E articulo aki ta trata algun pregunta cu kisas bo tin y ta mustra bo unda pa haya e contestanan den bo Bijbel. Si bo ta desea, Testigonan di Jehova gustosamente lo trata e preguntanan aki cu bo.

1. Bijbel su profecianan ta duna detaye specifico?

Ta e Dios Todopoderoso so por profetisa en detaye kico lo sosode den futuro. (Amos 3:7) Por ehempel, hopi tempo pasa, Dios a profetisa cu e Mesias, of Cristo, lo a bini na tera y cu lo e ta descendiente di e homber fiel Abraham. E Mesias lo a bira gobernante y, bou di su mando, hende obediente lo bira perfecto atrobe y lo no tin maleza mas. (Genesis 22:18; Isaias 53:4, 5) Dios a profetisa tambe cu e Mesias priminti lo a nace na Betlehem.​—Lesa Mikeas 5:2.

Hesus a resulta di ta e Mesias. Mas cu shete siglo adelanta, Bijbel a profetisa cu e Mesias lo a nace di un virgen y cu hende lo a despreci’e. Bijbel a bisa tambe cu lo el a duna su bida pa hende por haya pordon di pica, y cu lo el a ser dera hunto cu hende rico. (Isaias 7:14; 53:3, 9, 12) Ademas, mas cu cinco siglo adelanta, Bijbel a bisa cu lo el a drenta Jerusalem riba un burico y cu nan lo a traicion’e pa 30 pida di plata. Tur esakinan a cumpli en detaye.​—Lesa Zacarias 9:9; 11:12.

2. Dios ta profetisa fecha exacto?

Mas cu cinco siglo adelanta, Bijbel a bisa precies na ki aña e Mesias lo a presenta. El a mustra cu e periodo cu ta hiba na yegada di e Mesias lo tabata 69 siman, esta 7 siman plus 62 siman. E simannan aki ta simannan di aña; cu otro palabra, cada “siman” ta shete aña. Pues, si nos multiplica e 69 simannan ey cu 7, nos ta yega na un periodo di 483 aña. Awor, na ki tempo e periodo ey a cuminsa? Segun Bijbel, el a cuminsa ora Nehemias, Dios su sirbidor, a yega Jerusalem y a cuminsa reconstrui e stad. Y historia di Persia ta indica cu e construccion aki a cuminsa na aña 455 prome cu nos era. (Nehemias 2:1-5) Anto precies 483 aña despues, esta na aña 29 di nos era, Hesus a ser batisa y a bira e Mesias.​—Lesa Daniel 9:25.

  3. Tin profecia di Bijbel cu ta cumpliendo den nos tempo?

Hesus a profetisa sucesonan grandi cu lo tuma luga den nos tempo. El a profetisa tocante e bon noticia di e Reino di Dios cu lo trece alivio pa hende cu stima Dios. Y e Reino ey lo pone un fin na e mundo malbado aki.​—Lesa Mateo 24:14, 21 y 22.

Bijbel ta profetisa en detaye loke lo sosode den e ultimo dianan di e era aki. Contrario na loke hende ta spera di un era cu asina tanto desaroyo, Bijbel ta profetisa cu hende lo destrui planeta Tera. Angustia causa pa guera, temblor, maleza y scarsedad di cuminda lo aumenta. (Lucas 21:11; Revelacion 11:18) Normanan moral lo bay atras drasticamente. Den e tempo dificil aki, Hesus su siguidonan lo predica e bon noticia di e Reino di Dios den tur nacion.​—Lesa Mateo 24:3, 7 y 8; 2 Timoteo 3:1-5.

4. Kico lo tin den futuro pa humanidad?

E Dios Todopoderoso tin bon cos prepara pa hende obediente. E Reino di Dios, cu ta consisti di e Mesias Hesucristo y e 144.000 scoginan, lo goberna tera desde cielo pa mil aña. E mortonan lo ser resucita y lo haya oportunidad di biba pa semper despues di un huicio husto. Ademas, e Reino di Dios lo trece alivio pa tur hende. Lo no tin maleza ni morto mas.​—Lesa Revelacion 5:10; 20:6 y 12; 21:4 y 5.

Pa mas informacion, wak pagina 23-25 y 197-201 di e buki aki, Kico Bijbel Ta Siña Realmente?