“[Boso] tin comprondemento di e rasgonan basico di e conocemento y di e berdad haya den Lei.”​—ROM. 2:20.

1. Dicon ta importante pa nos compronde e balor di e Lei di Moises?

SI NO tabata pa e cartanan inspira di apostel Pablo, lo tabata dificil pa nos compronde e importancia di hopi aspecto di e Lei di Moises. Por ehempel, den e carta cu Pablo a skirbi na e Hebreonan, el a splica cu Hesus como ‘sumo sacerdote fiel’ a ofrece un bes y pa semper “un sacrificio di reconciliacion” y asina a haci posibel pa tur cu pone fe den e sacrificio ey por haya “liberacion eterno.” (Heb. 2:17; 9:11, 12) Pablo a splica tambe cu e tabernakel tabata djis “un sombra di cosnan selestial” y cu Hesus a bira e Mediador di ‘un pacto mihor’ cu e pacto di Lei. (Heb. 7:22; 8:1-5) Pablo su splicacion encuanto e aspectonan di Lei tabata di gran balor pa e cristiannan di su tempo. Y esey ta conta pa nos awe tambe, ya cu e splicacion aki ta yuda nos compronde y mustra mas aprecio pa e provisionnan cu Dios a haci disponibel pa nos.

2. Ki bentaha e Hudiunan cu a bira cristian tabatin riba e otro cristiannan?

² Ora Pablo a skirbi e cristiannan na Roma, el a dirigi algun palabra na e rumannan cu tabata di descendencia Hudiu y cu a ser educa den e Lei di Moises. Pablo a reconoce cu e rumannan ey tabatin un bentaha riba e otronan. Si, debi cu nan tabata conoce e Lei divino, nan tabata compronde “e rasgonan basico di e conocemento y di e berdad” encuanto Jehova y su principionan husto. Pues, como cu nan a compronde e Lei y tabatin un respet profundo p’e, nan por a guia, siña y yuda esnan cu no tabata conoce e Lei, mescos cu e Hudiunan fiel a yega di haci den pasado.​—Lesa Romanonan 2:17-20.

 UN SOMBRA DI E SACRIFICIO DI HESUS

3. Con un analisis di e sacrificionan cu Hudiunan a haci den pasado por beneficia nos awe?

³ E berdad basico di e Lei di Moises cu apostel Pablo a referi na dje ta yuda nos tambe compronde Jehova su proposito mihor. Dicon? Pasobra e principionan tras di e Lei di Moises nunca a perde nan balor. Pues, cu esey na mente, laga nos analisa djis un aspecto di e Lei, esta, e diferente sacrificio- y ofrendanan cu e Lei a stipula. Nos lo mira con esakinan a guia Hudiunan humilde na Cristo y yuda nan compronde kico Dios a spera di nan. Anto como cu Jehova su rekisitonan basico no ta cambia, nos lo mira tambe con e leinan encuanto sacrificio y ofrenda cu el a duna e Israelitanan por yuda nos evalua e calidad di nos sirbishi sagrado.​—Mal. 3:6.

4, 5. (a) Kico e Lei di Moises a recorda e pueblo di Dios? (b) E sacrificionan menciona den e Lei di Dios tabata un sombra di kico?

⁴ Hopi aspecto di e Lei di Moises a recorda e Hudiunan cu nan tabata pecador. Por ehempel, ken cu a mishi cu un cadaver humano mester a purifica su mes. Con? Wel, e mester a ofrece un bishe embra cora sin defecto como ofrenda. E sacerdote encarga mester a mata y kima e bestia y uza e shinishi pa traha e “awa di purificacion.” Mester a sprengo esaki riba e persona impuro riba e di tres y e di shete dia despues cu el a ser contamina. (Num. 19:1-13) Ata aki un otro ehempel: Como recordatorio cu tur hende ta nace imperfecto y cu pica, un hende muher cu a caba di duna luz mester a tene su mes na un periodo di impureza y despues duna un ofrenda pa e por tabata puro atrobe.​—Lev. 12:1-8.

⁵ Den hopi otro situacion, e Hudiunan mester a ofrece sacrificio di bestia pa haya pordon di pica. Sea cu nan tabata sa of no, e sacrificionan aki—y tambe esnan cu nan a ofrece despues den e tempel di Jehova—tabata djis “un sombra” di Hesus su sacrificio perfecto.​—Heb. 10:1-10.

E ACTITUD CORECTO PA HACI SACRIFICIO

6, 7. (a) Kico e Israelitanan mester a corda ora di ofrece sacrificio, y kico un sacrificio aceptabel pa Jehova a prefigura? (b) Ki preguntanan nos tin cu haci nos mes?

⁶ Jehova a rekeri pa e Israelitanan ofrece solamente animal “perfecto”, es decir, sin defecto. Nan no tabatin mag di ofrece bestia ciego, herida, mancaron ni malo. (Lev. 22:20-22) Ademas, e frutanan of grano cu nan tabatin cu ofrece na Jehova mester tabata “e prome frutanan” di nan cosecha, esnan “di mas mihor.” (Num. 18:12, 29) Ofrendanan mediocre no tabata aceptabel pa Jehova. E echo cu tabata importante pa e Israelitanan ofrece nan mihor animalnan como sacrificio a indica cu Hesus su sacrificio lo tabata sin mancha y sin defecto. Si, Jehova lo a duna lo mihor, e cos di mas valioso p’e, como sacrificio pa libra humanidad di pica y morto.​—1 Ped. 1:18, 19.

⁷ Awor si un persona den e tempo ey tabata realmente gradicido pa tur loke Jehova a haci p’e, lo el a keda contento di por duna Jehova lo mihor, no ta berdad? Claro cu ta e mes mester a dicidi si e ta duna lo mihor of no. Sinembargo, e tabata sa si cu Dios lo no a keda contento cu  un sacrificio mediocre. Pasobra esey lo a indica cu el a haci e sacrificio djis pa formalidad of cu esey lo tabata asta un carga p’e. (Lesa Malakias 1:6-8 y 13.) E analisis aki mester impulsa nos pa pensa seriamente riba nos sirbishi na Dios. Nos por puntra nos mes: ‘Cu ki actitud mi ta sirbi Jehova? Mi tin cu haci cambio den e manera cu mi ta sirbie? Mi ta duna Jehova lo mihor?’

8, 9. Kico nos por siña for di e actitud cu e Israelitanan mester a desplega ora di ofrece sacrificio?

⁸ Si un Israelita kier a ofrece un sacrificio boluntario como muestra di su gratitud na Jehova of un ofrenda kima pa haya aprobacion di Jehova, lo e no tabatin problema pa scoge su mihor bestia. Al contrario, lo el a keda contento di por duna Jehova lo mihor. Awe, cristiannan tambe ta ofrece sacrificio na Jehova. Ta claro cu nos no tin nodo di ofrece e sacrificionan cu e Lei di Moises a stipula. Mas bien, nos ta haci sacrificio den e sentido cu nos ta uza nos tempo, energia y recursonan pa sirbi Jehova. Apostel Pablo a mustra bon cla cu loke nos ta haci—esta, ‘declara publicamente’ e speransa cristian y ‘haci bon y comparti loke nos tin cu otro hende’—ta sacrificio cu ta agrada Dios. (Heb. 13:15, 16) Y e actitud cu cua Jehova su pueblo ta haci e cosnan ey ta revela nan gratitud y aprecio pa tur loke Dios a duna nan. Pues, tin un paralelo entre e sacrificionan cu cristiannan djawe ta haci y e sacrificionan boluntario cu e Israelitanan di antiguedad tabata ofrece. Pesey ta bon pa nos samina nos mes y wak ta cu ki motivacion y cu ki actitud nos ta sirbi Jehova awe.

⁹ Awor kico di un Israelita cu segun e Lei mester a haci un ofrenda di pica of di culpa pasobra el a comete un pica? Siendo cu e sacrificio ey tabata obligatorio, bo ta kere cu lo tabata dificil pa el a ofrec’e di buena gana? (Lev. 4:27, 28) Wel, si e persona realmente kier a mantene un bon relacion cu Jehova, lo el a ofrece su sacrificio cu smaak.

10. Ki ‘sacrificio’ un cristian mester ‘ofrece’ pa drecha asunto si el a haci algo malo?

¹⁰ Nos tambe ta comete pica awe. Kisas, sin cu bo sa of sin cu tabata bo intencion, bo a ofende un ruman. Of kisas bo consenshi ta bisa bo cu bo a haci algo cu no ta bon. Kico lo bo haci den un caso asina? Wel, un persona cu realmente ta tuma su sirbishi na Jehova na serio lo haci tur loke ta posibel pa corigi su fayo, no ta berdad? Lo e pidi e persona cu el a ofende despensa of si ta trata di un pica serio, lo e busca yudansa cerca e ancianonan. (Mat. 5:23, 24; Sant. 5:14, 15) Pues, pa rectifica un pica cu nos a comete contra nos prohimo of contra Dios, ta costa nos algo; nos tin cu dal cierto pasonan. Ta comosifuera nos ta ofrece un sacrificio pa drecha nos relacion cu Jehova y cu nos ruman. Como  resultado di esey, nos lo tin un bon consenshi, y esaki ta duna nos e siguransa cu Jehova su manera di haci cosnan ta mihor.

11, 12. (a) Kico un ofrenda di comunion a encera? (b) Kico nos por siña for di e ofrendanan di comunion?

¹¹ Cierto sacrificionan cu e Lei di Moises a stipula tabata ofrendanan di comunion. Esakinan a indica cu e persona cu a duna e ofrenda tabata na paz cu Jehova. Tanto e como su famia por a come carni di e bestia sacrifica, kisas den un di e comedornan di e tempel. E sacerdote cu a haci e sacrificio y e otro sacerdotenan cu tabata sirbi na e tempel tambe por a come di e carni. (Lev. 3:1; 7:31-33) E unico motibo pakico un sirbidor di Jehova tabata duna ofrenda di comunion tabata pa e mantene un bon relacion cu Dios. Ta comosifuera e cu su famia, e sacerdotenan y Jehova tabata come hunto den un ambiente di paz y goso.

¹² Pues, ora un Israelita a haci un ofrenda di comunion, ta comosifuera el a invita Jehova na un comemento. Y pa e Israelita ey tabata un gran honor ora cu Jehova a acepta esey. Ta claro cu e anfitrion lo a ofrece lo mihor cu e tabatin na un invitado asina special. Ofrenda di comunion tabata un di rasgonan basico di e berdad haya den e Lei di Moises. E sacrificionan aki a indica cu tur hende cu kier ta na paz cu nan Creador por logra esey pa medio di un sacrificio mucho mas grandi, esun di Hesus. Pues, nos tambe por disfruta di un amistad intimo cu Jehova si nos uza nos recursonan y energia di buena gana den su sirbishi.

SACRIFICIO CU DIOS NO A ACEPTA

13, 14. Dicon loke Rey Saul kier a sacrifica no tabata aceptabel pa Jehova?

¹³ Ta bisto anto cu pa Jehova a acepta un sacrificio cu e Lei di Moises a stipula, e mester a ser ofreci cu e actitud y motivacion corecto. Bijbel ta menciona algun sacrificio cu no tabata aceptabel pa Dios. Dicon Jehova no a acepta e sacrificionan ey? Laga nos ban wak dos ehempel.

¹⁴ E prome ta trata di Rey Saul. Ora Jehova su tempo a yega pa destrui e Amalekitanan, profeta Samuel a informa Saul di esey. Saul a haya e mandato pa caba cu henter e nacion enemigo ey, tanto e hendenan como nan tou di bestia. Sinembargo, despues di a logra victoria, Saul a permiti su soldanan laga Agag, Rey di e Amalekitanan, na bida. Ademas, el a aparta e mihor bestianan pa duna esakinan como sacrificio na Jehova. (1 Sam. 15:2, 3, 21) Con Jehova a reacciona? Wel, el a rechasa Saul pa motibo di su desobediencia. (Lesa 1 Samuel 15:22 y 23.) Kico  nos por siña for di esaki? Cu Dios ta acepta solamente sacrificio di hende cu ta obedece su mandamentonan.

15. E echo cu cierto Israelitanan tabata ofrece sacrificio aunke nan tabata haci malo a demostra kico?

¹⁵ Ata aki un otro ehempel. Den tempo di Isaias, algun Israelita tabata ofrece sacrificio na Jehova djis como rutina. Nan sacrificionan no tabatin ningun balor, ya cu nan tabata haci malo den bista di Jehova. Pesey Jehova a bisa nan: “Di kico e multitud di boso sacrificionan ta sirbi mi? . . . Mi ta harta di boso ofrendanan kima di chubato y di e vet di bestianan gorda. Mi no ta hiba gusto den e sanger di bishe macho, lamchi of cabrito. . . . No trece ofrendanan vano mas, sencia ta un abominacion pa mi.” Dicon Jehova no a acepta nan ofrendanan? Jehova a bisa nan: “Maske boso haci hopi oracion, lo mi no scucha. Boso mannan ta yen di sanger. Laba boso mes, haci boso mes limpi; kita e maldad di boso echonan for di mi bista. Stop di haci maldad.”​—Isa. 1:11-16.

16. Kico ta determina si un sacrificio ta aceptabel pa Dios of no?

¹⁶ Pues, Jehova no a acepta sacrificio di hende cu a sigui haci maldad. Ma oracion y ofrenda di esnan cu sinceramente tabata haci esfuerso pa biba na harmonia cu su mandamentonan si tabata aceptabel p’e. E rasgonan basico di e Lei di Moises a siña e Israelitanan cu nan tabata pecador y cu nan tabatin mester di pordon. (Gal. 3:19) Esnan cu a compronde esey a sinti duele cu nan a peca y tabata kier pa Jehova pordona nan. Awe, nos tambe tin cu reconoce cu nos mester di e sacrificio di Cristo pa haya pordon di pica. Si nos ta compronde esey y ta aprecia e sacrificio di Cristo, Jehova lo tin “delicia” den tur loke nos ta haci den su sirbishi.​—Lesa Salmo 51:17 y 19.

PONE FE DEN E SACRIFICIO DI HESUS

17-19. (a) Con nos por mustra Jehova cu nos ta aprecia e sacrificio di rescate di Hesus? (b) Kico nos lo trata den e siguiente articulo?

¹⁷ Nos tin un bentaha riba e Israelitanan: Nan a mira djis “un sombra” di Dios su proposito. En cambio, nos ta mira e realisacion. (Heb. 10:1) E leinan tocante sacrificio a siña e Israelitanan cu nan mester a cultiva e actitud corecto pa nan por tabatin un bon relacion cu Dios. Nan mester a demostra cu nan tabata sinceramente gradicido na Jehova, cu nan tabatin e deseo di dun’e lo mihor y cu nan a compronde cu nan tabatin mester di pordon. Danki na e Scritura Griego Cristian, nos a bin compronde cu pa medio di e sacrificio di rescate di Hesus, Jehova lo kita pica y morto pa semper y cu for di awor e ta pordona nos nos picanan pa asina nos por tin un bon consenshi. Si, e rescate ta un provision maraviyoso di Dios.​—Gal. 3:13; Heb. 9:9, 14.

¹⁸ Pa nos por beneficia di e sacrificio di rescate, nos tin cu haci mas cu djis compronde kico e ta encera. Pablo a skirbi: “Lei a bira nos tutor cu ta guia nos na Cristo, pa Dios por declara nos husto a base di fe.” (Gal. 3:24) Si, nos mester demostra nos fe pa medio di obra. (Sant. 2:26) Cu e palabranan ey, Pablo a anima e cristiannan di prome siglo, kendenan tabatin bon comprondemento di e rasgonan basico di e Lei di Moises, pa actua di acuerdo cu e conocemento ey. Di e manera ey, nan conducta lo tabata na harmonia cu e principionan divino cu nan tabata siña otro hende.​—Lesa Romanonan 2:21-23.

¹⁹ Aunke cristiannan no ta bou di e Lei di Moises, toch nos tin cu ofrece sacrificio cu ta aceptabel pa Jehova. Den e siguiente articulo nos lo mira den ki maneranan nos por haci esey.

[Preguntanan di Estudio]

[Comentario na pagina 19]

E rekisitonan basico di Jehova pa su sirbidornan no ta cambia nunca

[Plachi na pagina 20]

Cua di e bestianan aki abo lo a ofrece Jehova?

[Plachi na pagina 21]

Hende cu ta ofrece sacrificio aceptabel na Jehova tin su aprobacion