“E bondad inmereci di Señor Hesucristo sea cu e spirito cu boso ta demostra.”​—FLP. 4:23.

1. Dicon e congregacionnan di Filipo y Tiatira a haya elogio?

E CRISTIANNAN cu a biba na Filipo den prome siglo tabata pober. Sinembargo, nan tabata generoso y a sobresali den e manera cu nan a mustra amor na nan rumannan den fe. (Flp. 1:3-5, 9; 4:15, 16) Cu rason Pablo a conclui e carta cu el a skirbi nan cu e siguiente palabranan: “E bondad inmereci di Señor Hesucristo sea cu e spirito cu boso ta demostra.” (Flp. 4:23) E cristiannan na Tiatira tabatin e mesun spirito of actitud, y pesey Hesucristo a bisa e congregacion ey: “Mi conoce bo obranan, y bo amor, fe, sirbishi y perseverancia, y mi sa cu bo obranan di awor ta mas cu esnan di antes.”​—Rev. 2:19.

2. Ki efecto nos actitud tin riba nos congregacion?

² Awe ta mescos: Cada congregacion di Testigo di Jehova ta manifesta un cierto spirito of caracteristica cu ta sobresali. Algun congregacion ta specialmente conoci pa nan amor y cariño. Otronan ta sobresali den e manera celoso cu nan ta apoya e trabou di predica y e sirbishi di tempo completo. Ora cada un di nos ta haci esfuerso pa nos tin un actitud positivo, nos ta contribui na e union cu tin den congregacion y na su progreso en general. (1 Cor. 1:10) Pero di otro banda, un mal actitud por desanima otronan den congregacion, pone nan perde celo, baha man na sirbishi y asta tolera pica serio. (1 Cor. 5:1; Rev. 3:15, 16) Ki spirito ta sobresali den bo congregacion? Kico abo por haci pa yuda mantene un spirito positivo den bo congregacion?

ANIMA OTRONAN PA NAN TA POSITIVO

3, 4. Con nos por alaba Jehova den congregacion?

³ E salmista David a canta: “[Jehova,] lo mi duna  bo gradicimento den e congregacion grandi; lo mi alaba bo meymey di un multitud enorme.” (Sal. 35:18) Si, David no a keda sin alaba Jehova ora e tabata hunto cu otro sirbidornan di Dios. Awe, nos reunionnan semanal di congregacion, incluso e Estudio di Toren di Vigilancia, ta duna nos un excelente oportunidad pa demostra nos celo y fe mediante nos comentarionan. Pesey, nos tur mester puntra nos mes: ‘Mi ta haci bon uzo di mi privilegio di por duna comentario na reunion? Mi ta prepara bon y ta duna comentario significativo? Como cabes di famia, mi ta yuda mi yiunan prepara nan comentario di antemano y ta siña nan contesta cu nan mes palabra?’

⁴ David a bisa: “Mi curason ta para firme, o Dios, mi curason ta para firme; lo mi canta, si, lo mi canta alabanza.” (Sal. 57:7) Cu e palabranan aki, David a mustra cu si nos curason ta firme, esta, determina pa haci loke ta corecto, nos lo demostra esey den e manera cu nos ta canta. E canticanan cu nos ta uza na nos reunionnan cristian ta yuda nos “canta alabanza” na Jehova cu un curason firme. Y si nos no sa con pa canta algun di e canticanan aki, pakico no train nan durante e anochi di Adoracion Como Famia? Laga nos ta determina pa ‘canta na Jehova tanten cu nos ta na bida y canta alabanza na dje mientras cu nos tin bida.’​—Sal. 104:33.

5, 6. Con nos por mustra hospitalidad y generosidad, y na kico esaki ta contribui?

⁵ Un otro manera cu nos por contribui na un actitud positivo den congregacion ta di mustra hospitalidad na nos rumannan den fe. Den e ultimo capitulo di Pablo su carta na e Hebreonan, el a exhorta e rumannan: “Sigui stima otro manera ruman. No lubida di mustra hospitalidad.” (Heb. 13:1, 2) Un manera excelente cu nos por mustra hospitalidad ta di invita superintendentenan biahero y nan esposa of rumannan den tempo completo pa come hunto cu nos. Ademas, ta bon pa corda riba esnan cu ta viuda, mayor soltero y otro personanan cu por join nos de bes en cuando den nos Adoracion Como Famia of disfruta di un cuminda hunto cu nos.

 ⁶ Pablo a anima Timoteo pa instrui e rumannan “pa nan haci bon, pa nan ta rico den bon obra, pa nan ta generoso, cla pa comparti cu otro, y asina acumula como tesoro pa nan mes un bon fundeshi pa futuro, a fin cu nan por haya un gara firme riba loke realmente ta bida.” (1 Tim. 6:17-19) Di e manera aki, Pablo a anima su rumannan den fe pa nan tin un spirito generoso. Anto nos por ta generoso asta si nos situacion financiero no ta dje bon ey. Por ehempel, nos por yuda esnan cu tin mester di transport pa bay sirbishi y reunion. Y kico di esnan cu ta beneficia di tal actonan di bondad amoroso? Nan, na nan turno, por duna loke nan por pa yuda cubri gasto di combustibel, cu ta sigui aumenta. Di e manera ey, nan ta mustra aprecio y ta contribui na e bon spirito den congregacion. Ademas ta bon pa nos regla nos asuntonan pa nos por pasa mas tempo hunto cu nos rumannan, pasobra asina nos ta laga nan sinti cu nos ta stima nan y cu nos tin mester di nan. Ora nos ta haci bon na “nos rumannan den fe” y ta cla pa duna di nos tempo y recurso pa pasa un rato ameno hunto cu nan, nos amor pa nan lo bira mas fuerte, y nos lo yuda contribui na un spirito caluroso y positivo den congregacion.​—Gal. 6:10.

7. Con nos por yuda mantene e bon spirito di nos congregacion?

⁷ Laga nos considera awor dos factor mas cu ta fortalece e laso di amor cu tin entre rumannan den fe: nan amistad y e echo cu nan ta tene asuntonan personal di otro hende confidencial. (Lesa Proverbionan 18:24.) Berdadero amigonan no ta revela cosnan personal di nan rumannan. Ora un ruman papia su cosnan personal cu un amigo y ta confia cu e amigo aki ta tene e cosnan aki pa su mes, e laso di amor cu kisas ta existi entre nan lo bira mas fuerte. Pesey, laga nos ta amigonan di confianza cu no ta plama asuntonan confidencial, pasobra asina nos ta demostra cu nos ta stima nos rumannan den fe y ta fortifica e lasonan di amistad den congregacion.​—Pro. 20:19.

SEA CELOSO DEN SIRBISHI

8. Kico Hesus a bisa e Laodicensenan, y dicon?

⁸ Hesus a bisa e congregacion di Laodicea: “Mi conoce bo obranan, y mi sa cu bo no ta ni friu ni cayente. Mare bo tabata sea friu of cayente. Pues, como cu bo ta lauw, y no ta ni friu ni cayente, mi ta bay scupi bo for di mi boca.” (Rev. 3:15, 16) E rumannan na Laodicea no tabata masha celoso den sirbishi. Y probablemente, e actitud ey a daña nan relacion cu otro. Pesey, amorosamente  Hesus a bisa nan: “Mi ta reprende y disciplina tur esnan cu mi tin cariño p’e. Pesey, sea yen di celo y arepenti.”​—Rev. 3:19.

9. Ki efecto nos entusiasmo den sirbishi di veld tin riba e congregacion?

⁹ Pa por promove un spirito positivo den congregacion, nos mester tin celo pa e sirbishi di veld. Un meta di e congregacion cristian ta pa busca hende semehante na carne den teritorio y siña nan e berdad. Pues, nos tin cu participa cu entusiasmo den e trabou di haci discipel, mescos cu Hesus a haci. (Mat. 28:19, 20; Luc. 4:43) Mas celoso nos ta den sirbishi, mas uni nos lo ta como “compañero di trabou di Dios.” (1 Cor. 3:9) Y ora nos ta mira con otronan ta defende nan fe den sirbishi y ta expresa nan aprecio pa cosnan spiritual, esey ta motiva nos pa stima y respeta nan mas. Ademas, ora nos ta traha “lado a lado” den sirbishi, e congregacion ta bira mas uni.​—Lesa Filipensenan 1:27.

10. Ora nos ta haci esfuerso pa mehora nos sirbishi di veld, ki efecto esaki lo por tin riba otronan den congregacion?

¹⁰ Nos esfuerso pa mehora nos sirbishi tambe por tin un bon efecto riba otronan. Segun cu nos ta mustra mas interes den e personanan cu nos ta topa den sirbishi y ta haci mas esfuerso pa alcansa nan curason, nos celo pa e sirbishi di veld lo aumenta. (Mat. 9:36, 37) Y nos lo contagia nos rumannan cu nos entusiasmo. Pesey mes Hesus a manda su discipelnan pa predica dos dos y no nan so. (Luc. 10:1) Esaki no solamente a anima y edifica e discipelnan pero a aumenta nan celo tambe pa e sirbishi. Nos tur gusta traha cu publicadornan celoso, no ta berdad? Nan entusiasmo ta anima nos pa sigui den e trabou di predica.​—Rom. 1:12.

TENE CUIDOU CU MURMURAMENTO Y NO SCONDE PICA

11. Ki actitud algun Israelita den tempo di Moises tabatin, y kico esaki a hiba na dje?

¹¹ Un par di siman despues cu Israel a bira un nacion nobo, e Israelitanan a cuminsa murmura y keha. Esey a pone cu despues nan a rebela contra Jehova y su representantenan. (Exo. 16:1, 2) Pesey, ta solamente un grupo chikito di e Israelitanan cu a bandona Egipto a drenta e Tera Priminti. Imagina bo, ni Moises no por a drenta, pasobra Jehova no a keda contento cu e manera cu el a reacciona riba e mal actitud di e Israelitanan. (Deu. 32:48-52) Con nos por evita di tin un mal actitud?

12. Con nos por evita di crea e custumber di murmura?

¹² Nos mester tene cuidou pa nos no crea e custumber di murmura. Pa evita esey, nos mester ta humilde y tin respet pa autoridad. Ademas, nos tin cu wak bon cu ken nos ta asocia. Dicon? Pasobra si nos recreo no ta sano of si nos ta pasa mucho tempo cu coleganan di trabou of compañeronan di scol cu no ta respeta principionan di Bijbel, esaki por afecta nos. Si, ta sabi pa no asocia mucho cu personanan negativo of cu ta promove un spirito independiente.​—Pro. 13:20.

13. Na ki problemanan mas murmuramento por hiba?

¹³ Murmuramento por hiba na mas problema. Por ehempel, murmuramento por trece desunion y perturba e paz den congregacion. Es mas, ora nos ta critica nos rumannan den fe, nos por haci nan dolor, y e kehamento aki por asta hiba  na calumnia y odio. (Lev. 19:16; 1 Cor. 5:11) Algun cristian den prome siglo tabata murmura y ‘desprecia esnan cu tin autoridad y papia malo di esnan glorioso.’ (Judas 8, 16) Tal murmuramento contra rumannan den puesto di responsabilidad sigur a desagrada Jehova.

14, 15. (a) Si no atende pica serio, con esaki por afecta e congregacion? (b) Kico nos mester haci ora nos haya sa cu un ruman ta envolvi den pica serio?

¹⁴ Awor, kico si nos haya sa cu un ruman ta comete pica den secreto? Por ehempel, e ruman por ta bebe di mas, wak pornografia of hiba un bida inmoral. Kico nos lo haci? (Efe. 5:11, 12) Wel, si nos ta ignora pica serio, Jehova lo por kita su spirito santo for di e congregacion. (Gal. 5:19-23) Mescos cu e cristiannan di Corinto den prome siglo mester a elimina tur maldad for di e congregacion, nos tambe mester tene nos congregacion limpi y asina mantene e bon spirito di e congregacion. Kico abo por haci pa yuda mantene paz den congregacion?

¹⁵ Manera nos a menciona anteriormente, ta importante pa mantene cierto asuntonan confidencial, specialmente si ta trata di cosnan priva di un ruman. Ta masha malo pa plama informacion confidencial. Pero si ta trata di pica serio, mester informa e ancianonan tocante e asunto. Biblicamente, ta nan tin e responsabilidad di atende e asunto ey. (Lesa Levitico 5:1.) Pues, si nos sa cu un ruman a comete un pica serio, nos mester anim’e pa acerca e ancianonan y busca yudansa. (Sant. 5:13-15) Anto si e no haci esey denter di un periodo di tempo rasonabel, nos mester raporta e pica.

16. Den ki sentido nos ta yuda mantene e bon spirito di nos congregacion ora nos raporta pica serio?

¹⁶ E congregacion cristian ta un refugio spiritual, y pesey mes nos tin cu yuda proteh’e y raporta cualkier pica serio. Anto si e pecador reconoce su fayo, arepenti y acepta disciplina y yudansa di ancianonan, e congregacion lo no core peliger mas. Pero kico si e ruman cu a comete pica serio no kier arepenti y no ta acepta conseho amoroso di e ancianonan? E ora ey mester expuls’e. Asina, ta ‘destrui’, of elimina, e mal influencia for di e congregacion y mantene su bon spirito. (Lesa 1 Corintionan 5:5.) Si, pa mantene e bon spirito di un congregacion, cada un di nos mester haci loke ta corecto, coopera cu e ancianonan y haci lo mihor pa nos rumannan.

YUDA MANTENE “UNION DI SPIRITO”

17, 18. Kico lo yuda nos “mantene e union di spirito”?

¹⁷ E prome discipelnan di Hesus a contribui na e union den congregacion pasobra nan tabata “presta atencion na siñansa di e apostelnan.” (Echo. 2:42) Nan a balora conseho biblico y a sigui guia di e ancianonan. Awe tambe, ancianonan ta coopera cu e esclavo fiel y prudente y ta anima y yuda nan rumannan den fe pa keda uni. (1 Cor. 1:10) Ora nos, na nos turno, ta somete nos mes na e instruccionnan di Jehova su organisacion y ta sigui guia di e ancianonan, nos ta duna prueba cu nos ta “haciendo esfuerso sincero pa mantene e union di spirito den e vinculo di paz.”​—Efe. 4:3.

¹⁸ Pues, laga nos haci nos maximo esfuerso pa mantene un spirito positivo den congregacion. Si nos haci esey, nos por ta sigur cu ‘e bondad inmereci di Señor Hesucristo lo ta cu e spirito cu nos ta demostra.’​—Flp. 4:23.

[Preguntanan di Estudio]

[Plachi na pagina 24]

Bo ta prepara comentario significativo y asina yuda contribui na e bon spirito den congregacion?

[Plachi na pagina 25]

Pa contribui na un spirito positivo den congregacion, ta bon pa train e canticanan di Reino