Abraham​—Un Homber cu Curashi

Ata aki un otro escena: Abraham, su famia y su sirbidornan ta preparando pa muda bay Canan. (Genesis 12:1-5) Segun cu Abraham ta observa e grupo grandi di hende aki, kendenan ta depende di dje pa nan necesidadnan basico, e ta sinti cu e tin un responsabilidad grandi. Con lo e bay percura pa nan den un pais cu e no conoce? Lo no tabata mas facil p’e percura pa nan na Ur, un area prospero cu sabana grandi, tera fertil y abundancia di awa? Kico si e bira malo of muri na Canan? Ken lo cuida su famia? Si Abraham tabatin e preocupacionnan aki mes, e no a laga esakinan strob’e. E tabata determina pa obedece Dios su mandamentonan cueste loke cueste. Esey si ta berdadero curashi.

KICO TA CURASHI? Un persona cu curashi no ta un persona timido ni cobarde. Pero e echo cu un persona tin curashi no necesariamente ta nifica cu nunca e no tin miedo. Al contrario, ta e curashi cu Dios ta duna ta yuda un persona asina tuma accion a pesar di miedo.

CON ABRAHAM A DEMOSTRA CURASHI? Abraham no tabatin miedo di ta diferente. Abraham a lanta den un ambiente caminda hende tabata adora yen di dios falso y idolo. Toch, e no a laga miedo di loke otronan lo a bisa strob’e di haci loke e tabata sa cu ta corecto. Mas bien, cu curashi Abraham a scoge un otro rumbo den bida: El a scoge pa adora solamente “e Dios Haltisimo”, Jehova.​—Genesis 14:21, 22.

Pa Abraham, adoracion na Jehova tabata mas importante cu cos material. E tabata dispuesto pa bandona un bida comodo na Ur pa bay biba den desierto, cu pleno confianza cu Jehova lo a percura pa su necesidadnan material. Segun cu e añanan tabata pasa, ta natural cu Abraham lo a pensa riba algun di e comodidadnan cu e tabatin na Ur. Pero e tabatin confianza cu Jehova semper lo a percura p’e y pa su famia. Abraham tabatin un bon relacion cu Jehova, kende tabata e Persona di mas importante den su bida. Y esey a dun’e curashi pa obedece Dios su mandamentonan.

LES PA NOS: Nos tur por imita Abraham, cultivando curashi pa obedece Jehova asta si hende rond di nos no ta haci esey. Dicon nos mester di curashi? Pasobra Bijbel ta bisa bon cla cu esnan cu para firme na banda di Jehova lo haya nan cu oposicion, kisas di amigo of famia cu tin bon intencion. (Juan 15:20) Pero si nos ta convenci di loke nos ta siña tocante Jehova, na un manera  respetuoso nos lo para firme pa loke nos ta kere.​—1 Pedro 3:15.

Ademas, nos por tin confianza cu Dios lo cumpli cu su promesa, esta, cu e lo percura pa esnan cu pone fe den dje. E confianza ey ta duna nos curashi pa pone actividadnan spiritual na prome luga den nos bida y no cos material. (Mateo 6:33) Esey ta precies loke Doug y Becky a haci.

Aunke e famia aki tabatin dos yiu homber chikito, nan kier a muda bay un pais caminda tabatin mas necesidad di predicador di e bon noticia di Bijbel. Despues di a busca informacion y haci oracion tocante e asunto, nan a dal bay cu nan plan. Doug a bisa: “No tabata facil pa muda cu dos yiu sin sa con cos lo a resulta pa nos. Ma prome cu nos a tuma e decision ey, nos a analisa e ehempel di Abraham cu Sara. Nos a mira bon cla con nan a confia den Jehova y cu Jehova nunca a laga nan desampara, y esey a encurasha nos hopi.”

Relaciona cu nan bida den estranheria, Doug a bisa: “Nos a ser bendiciona ricamente. Debi cu nos bida ta mucho mas simpel, nos tin mas tempo awor; nos por pasa mayoria di e dia hunto como famia: Nos ta predica hunto, combersa y hunga cu nos yiunan. Nos ta contento cu nos tin e oportunidad aki.”

Ta claro cu no ta tur hende por haci cambio drastico asina. Toch, nos tur por imita Abraham. Con asina? Nos por pone adoracion na Dios na prome luga den nos bida y confia cu e lo sostene nos. Ora nos haci esey, nos ta sigui Bijbel su conseho pa “ta yen di animo y bisa: ‘Jehova ta mi ayudante; lo mi no tin miedo.’ ”​—Hebreonan 13:5, 6.

[Cuadro/Plachi na pagina 7]

Un Esposa Excelente y Devoto na Dios

Sara tabata casa cu un homber cu tabatin un fe sobresaliente. Pero Sara mes tambe a pone un excelente ehempel. De echo, tres biaha Bijbel ta menciona Sara como ehempel cu hende muher devoto mester imita. (Isaias 51:1, 2; Hebreonan 11:11; 1 Pedro 3:3-6) Aunke Bijbel ta papia masha poco biaha di e muher extraordinario aki, toch nos por mira cu e tabatin bon cualidad.

Pensa, por ehempel, riba e manera cu Sara lo a reacciona na prome instante ora Abraham a inform’e di Dios su mandato pa bandona Ur. Lo el a puntra su mes unda nan lo a bay y dicon? Lo el a preocupa tocante nan necesidadnan material? Lo el a sintie tristo cu e mester a bandona su amigo- y famianan, sin sa si un dia e lo a mira nan atrobe? Sin duda, e cosnan aki mester a pasa den Sara su mente. A pesar di esey, e tabata dispuesto pa bandona Ur. El a confia cu Jehova lo a bendicion’e si el a obedece.​—Echonan 7:2, 3.

Sara no solamente tabata un fiel sirbidor di Dios, ma un excelente esposa tambe. Na luga di competi cu su casa den asuntonan di famia, cu amor y respet el a apoya Abraham segun cu Abraham a guia e famia. Di e manera ey, su adorno, esta su cualidadnan, a hacie un bunita persona.​—1 Pedro 3:1-6.

E cualidadnan aki por beneficia esposanan awe? Si. Jill, kende tin mas cu 30 aña felizmente casa, a bisa: “E ehempel di Sara a siña mi cu mi mester sinti mi liber pa expresa mi punto di bista na mi esposo. Pero mi a compronde tambe cu ta mi esposo, e cabes di famia, tin cu tuma decision final. Anto ora e tuma un decision, mi trabou ta pa haci tur loke ta necesario pa esaki resulta un exito.”

Kisas loke a impresiona nos mas di Sara ta esaki: Aunke e tabata hopi bunita, nunca el a bira orguyoso. (Genesis 12:10-13) Mas bien, humildemente el a apoya Abraham, den tempo bon y malo. Sin duda, Abraham cu Sara tabata un pareha fiel y humilde cu a stima otro; nan bunita cualidadnan a contribui na nan felicidad.