algo cu nos tur ta spera ansiosamente.—Isa. 35:5, 6.

¹⁹ Mientras nos ta warda riba e glorioso futuro ey, nos sa cu Jehova ta interesa den nos, hasta ora nos ta malo. Nos por ta sigur, mescos cu David, cu nos Dios lo sostene nos ora cu nos ta malo. Y mescos cu David nos por bisa: “Ma pa loke t’ami, bo ta sostene mi den mi integridad, y bo ta pone mi den bo presencia pa semper.”—Sal. 41:12.