“Predica e palabra, ocupa bo cu ne cu urgencia.”​—2 TIM. 4:2.

1, 2. Cua preguntanan ta lanta encuanto e mandato pa ‘predica cu urgencia’?

GENERALMENTE, hende cu tin trabou di salba bida ta traha cu un sentido di urgencia. Bomberonan, por ehempel, ta reacciona di biaha riba un yamada di emergencia pasobra nan sa cu bida di hende por ta na peliger.

² Como Testigo di Jehova, nos tambe kier yuda salba bida di hende. Pesey, nos ta tuma e mandato pa predica e bon noticia di Reino masha na serio. Pero maske nos trabou ta urgente, nos no ta hacie ansha. Kico apostel Pablo tabata kiermen anto ora el a urgi nos pa ‘predica e palabra y ocupa nos cu ne cu urgencia’? (2 Tim. 4:2) Con nos por predica cu urgencia? Y dicon nos trabou ta asina urgente?

DICON NOS TRABOU DI PREDICA TA URGENTE?

3. Kico lo ta e resultado si un hende acepta of rechasa e mensahe di Reino?

³ Ora nos pensa con importante nos trabou di predica ta, esta, cu e por salba bida di hende, nos lo compronde con urgente ta pa papia cu otronan tocante e bon noticia. (Rom. 10:13, 14) E Palabra di Dios ta bisa: “Ora mi bisa e malbado: ‘Lo bo muri sigur’, y e bira for di su pica y practica huicio y husticia, . . . e lo biba sigur; e lo no muri. Ningun di su picanan cu el a comete lo no wordo recorda contra dje.” (Eze. 33:14-16) Si, Bijbel ta bisa proclamadonan di e mensahe di Reino: “Lo bo salba bo mes y tambe esnan cu ta scucha bo.”​—1 Tim. 4:16; Eze. 3:17-21.

4. Dicon Timoteo tabatin cu predica cu urgencia den prome siglo?

⁴ Pa nos por compronde dicon Pablo a urgi Timoteo pa predica cu urgencia, nos mester analisa nos texto central hunto cu un parti di su contexto, cu ta bisa: “Predica e palabra, ocupa bo cu ne cu urgencia den tempo faborabel y den tempo dificil, reprende, spierta seriamente, stimula, cu tur pasenshi y arte di siña. Pasobra lo yega un tempo cu nan lo rechasa siñansa sano; ma di acuerdo cu nan mes deseo, nan lo rondona nan mes cu maestronan cu ta conta nan loke nan tin gana di tende. Nan lo cera nan horea pa e berdad.” (2 Tim. 4:2-4) Si, manera Hesus mes a profetisa, hende lo a bini cu siñansanan falso den congregacion. (Mat. 13:24, 25, 38) Ta pesey tabata urgente pa Timoteo “predica e palabra” asta den congregacion pa e cristiannan no bay tras di siñansa falso. Bida di hende tabata den wega. Awor, kico di nos tempo?

5, 6. Cua ta algun siñansa falso cu hende ta kere den dje?

⁵ Apostasia a aumenta y plama den nos tempo. (2 Tes. 2:3, 8) Ki siñansa falso ta atrae hende awe? Un di nan ta e siñansa di evolucion. Por lo general, hende ta splica e teoria di evolucion cu terminonan cientifico. Pero debi cu den hopi pais nan ta promove e teoria aki cu asina un celo, comosifuera ta un siñansa religioso e ta, e ta corumpi e concepto cu hende tin di Dios y di otro hende. Un otro siñansa falso cu ta popular ta cu Dios no ta interesa den nos, y pesey nos tampoco no tin nodo di mustra interes den dje. Dicon e siñansanan aki ta atrae miyones di hende y pone nan pega soño den sentido spiritual? Wel, ambos siñansa ta promove e mesun mensahe aki: ‘Bo por haci loke bo kier pasobra bo no tin cu duna cuenta na ningun persona.’ Esaki ta un mensahe cu hopi hende gusta tende.​—Lesa Salmo 10:4.

⁶ Pero tin mas siñansa falso cu ta atrae hende. Por ehempel, algun baido di misa gusta pa nan pastoornan bisa nan, ‘Maske kico boso haci, Dios stima boso.’ Otro cosnan cu hende gusta tende y cu nan lidernan di iglesia y pastoornan ta siña nan ta cu ceremonia, sacrificio di misa, fiesta religioso y imagen ta trece bendicion di Dios. E baidonan di misa ey no ta realisa den ki peliger nan ta. (Sal. 115:4-8) Pesey, si nos por lanta nan for di soño y yuda nan compronde e mensahe di Bijbel, nan tambe por beneficia di e Reino di Dios.

KICO TA NIFICA PREDICA CU URGENCIA?

7. Con nos por demostra nos sentido di urgencia?

⁷ Un bon ciruhano ta eherce su profesion cu sumo cuidou pasobra bida di hende ta den wega. Pa cristiannan berdadero, e trabou di predica ta sumamente urgente, y pesey nos ta dedica tur nos atencion na dje. Por ehempel, nos ta pensa riba pregunta- of topiconan cu kisas por lanta interes di hende cu nos topa. Ademas, nos ta cla pa adapta nos schedule y sali den sirbishi ora hende ta mas dispuesto pa scucha.​—Rom. 1:15, 16; 1 Tim. 4:16.

8. Con un persona ta reacciona generalmente ora algo ta urgente?

⁸ Un otro manera pa demostra nos sentido di urgencia ta di pone prioridad. (Lesa Genesis 19:15.) Ban bisa cu bo a bay dokter pa tuma resultado di algun test cu bo a haci, y e dokter ta bisa bo honestamente: “Tende, bo tin un problema cu nos mester trata urgentemente. Bo tin net un luna pa tuma un decision.” Kico lo bo haci? Lo bo core sali for di su oficina manera un bombero cu ta reacciona riba un yamada di emergencia? Claro cu no. Probablemente, lo bo sinta scucha kico e dokter ta recomenda bo, bay cas y pensa seriamente riba bo prioridadnan.

9. Dicon nos por bisa cu Pablo a predica cu urgencia tempo e tabata na Efeso?

⁹ Loke Pablo a bisa e ancianonan di Efeso encuanto su predicacion den e districto di Asia tambe ta yuda nos mira con urgente e trabou di predica tabata p’e. (Lesa Echonan 20:18-21.) Aparentemente, for di e prome dia cu Pablo a yega Asia, el a cuminsa predica e bon noticia di cas pa cas. Banda di esey, “tur dia e tabata duna discurso den e sala di conferencia di e scol di Tirano.” Anto el a haci esaki dos aña largo. (Echo. 19:1, 8-10) Pablo su rutina a mustra bon cla cu e trabou di predica tabata urgente. Meta di e yamada pa ‘predica e palabra cu urgencia’ no ta pa pone nos sinti presiona of carga. Mas bien, e ta indica cu e trabou di predica mester ta e cos di mas importante den nos bida.

10. Dicon nos mester ta contento cu algun cristian a predica cu urgencia un 100 aña pasa?

¹⁰ Prome cu 1914, un grupo chikito di Studiante di Bijbel a cuminsa predica e bon noticia. Nan ehempel a mustra bon cla kico kiermen predica cu urgencia. Aunke nan tabata un grupo chikito di algun mil hende so, nan a realisa cu tabata urgente pa predica e mensahe di Reino y a haci esey cu entusiasmo. Nan a publica nan sermonnan den cientos di corant y a presenta un combinacion di pelicula y slides cu nan a yama “Foto-Drama di Creacion.” Di e manera ey, miyones di hende a haya e bon noticia. Si nan no tabatin un sentido di urgencia, cuanto di nos awe lo a tende e mensahe di Reino?​—Lesa Salmo 119:60.

WAK PA BO NO PERDE BO SENTIDO DI URGENCIA

11. Kico a pone algun ruman perde nan sentido di urgencia?

¹¹ Distraccion por pone un hende cuminsa considera e trabou di predica como algo di menos importancia. E meta di Satanas su mundo ta pa pone nos core tras di nos cosnan personal y ocupa nos mes cu asuntonan di menos importancia. (1 Ped. 5:8; 1 Juan 2:15-17) Y algun ruman cu un tempo tabata celoso den Jehova su sirbishi a perde nan sentido di urgencia. Demas, por ehempel, un cristian di prome siglo cu tabata ‘compañero di trabou’ di Pablo, a laga cosnan di mundo distrae di manera cu el a stop di apoya Pablo. Si, en bes di sigui fortalece Pablo den tempo di angustia, el a bandon’e.​—Flm. 23, 24; 2 Tim. 4:10.

12. Ki oportunidad nos tin awor, y ki oportunidad nos lo tin pa semper?

¹² Pa nos por keda cu nos sentido di urgencia, nos mester evita di cay den e tentacion pa disfruta di tur loke bida tin di ofrece. Nos mester traha duro pa “haya un gara firme riba loke realmente ta bida.” (1 Tim. 6:18, 19) Probablemente, bo ta convenci cu bida eterno bou di e gobernacion di e Reino di Dios lo duna bo oportunidad amplio pa haci hopi cos interesante. Pero ta aworaki so nos tin e oportunidad di yuda hende sobrevivi Armagedon.

13. Como cristian, kico nos por haci pa keda cu nos sentido di urgencia?

¹³ Mirando cu mayoria di hende den mundo ta drumi den sentido spiritual, nos mester tene cuidou pa nos no perde nos sentido di urgencia. Con nos por evita esey? Wel, ta bon pa nos corda cu un tempo nos tambe tabata drumi den scuridad den sentido spiritual. Pero manera Pablo a bisa, nos a lanta for di soño y Cristo a briya riba nos. Pesey awor, nos tin e privilegio di ta cargado di luz. (Lesa Efesionan 5:14.) Pablo a bisa tambe: “Paga bon tino pa e manera cu boso ta cana no ta manera hende imprudente sino manera hende sabi, uzando boso tempo di e mihor manera, pasobra nos ta biba den temponan malo.” (Efe. 5:15, 16) Si, nos ta bibando den un mundo malbado; pues laga nos ‘uza nos tempo’ bon y haci cosnan cu ta yuda nos keda spiritualmente lanta.

NOS TA BIBANDO DEN UN TEMPO CRUCIAL

14-16. Dicon e predicacion di e mensahe di Reino ta mas urgente cu nunca awe?

¹⁴ Semper nos sirbishi tabata urgente, pero awor mas cu nunca. Desde 1914 nos ta mira hopi rasgo di e señal ta cumpli precies manera Bijbel a profetisa. (Mat. 24:3-51) Awe mas cu nunca bida di hende ta na peliger. A pesar di e acuerdonan cu nacionnan poderoso a cera recientemente, ainda nan tin un 2.000 bom nuclear cla pa uza. Autoridadnan a raporta cientos di caso di material nuclear cu ta supuestamente perdi. Kisas algun di e materialnan ey ta den man di terorista? Segun observadornan, facilmente teroristanan por inicia un guera cu por caba cu humanidad completo. Pero no ta guera so por extermina e rasa humano.

¹⁵ Na 2009, e revista The Lancet y University College London a publica un articulo cu ta bisa cu “cambio di clima ta e menasa di mas grandi pa salud di hende den siglo 21.” E articulo ta sigui bisa: “Cambio di clima lo afecta salud di mayoria di pueblo den e siguiente decadanan y pone bida di miles di miyones di hende mas y mas na peliger.” Cambio di clima por causa destruccion rond mundo. Dicon? Pasobra esaki ta pone nivel di lama subi, causa secura, inundacion, epidemia, horcan y guera debi na scarsedad di recurso. Si, guera y desaster natural sigur ta un menasa pa humanidad.

¹⁶ Algun hende ta pensa cu si bini un guera nuclear, esaki lo resulta den e sucesonan cu lo cumpli cu “e señal” di e ultimo dianan cu Hesus a profetisa di dje. Pero, mayoria di hende no sa kico ta e berdadero nificacion di e señal. Dicon nos ta bisa esey? Pasobra e señal ta bisto pa decadanan caba y ta indica cu Cristo su presencia ta un realidad y cu e fin di e era malbado aki ta acercando rapidamente. (Mat. 24:3) Nunca prome nos por a mira cumplimento di asina tanto rasgo di e señal. Ta tempo pa hende lanta for di soño spiritual. Y mediante nos predicacion, nos por yuda nan lanta.

17, 18. (a) Ki efecto e “tempo” aki tin riba nos? (b) Kico por motiva hende pa cambia nan punto di bista di e mensahe di Reino?

¹⁷ Ta un poco tempo so a keda nos pa demostra nos amor pa Jehova y pa completa e trabou di predica cu el a duna nos pa haci den e ultimo dianan aki. Loke Pablo a bisa e cristiannan di prome siglo na Roma tin un nificacion asta mas grandi awe. El a bisa nan: “Boso sa den ki tempo nos ta biba. Ya ta ora pa boso lanta for di soño, pasobra nos salbacion ta mas cerca cu tempo nos a bira creyente.”​—Rom. 13:11.

¹⁸ E cosnan cu ta sosode den e ultimo dianan aki por haci hende consciente di nan necesidad spiritual. Otronan ta bira consciente cu hende tin mester di yudansa ora nan mira cu gobierno humano no por soluciona problema economico, caba cu violencia y armanan nuclear ni evita daño na nos medioambiente. Otronan ta bira consciente di nan necesidad spiritual debi na e situacionnan cu nan ta enfrenta den famia, manera por ehempel, problema serio cu salud, divorcio of morto di un ser keri. Ora nos ta participa den sirbishi, nos ta pone nos mes disponibel pa yuda e hendenan aki.

MOTIVA PA UN SENTIDO DI URGENCIA

19, 20. Con un sentido di urgencia a motiva hopi cristian pa cambia nan estilo di bida?

¹⁹ Debi na nan sentido di urgencia, hopi cristian ta sinti nan motiva pa haci mas den sirbishi. Por ehempel, un pareha jong di Ecuador a dicidi di simplifica nan bida despues di a asisti na e dia special di asamblea na aña 2006: “Mantene Bo Wowo Simpel.” Nan a traha un lista di e cosnan cu nan no tabatin mester di dje, y denter di tres luna nan a muda for di nan apartamento di tres camber pa un apartamento di un camber. Nan a bende algun cos y a elimina tur debe. Un poco despues, nan a cuminsa traha pionero auxiliar y, a sigui e sugerencia di e superintendente di circuito pa bay sirbi den un congregacion caminda tabatin mas necesidad.

²⁰ Un ruman homber di Noord Amerika a skirbi: “Tempo cu ami cu mi casa a asisti na e asamblea di circuito na aña 2006, nos tabatin 30 aña batisa. Den auto, bayendo cas, nos tabata combersa tocante e cambionan cu nos por haci pa simplifica nos bida y asina aplica e consehonan cu nos a haya. (Mat. 6:19-22) Nos tabatin tres cas, tereno, autonan luhoso, un boto y un caravan. Nos a sinti cu nos tabata manera cristiannan bobo y a dicidi di haci sirbishi di tempo completo nos meta. Na aña 2008, nos a join nos yiu muher den e trabou di pionero regular. Ta dushi pa traha den estrecho compania cu nos rumannan! Nos a haya oportunidad di sirbi caminda tin mas necesidad. Anto haciendo mas pa Jehova a hala nos mas cerca dje. Loke ta duna nos goso tambe ta e privilegio di mira con contento hende ta bira ora nan tende y compronde e berdad di e Palabra di Dios.”

21. Kico ta motiva nos na accion?

²¹ Nos sa kico ta spera e mundo malbado aki pronto: “e dia di huicio y di destruccion di hende malbado.” (2 Ped. 3:7) Nos conocemento di e Palabra di Dios ta motiva nos pa predica celosamente tocante e binidero gran tribulacion y e mundo nobo. Cu urgencia, nos ta sigui predica e mensahe cu ta duna hende berdadero speransa. Ora nos ta participa plenamente den e trabou urgente aki, nos ta demostra berdadero amor pa Dios y pa nos prohimo.

[Preguntanan di Estudio]