“Con leal, husto y intachabel nos tabata.”​—1 TES. 2:10.

1-3. (a) Kico ta un señal cu nos ta bibando den e ultimo dianan, y kico esey ta encera? (b) Cua ta e tres preguntanan cu nos lo contesta?

KICO Dalila, Absalon y Judas tin en comun? Wel, nan tur tabata desleal: Dalila tabata desleal na Hues Samson, e homber cu a stim’e; Absalon tabata desleal na su tata, Rey David; y Judas na su Maestro, Cristo Hesus. E echonan horibel di e personanan aki a causa otro hende hopi daño y angustia. Pero pakico nos ta interesa den e topico aki?

² Traicion of deslealtad ta ser menciona entre e fayonan di mas comun cu hende ta comete awendia. Y esey no ta nada straño, pasobra ora Hesus a duna e señal di e “conclusion di e era aki”, el a bisa cu “hopi hende . . . lo traiciona otro.” (Mat. 24:3, 10) Traiciona un persona ta nifica cu bo ta desleal na dje of ta entreg’e den man di enemigo. Pues, e falta di lealtad cu nos ta mira awendia ta prueba cu nos ta bibando den “e ultimo dianan.” Apostel Pablo tambe a profetisa cu den e ultimo dianan hende lo ta “desleal, . . . traidor.” (2 Tim. 3:1, 2, 4) Hopi bes escritornan di buki y di pelicula ta dramatisa y presenta actonan di traicion como algo romantico. Pero den bida real, deslealtad y traicion ta causa hopi sufrimento y dolor. Si, traicion en berdad ta un señal cu nos ta bibando den e ultimo dianan!

³ Awor, ki les nos por siña for di personahenan biblico cu tabata desleal? Ki ehempelnan di lealtad nos por imita? Na ken nos mester keda semper leal? Laga nos ban wak.

EHEMPELNAN CU NOS NO MESTER IMITA

4. Con Dalila a traiciona Samson, y pakico esey tabata un acto baho?

⁴ Nos ta cuminsa cu Dalila, e muher astuto cu  Hues Samson a enamora di dje. Samson tabata esun cu mester a guia e bataya pa libra e pueblo di Dios for di e Filisteonan. Awor tabatin cinco prins Filisteo cu podise tabata sa cu Dalila no tabata stima Samson di berdad, y nan a ofrec’e un suma considerabel di placa pa e bisa nan con bin Samson tabata asina fuerte pasobra nan kier a mat’e. Dalila, kende tabata golos pa placa, a acepta nan oferta. Pero e prome tres biahanan cu el a haci intento pa descubri e secreto di Samson, e no a logra. No obstante, el a sigui pone presion riba Samson “cu su palabranan y tabata rog’e” te cu “Samson a fada pa muri.” E ora ey, Samson a bis’e cu nunca nabaha a pasa riba su cabes y cu si corta su cabey, lo e perde tur su forsa. * Ora Dalila a haya sa esey, el a laga feita Samson su cabes mientras e tabata drumi riba su scochi. Despues el a entreg’e na su enemigonan pa nan haci cu ne loke nan tabata kier. (Hues. 16:4, 5, 15-21) Esta baho no! Dalila su golosidad a pon’e traiciona e persona cu tabata stim’e.

5. (a) Con Absalon a demostra cu e no tabata leal na David, y kico esey a bisa di Absalon? (b) Con David a sinti ora Ahitofel a traicion’e?

⁵ Laga nos papia awor di Absalon. E homber ambicioso aki tabata determina pa kita e trono for di su tata, Rey David. Pa logra esey, el a cuminsa haci hopi cos pa “horta curason di e hombernan di Israel.” Pa gana nan na su banda, e tabata priminti nan yen di cos y haci comosifuera e tabatin masha cariño pa nan. E tabata brasa nan y sunchi nan comosifuera e tabata masha interesa den nan y cla pa yuda nan. (2 Sam. 15:2-6) Absalon a gana asta Ahitofel, David su homber di confianza, na su banda. Ahitofel tambe a bira un traidor y a uni cu nan den e golpi di estado. (2 Sam. 15:31) Den Salmonan 3 y 55, David a mustra con e deslealtad ey a afect’e. (Sal. 3:1-8; lesa Salmo 55:12-14.) Absalon su plan malbado tabata contra e rey cu Jehova a nombra. Asina, el a demostra cu e no tabatin ningun clase di respet pa Jehova su derecho di scoge ken lo a bira rey. (1 Cro. 28:5) Finalmente, e rebelion a fracasa, y David a sigui goberna como esun ungi di Jehova.

6. Con Judas a traiciona Hesus, y di cua palabra Judas a bira un sinonimo?

⁶ Awor, pensa riba loke e traidor Judas Iscariot a haci cu Cristo. Durante e ultimo Pasco Hudiu cu Hesus a celebra cu su 12 apostelnan, el a bisa nan: “Di berdad mi ta bisa boso: Un di boso lo traiciona mi.” (Mat. 26:21) Mas laat riba e anochi ey, den e hofi di Getsemani, Hesus a bisa Pedro, Santiago y Juan: “Esun cu ta traiciona mi a yega!” Si, na e momento ey Judas a yega e hofi hunto cu su complicenan, y “el a cana bay stret riba Hesus y a bis’e: ‘Saludo, Rabi!’ y a dun’e un sunchi tierno.” (Mat. 26:46-50; Luc. 22:47, 52) Asina Judas “a traiciona sanger husto” y a entrega Hesus den man di su enemigonan. Y ta pa cuanto placa e homber golos ey a traiciona Hesus? Pa solamente 30 moneda di plata! (Mat. 27:3-5) Anto desde e tempo ey, e nomber Judas a bira sinonimo di “traidor”, y hende ta uza e nomber ey specialmente pa referi na un persona cu a traiciona un amigo. *

7. Kico nos ta siña for di e ehempel di (a) Absalon y Judas y (b) Dalila?

⁷ Kico nos ta siña for di e ehempelnan aki? Wel, tanto Absalon como Judas  a haya un fin bergonsoso pasobra nan a traiciona un ungi di Jehova. (2 Sam. 18:9, 14-17; Echo. 1:18-20) Y semper cu nos tende e nomber Dalila, nos ta pensa riba un persona desleal cu ta haci comosifuera e ta stima. (Sal. 119:158) Pesey, laga nos lucha contra cualkier tendencia cu nos por tin di ta ambicioso of golos, pasobra e caracteristicanan aki por pone nos perde Jehova su fabor. Anto e mal ehempelnan cu nos a caba di considera por yuda nos resisti cualkier cos cu por pone nos bira desleal.

IMITA ESNAN CU TABATA LEAL

8, 9. (a) Dicon Jonatan a priminti di keda leal na David? (b) Con nos por imita Jonatan?

⁸ Bijbel ta contene hopi ehempel tambe di personanan cu tabata leal. Laga nos considera dos ehempel y wak kico nos por siña for di esakinan. Esun prome ta di un homber cu a demostra cu e tabata leal na David: Jonatan, e yiu mayo di Rey Saul. Despues di Saul, ta Jonatan mester a hereda e trono di Israel. Sinembargo, Jehova no a scoge Jonatan como e siguiente rey sino David. Y Jonatan a respeta e decision di Jehova y no a bira jaloers riba David. Al contrario, “alma di Jonatan a keda uni cu alma di David”, y el a priminti David cu lo el a keda leal na dje. El a asta duna David su paña, spada, boog y su faha, mustrando asina gran honor na David como futuro rey. (1 Sam. 18:1-4) Jonatan a haci tur loke e tabata por pa ‘encurasha’ David. El a bay asina leu di risca su bida pa defende David dilanti di Saul. Si, Jonatan tabata leal, y el a bisa David: “Lo bo bira rei di Israel i ami lo ta na di dos lugá.” (1 Sam. 20:30-34; 23:16, 17, BPK) Pesey, ta di compronde cu ora Jonatan a muri, David a expresa su tristeza y amor p’e den un cantica di lamento.​—2 Sam. 1:17, 26.

⁹ Sin duda, Jonatan tabata sa na ken e mester a demostra lealtad. E tabata completamente sumiso na Jehova, e Soberano, y a sostene David, e ungi di Dios, den tur cos. Di igual manera, maske nos mes no tin un privilegio special den congregacion, nos tambe mester ta dispuesto pa apoya e rumannan cu si a ser nombra pa dirigi asuntonan den congregacion.​—1 Tes. 5:12, 13; Heb. 13:17, 24.

10, 11. (a) Dicon Pedro a keda leal na Hesus? (b) Con nos por imita Pedro?

¹⁰ Un otro excelente ehempel cu nos por siña for di dje ta esun di apostel Pedro, kende a priminti di keda leal na Hesus. Ora Cristo a uza idioma figurativo pa yuda su discipelnan compronde e importancia di pone fe den su carni y sanger cu lo a ser sacrifica, hopi di su discipelnan a haya su palabranan ofensivo y a bandon’e. (Juan 6:53-60, 66) Pesey Hesus a bira puntra su 12 apostelnan:  “Acaso boso tambe kier bay?” Pedro a contest’e: “Señor, cerca ken nos lo bay? Abo tin e palabranan cu ta hiba na bida eterno; y nos a kere y a haya sa cu abo ta e Santo di Dios.” (Juan 6:67-69) Acaso loke Pedro a bisa ey ta nifica cu el a compronde tur loke Hesus a caba di bisa tocante e sacrificio cu E tabata bay haci? Probablemente cu no. Pero a pesar di esey, Pedro tabata determina pa keda leal na Dios su Yiu ungi.

¹¹ Pedro no a pensa cu Hesus mester tabata ekiboca y cu lo el a bin realisa esey despues y rectifica loke El a bisa. Al contrario, humildemente Pedro a reconoce cu Hesus tabatin “e palabranan cu ta hiba na bida eterno.” Kico di nos awe? Con nos ta reacciona ora nos topa algo den un publicacion di “e mayordomo fiel” cu nos tin dificultad pa compronde of cu no ta cuadra cu loke nos ta pensa? Wel, en bes di sinta spera cu lo bini un cambio cu ta apoya nos punto di bista, nos mester haci esfuerso sincero pa compronde e asunto.​—Lesa Lucas 12:42.

KEDA LEAL NA BO CASA

12, 13. Ki ora por surgi traicion den matrimonio, y dicon edad no ta un excuus pa esaki?

¹² Tur traicion ta malo. Pues, nunca nos mester traiciona otro, pasobra esey por causa desunion y kita e paz cu nos ta disfruta di dje den nos famia y den congregacion. Cu esey na mente, laga nos wak con nos por keda semper leal na nos casa y na nos Dios.

¹³ Adulterio ta un di e actonan di traicion di mas doloroso y cu ta causa hopi daño. Un persona cu comete adulterio ta bira infiel na su casa y ta dirigi su atencion na otro persona. Diripiente, esun cu el a traiciona ta hay’e su so; y su bida ta cambia completamente. Pero, con bin algo asina por pasa cu dos persona cu un tempo tabata stima otro? Hopi biaha, esey ta cuminsa ora parehanan casa no ta mustra interes den otro su sintimentonan. Gabriella Turnaturi, un profesor di sociologia, a splica cu ta ora parehanan casa stop di haci esfuerso pa fortalece nan relacion, bo por haya bo cu adulterio. Asta parehanan cu tin hopi aña casa por cuminsa distancia nan mes emocionalmente for di otro. Por ehempel, despues di 25 aña casa, un homber di 50 aña di edad ta divorcia di su esposa fiel pa e por ta cu un otro hende muher cu e ta gusta. Algun hende ta hustifica su conducta, bisando cu esaki ta algo normal pa hende di e edad ey. Pero en bes di haci comosifuera esaki ta algo inevitabel, laga nos yam’e na su nomber, esta, traicion. *

14. (a) Con Jehova ta mira traicion den matrimonio? (b) Kico Hesus a bisa cu parehanan casa no mester haci?

¹⁴ Con Jehova ta mira hende cu ta bandona nan casa sin base biblico? Jehova Dios ta “odia divorcio.” Pesey mes el a papia fuertemente cu esnan cu ta trata nan casa malo y bandona nan. (Lesa Malakias 2:13-16.) Hesus ta pensa mescos cu su Tata; el a siña hende cu nan no por core cu nan casa of bandon’e pa cualkier motibo y haci comosifuera nada no a pasa.​—Lesa Mateo 19:3-6 y 9.

15. Con parehanan casa por keda leal na otro?

¹⁵ Con parehanan casa por keda leal na otro? E Palabra di Dios ta bisa: “Alegra bo den e esposa [of esposo] di bo hubentud” y “gosa di bida ku bo kasá ku bo ta stima.” (Pro. 5:18; Predikador [Ecl.] 9:9, BPK) Segun cu un pareha casa  ta bira grandi, nan tur dos mester sigui haci tur loke nan por pa mantene nan relacion fuerte, tanto fisicamente como emocionalmente. Con asina? Wel, nan mester ta bondadoso cu otro, cuida otro y pasa tempo cu otro. Nan mester traha duro pa proteha nan matrimonio y nan relacion cu Jehova. Pa logra esaki, nan mester studia Bijbel hunto, traha regularmente den sirbishi hunto y haci oracion hunto pa pidi Jehova su bendicion.

KEDA LEAL NA JEHOVA

16, 17. (a) Ki situacion na cas of den congregacion por pone nos lealtad na Dios na prueba? (b) Menciona un ehempel cu ta mustra cu nos obediencia na Dios su mandamento pa no anda cu miembronan di famia cu ta expulsa por duna bon resultado.

¹⁶ Algun ruman a yega di comete pica serio y nan a ser reprende “severamente pa nan por tin un fe firme” atrobe. (Tito 1:13) Algun mester a ser expulsa di e congregacion cristian pa motibo di nan conducta. Esnan cu a laga e disciplina fuerte ey “entrena” nan por a drecha nan relacion cu Jehova. (Heb. 12:11) Awor kico si nos tin un famia of un bon amigo cu ta expulsa? Wel, nos echonan ta demostra na ken nos ta leal: na e persona of na Jehova. Naturalmente, nos mester keda leal na Jehova. Y Jehova ta observa nos pa wak si nos ta obedece su mandamento pa no anda cu ningun hende expulsa.​—Lesa 1 Corintionan 5:11-13.

¹⁷ Ora miembronan di famia ta keda leal na Jehova y ta haci caso di su mandamento pa no anda cu miembro di famia cu ta expulsa, esaki ta duna bon resultado. Laga nos wak djis un ehempel: Un yoncuman tabatin mas cu dies aña expulsa. Durante e tempo ey, su tata, mama y su cuater rumannan a “stop di anda” cu ne. Algun biaha, e tabata purba participa den nan actividadnan, pero henter e famia a para firme y a evita tur contacto cu ne. Despues cu el a ser restaura, el a bisa cu e tabata sinti falta di ta hunto cu su famia, specialmente anochi ora e tabata su so. El a bisa cu si nan lo a asocia djis un rato cu ne, esey so lo tabata suficiente. Pero debi cu niun di nan no tabata comunica cu ne, su deseo fuerte pa asocia cu su famia tabata un di e cosnan cu a motiv’e pa drecha su relacion cu Jehova. Si algun dia bo haya gana di anda cu un miembro di famia cu ta expulsa y asina kibra cu Dios su mandamento, corda e ehempel aki.

18. Awor cu nos a caba di mira e beneficionan di ser leal y e consecuencianan di deslealtad, kico abo ta determina pa haci?

¹⁸ Nos ta bibando den un mundo pesta cu hende desleal y traidor. Pero den e congregacion cristian si tin hopi hende leal cu nos por imita nan ehempel. E manera cu nan ta hiba nan bida ta mustra cu nan ta “leal, husto y intachabel.” (1 Tes. 2:10) Pues, laga nos ta mas determina cu nunca pa keda leal na Dios y na nos prohimo.

[Nota]

[Preguntanan di Estudio]

[Plachi na pagina 16]

Pedro a keda leal na Dios su Yiu ungi aunke otronan si a rechas’e