“Ningun hende no sa ken e Tata ta, sino e Yiu y esun na ken e Yiu kier revela e Tata.”​—LUC. 10:22.

1, 2. Ki pregunta ta dificil pa hopi hende, y dicon?

‘KEN Dios ta?’ Esaki ta un pregunta dificil pa hopi hende. Tuma por ehempel, hende cu ta yama nan mes cristian. Aunke mayoria di nan ta kere cu Dios ta parti di un Trinidad, hopi di nan ta admiti cu nan no ta compronde e doctrina aki. Un escritor religioso a skirbi cu “e doctrina aki ta algo cu hende su mente limita no por capta. E ta surpasa logica of comprondemento humano.” Di otro banda, mayoria di hende cu ta kere den e teoria di evolucion ta bisa cu Dios no ta existi. Segun nan, tur e cosnan maraviyoso cu nos ta mira a bini na existencia pa casualidad. Pero Charles Darwin mes no a nenga cu Dios ta existi. El a declara cu ta mihor nos bisa cu e topico Dios ta dificil pa hende compronde.

² Sea loke sea hende ta kere, mayoria di nan tin pregunta tocante Dios su existencia. Pero como cu nan no ta haya contesta satisfactorio, cu tempo, hopi di nan ta stop di busca. Y Bijbel ta bisa cu Satanas ta “ciega mente di esnan cu no ta creyente.” (2 Cor. 4:4) Pues, ta comprendibel cu mayoria di hende no sa e berdad tocante e Tata, e Creador di universo!​—Isa. 45:18.

3. (a) Ken a revela e Creador na nos? (b) Ki preguntanan e articulo aki lo contesta?

³ No obstante, ta masha importante pa hende haya sa e berdad tocante Dios. Dicon? Pasobra ta solamente esnan cu invoca “e nomber di Jehova” lo ser salba. (Rom. 10:13) Y pa invoca e nomber di Dios, nos mester sa ken Dios ta y ki clase di Persona e ta. Anto Hesucristo a yuda su discipelnan conoce su Tata, revelando e Tata na nan. (Lesa Lucas 10:22.) Dicon Hesus por a haci esaki mihor cu cualkier otro persona? Con Hesus a revela e Tata na su discipelnan? Con nos tambe por revela e Tata mescos cu Hesus a haci? Laga nos contesta e preguntanan aki.

 HESUCRISTO​—E UNICO CUALIFICA

4, 5. Dicon Hesus tabata e mihor persona pa revela su Tata?

⁴ Hesus tabata e mihor persona pa revela su Tata. Dicon? Pasobra prome cu Dios a crea tur otro forma di bida, el a crea Hesus como un criatura selestial. Si, e ta “e Yiu unigenito di Dios.” (Juan 1:14; 3:18) Esta un privilegio unico! Tempo cu no tabatin ningun otro criatura ainda, e Yiu tabatin tur atencion di su Tata y a siña conoce su Tata y Su cualidadnan. Y segun cu nan tabata comunica cu otro a traves di e miles di miyones di añanan ey, nan amor y cariño pa otro a bira mas profundo. (Juan 5:20; 14:31) No tin duda, Hesus a siña conoce su Tata mas mihor cu cualkier otro persona!​—Lesa Colosensenan 1:15-17.

⁵ Pues, no ta straño cu e Tata a nombra e Yiu como su vocero, esta, como e “Palabra di Dios.” (Rev. 19:13) Si, Hesus tabata esun cu por a revela e Tata na otro hende. Cu rason Juan, un escritor di Evangelio, a bisa cu Hesus, “e Palabra”, ta “sinta banda di e Tata.” (Juan 1:1, 18) Kisas Juan a uza e expresion ey pa referi na un custumber cu hende di su tempo tabatin ora di come. E tempo ey, un invitado tabata haya un luga di sinta pega cu un otro invitado di manera cu nan por a combersa facilmente cu otro. Pues, como cu e Scritura ta describi e Yiu “sinta banda” di e Tata, e por tabatin combersacionnan intimo cu e Tata.

6, 7. Con bin e relacion entre e Tata y e Yiu a sigui bira mas fuerte?

⁶ Bijbel ta bisa cu e Yiu tabata “delicia” di su Tata, esta, cu e Tata tabatin cariño special pa e Yiu. (Lesa Proverbionan 8:22, 23, 30 y 31.) Anto segun cu nan tabata traha hunto, nan relacion a bira mas fuerte, y e Yiu a siña imita e cualidadnan di su Tata. Y sin duda, e Yiu a haya mas aprecio pa su Tata segun cu e tabata observa con su Tata tabata trata cu e otro criaturanan inteligente cu a ser crea despues.

⁷ Asta ora Satanas a insinua cu Jehova no tin derecho di goberna, e Yiu por a observa con Jehova a demostra amor, sabiduria, husticia y poder den un situacion dificil. Esaki, na su turno, sin duda a siña e Yiu con pa trata cu situacionnan dificil cu e mes lo a confronta despues durante su sirbishi riba tera.​—Juan 5:19.

8. Con e Evangelionan ta yuda nos siña hopi cos tocante e Tata su cualidadnan?

⁸ Debi cu e Yiu tabatin un bon relacion cu su Tata, e por a duna detayenan di e Tata cu ningun otro persona no por a duna. Pesey, e mihor manera pa siña conoce e Tata ta di analisa e obranan di su Yiu unigenito y loke el a siña hende. Pensa por ehempel riba e palabra “amor.” Awor, imagina bo cu e unico cos cu nos tabata sa di amor ta e definicion cu un diccionario ta duna. Lo tabata masha dificil pa compronde completamente kico ta amor, no ta berdad? Pero awor, como cu nos por reflexiona riba e relatonan den e Evangelionan cu ta describi Hesus su sirbishi y mustra con el a demostra interes den hende, nos por compronde kico Bijbel kiermen cu e expresion “Dios ta amor.” (1 Juan 4:8, 16) Asina tambe nos por siña di e otro cualidadnan di Dios cu Hesus a revela na su discipelnan tempo cu e tabata riba tera.

CON HESUS A REVELA SU TATA?

9. (a) Den cua dos manera Hesus a revela su Tata na su discipelnan? (b) Ki ilustracion Hesus a uza pa revela su Tata?

⁹ Con Hesus a revela su Tata na su discipelnan y den un sentido na su futuro siguidonan? El a haci esey den dos manera: pa medio di loke el a siña hende y su conducta. Prome, laga nos analisa loke el a siña hende. Loke Hesus a siña su discipelnan ta mustra cu e tabata sa bon con Jehova ta pensa, sinti y tambe con ta Jehova su manera di haci cosnan. Por ehempel, Hesus a compara su Tata cu un homber cu ta stima su carnenan y cu ta bay busca su carne cu a dual. Anto Hesus a bisa cu ora e doño haya su carne perdi, “e ta alegra mas pa motibo di esun ey cu pa motibo  di e 99 carnenan cu no a dual.” Kico Hesus kier a siña nos cu e ilustracion aki? El a splica: “Asina tambe mi Tata cu ta den cielo no ta desea pa ni un di e chikitonan aki bay perdi.” (Mat. 18:12-14) Anto kico e ilustracion aki ta siña bo tocante Jehova? Wel, cu asta si bo ta sinti cu otronan ta neglisha bo y cu bo no ta bal nada, bo Tata selestial si ta interesa den bo. Si, den bista di Jehova, bo ta un di “e chikitonan aki.”

10. Con Hesus a revela e Tata pa medio di su conducta?

¹⁰ E di dos manera cu Hesus a revela e Tata na su discipelnan tabata pa medio di su conducta. Pesey, ora apostel Felipe a bis’e pa “mustra [nan] e Tata”, Hesus por a responde: “Esun cu a mira mi, a mira e Tata tambe.” (Juan 14:8, 9) Awor, laga nos considera algun ocasion cu Hesus a refleha e cualidadnan di su Tata. Ora un leproso a roga Hesus pa cur’e, Hesus a mishi cu e homber “tur na lepra” y a bis’e: “Mi kier. Sea cura.” Sin duda, e leproso a compronde cu ta Jehova a duna Hesus poder pa cur’e. (Luc. 5:12, 13) Ata aki un otro ehempel: Ora Lazaro a muri, Hesus “a suspira profundamente y a keda masha conmovi” y ‘awa tabata basha for di su wowo.’ Esey sigur lo a yuda su discipelnan sinti e compasion di e Tata. Maske Hesus tabata sa cu e ta bay resucita Lazaro, el a sinti e dolor cu e famia y amigonan di Lazaro tabata sinti. (Juan 11:32-35, 40-43) Sin duda, bo tambe tin bo relatonan biblico faborito tocante Hesus cu ta laga bo mira con misericordioso e Tata ta.

11. (a) Kico Hesus a revela tocante su Tata ora el a haci e tempel limpi? (b) Dicon e relato aki ta duna nos consuelo?

¹¹ Awor, kico nos por siña for di e echo cu Hesus a haci e tempel limpi? Visualisa e escena: Hesus ta traha un zwiep di cabuya y ta core cu e hendenan cu ta bende baca y carne den e tempel. Despues, e ta basha e monedanan di e cambiadonan di placa abou y ta bolter nan mesanan. (Juan 2:13-17) E medida drastico cu Hesus a tuma sigur a laga e discipelnan corda e profecia di Rey David, cu ta bisa: “Celo pa bo cas a caba cu mi.” (Sal. 69:9) No tin duda, e echo cu Hesus a tuma accion a demostra cu e tabata celoso pa defende adoracion berdadero. Bo ta mira Jehova su personalidad den e manera cu Hesus a reacciona? Si, e relato aki ta laga nos corda cu Dios tin tur poder pa caba cu maldad y cu e ta ansioso pa haci esey. E manera cu Hesus a reacciona ta revela con e Tata lo ta sinti ora e ta mira tur e cosnan malo cu ta sosode riba tera awe. Esaki sigur ta un consuelo pa nos ora nos ta experencia inhusticia.

12, 13. Kico bo por siña di Jehova for di e manera cu Hesus a trata su discipelnan?

¹² E manera cu Hesus a trata su discipelnan tambe a revela diferente cualidad di su Tata. Constantemente e discipelnan tabata discuti tocante ken tabata esun di mas grandi. (Mar. 9:33-35; 10:43; Luc. 9:46) Pero debi cu Hesus a pasa hopi tempo cu su Tata, e tabata sa con E ta mira hende orguyoso. (2 Sam. 22:28; Sal. 138:6) Ademas, Hesus a mira tambe con Satanas, un individuo egoista, a desplega e mal caracteristica ey. Diabel tabata masha interesa den prominencia y posicion. Pues, Hesus lo mester a sintie tristo ora el a ripara cu su discipelnan, personanan cu el a siña, tabata sigui mustra cu nan ta ambicioso. Asta algun di esnan cu el a scoge como apostel tabatin e actitud ey! Anto nan a keda ambicioso te na e ultimo dia di Hesus su bida riba tera. (Luc. 22:24-27) No obstante, Hesus a sigui corigi nan cu cariño; nunca el a perde speransa cu algun dia nan lo a cultiva e mesun actitud humilde cu e tabatin.​—Flp. 2:5-8.

¹³ Bo a mira con Hesus a imita su Tata y cu pasenshi a corigi su discipelnan pa nan mal actitud? Loke Hesus a haci y bisa no ta siña bo cu Dios nunca lo bandona su pueblo maske nan ta faya bes tras bes? E echo cu nos sa ki clase di Dios Jehova ta no mester motiva nos pa arepenti y pidi Dios pordon ora nos faya?

 E YIU TABATA KIER REVELA SU TATA

14. Con Hesus a demostra cu e tabata kier revela su Tata?

¹⁴ Hopi dictador gusta sconde informacion pa nan pueblo pa mantene nan bou di nan dominio y den ignorancia. Hesus si no tabata asina. E tabata kier pa hende siña conoce su Tata bon; pesey el a bisa nan tur loke nan mester a sa tocante su Tata. (Lesa Mateo 11:27.) Ademas, el a duna su discipelnan ‘comprondemento penetrante pa nan por a siña conoce Jehova, e Dios berdadero.’ (1 Juan 5:20) Kico esey a encera? Cu Hesus a habri mente di su siguidonan pa nan por a compronde loke e tabata siña nan di e Tata. Pues, e no a sconde e identidad di su Tata den un siñansa incomprendibel y complica, manera esun di Trinidad.

15. Dicon Hesus no a revela tur loke e tabata sa tocante su Tata?

¹⁵ Awor, ta tur cos cu Hesus tabata sa tocante su Tata el a revela? No! Tabatin cosnan cu el a keda sin bisa su discipelnan. (Lesa Juan 16:12.) Dicon? Pasobra e tempo ey, nan lo ‘no por a compronde’ tur e cosnan ey. Pero, manera Hesus mes a splica, hopi cos mas lo a ser revela na nan despues ora nan haya “e ayudante”, esta spirito santo. Y spirito santo lo a capacita nan pa “compronde e berdad plenamente.” (Juan 16:7, 13) Pues, mescos cu mayornan sabi ta warda te ora nan yiunan bira suficientemente grandi pa siña of bisa nan cierto cosnan, Hesus a warda te ora su discipelnan tabata suficientemente madura y capaz pa compronde cierto cosnan tocante e Tata. Hesus bondadosamente a tene cuenta cu nan limitacionnan.

IMITA HESUS Y YUDA HENDE CONOCE JEHOVA

16, 17. Dicon abo tambe por revela e Tata na otro hende?

¹⁶ Ora bo siña conoce un persona bon y ta ripara cu e ta un persona masha amoroso, bo no ta haya gana di conta otro hende di dje? Si, esey ta precies loke Hesus a haci ora e tabata riba tera; el a papia tocante su Tata. (Juan 17:25, 26) Awor, kico di nos? Nos tambe por revela e Tata na otro hende manera Hesus a haci?

¹⁷ Manera nos a mira caba, Hesus tabata conoce su Tata mihor cu cualkier otro persona. Y e tabata kier pa otro hende tambe sa algun di e cosnan cu e tabata sa di su Tata. Pesey el a asta duna su siguidonan comprondemento penetrante pa nan por a capta aspectonan profundo di Dios su personalidad. Ta cu Hesus su yudansa, nos a siña conoce nos Tata selestial den un manera cu mayoria di hende awe no conoc’e. Pesey, nos ta masha contento cu Hesus tabata kier revela su Tata na nos pa medio di su siñansa y conducta. De echo, nos por asta gaba cu nos conoce e Tata. (Jer. 9:24; 1 Cor. 1:31) Anto segun cu nos ta sigui traha duro pa nos tin un bon relacion cu Jehova, e, na su turno, tambe ta hala cerca nos. (Sant. 4:8) Pesey, awor nos tambe por comparti nos conocemento cu otro hende. Pero con nos por haci esey?

18, 19. Den ki manera nos por revela e Tata na otro hende? Splica.

¹⁸ Nos mester imita Hesus y revela e Tata cu echo y palabra. Pero tene cuenta si cu hopi hende cu nos topa den sirbishi no sa ken Dios ta. Podise nan tin un punto di bista troci encuanto Dios debi na siñansa falso. Nos por siña nan loke Bijbel ta bisa tocante e nomber di Dios, su proposito pa humanidad y tocante su cualidadnan. Ademas, nos por combersa cu nos rumannan den fe tocante algun relato biblico cu ta revela algo di e personalidad di Dios cu nos no tabata sa di dje. Asina nan tambe por beneficia.

¹⁹ Awor, dicon nos mester revela e Tata pa medio di nos conducta? Wel, ora nos echonan ta refleha e amor di Cristo, hende lo sinti nan motiva pa siña conoce tanto e Tata como Hesus. (Efe. 5:1, 2) Apostel Pablo a anima nos pa ‘imit’e, mescos cu el a imita Cristo.’ (1 Cor. 11:1) Pues, nos tin e gran privilegio di por yuda hende conoce Jehova pa medio di nos conducta. Pesey, laga nos sigui imita Hesus y revela e Tata na otro hende.

[Preguntanan di Estudio]