“Ningun hende cu pone su man na ploeg y wak patras no ta apto pa drenta e Reino di Dios.”​—LUC. 9:62.

1. Ki spiertamento Hesus a duna, y ki pregunta ta lanta?

CORDA e casa di Lot.” (Luc. 17:32) Hesucristo a duna e spiertamento importante aki casi 2.000 aña pasa, pero awe e ta mas importante cu nunca. Pero kico Hesus tabata kiermen cu e palabranan ey? E Hudiunan cu e tabata papia cu ne a compronde kico e tabata kiermen ya cu nan tabata sa kico a sosode cu e casa di Lot. Ora e cu su famia tabata huy for di Sodoma, el a desobedece Jehova y a wak patras, y a bira un pilar di salo.​—Lesa Genesis 19:17 y 26.

2. Ki motibo e casa di Lot lo por tabatin pa wak patras, y kico tabata e consecuencia di su desobediencia?

² Pero dicon e esposa di Lot a wak patras? Acaso e tabata kier sa kico tabata sosodiendo? Of ta pasobra e no por a kere cu Dios tabata destruyendo e stad? Kisas su fe tabata zwak? Of el a wak patras pasobra e tabata corda riba e cosnan cu el a laga atras na Sodoma? (Luc. 17:31) Sea cual sea e motibo pakico el a wak patras, su desobediencia a cost’e su bida. Imagina bo! El a muri riba e mesun dia cu e habitantenan inmoral di Sodoma y Gomora a muri. Pesey, no ta straño cu Hesus a bisa: “Corda e casa di Lot”!

3. Con Hesus a enfatisa cu nos no mester wak patras den sentido figurativo?

³ Nos tambe ta biba den un tempo crucial, y ta masha importante pa nos no wak patras den sentido figurativo. Hesus a enfatisa esaki ora e tabata papia cu un homber cu kier a bira su discipel. E homber a bisa Hesus cu e kier bay despedi di e hendenan di su cas prome cu e bira discipel. Anto Hesus a bis’e: “Ningun hende cu pone su man na  ploeg y wak patras no ta apto pa drenta e Reino di Dios.” (Luc. 9:62) Hesus su reaccion tabata bruto of irasonabel? No. Hesus tabata sa cu e homber su peticion tabata djis un excuus pa e no bira discipel. Pa Hesus hende cu ta busca excuus pa keda sin cumpli cu nan obligacion cu Dios ta hende cu ta wak “patras.” Awor, ta haci diferencia si un persona cu ta ploeg ta djis wak patras un rato of ta pone su herment abou y wak patras? Den ambos caso e ta ser distrai, y esaki por afecta su trabou.

4. Riba kico nos mester enfoca?

⁴ Proverbionan 4:25 ta bisa: “Laga bo wowo wak recht bo dilanti; laga bo klep di wowo keda fiha stret bo dilanti.” Pues, nos mester enfoca riba futuro y no riba pasado.

5. Ki motibo nos tin pa no wak patras?

⁵ Nos tin bon motibo pa no wak patras. Dicon? Pasobra nos ta bibando den “e ultimo dianan.” (2 Tim. 3:1) Loke nos lo mira pronto no ta e destruccion di dos stad malbado sino di henter e sistema di cos malbado. Pesey, con nos por evita di wak patras mescos cu e casa di Lot? Pa di prome, nos mester identifica e cosnan cu por pone nos wak patras. (2 Cor. 2:11) Pues, laga nos ban wak kico e cosnan ey ta, y con nos por evita di enfoca riba nan.

E “DUSHI” TEMPO DI ANTES

6. Dicon ta robes pa pensa cu antes bida tabata mihor?

⁶ Un eror cu nos por comete ta di pensa cu antes bida tabata mihor. Dicon esaki ta un eror? Pasobra podise, sin cu nos sa, nos ta minimisa e problemanan cu nos tabatin den pasado y exagera e goso cu nos tabatin. Di e manera ey, e cosnan di antes por parce mucho mas mihor cu nan tabata realmente. Anto e pensamento robes ey por pone nos cuminsa anhela e supuesto dushi bida di antes. Bijbel ta adverti nos: “No bisa: ‘Pakico e dianan di antes tabata mihor cu esakinan?’ Pasobra no ta for di sabiduria bo ta puntra esaki.” (Ecl. 7:10) Dicon e manera di pensa aki ta peligroso?

7-9. (a) Kico e Israelitanan a pasa aden na Egipto? (b) Kico a haci e Israelitanan contento? (c) Tocante kico e Israelitanan a cuminsa keha y murmura?

⁷ Corda kico a pasa cu e Israelitanan den tempo di Moises. Na principio ora nan a bay biba na Egipto, e Egipcionan tabata trata nan bon, manera un invitado. Pero despues cu Jose a muri, e Egipcionan “a pone capatasnan riba [e Israelitanan] pa afligi nan cu trabou pisa.” (Exo. 1:11) Cu tempo, Farao a duna ordo pa mata tur nan yiu hombernan recien naci pa e Israelitanan no bira hopi. (Exo. 1:15, 16, 22) Pesey no ta nada straño cu Jehova a bisa Moises: “Siguramente mi a mira e afliccion di mi pueblo cu ta na Egipto, y a tende nan sclamacion pa motibo di nan capatasnan, pasobra mi ta consciente di nan sufrimentonan.”​—Exo. 3:7.

⁸ Bo por imagina bo con contento e Israelitanan tabata ora nan tabata saliendo for di e pais caminda nan tabata  esclavo? Nan a mira con Jehova a uza su poder na un manera extraordinario, mandando Dies Plaga riba Egipto, pa libra su pueblo for di man di Farao, un homber arogante. (Lesa Exodo 6:1, 6 y 7.) Finalmente, e Egipcionan no solamente a duna e Israelitanan nan libertad, ma a roga nan pa nan bay pura y a duna nan asina tanto oro y plata cu Bijbel ta bisa cu e pueblo di Dios “a plunder e Egipcionan.” (Exo. 12:33-36) E Israelitanan a bira mas contento ainda ora nan a mira con Farao y su ehercito a ser destrui den Lama Cora. (Exo. 14:30, 31) Tur e sucesonan maraviyoso aki lo mester a fortalece nan fe.

⁹ Casi bo no por kere, pero un poco despues cu Jehova a libra nan milagrosamente, e mesun hendenan aki a cuminsa keha y murmura. Tocante kico? Cuminda! Nan no tabata satisfecho mas cu loke Jehova tabata duna nan y a keha: “Nos ta corda e pisca cu nos tabata come pornada na Egipto, e concombernan, milonnan, y e prei, siboyo y conoflok, ma awor nos apetit a bay. Nos wowo no ta mira nada otro cu e mana aki so.” (Num. 11:5, 6) Nan a lubida con malo nan a pasa como esclavo na Egipto y asta kier a bay bek. (Num. 14:2-4) Si, e Israelitanan a desea e cosnan cu nan a laga atras y a perde Jehova su fabor.​—Num. 11:10.

10. Kico nos por siña for di e Israelitanan?

¹⁰ Ki les nos por siña for di esaki? Wel, ora nos haya nos den situacion dificil of cu problema, no wak patras y bisa cu antes—tempo cu kisas nos no tabata ni conoce e berdad—cos tabata mihor. No tin nada malo den siña for di experencianan di pasado of recorda momentonan placentero. Pero nos mester keda cu un punto di bista balansa y realistico di pasado. Di otro manera, nos lo por bira mal contento cu nos bida actual y desea di biba manera antes.​—Lesa 2 Pedro 2:20-22.

SACRIFICIONAN CU NOS A HACI DEN PASADO

11. Con algun hende ta sinti tocante e sacrificionan cu nan a haci den pasado?

¹¹ Ta tristo pa bisa pero algun hende ta lamenta cu nan a haci cierto sacrificionan den pasado. Kisas bo tabatin oportunidad di sigui un estudio avansa, bira famoso of gana hopi placa, pero bo a dicidi di no bay tras di e cosnan ey. Hopi ruman a laga trabou cu ta paga bon. Kisas nan tabatin nan mes negoshi, of nan tabata musico of deportista famoso of profesor di universidad. Pero awor tempo a pasa, y ainda e fin no a yega. Kico di abo? Bo ta sinta imagina bo mes con bo bida lo tabata si bo no a haci e sacrificionan ey?

12. Kico Pablo a pensa di e cosnan cu el a laga atras?

¹² Apostel Pablo a bandona hopi cos pa bira siguido di Cristo. (Flp. 3:4-6) Kico el a pensa di e cosnan cu el a laga atras? El a bisa: “Loke tabata ganashi pa mi, mi a considera nan como perdida pa motibo di Cristo.” Dicon? El a bisa: “Di berdad mi ta considera tur cos como perdida pa motibo di e conocemento tocante Cristo Hesus, mi Señor, cu ta di mucho mas balor. Pa motibo di dje mi a acepta perdida  di tur cos y ta considera nan como cos di benta afo, a fin cu mi por gana Cristo.” * (Flp. 3:7, 8) Mescos cu un hende cu ta tira sushi afo no ta lamenta esey despues, Pablo no a lamenta cu el a benta afo e oportunidadnan cu e tabatin den mundo. P’e, e cosnan ey no tabatin niun balor mas.

13, 14. Con nos por sigui e ehempel di Pablo?

¹³ Awor, kico nos mester haci si nos ta sigui pensa riba e oportunidadnan cu nos a benta afo? Wel, imita Pablo su ehempel. Con asina? Pensa riba loke bo tin awor: Bo tin un bon relacion cu Jehova y un trayectoria di sirbishi fiel na dje. (Heb. 6:10) E mundo por ofrece bo algo mihor cu loke Jehova ta duna nos awor y lo duna nos den futuro?​—Lesa Marco 10:28-30.

¹⁴ Despues apostel Pablo a bisa algo cu lo yuda nos sigui sirbi Jehova fielmente. El a bisa: “Mi ta lubida e cosnan mi tras y ta rek pa gara e cosnan mi dilanti.” (Flp. 3:13) Ripara cu Pablo ta enfatisa dos cos masha importante. Prome, nos mester lubida e cosnan cu nos a laga atras y stop di perde nos tempo y energia preocupando cu e cosnan ey. Di dos, nos mester haci mescos cu un coredo cu ta yegando liña final: rek y keda cu nos bista fiha riba loke tin nos dilanti.

15. Dicon ta bon pa medita riba ehempel di fiel sirbidornan di Dios?

¹⁵ Ora nos medita riba ehempel di fiel sirbidornan di Dios—sea di pasado of di nos tempo—nos lo sinti nos motiva pa sigui padilanti en bes di wak patras. Tuma por ehempel Abraham cu Sara. Si nan a keda pensa riba Ur, “nan lo tabatin oportunidad pa bay bek.” (Heb. 11:13-15) Pero nan no a bay bek. Moises ta un otro ehempel: E prome biaha cu el a bandona Egipto, el a laga mucho mas cos atras cu cualkier Israelita a laga despues. Pero niun caminda Bijbel no ta mustra cu el a anhela e cosnan ey despues. Al contrario, Bijbel ta bisa cu “el a considera e deshonor cu el a sufri como Ungi como un rikesa mas grandi cu e tesoronan di Egipto, ya cu e tabatin su bista fiha riba e recompensa.”​—Heb. 11:26.

EXPERENCIANAN DI PASADO

16. Con experencianan di pasado por afecta nos?

¹⁶ Kisas nos tabatin mal experencia den pasado. Podise e pica- y erornan cu nos a comete den pasado ta sigui molestia nos. (Sal. 51:3) Podise ainda e disciplina cu nos a ricibi ta haci nos dolor. (Heb. 12:11) Of kisas nos no por stop di pensa riba e inhusticia​—of loke nos ta considera inhusticia​—cu nos a yega di experencia. (Sal. 55:2) Awor, kico nos por haci pa stop di pensa riba mal experencianan di pasado? Ata aki algun conseho.

17. (a) Dicon Pablo a considera su mes “esun di mas insignificante di tur e santonan”? (b) Kico a yuda Pablo trata cu pensamentonan negativo?

¹⁷ Erornan di pasado. Apostel Pablo a  considera su mes “esun di mas insignificante di tur e santonan.” (Efe. 3:8) Dicon el a sinti asina? El a bisa: “Pasobra mi a persigui e congregacion di Dios.” (1 Cor. 15:9) Bo por imagina bo con Pablo lo a sinti ora el a topa algun di e hendenan cu el a yega di persigui? Pero Pablo no a laga sintimentonan negativo molesti’e; mas bien, el a enfoca riba e bondad inmereci cu Dios a demostra na dje. (1 Tim. 1:12-16) Esey a pon’e haya mas aprecio pa Jehova y a motiv’e pa sigui den su sirbishi. Pues, ora Pablo a bisa cu e ta determina pa lubida cierto cosnan, el a referi tambe na su conducta pecaminoso di antes. Si nos tambe sigui reflexiona riba e misericordia cu Jehova a mustra na nos, nos lo no laga ansiedad encuanto cosnan di pasado cu nos no por cambia caba cu nos energia. Anto nos por uza nos forsa y energia den Jehova su sirbishi.

18. (a) Kico por pasa si nos keda rabia pa motibo di disciplina cu nos a yega di haya? (b) Con nos por haci caso di Salomon su conseho?

¹⁸ Disciplina fuerte. Kico si ainda nos ta rabia pa motibo di algun conseho cu nos a yega di haya? Esaki por haci nos dolor of tristo y pone nos “perde animo.” (Heb. 12:5) Si nos rechasa un conseho mesora of acept’e y toch no aplic’e, e resultado ta mescos: E conseho no a yuda nos ni refina nos. No ta mucho mas mihor pa haci caso di Salomon su conseho? El a bisa: “Esun cu neglisha disciplina ta desprecia su mes alma, ma esun cu scucha reprendemento ta adkiri comprondemento.” (Pro. 15:32) Mescos cu un chauffeur ta respeta regla di trafico, laga nos tambe acepta disciplina, aplica conseho y sigui padilanti.​—Pro. 4:26, 27; lesa Hebreonan 12:12 y 13.

19. Con nos por imita e fe di Habacuk y di Jeremias?

¹⁹ Inhusticia of loke ta parce inhusticia. Tin biaha nos por sinti manera profeta Habacuk, kende a sclama na Jehova pa husticia, ya cu e no por a compronde dicon Jehova tabata permiti cierto cosnan inhusto sosode. (Hab. 1:2, 3) No obstante, Habacuk a bisa: “Toch lo mi alegra den SEÑOR, lo mi regociha den e Dios di mi salbacion.” (Hab. 3:18) Ta masha importante pa nos imita e fe di e profeta ey. Un otro persona cu nos tin cu imita su fe ta Jeremias, kende tabatin “un actitud di warda” (NW ). Mescos cu Jeremias, nos tambe mester warda riba Jehova, e Dios di husticia, cu pleno confianza cu lo e drecha tur asunto na su debido tempo.​—Lam. 3:19-24.

20. Con nos por demostra cu nos ta “corda e casa di Lot”?

²⁰ Nos ta bibando den un tempo emocionante. Tin hopi cos maraviyoso ta sosode y tin mas pa bini pronto. Pesey, laga cada un di nos sigui cana pareu cu Jehova su organisacion. Si, laga nos haci caso di e conseho biblico pa wak padilanti y no patras. Asina nos ta demostra cu nos ta “corda e casa di Lot”!

[Nota]

[Preguntanan di Estudio]