“Boso sa den ki tempo nos ta biba. Ya ta ora pa boso lanta for di soño.”​—ROM. 13:11.

1, 2. Den ki sentido hopi hende tin cu lanta for di soño?

TUR aña, miles di hende ta muri den accidente di trafico pasobra nan ta cabisha of asta pega soño tras di stuurwiel. Otronan ta perde nan trabou pasobra nan no ta lanta na ora pa bay traha of ta drumi na trabou. Sinembargo, si un hende ta cabisha den sentido spiritual, esey por tin consecuencianan mucho mas serio. Pesey mes Bijbel ta bisa: “Feliz ta esun cu keda lanta.”​—Rev. 16:14-16.

² No obstante, mayoria di hende ta na soño den sentido spiritual mientras cu e gran dia di Jehova ta acerca. Asta algun lider di cristiandad ta admiti cu nan tou ta na soño. Ki ora un hende ta na soño den sentido spiritual? Dicon ta importante pa cristiannan berdadero keda lanta? Con nos por yuda otro hende lanta for di soño spiritual?

KI ORA UN HENDE TA NA SOÑO DEN SENTIDO SPIRITUAL?

3. Ki ora un hende ta na soño den sentido spiritual?

³ Generalmente, un hende na soño ta inactivo. Ma hende cu ta na soño den sentido spiritual si ta activo; kisas nan ta masha ocupa—pero no cu cosnan spiritual. Podise nan ta ocupa cu nan quehaceres di tur dia of ta dedica tur nan tempo buscando placer, prestigio of rikesa. Tur e cosnan aki ta stroba nan di satisface nan necesidad spiritual. Pero hende cu ta spiritualmente lanta si ta consciente cu nos ta bibando “den e ultimo dianan” y cu nan tin cu haci mas tanto posibel den Dios su sirbishi.​—2 Ped. 3:3, 4; Luc. 21:34-36.

4. Dicon Pablo a conseha nos pa “no sigui drumi manera otro hende”?

⁴ Lesa 1 Tesalonicensenan 5:4-8. Si, apostel Pablo a papia seriamente cu e rumannan. El a bisa nan pa “no sigui drumi manera otro hende.” Kico e tabata kiermen? Un manera cu nos por “sigui drumi” ta di ignora e normanan moral di Jehova. Ademas, nos por “sigui drumi” den e sentido cu nos ta ignora e echo cu Jehova su tempo pa destrui e malbadonan ta cerca. Nos mester tene cuidou pa hende malbado no influencia nos pa imita nan conducta y actitud.

5. Con hende ta demostra cu nan ta na soño den sentido spiritual?

⁵ Algun hende ta kere cu Dios no ta existi y cu nan no tin cu duna cuenta na dje. (Sal. 53:1) Otronan ta pensa cu nan no tin nodo di mustra interes den Dios pasobra e no ta interesa den hende. Y tin hende ta bisa cu kere den Dios so ta suficiente. Tur e hendenan aki ta drumi den sentido spiritual; nan mester lanta for di soño. Pero con nos por yuda nan?

NOS MES MESTER KEDA LANTA

6. Dicon un cristian mester haci esfuerso pa keda lanta den sentido spiritual?

⁶ Pa nos por lanta otro hende for di soño, nos mes mester ta lanta. Kico esey ta encera? Nos tin cu evita di comporta nos mes manera hende cu ta na soño spiritualmente. Segun e Palabra di Dios, e hendenan aki ta haci “obranan cu ta pertenece na scuridad”—cu ta entre otro, coremento di paranda, buracheria, inmoralidad sexual, conducta sinberguensa, pleito y jaloersheid. (Lesa Romanonan 13:11-14.) Pa evita e obranan ey por ta dificil. No obstante, ta masha importante pa keda alerta. Tuma por ehempel un chauffeur; si e no mira e importancia di keda lanta ora e ta stuur, e por pone su bida na peliger. Den caso di un cristian ta mas importante ainda pa e realisa con peligroso ta pa pega soño den sentido spiritual, ya cu esey por ta fatal!

7. Con un punto di bista robes di e hendenan den nos teritorio por afecta nos sirbishi?

⁷ Imagina cu un cristian ta pensa cu tur hende den su teritorio a rechasa e bon noticia y cu nan lo no cambia nunca. (Pro. 6:10, 11) Kisas e ta rasona, ‘Si niun hende den mi teritorio no ta acepta e bon noticia, pakico gasta mi energia pa purba yuda nan?’ Ta berdad cu aworaki hopi hende kisas ta drumi den sentido spiritual, pero nan situacion of actitud por cambia. Y echo ta mustra cu algun ta lanta for di soño y acepta e mensahe di Reino. Pues, semper nos mester ta lanta, haciendo esfuerso pa yuda hende. Por ehempel, nos por purba metodonan nobo pa presenta e mensahe di Reino na un manera mas atractivo. Pa nos keda lanta, nos mester tene bon na mente tambe dicon nos sirbishi ta importante.

DICON NOS SIRBISHI TA IMPORTANTE?

8. Dicon nos sirbishi cristian ta masha importante?

⁸ Corda, sea cual sea e manera cu hende ta reacciona, nos predicacion ta honra Jehova y ta hunga un papel importante den cumplimento di su proposito. Pronto, Dios lo husga hende a base di e manera cu nan ta reacciona riba nos predicacion. Esnan cu desobedece e bon noticia, e lo destrui pa semper. (2 Tes. 1:8, 9) Ademas, lo ta robes pa un cristian pensa cu e no tin nodo di haci esfuerso pa predica cu celo ya cu “lo bay tin un resureccion di tanto hende husto como inhusto.” (Echo. 24:15) Dicon e no mester pensa asina? Pasobra Bijbel ta laga nos compronde tambe cu esnan cu ta ser husga como “cabrito” lo “haya morto eterno.” Pues, nos trabou di predica ta un expresion di Dios su misericordia; e ta habri caminda pa hende cambia y haya “bida eterno.” (Mat. 25:32, 41, 46; Rom. 10:13-15) Si nos no predica, con hende por tende e mensahe cu por salba nan bida?

9. Con predicacion di e bon noticia ta beneficia tanto abo como otro hende?

⁹ Predicacion di e bon noticia ta beneficia nos mes tambe. (Lesa 1 Timoteo 4:16.) Bo no a ripara cu ora bo papia di Jehova y di e speransa di Reino cu esey ta fortalece bo fe y bo amor pa Dios? Esey no a yuda bo cultiva cualidadnan cristian? E echo cu bo ta demostra bo amor pa Dios predicando e bon noticia no a haci bo un persona mas feliz? Hopi ruman cu tabatin e privilegio di siña otro hende e berdad a experencia e goso di mira con Dios su spirito a yuda e personanan ey mehora nan bida.

SEA UN BON OBSERVADOR

10, 11. (a) Con Hesus y Pablo a demostra cu nan tabata alerta y un bon observador? (b) Ilustra con nos por tin mihor resultado den sirbishi ora nos ta alerta y un bon observador.

¹⁰ Tin diferente manera cu nos por lanta hende su interes pa e bon noticia. Pesey, nos mester ta alerta den sirbishi y observa bon. Y Hesus a pone un excelente ehempel pa nos. Debi cu e tabata un bon observador, e por a discerni kico tabata molestia un fariseo maske e fariseo mes no a bisa nada. Ademas, e por a mira e sinceridad di un muher pecador cu a arepenti di curason y tambe e spirito di sacrificio propio cu un viuda a desplega. (Luc. 7:37-50; 21:1-4) Hesus por a yuda hende pasobra e tabata sa kico nan tabatin mester. Nos tambe por ta un bon observador aunke nos no tin e mesun capacidad cu Hesus. Apostel Pablo a mustra esey bon cla: El a adapta su presentacion pa por alcansa diferente grupo di hende y tambe personanan cu diferente punto di bista.​—Echo. 17:22, 23, 34; 1 Cor. 9:19-23.

¹¹ Ora nos haci esfuerso pa ta alerta y un bon observador manera Hesus y Pablo, nos por haya sa con ta e mihor manera pa lanta interes di hende cu nos topa. Por ehempel, segun cu bo ta acerca un persona, busca indicacion cu por yuda bo saca afo kico ta su cultura, interes of situacion familiar. Kisas bo por discerni kico e persona ta haciendo na e momento ey y bisa algo amabel tocante esey pa cuminsa un combersacion.

12. Kico nos mester tene cuidou cu ne ora nos ta combersa den sirbishi?

¹² Un hende alerta ta evita distraccion. Ora nos ta den sirbishi, por ta masha edificante pa combersa cu nos compañero. No obstante, nos no mester lubida kico ta e proposito di nos sirbishi di veld: predica na otro hende. (Ecl. 3:1, 7) Pues, ora nos ta bay di un cas pa otro, nos mester tene cuidou pa nos combersacionnan no kita nos atencion for di e proposito ey. Un bon manera pa keda enfoca riba nos trabou di predica ta di papia tocante topiconan cu nos kier bay trata cu personanan interesa. Un otro cos cu nos kier tene cuidou cu ne ta telefon celular. Aunke esaki por yuda nos bon den sirbishi, nos mester haci sigur pa nos telefon no interumpi nos combersacion cu un doño di cas.

MUSTRA INTERES PERSONAL

13, 14. (a) Con nos por saca afo kico ta interesa un persona? (b) Kico lo por lanta un persona su interes pa cosnan spiritual?

¹³ Cristiannan cu ta lanta y alerta ta scucha bon ora hende den sirbishi ta papia cu nan. Kisas bo por pensa riba preguntanan cu bo por haci pa yuda un persona expresa su mes. E ta preocupa tocante e cantidad di religion cu tin, e violencia den su area of e fracasonan di gobernacion humano? Ademas, bo por lanta un persona su interes, mencionando con Dios a crea organismonan bibo di un manera maraviyoso of con beneficioso ta pa sigui conseho biblico. Oracion tambe ta algo cu ta interesa hende di casi tur cultura, asta algun ateista. Hopi hende ta puntra nan mes si tin un persona cu ta scucha oracion. Podise nos por lanta interes di otronan cu preguntanan manera por ehempel: Dios ta scucha tur oracion? Si no ta asina, kico nos mester haci pa Dios scucha nos?

¹⁴ Nos por siña hopi tambe ora nos ta observa bon con publicadornan experencia ta cuminsa un combersacion. Ripara con nan ta haci e doño di cas pregunta sin mete den su asuntonan of lag’e sintie incomodo. Observa con nan tono di bos y nan expresion di cara ta laga e doño di cas compronde cu nan ta interesa den su punto di bista.​—Pro. 15:13.

SEA CARIÑOSO Y UZA TACTO

15. Dicon nos mester ta cariñoso cu e hendenan den teritorio?

¹⁵ Abo gusta pa hende lanta bo for di un soño profundo? Hopi hende no gusta pa bo lanta nan diripiente for di soño. Mayoria di hende ta prefera pa bo lanta nan na un manera suave. Mescos ta conta ora di lanta hende cu ta drumi den sentido spiritual. Awor, si un hende rabia pasobra bo a bishit’e na su cas, con ta e mihor manera pa reacciona? Generalmente, ta mihor pa respeta su sintimentonan y bay. (Pro. 15:1; 17:14; 2 Tim. 2:24) Nos bon manera por motiva e persona pa e ta mas receptivo e siguiente biaha cu un Testigo bishit’e.

16, 17. Con nos por mustra discernimento den sirbishi?

¹⁶ Den algun caso, nos por logra papia cu un persona maske su prome reaccion ta negativo. Kisas e ta bisa nos, “Danki, pero mi tin mi mes religion” of, “Mi no ta interesa” djis pa termina e combersacion. Pero, kisas cu tacto y bondad lo bo por logra haci un pregunta cu ta lanta su interes.​—Lesa Colosensenan 4:6.

¹⁷ Tin biaha ta mihor pa mustra comprension y bay ora un persona bisa cu e ta mucho ocupa pa scucha nos. Pero, tin biaha e situacion ta permiti bo bisa algo breve y significativo. Algun ruman ta logra habri Bijbel, lesa un texto cu ta pone e doño di cas pensa y asta laga un pregunta pa e reflexiona riba dje; tur esaki den menos cu un minuut. Tin biaha nan presentacion breve ta logra lanta e doño di cas su interes asina tanto cu e ta sinti cu e no ta dje ocupa ey pa combersa un rato. Ta bon pa ora bo haya un oportunidad asina, bo tambe purba e metodo ey.

18. Kico nos por haci pa ta mas eficaz den duna testimonio informal?

¹⁸ Durante nos actividadnan di tur dia tambe nos por lanta hende su interes pa e bon noticia si nos ta prepara pa duna testimonio informal. Hopi ruman ta percura pa semper nan tin literatura den nan saco di camisa of den nan tas. Podise nan tin tambe un texto di Bijbel specifico na mente cu nan lo kier uza ora e oportunidad presenta. Si bo mester di yudansa pa prepara pa duna testimonio informal, ta bon pa bo papia cu e superintendente di sirbishi of un pionero den bo congregacion.

LANTA INTERES DI BO FAMIANAN NA UN MANERA BONDADOSO

19. Dicon nos no mester stop di haci esfuerso pa yuda nos famia?

¹⁹ Nos tur kier pa nos famia tambe acepta e berdad. (Jos. 2:13; Echo. 10:24, 48; 16:31, 32) Anto si nan no acepta e bon noticia mesora, esey lo por desanima nos y pone nos perde smaak di predica na nan. Podise nos ta pensa cu nada cu nos bisa of haci lo no cambia nan actitud. Pero algo por sosode cu por pone un miembro di famia cambia su bida of punto di bista. Of podise awor abo por splica e berdad mihor, y asina logra un mihor resultado.

20. Dicon ta importante pa uza tacto ora nos ta papia cu nos famia?

²⁰ Semper ta bon pa tene cuenta cu e sintimentonan di nos famia. (Rom. 2:4) Mescos cu nos ta cariñoso cu hende cu nos topa den sirbishi, nos mester ta cariñoso cu nos famia tambe. Si, nos mester papia cu suavidad y respet cu nan. En bes di predica na nan constantemente, laga nan mira ki bon efecto e berdad tin riba bo. (Efe. 4:23, 24) Laga nan mira bon cla tambe con Jehova a yuda bo mehora bo bida y ‘siña bo prospera.’ (Isa. 48:17) Si, laga bo famia mira con bida di un cristian mester ta.

21, 22. Conta un experencia cu ta mustra cu ta importante pa sigui haci esfuerso pa yuda nos famia spiritualmente.

²¹ Un ruman muher a skirbi recientemente: “Semper mi a haci esfuerso pa mi duna testimonio na mi 13 rumannan, cu echo y palabra. Tur aña mi ta skirbi nan. Toch, pa 30 aña largo, mi so tabata Testigo den mi famia.”

²² E ruman muher a sigui conta: “Un biaha mi a yama un di mi ruman muhernan cu ta biba cientos di kilometer leu for di mi. El a bisa mi cu el a pidi su pastoor studia Bijbel cu ne, pero nunca e pastoor no a haci esey. Mi a bis’e cu mi ta cla pa yud’e. Anto el a contesta: ‘Ta bon, pero for di aworaki mi ta bisa bo cu ami si no ta bira Testigo di Jehova.’ Mi a post e buki Kico Bijbel Ta Siña Realmente? p’e, y cada pasa tanto dia, mi tabata yam’e na telefon. Pero e no a ni habri e buki. Finalmente, mi a pidie pa e coy su buki y, via telefon, pa un 15 minuut, nos tabata lesa y trata algun di e textonan cita. Despues di un par di yamada, e tabata kier a studia mas cu 15 minuut. Despues e mes a cuminsa yama mi pa nos studia: Tabatin biaha cu e tabata yama dos bes pa dia, y tin biaha asta mainta trempan prome cu mi lanta for di soño. E siguiente aña, el a batisa, y un aña despues, el a cuminsa traha como pionero.”

23. Dicon nos no mester cansa di haci esfuerso pa lanta hende cu ta drumi den sentido spiritual?

²³ Pa yuda hende lanta for di soño den sentido spiritual ta un arte, y e ta exigi esfuerso continuo. Y tin hende manso cu ta reacciona bon ora nos lanta nan for di soño. Tur luna, un promedio di mas cu 20.000 hende ta batisa y bira Testigo di Jehova. Pues, laga nos haci caso di e conseho cu Pablo a duna Argipo: “Keda alerta pa bo cumpli cu e sirbishi cu bo a acepta den Señor.” (Col. 4:17) E siguiente articulo ta yuda nos compronde kico ta encera predica cu un sentido di urgencia.

[Preguntanan di Estudio]

 [Cuadro na pagina 13]

KICO BO TIN CU HACI PA KEDA LANTA?

▪ Sigui haci e boluntad di Dios

▪ Evita obranan cu ta pertenece na scuridad

▪ Keda alerta pasobra ta peligroso pa pega soño den sentido spiritual

▪ Mustra interes sincero den tur hende den bo teritorio

▪ Purba metodonan nobo di predica

▪ Corda cu bo sirbishi ta importante