‘Mi yiu, conoce e Dios di bo tata y sirbie cu henter bo curason.’​—1 CRO. 28:9.

1, 2. (a) Cua parti di e curpa humano ta ser uza mas tanto biaha na un manera figurativo den Bijbel? (b) Dicon nos mester sa kico e curason figurativo ta?

HOPI biaha, e Palabra di Dios ta uza partinan di e curpa humano na un manera figurativo. Por ehempel, e patriarca Job a bisa: “No tin violencia den mi mannan.” Rey Salomon a remarca: “Bon noticia ta haci weso salud.” Jehova a sigura Ezekiel: “Mas duro cu piedra, mi a haci bo frenta.” Discipel Santiago a bisa: “Lenga ta un candela.”​—Job 16:17; Pro. 15:30; Eze. 3:9; Sant. 3:6.

² Pero tin un organo di e curpa humano cu Bijbel ta uza den sentido figurativo mas cu cualkier otro parti. Ana, un fiel sirbidor di Jehova, a mencion’e den su oracion; el a bisa: “Mi curason ta regociha den SEÑOR.” (1 Sam. 2:1) De echo, escritornan di Bijbel a menciona e palabra “curason” casi mil biaha, y mayoria di biaha den sentido figurativo. Pues, ta masha importante pa nos sa kico e curason figurativo ta pasobra Bijbel ta bisa cu nos mester proteh’e. (Lesa Proverbionan 4:23.)

KICO E CURASON FIGURATIVO TA?

3. Con nos por haya sa kico e curason figurativo ta? Ilustra.

³ E Palabra di Dios no ta duna un definicion di e palabra “curason”, pero e ta yuda nos discerni si kico e curason figurativo ta. Con asina? Wel, pensa riba un puzzel cu ta consisti di varios pida cu hunto ta forma un bunita cuadra. Ma un pida so no ta yuda bo mira henter e cuadra. Den caso di e curason figurativo ta mescos. Ta ora nos analisa varios texto biblico cu ta papia di e curason, nos por haya sa kico e curason figurativo ta.

4. (a) Kico e curason figurativo ta? (b) Kico Hesus kier a bisa cu e palabranan cu el a expresa na Mateo 22:37?

 ⁴ Escritornan di Bijbel a uza e palabra “curason” pa describi e persona cu nos ta di paden, loke ta encera nos caracter, deseo, pensamento, actitud, capacidad, motivacion y metanan. (Lesa Deuteronomio 15:7; Proverbionan 16:1; Echonan 2:26.) Pero tin biaha, e palabra “curason” no ta referi na tur e cosnan ey. Tuma por ehempel ora Hesus a bisa: “Stima Jehova bo Dios cu henter bo curason, cu henter bo alma y cu henter bo mente.” (Mat. 22:37) Akinan, e palabra “curason” ta referi na un persona su emocion-, deseo- y sintimentonan. Hesus a menciona curason, alma y mente cada un riba nan mes pa enfatisa e echo cu nos mester demostra nos amor pa Dios den e manera cu nos ta sinti, hiba nos bida y uza nos mente. (Juan 17:3; Efe. 6:6) Pero ora Bijbel ta menciona e palabra “curason” riba su so, e ta referi na henter e persona cu nos ta di paden.

DICON NOS TIN CU PROTEHA NOS CURASON?

5. Dicon nos mester haci nos maximo esfuerso pa sirbi Jehova cu henter nos curason?

⁵ Rey David a bisa Salomon: “Mi yiu Salomon, conoce e Dios di bo tata, y sirbie cu henter bo curason y cu un alma boluntario; pasobra SEÑOR ta scudriña tur curason y ta compronde tur intencion di e pensamentonan.” (1 Cro. 28:9) Si, Jehova ta Esun cu ta sondea, of samina, tur curason, incluso esun di nos. (Pro. 17:3; 21:2) Y loke e ta mira den nos curason ta determina si nos por tin un bon relacion cu ne y un futuro briyante. Pesey, nos tin bon motibo pa sigui e conseho di David y sigui haci tur loke nos por pa sirbi Jehova cu ‘henter nos curason.’

6. Kico nos mester ta consciente di dje?

⁶ E manera celoso cu nos ta cumpli cu nos actividadnan teocratico ta mustra cu nos kier sirbi Jehova di henter nos curason. Pero na mes momento, nos ta consciente tambe cu e mundo malbado di Satanas y nos inclinacionnan pecaminoso por influencia nos y stroba nos di sirbi Dios cu henter nos curason. (Jer. 17:9; Efe. 2:2) Pues, pa evita cu esaki ta sosode, nos mester samina nos curason regularmente. Con nos por haci esey?

7. Kico ta revela e condicion di nos curason?

⁷ Ningun hende no por mira kico tin den curason di otro persona, mescos cu nos no por mira curason di un palo. No obstante, den Hesus su Sermon Riba Sero, el a indica cu mescos cu fruta ta revela e condicion di un palo, hende su echonan ta revela e berdadero condicion di nan curason. (Mat. 7:17-20) Laga nos considera un di e echonan ey.

UN MANERA PA SAMINA NOS CURASON

8. Segun Hesus su palabranan na Mateo 6:33, con nos por demostra loke tin den nos curason?

⁸ Den e mesun sermon ey, Hesus a bisa su oyentenan kico nan mester a haci pa demostra cu nan kier sirbi Jehova di henter nan curason. El a bisa: “Sigui busca anto prome e Reino y e husticia di Dios, y lo e duna boso tur e cosnan aki.” (Mat. 6:33) Pues, loke nos ta pone na prome luga den nos bida ta revela loke tin den nos curason, esta, nos deseo-, pensamento- y plannan. Pesey, un bon manera pa samina nos mes y wak si nos ta sirbiendo Jehova cu henter nos curason ta di analisa nos prioridadnan.

9. Ki invitacion Hesus a extende na algun homber, y kico nan reaccion a demostra?

 ⁹ Poco tempo despues cu Hesus a urgi su siguidonan pa “sigui busca . . . prome e Reino” a sosode algo cu ta mustra cu loke hende ta pone na prome luga den nan bida en berdad ta revela loke tin den nan curason. Lucas, un escritor di Evangelio, a relata e suceso aki. El a bisa cu Hesus tabata “determina pa bay Jerusalem” maske e tabata sa kico tabata sper’e eynan. Anto ora Hesus y su apostelnan “tabata riba caminda”, el a topa algun homber y a bisa nan: “Sigui mi.” E hombernan ey tabata dispuesto pa bira Hesus su discipel​—pero bou di cierto condicion. Un di nan a contesta: “Permiti mi bay dera mi tata prome.” Un otro a bisa: “Mi ta sigui bo, Señor, ma permiti mi yama mi hendenan di cas ayo prome.” (Luc. 9:51, 57-61) Bo a mira e diferencia? Hesus tabata determina pa haci e boluntad di Dios di henter su curason, pero e hombernan ey a bini cu excuus flauw pa no acepta Hesus su invitacion. Nan a pone nan interes prome cu e Reino; asina nan a demostra cu nan no tabata dispuesto pa sirbi Dios cu henter nan curason.

10. (a) Con nos a reacciona na e invitacion di Hesus pa bira su discipel? (b) Ki ilustracion Hesus a duna?

¹⁰ Distinto for di e hombernan ey, nos si a acepta e invitacion di Hesus pa ta su siguido y ta sirbi Jehova tur dia. Asina nos ta demostra cu nos ta stima Jehova. No obstante, nos curason por ta na peliger maske nos ta activo den congregacion. Con asina? Wel, den e mesun combersacion cu Hesus tabatin cu e hombernan cu el a invita pa bira su discipel, el a revela kico lo por ta un peliger pa nos ora el a bisa: “Ningun hende cu pone su man na ploeg y wak patras no ta apto pa drenta e Reino di Dios.” (Luc. 9:62) Kico nos ta siña for di e ilustracion aki?

“PEGA NA LOKE TA BON”

11. Con a para cu e trabou di e ploegdo den e ilustracion di Hesus, y dicon?

¹¹ Pa nos por haya un mihor comprondemento di e les tras di e ilustracion di Hesus, laga nos agrega algun detaye. Ban bisa cu mientras e trahado ta ploeg, e ta blo pensa riba su cas. Dicon? Pasobra na cas e tin su famia y amigonan cu e por pasa un rato ameno cu ne; e por disfruta di musica, un plato di cuminda y asta sconde pa solo. E ta anhela e cosnan aki. Ma e ta sigui ploeg y ta cubri un bon pida di e tereno. Pero debi cu su anhelo pa e cosnan placentero di bida ta bira asina fuerte, e ta “wak patras.” E ta ser distrai y, como cu falta hopi pa caba di sembra e tereno, su trabou ta sufri. Ta claro cu e doño ta keda desapunta debi na e trahado su falta di perseverancia.

12. Con un cristian awe por ta den e mesun situacion cu e trahado den e ilustracion di Hesus?

¹² Laga nos wak awor con esaki por sosode den nos tempo. E trahado por ta cualkier cristian. Aparentemente cos ta bay bon cu e cristian aki den sentido spiritual, pero en realidad su relacion cu Jehova ta na peliger. Laga nos bisa cu ta trata di un ruman homber cu ta masha celoso den e trabou di predica y cu ta asisti na tur reunion cristian. Sinembargo, constantemente e ta pensa riba cierto cosnan di e mundo aki cu ta atrae. Pues, den profundidad di su curason, e ta anhela e cosnan aki. Cu tempo, despues di a sirbi Jehova pa varios aña, su deseo pa algun di e cosnan aki ta bira asina fuerte cu e ta “wak patras.” Aunke tin hopi di haci ainda  den e trabou di predica, e no ta “tene un gara firme riba e palabra di bida” y su sirbishi ta sufri. (Flp. 2:16) Jehova, e “Doño di e cosecha”, ta bira tristo ora su trahadonan ta mustra un falta di perseverancia asina.​—Luc. 10:2.

13. Kico sirbi Jehova cu henter nos curason ta encera?

¹³ E les ta cla y comprendibel. Sirbi Jehova cu henter nos curason ta encera mucho mas cu asisti regularmente na nos reunionnan y participa den sirbishi. (2 Cro. 25:1, 2, 27) Si un cristian, profundamente den su curason, ta sigui stima cierto cosnan di mundo​—cu otro palabra, ta sigui “wak patras”​—e ta core riesgo di daña su bon relacion cu Dios. (Luc. 17:32) Pues, pa nos por ta “apto pa drenta e Reino di Dios”, nos mester “odia loke ta malo” y “pega na loke ta bon.” (Luc. 9:62; Rom. 12:9) Pesey, nos tur mester ta determina pa no laga nada den e mundo di Satanas, ni maske con util of placentero esaki por parce, stroba nos di sirbi Dios cu henter nos curason.​—2 Cor. 11:14; lesa Filipensenan 3:13 y 14.

KEDA ALERTA!

14, 15. (a) Con Satanas ta purba influencia nos curason? (b) Ilustra dicon e metodo cu Satanas ta uza ta peligroso.

¹⁴ Amor pa Jehova a motiva nos pa dedica nos bida na dje. Y for di e tempo ey padilanti, hopi di nos a demostra cu nos ta determina pa sigui sirbi Jehova cu henter nos curason. Sinembargo, Satanas no a entrega: Ainda e ta purba di influencia nos curason. (Efe. 6:12) Anto e sa cu no ta diripiente un cristian ta stop di sirbi Jehova. Pesey mes, na un manera astuto, e ta uza “e mundo aki” pa gradualmente mengua nos celo pa sirbi Dios. (Lesa Marco 4:18 y 19; wak e nota tambe.) Dicon e metodo ey di Satanas ta asina eficaz?

¹⁵ Un ilustracion por yuda nos contesta e pregunta aki. Imagina bo cu bo ta lesando un buki den un camber cu tin bon luz, pero diripiente e bombio ta kima. Como cu bo a keda den scuridad, bo ta compronde mesora ta kico a pasa y bo ta cambia e bombio. Bo ta haya luz atrobe. E siguiente anochi, bo ta bolbe  sinta lesa den e mesun camber ey. Awor imagina bo cu, sin cu bo sa, un hende a cambia e bombio di 100 watt pa un di 95 watt. Lo bo nota e diferencia? Probablemente no. Awor kico si e siguiente dia nan bolbe cambia e bombio, pero awor pa un di 90 watt? Probablemente, lo bo no ripara esey tampoco. Dicon no? Pasobra ta gradualmente e luz a bira dof, sin cu bo a ripara esey. Di mes manera, e influencia cu e mundo di Satanas ta eherce riba nos por pone nos celo mengua tiki tiki. Ta comosifuera Satanas a logra baha e celo di 100 watt cu nos tabatin pa Jehova su sirbishi na menos watt. Y si un cristian no ta alerta, lo e no ripara e cambio gradual ey mes.​—Mat. 24:42; 1 Ped. 5:8.

ORACION TA MASHA IMPORTANTE

16. Con nos por proteha nos mes contra e trampanan di Satanas?

¹⁶ Awor, con nos por proteha nos mes contra e trampanan di Satanas y sigui sirbi Jehova di henter nos curason? (2 Cor. 2:11) Oracion ta masha importante. Pablo a anima su compañeronan cristian pa nan “para firme contra e trampanan di Diabel.” Despues el a urgi nan pa ‘sigui resa tur ora bay, uzando tur forma di oracion y suplica.’​—Efe. 6:11, 18; 1 Ped. 4:7.

17. Kico nos ta siña for di e oracionnan di Hesus?

¹⁷ Pa nos por para firme contra Satanas, nos mester imita Hesus y su deseo di sirbi Jehova di henter su curason. Wak por ehempel kico Lucas a skirbi tocante e manera cu Hesus a haci oracion riba e ultimo anochi prome cu su morto: “Como cu el a drenta den un ansha, el a sigui haci oracion cu mas fervor ainda.” (Luc. 22:44) No ta prome biaha cu Hesus a haci oracion cu fervor, pero e biaha aki, e tabata a punto di pasa den e prueba di mas dificil den su bida riba tera, pesey, el a haci oracion “cu mas fervor ainda.” Y Dios a contesta su oracion. E ehempel di Hesus ta mustra cu un oracion por ta mas intenso cu un otro. Pues, segun cu nos pruebanan ta bira mas dificil y e influencia di Satanas mas fuerte, nos tambe mester resa “cu mas fervor ainda” y pidi Jehova su proteccion.

18. (a) Kico nos mester puntra nos mes encuanto nos oracionnan, y dicon? (b) Menciona algun factor cu tin efecto riba nos curason y den ki manera nan por haci esaki. (Wak e cuadro na pagina 22.)

¹⁸ Ki efecto oracion cu fervor por tin riba nos? Pablo a bisa: “Den tur cos, pa medio di oracion y suplica hunto cu gradicimento, laga Dios sa kico ta boso peticionnan; y e paz di Dios cu ta surpasa tur comprondemento lo proteha boso curason.” (Flp. 4:6, 7) Pues, si nos kier sigui sirbi Jehova cu henter nos curason, nos mester haci oracion regularmente y cu fervor. (Luc. 6:12) Pesey, puntra bo mes: ‘Cu ki frecuencia mi ta haci oracion? Con intenso mi oracionnan ta?’ (Mat. 7:7; Rom. 12:12) Bo contesta lo revela con fuerte bo deseo pa sirbi Dios ta.

19. Kico abo lo haci pa bo por sigui sirbi Jehova cu henter bo curason?

¹⁹ Manera nos a mira, nos prioridadnan ta revela loke nos tin den nos curason. Pesey, nos no mester laga niun di e cosnan cu nos a laga atras ni e trampanan sutil di Satanas stroba nos di sirbi Jehova cu henter nos curason. (Lesa Lucas 21:19, 34-36.) Pesey, laga cada un di nos, mescos cu David, sigui suplica Jehova: “Uni mi curason.”​—Sal. 86:11.

[Preguntanan di Estudio]

[Cuadro na pagina 22]

TRES FACTOR IMPORTANTE PA MANTENE NOS CURASON SALUDABEL

Mescos cu nos ta haci esfuerso pa cuida nos curason literal, nos mester cuida nos curason figurativo tambe. Ata aki tres factor importante pa logra esey:

1 Nutricion: Pa nos por mantene nos curason literal den bon salud, nos mester alimenta nos mes cu suficiente cuminda saludabel. Den sentido spiritual ta mescos: Nos mester alimenta nos mes bon. Con nos por haci esey? Nos mester studia Bijbel y medita riba loke nos ta studia regularmente y tambe asisti na tur nos reunionnan.​—Sal. 1:1, 2; Pro. 15:28; Heb. 10:24, 25.

2 Ehercicio: Pa nos curason literal por keda salud, rato rato e mester pomp mas duro; pesey, nos mester haci ehercicio. Di mes manera, ora nos ta participa celosamente den e trabou di predica​—kisas, haciendo esfuerso pa aumenta nos sirbishi​—nos ta mantene nos curason figurativo den bon condicion.​—Luc. 13:24; Flp. 3:12.

3 Ambiente: E ambiente malbado den cua nos tin cu traha y biba awe por pone tanto nos curason literal como esun figurativo bou di hopi stress. No obstante, nos por reduci e stress ey. Con? Nos tin cu asocia mas tanto posibel cu nos compañeronan cristian, kendenan sinceramente ta interesa den nos y ta sirbi Jehova di henter nan curason.​—Sal. 119:63; Pro. 13:20.