Cristiannan Berdadero Ta Respeta e Palabra di Dios
“Bo palabra ta e berdad.”—JUAN 17:17.
1. Den bo prome combersacion cu Testigonan di Jehova, kico a laga bo mira cu nan ta distinto for di otro religion?
BO TA corda e prome biaha cu bo tabatin un bon combersacion cu un Testigo di Jehova? Kico bo ta corda di e combersacion ey? Hopi hende lo bisa: ‘Un cos cu a impresiona mi ta e manera cu e Testigo a uza Bijbel pa contesta tur mi preguntanan.’ Sin duda, nos a keda masha contento ora nos a haya sa kico ta Dios su proposito pa planeta Tera, kico ta pasa cu nos ora nos muri y ki speransa tin pa nos sernan keri cu a fayece.
2. Menciona algun motibo pakico Bijbel ta un buki masha valioso pa bo.
2 Pero segun cu nos a sigui studia Bijbel, nos a bin realisa cu Bijbel ta bay mas leu cu djis contesta nos preguntanan tocante bida, morto y futuro. Nos a mira cu Bijbel ta di gran balor, e mihor buki na mundo. Su consehonan semper ta practico, y esnan cu haci caso di nan lo ta feliz y lo tin exito den bida. (Lesa Salmo 1:1-3.) Cristiannan berdadero semper a acepta Bijbel “no como palabra di hende sino, manera loke e ta di berdad, como e palabra di Dios.” (1 Tes. 2:13) Un analisis breve di historia ta yuda nos mira e contraste entre hende cu di curason ta respeta e Palabra di Dios y esnan cu no ta haci esey.
UN PROBLEMA DIFICIL TA HAYA SOLUCION
3. Ki problema a pone e union di e congregacion cristian den prome siglo na peliger, y dicon e problema aki tabata dificil pa soluciona?
3 Pa 13 aña largo, despues cu Cornelio—e prome persona cu no tabata Hudiu ni circuncida—a bira un cristian ungi, tabatin un problema cu a pone e union di e congregacion cristian na peliger. Kico tabata e problema? Wel, mas y mas hende di e nacionnan a bira cristian y a lanta e pregunta: Mester a circuncida e hende hombernan segun tradicion Hudiu pa nan por a batisa? Esey no tabata un pregunta facil pa un Hudiu contesta. Dicon? Pasobra Hudiunan cu a obedece e Lei di Moises no tabata ni drenta cas di hende cu no tabata Hudiu, corda pa nan trata nan manera ruman. Ya caba e Hudiunan cu a bira cristian tabata ser persigui severamente pasobra nan a bandona nan creencianan di antes. Awor, si nan a cuminsa acepta personanan cu no tabata circuncida como nan ruman, nan lo a haya nan cu mas persecucion, y esey lo a causa mas desunion entre e Hudiunan y e cristiannan.—Gal. 2:11-14.
4. (a) Ken a reuni hunto pa soluciona e problema? (b) Ki preguntanan e reunion ey lo por a lanta den mente di un persona?
4 Na aña 49 di prome siglo, e apostel- y ancianonan na Jerusalem, kendenan tabata Hudiu circuncida, “a reuni pa considera e asunto.” (Echo. 15:6) Nan reunion no tabata un consideracion laf di detayenan religioso sin importancia; e tabata mas bien un deliberacion emocionante tocante siñansanan biblico. Tanto esnan cu tabata na fabor di circuncision como esnan cu tabata contra a duna nan opinion. Awor, con nan a soluciona e problema? Acaso nan a laga ideanan personal of prehuicio influencia nan decision? Of e ancianonan responsabel ey a warda te ora cu e situacion di e cristiannan na Israel a drecha pa tuma un decision? Of nan a tuma un decision djis pa yega na un consenso aunke nan tabata sa cu e decision no tabata corecto?
5. Den ki manera e reunion cu a tuma luga na Jerusalem na aña 49 di prome siglo ta distinto for di e concilionan di iglesia cu a tuma luga siglonan despues?
5 Awendia, ta masha normal pa lidernan religioso bini hunto na nan concilio- of reunionnan di iglesia y acepta ideanan cu nan no ta di acuerdo cu ne djis pa yega na un consenso. Tin biaha, algun lider ta asta purba persuadi otro miembro pa apoya nan ideanan. Pero, niun di e cosnan ey no a tuma luga durante e reunion na Jerusalem. Y loke ta mas importante, e apostelnan y e ancianonan a yega na un acuerdo unanime. Con esey tabata posibel? Wel, maske nan cada un por tabata masha convenci di nan opinion, nan tur a respeta e Palabra di Dios y a uza esaki como base pa soluciona e problema.—Lesa Salmo 119:97-101.
6, 7. Con e apostel- y ancianonan a uza e Scritura pa resolve e problema tocante circuncision?
6 E textonan di Bijbel cu a yuda e apostel- y ancianonan soluciona e problema tabata Amos 9:11 y 12. Nos por compronde esey for di Echonan 15:16 y 17 cu a cita e palabranan di Amos. Echonan ta bisa: “Lo mi bini bek y reconstrui e cas di David cu a basha abou; lo mi reconstrui su ruinanan y restaur’e, pa e hendenan cu resta, hunto cu hende di tur nacion, esta, hende cu ta carga mi nomber, por haci esfuerso pa busca Jehova.”
7 Algun hende por protesta y bisa: ‘Pero warda: E textonan ey no ta bisa cu un persona cu no tabata Hudiu por a bira cristian sin circuncida prome.’ Y nan tin rason. No obstante, e Hudiunan cu a bira cristian si lo a compronde e punto. Dicon nos ta bisa esey? Wel, pa cuminsa, nan a considera e personanan cu no ta Hudiu circuncida como ruman y no como ‘hende di e nacionnan.’ (Exo. 12:48, 49) Por ehempel, Bagster su version di e Septuaginta ta bisa na Ester 8:17: “Hopi hende di e nacionnan a circuncida y bira Hudiu.” Pues, ‘e hendenan cu a resta’ di e cas di Israel tabata Hudiu y hende cu a circuncida, comberti y bira Hudiu. Y segun e profecia, nan lo a carga Dios su nomber hunto cu “hende di tur nacion”, esta, personanan cu no ta Hudiu y cu no ta circuncida. Pues, e mensahe di e Scritura tabata cla y comprendibel: Hende cu kier a bira cristian no tabatin nodo di circuncida.
8. Dicon e cristiannan Hudiu mester tabatin curashi pa tuma e decision corecto?
8 Ta e Palabra di Dios y spirito santo a yuda e cristiannan sincero ey yega na un “decision unanime.” (Echo. 15:25) Y maske e decision ey kisas lo a pone cu e cristiannan Hudiu a haya nan cu mas persecucion, toch esnan fiel a coopera plenamente cu e decision basa riba Bijbel.—Echo. 16:4, 5.
UN DIFERENCIA REMARCABEL
9. (a) Ki factor determinante a hiba na contaminacion di adoracion berdadero? (b) Cua creencia cristian importante nan a contamina?
9 Apostel Pablo a profetisa cu despues di morto di e apostelnan siñansa falso lo a contamina adoracion berdadero. (Lesa 2 Tesalonicensenan 2:3 y 7.) Asta algun ruman cu responsabilidad den congregacion lo a rechasa “siñansa sano.” (2 Tim. 4:3) Pesey Pablo a adverti e ancianonan di su tempo: “For di meymey di boso mes lo lanta hombernan cu lo troce e berdad pa pone e discipelnan bay nan tras.” (Echo. 20:30) Segun The New Encyclopædia Britannica, un factor determinante cu a hiba na siñansa falso tabata e echo cu algun cristian a sigui curso di filosofia Griego y a cuminsa splica nan creencianan cristian a base di e filosofia ey. Nan a sinti un placer den esey y a pensa cu di e manera ey nan lo por a yuda paganonan educa acepta cristianismo. Un creencia cristian importante cu nan a bisti un bachi pagano tabata e doctrina tocante e identidad di Hesucristo. Bijbel ta bisa cu Hesus ta Yiu di Dios, mientras cu hende cu ta stima filosofia Griego a insisti cu e ta Dios.
10. Con lidernan religioso lo por a resolve e cuestion encuanto e identidad di Cristo?
10 Diferente concilio di iglesia a debati riba e cuestion aki. E representantenan di iglesia por a resolve e asunto ey facilmente si nan a duna balor na loke e Scritura ta bisa, pero mayoria di nan no a haci esey. De echo, prome cu e concilionan a cuminsa, mayoria di nan ya caba tabatin nan mes punto di bista encuanto e identidad di Cristo, y nada no por a cambia nan opinion. Ningun di e decretonan cu nan a establece y e decisionnan cu nan a tuma na e reunionnan aki no tabata basa riba e Scritura.
11. Ki balor lidernan di iglesia a duna e asina yama Tatanan di Iglesia, y dicon?
11 Dicon esnan cu tabata kere cu Hesus ta Dios no a analisa e Scritura mas a fondo? E historiado Charles Freeman a splica cu “tabata dificil pa [e hendenan ey] ignora e echo cu varios biaha Hesus a indica cu e Tata ta mas cu ne.” Pues, en bes di analisa e Scritura y haci caso di loke e Evangelionan ta bisa, nan a prefera di sigui tradicion di iglesia y opinion di hende. Y te na dia djawe, hopi clero ta prefera di bay tras di loke e asina yama Tatanan di Iglesia a bisa y no e Palabra di Dios. Si bo a yega di papia tocante e doctrina di Trinidad cu un teologo, lo bo a ripara esey.
12. Ki influencia e emperador tabatin?
12 Algo masha notabel di e debatenan durante e concilionan ey tabata e influencia di emperadornan Romano. Por ehempel, relaciona cu e Concilio di Nicea, profesor Richard E. Rubenstein a skirbi: ‘Constantino a faborece e obisponan y a haci nan masha rico. Den menos cu un aña, e emperador nobo aki a reconstrui practicamente tur misa y a debolbe esakinan na e obisponan hunto cu tur otro cos cu a ser kita for di nan, manera por ehempel nan trabou y titulonan. Ademas, e tabata duna e obisponan privilegionan cu anteriormente sacerdotenan pagano tabata ricibi.’ Pesey mes “Constantino por tabatin hopi di bisa na e Concilio di Nicea, y kisas asta determina ki decision mester a tuma na e reunion ey.” Charles Freeman a bisa cu ‘despues di e concilio ey, e emperador a sigui interveni den asuntonan di Iglesia. Di un banda, el a duna Iglesia mas autoridad, y di otro banda, e tabata interferi den nan doctrinanan.’—Lesa Santiago 4:4.
13. Segun bo, dicon e lidernan di iglesia no a acepta berdadnan Biblico cu ta asina cla?
13 E lidernan di iglesia no kier a acepta cu Hesucristo ta e Yiu di Dios; pero hopi hende comun si no tabatin problema cu esey. Nan no tabata interesa den placa di emperador ni carera den Iglesia. Nan a mira cos na un manera mas obhetivo y a compronde loke e Scritura ta bisa. Wak kico Gregorio di Nisa, un lider religioso di e tempo ey, a remarca encuanto hende comun. Haciendo mofa di nan, el a bisa: “Tanto bendedo di paña, cambiado di placa como doño di tienda a bira teologo. Si bo puntra nan cuanto bo placa ta bal, nan ta splica bo dicon e Tata y e Yiu no ta igual. Si bo puntra nan cuanto un pan ta costa, nan ta contesta cu e Tata ta mas cu e Yiu. Si bo puntra si awa di baño ta cla, nan ta bisa bo cu e Yiu a ser crea.” Si, distinto for di e lidernan di iglesia, e pueblo tabata uza Bijbel pa splica loke nan tabata kere. Pesey, lo tabata bon si Gregorio di Nisa y su compinchinan a scucha di e pueblo.
“TRIGO” Y “MAL YERBA” TA CRECE HUNTO
14. Con nos por sa cu for di e prome siglo padilanti semper lo tabatin algun cristian ungi riba tera?
14 Den un di Hesus su ilustracionnan, el a indica cu for di prome siglo padilanti semper lo tabatin cristian ungi riba tera. El a compara e cristiannan aki cu “trigo” cu ta crece hunto cu “mal yerba.” (Mat. 13:30) Ta claro cu nos no por bisa cu tur siguransa ta ken ta e hendenan cu tabata ungi. Loke si nos por confirma ta cu semper tabatin hende cu a defende e Palabra di Dios cu curashi y cu a refuta e siñansanan falso di iglesia. Laga nos wak algun ehempel.
15, 16. Menciona algun hende cu a defende e Palabra di Dios.
15 Arsobispo Agobard di Lyons, Francia (779-840 E.C.), tabata contra di adoracion di imagen, sacrificio di misa pa santo y otro practica- y ceremonianan religioso cu Bijbel ta desaproba. Un di su contemporaneonan, Obispo Claudio, tambe a rechasa tradicion di iglesia y tabata contra di resamento na santo y veneracion di relikia. Den siglo 11, nan a expulsa e Diacono principal Berengarius di Tours, Francia, pasobra el a rechasa e siñansa catolico cu ta bisa cu e pan y e biña cu Hesus a duna su discipelnan durante e ultimo cena ta cambia bira curpa y sanger di Cristo. Ademas, e tabata siña hende cu Bijbel su autoridad ta superior; pues cu nan mester a sigui Bijbel y no tradicion di iglesia.
16 Pedro di Bruys y Enrique di Lausana, kendenan a biba durante siglo 12, tambe tabata stima e berdad di Bijbel. Pedro di Bruys, por ehempel, a stop di sirbi como Pastoor pasobra el a ripara cu e siñansanan catolico, manera bautismo di mucha, oracion pa defunto, adoracion di cruz y cu e pan y biña ta cambia y bira curpa y sanger di Cristo, no tabata cuadra cu loke e Scritura ta bisa. Na aña 1140, Pedro di Bruys su creencianan a cost’e su bida. Enrique, kende tabata un Monnik, tabata abiertamente contra e practicanan corupto y adoracion falso di iglesia. Nan a arest’e na 1148 y a encarcel’e pa resto di su bida.
17. Ki pasonan importante Waldo y su siguidonan a dal?
17 Alrededor di e tempo cu nan a kima Pedro di Bruys na bida pasobra el a tribi di critica Iglesia, a nace un otro persona cu despues tabatin masha influencia riba plamamento di berdadnan biblico. Su fam tabata Valdes, of Waldo. Distinto for di Pedro di Bruys y Enrique di Lausana, e tabata un laico. Pero el a balora e Palabra di Dios masha; el a asta deshaci di su pocesionnan material y a laga traduci partinan di Bijbel den e idioma cu mayoria di hende na parti zuidoost di Francia tabata papia. Algun hende a keda asina contento cu nan a haya e mensahe biblico den nan mes idioma cu nan tambe a reparti nan cosnan material y a dedica nan bida na comparti berdadnan biblico cu otro hende. E lidernan di iglesia no a gusta esaki niun tiki. Na 1184, e papa di e tempo ey a expulsa e homber- y muhernan celoso aki, cu despues nan a yama e Valdensenan, y a core cu nan for di nan casnan. Pero esaki en realidad a yuda plama e mensahe di Bijbel den otro areanan. Pesey cu tempo, na hopi parti di Europa tabatin siguido di Waldo, di Pedro di Bruys, di Enrique di Lausana y di otronan cu tambe a bandona Iglesia Catolico. Siglonan despues, a lanta otro personanan cu tambe a defende berdadnan biblico. Nan tabata: John Wycliffe (ca. 1330-1384), William Tyndale (ca. 1494-1536), Henry Grew (1781-1862) y George Storrs (1796-1879).
‘E PALABRA DI DIOS NO TA NA CADENA’
18. Splica ki metodo studiantenan di Bijbel di siglo 19 a uza pa studia e Scritura y dicon e tabata un bon metodo.
18 Maske cuanto enemigonan di Bijbel a trata di stroba berdadnan biblico di plama, nan no a logra. Na 2 Timoteo 2:9, nos ta lesa: “E palabra di Dios si no ta na cadena.” Por ehempel, na 1870 un grupo di studiante di Bijbel sincero a cuminsa busca e berdad. Ki metodo nan a uza? Wel, un hende tabata haci un pregunta tocante un cierto topico. Nan tabata analisa e pregunta hunto, caba nan tabata busca y lesa tur texto biblico cu tabatin di haber cu e topico ey. Ora nan a saca afo ki relacion e textonan ey tabatin cu otro y tabata di acuerdo cu esaki, nan tabata dicidi kico ta e contesta y tabata haci un anotacion di esaki. Pues, e hombernan fiel aki, esta, nos antecesornan spiritual di siglo 19, a basa nan creencianan completamente riba e Palabra di Dios, mescos cu e apostel- y ancianonan di prome siglo a haci. Esey no ta un animacion pa nos awe?
19. Kico ta e texto di aña pa 2012, y dicon e ta na su luga?
19 Awe tambe nos ta basa nos creencianan riba Bijbel. Y cu esey na mente, e Cuerpo Gobernante di Testigonan di Jehova a scoge como texto di aña pa 2012 e declaracion convencente aki di Hesus: “Bo palabra ta e berdad.” (Juan 17:17) Ken cu kier haya e aprobacion di Dios mester biba na harmonia cu e berdad. Pesey, laga nos tur sigui haci esfuerso pa laga e Palabra di Dios guia nos.
[Preguntanan di Estudio]
[Comentario na pagina 12]
Texto di aña pa 2012: “Bo palabra ta e berdad.”—Juan 17:17.
[Plachi na pagina 11]
Waldo
[Plachi na pagina 11]
Wycliffe
[Plachi na pagina 11]
Tyndale
[Plachi na pagina 11]
Grew
[Plachi na pagina 11]
Storrs
