“Boso ta ‘un rasa scogi, sacerdotenan cu ta sirbi como rey, un nacion santo, un pueblo pa un propiedad special.’”​—1 PED. 2:9.

1. Dicon ta yama “e cena di Señor” Memorial tambe, y kico ta su proposito?

DIA 14 di nisan di aña 33 di nos era, Hesucristo y su 12 apostelnan a celebra e Pasco Hudiu pa ultimo biaha. E mesun anochi ey, despues cu Hesus a manda e traidor Judas Iscariot bay, el a introduci un otro celebracion, cu despues nan a yama “e cena di Señor.” (1 Cor. 11:20) Como cu Hesus a bisa dos biaha “sigui haci esaki na mi memoria”, e celebracion aki ta conoci tambe como Memorial. Riba e anochi ey, nos ta conmemora e morto di Hesus y reflexiona riba tur loke el a haci pa nos. (1 Cor. 11:24, 25) Si, Testigonan di Jehova rond mundo ta obedece e mandamento di Hesus y ta celebra e Memorial tur aña. E aña aki, 14 di nisan riba e kalender Hudiu ta cay riba diahuebs 5 di april, despues cu solo baha.

2. Kico Hesus a bisa di e pan y e biña cu el a uza?

² Discipel Lucas a resumi loke Hesus a haci y bisa na e ocasion ey den dos versiculo: “El a coy un pan, gradici Dios, kibra e pan y duna nan, bisando: ‘Esaki ta representa mi curpa cu lo mi duna pa boso. Sigui haci esaki na mi memoria.’ Asina tambe el a coy e copa, despues cu nan a cena, y a bisa: ‘E copa aki ta representa e pacto nobo a base di mi sanger cu lo mi drama pa boso.’ ” (Luc. 22:19, 20) Kico e apostelnan a compronde for di e palabranan aki?

3. Kico e apostelnan a compronde for di loke Hesus a bisa encuanto e pan y e biña?

³ Siendo cu e apostelnan tabata Hudiu, nan tabata bon na haltura di e sacrificionan di bestia cu e sacerdotenan tabata ofrece Dios den e tempel na Jerusalem. E ofrendanan aki tabata un medio pa haya e aprobacion di Jehova, y hopi di nan tabata pa pordon di pica. (Lev. 1:4; 22:17-29) Pues, ora Hesus a bisa su apostelnan  cu lo el a duna su curpa y drama su sanger pa nan, nan por a compronde bon cla kico e tabata kiermen, esta, cu lo el a duna su bida perfecto como sacrificio. Y su sacrificio lo a bal mucho mas cu sacrificio di bestia.

4. Kico Hesus tabata kiermen ora el a bisa: “E copa aki ta representa e pacto nobo a base di mi sanger”?

⁴ Awor kico Hesus tabata kiermen ora el a bisa: “E copa aki ta representa e pacto nobo a base di mi sanger”? Wel, e apostelnan tabata sa di e profecia tocante un pacto nobo cu Jeremias a menciona. (Lesa Jeremias 31:31-33.) Pues, cu e palabranan ey, Hesus a indica cu e tabata introduciendo e pacto nobo; e pacto nobo lo a reemplasa e pacto di Lei cu Jehova a cera cu Israel pa medio di Moises. Pero, e dos pactonan aki tabatin un conexion cu otro?

5. Ki oportunidad e pacto di Lei a duna e Israelitanan?

⁵ Si, nan proposito tabatin hopi di haber cu otro. Ora Jehova a introduci e pacto di Lei, el a bisa e nacion di Israel: “Si di berdad boso kier obedece mi bos y warda mi alianza [of, “pacto”, NW ], e ora ey boso lo ta un tesoro peculiar riba tur pueblo, pasobra henter tera ta di mi; y boso lo ta pa mi un reino di sacerdotenan y un nacion santo.” (Exo. 19:5, 6) Kico e palabranan aki lo a nifica pa e Israelitanan?

E PROMESA PA SIRBI COMO REY Y SACERDOTE

6. Ki promesa lo a ser realisa si e Israelitanan a cumpli cu e pacto di Lei?

⁶ E Israelitanan tabata sa kico e palabra “pacto” ta nifica, pasobra den pasado Jehova a yega di cera pacto cu nan antepasadonan, Noe y Abraham. (Gen. 6:18; 9:8-17; 15:18; 17:1-9) E pacto cu Jehova a cera cu Abraham ta encera e promesa aki: “Den bo descendientenan tur e nacionnan di e tera lo ta bendiciona.” (Gen. 22:18) E pacto di Lei lo a yuda realisa e promesa ey. Con asina? Wel, si Israel a cumpli cu e pacto di Lei, nan lo por a bira Jehova su “tesoro peculiar riba tur pueblo.” Cu ki proposito? Pa ‘bira un reino di sacerdote pa Jehova.’

7. Kico Jehova tabata kiermen cu e expresion ‘un reino di sacerdote?

⁷ A traves di historia, e Israelitanan tabatin tanto rey como sacerdote, pero Melkisedek tabata e unico homber den pasado cu a ocupa e dos puestonan aki simultaneamente cu e aprobacion di Jehova. (Gen. 14:18) Pero awor Jehova a ofrece e nacion di Israel e oportunidad pa produci ‘un reino di sacerdote.’ Manera e Scritura ta indica mas aleu, esaki tabata un oportunidad pa produci sacerdote cu por a sirbi como rey.​—1 Ped. 2:9.

8. Ki tarea e sacerdotenan cu Jehova a nombra tabatin?

⁸ Nos tur sa cu un rey ta un persona cu ta goberna. Pero kico ta e trabou di un sacerdote? Hebreonan 5:1 ta splica: “Tur sumo sacerdote scogi for di entre hende ta keda nombra pa rindi sirbishi na Dios na fabor di hende, pa e por ofrece regalo y sacrificio pa pica.” Pues, Jehova tabata nombra sacerdote pa representa e pueblo; un sacerdote tabata ofrece sacrificio pa roga Jehova pordon pa e pueblo su picanan. Ademas di esey, como un representante di Jehova, e sacerdote tabata esun cu a siña e pueblo e leinan di Dios. (Lev. 10:8-11; Mal. 2:7) Di e maneranan ey, un sacerdote nombra pa Jehova a yuda hende pecaminoso reconcilia cu ne.

9. (a) Ki condicion e Israelitanan mester a cumpli cu ne pa por a produci ‘un reino di sacerdote’? (b) Dicon Jehova a cuminsa nombra sacerdote den Israel? (c) Kico a pone cu e Israelitanan no por a produci ‘un reino di sacerdote’ bou di e pacto di Lei?

⁹ Pues, e pacto di Lei a duna Israel e oportunidad di produci un reino di sacerdote cu lo a beneficia “tur pueblo.” Sinembargo, e perspectiva maraviyoso aki  tabata mara na un condicion. Jehova a bisa e Israelitanan cu nan mester a “obedece [su] bos y warda [su] alianza.” Pero e Israelitanan por a ‘obedece e bos di Jehova’ manera e tabata kier? Si, te na cierto grado, pero no perfectamente. (Rom. 3:19, 20) Pesey mes, como medida temporal Jehova a nombra algun sacerdote den Israel, no pa sirbi como rey, sino pa ofrece sacrificio di bestia pa e picanan cu e Israelitanan lo a comete. (Lev. 4:1–6:7) E picanan aki a inclui esnan di e sacerdotenan. (Heb. 5:1-3; 8:3) Pero maske Jehova a acepta e sacrificionan aki, nan no por a elimina pica completamente. Pues, aunke tabatin Israelita cu a sirbi Jehova di curason, e sacerdocio bou di e pacto di Lei no por a yuda nan reconcilia completamente cu Dios. Ta manera apostel Pablo a bisa: “Ta imposibel pa sanger di toro y di cabrito kita pica.” (Heb. 10:1-4) Como cu e Israelitanan a kibra Lei, nan a cay bou di maldicion. (Gal. 3:10) Anto den e condicion ey, sigur nan lo no por a sirbi tur pueblo, of henter mundo, como rey y sacerdote.

10. Kico tabata e proposito di e pacto di Lei?

¹⁰ Esaki no a nifica si cu nunca mas e Israelitanan lo no por a bira miembro di ‘un reino di sacerdote’ manera Jehova a priminti. Al contrario, si nan a haci esfuerso sincero pa obedece Jehova, nan lo por a haya e oportunidad ey, pero no bou di Lei. Dicon no? (Lesa Galationan 3:19-25.) Pa nos por compronde esaki, nos mester sa kico tabata e proposito di e pacto di Lei. E Lei a proteha e Israelitanan obediente contra adoracion falso. Ademas, e Lei a haci nan consciente cu nan ta pecador y cu nan tabatin mester di un sacrificio mas grandi cu loke nan sumo sacerdote por a ofrece. Pues, e Lei a fungi como un tutor cu lo a prepara e Israelitanan pa acepta Cristo, of Mesias; eseynan ta titulonan cu ta nifica “Ungi.” Sinembargo, ora e Mesias a aparece, el a introduci e pacto nobo cu Jeremias a profetisa di dje. Y esnan cu a acepta Cristo a haya invitacion pa bira miembro di e pacto nobo y asina forma parti di ‘un reino di sacerdote.’ Laga nos ban wak con esey a bay.

E PACTO NOBO TA PRODUCI UN REINO DI SACERDOTE

11. Con Hesus a bira e fundeshi di un reino di sacerdote?

¹¹ Na aña 29 di nos era, Hesus di Nazaret a bira e Mesias. Con asina? Ora Hesus tabatin mas o menos 30 aña di edad, e tabata cla pa cumpli cu e tarea special cu Jehova tabatin p’e y a simbolisa esaki pa medio di su bautismo. Jehova, na su turno, a declara cu Hesus ta “[Su] Yiu stima” y a ungie, no cu zeta, pero cu spirito santo. (Mat. 3:13-17; Echo. 10:38) Dios a ungi Hesus pa e por a sirbi como Sumo Sacerdote y futuro Rey na bienestar di tur cu kere den dje. (Heb. 1:8, 9; 5:5, 6) Asina Hesus a bira e fundeshi di un reino di sacerdote. Pues, e mester a habri caminda pa otronan tambe forma parti di esaki.

12. Kico e sacrificio di Hesus a logra?

¹² Awor como Sumo Sacerdote, con Hesus por a yuda esnan cu a pone fe den dje? Ki sacrificio e mester a ofrece pa cubri nan pica hereda completamente? Wel, esey tabata su curpa humano perfecto, manera e mes a indica ora el a institui e Memorial di su morto. (Lesa Hebreonan 9:11 y 12.) Y for di momento cu Hesus a ser ungi como Sumo Sacerdote, el a somete su mes na diferente prueba y a acepta pa e ser siña te na morto. (Heb. 4:15; 5:7-10) Despues di su resureccion, el a subi na cielo y a presenta e balor di su sacrificio na Jehova. (Heb. 9:24) Pues, desde e tempo ey, Hesus por suplica Jehova na fabor di tur hende cu  eherce fe den su sacrificio y yuda nan sirbi Dios cu e speransa di haya bida eterno. (Heb. 7:25) Ademas, mediante su sacrificio, e pacto nobo a drenta na vigor.​—Heb. 8:6; 9:15.

13. Ki speransa esnan cu a haya invitacion pa drenta den e pacto nobo tabatin?

¹³ Esnan cu a haya invitacion pa forma parti di e pacto nobo tambe mester a ser ungi cu spirito santo. (2 Cor. 1:21) Esey a conta tanto pa Hudiu como pa hende di e nacionnan. (Efe. 3:5, 6) Awor, ki speransa esnan den e pacto nobo tabatin? Nan tabatin speransa di haya berdadero pordon pa nan picanan. Jehova a priminti: “Lo mi pordona nan inikidad, y nan pica lo mi no corda mas.” (Jer. 31:34) Unabes cu nan picanan ta completamente pordona, nan ta den e condicion pa bira parti di ‘un reino di sacerdote.’ Papiando cu cristiannan ungi, Pedro a skirbi: “Boso ta ‘un rasa scogi, sacerdotenan cu ta sirbi como rey, un nacion santo, un pueblo pa un propiedad special, pa boso proclama tur caminda e cualidadnan excelente’ di esun cu a yama boso for di scuridad na su luz maraviyoso.” (1 Ped. 2:9) Aki Pedro ta cita e palabranan cu Jehova a dirigi na Israel ora el a introduci e Lei di Moises. Pero Pedro ta aplica nan na e cristiannan cu ta den e pacto nobo.​—Exo. 19:5, 6.

UN SACERDOCIO CU LO TRECE BENDICION PA HENTER HUMANIDAD

14. Unda e reino di sacerdote lo sirbi?

¹⁴ Unda e cristiannan cu ta den e pacto nobo lo sirbi? Nan lo sirbi aki na tera. Como grupo, nan lo sirbi como sacerdote cu ta representa Jehova, ya cu ‘tur caminda nan ta proclama su cualidadnan excelente’ y ta percura cuminda spiritual. (Mat. 24:45; 1 Ped. 2:4, 5) Despues cu nan muri y haya resureccion, nan lo sirbi como rey y sacerdote den cielo hunto cu Cristo; ey, nan lo eherce ambos funcion. (Luc. 22:29; 1 Ped. 1:3-5; Rev. 1:6) Loke apostel Juan a mira den un vision ta confirma esaki. El a mira un cantidad di criatura angelical banda di e trono di Jehova ta canta “un cantica nobo” pa “e Lamchi.” Nan ta canta: “Cu bo sanger bo a cumpra hende pa Dios for di tur tribu, idioma, pueblo y nacion; y bo a haci nan rey y sacerdote pa nos Dios, y como rey, nan lo goberna e tera.” (Rev. 5:8-10) Den un vision cu Juan a haya mas despues,  el a mira cu e gobernantenan aki “lo ta sacerdote di Dios y di Cristo, y [cu] nan lo reina como rey hunto cu ne pa e 1.000 añanan.” (Rev. 20:6) Si, hunto cu Cristo, nan ta forma un reino di sacerdote cu lo beneficia henter humanidad.

15, 16. Con e reino di sacerdote lo beneficia humanidad?

¹⁵ Kico ta e beneficionan pa hende riba tera? Revelacion capitulo 21 ta describi e reino di sacerdote como un stad celestial, Jerusalem Nobo, cu Bijbel ta yama tambe “e esposa di e Lamchi.” (Rev. 21:9) Versiculo 2 pa 4 ta bisa: “Mi a mira e stad santo, Jerusalem Nobo, ta baha for di cielo, for di Dios, prepara manera un bruid dorna pa su bruidegom. Anto mi a tende un stem duro for di e trono bisa: ‘Tende! E tent di Dios lo ta cu humanidad, y lo e biba hunto cu nan, y nan lo ta su pueblo. Y Dios mes lo ta hunto cu nan. Y lo e seca tur lagrima for di nan wowo, y lo no tin morto mas; ni tristesa ni sclamacion ni dolor lo no tin mas. E cosnan cu tabata pasa antes no t’ey mas.’ ” Esakinan si ta bendicionnan maraviyoso, no ta berdad? Morto ta e causa principal di tristesa, sclamacion y dolor. Pues si no tin morto mas, lo no tin niun di e cosnan ey tampoco. Hende lo bira perfecto, y nan reconciliacion cu Dios lo ta completo.

¹⁶ Pero tin mas bendicion cu e sacerdocio aki lo trece pa humanidad. Na Revelacion 22:1 y 2 nos ta lesa: “E angel a mustra mi un riu di awa di bida, cla manera cristal, cu tabata core for di e trono di Dios y di e Lamchi y pasa meymey di e caya principal di e stad. Y na tur dos banda di e riu tabatin palo di bida cu 12 biaha pa aña tabata duna fruta; nan tabata pari tur luna. Y e blachinan di e palonan tabata pa cura e nacionnan.” Si, e vision aki ta ilustra bon cla cu “e nacionnan”, esta, tur famia na mundo, lo cura completamente di e imperfeccion cu nan a hereda di Adam. Di berdad, “e cosnan cu tabata pasa antes [lo] no t’ey mas.”

E REINO DI SACERDOTE TA COMPLETA SU TRABOU

17. Kico e reino di sacerdote lo logra finalmente?

¹⁷ Bou di guia di Cristo y su rumannan ungi, na fin di e 1.000 añanan tur hende lo ta perfecto. e ora ey, Cristo, como Sumo Sacerdote y Rey, lo entrega Jehova e famia humano perfecto. (Lesa 1 Corintionan 15:22-26.) Asina, e reino di sacerdote lo a cumpli cu e trabou cu Dios a duna nan.

18. Despues cu e reino di sacerdote cumpli cu nan trabou, con Jehova lo sigui uza e cogobernantenan di Cristo aki?

¹⁸ Con Jehova lo sigui uza e cogobernantenan aki di Cristo despues di e reinado di 1.000 aña? Wel, segun Revelacion 22:5, “nan lo reina como rey pa tur eternidad.” Pero riba ken nan lo reina? Bijbel no ta bisa esey. E echo cu nan ta inmortal y incoruptibel y tin experencia den yuda hende imperfecto lo capacita nan pa sigui sirbi como rey, y Jehova lo sigui uza nan pa yuda cumpli cu su propositonan pa semper.

19. Kico esnan cu asisti na Memorial lo ser recorda di dje?

¹⁹ Diahuebs 5 di april 2012, ora nos reuni pa conmemora Hesus su morto, nos lo ser recorda di e siñansanan biblico aki. E resto di cristiannan ungi cu ainda ta riba tera lo come di e pan sin zuurdeeg y bebe di e biña cora, indicando asina cu nan ta den e pacto nobo. E simbolonan aki di Cristo su sacrificio lo laga nan corda riba e maraviyoso privilegio y e responsabilidad cu nan tin den yuda realisa Dios su proposito eterno. Pesey, laga nos tur asisti y mustra aprecio pa e echo cu Jehova a percura un reino di sacerdote cu lo beneficia henter humanidad.

[Preguntanan di Estudio]

[Plachi na pagina 31]

E reino di sacerdote lo beneficia humanidad pa semper