“Nos . . . ta refleha manera spiel e gloria di Jehova.”​—2 COR. 3:18.

1, 2. Dicon ta rasonabel pa pensa cu nos por imita e cualidadnan di Jehova?

DEN un of otro manera, nos tur tin algo di nos mayornan. Pesey, no ta nada straño si nos tende un hende bisa un mucha homber: ‘Bo ta pinto pinto bo tata’, of si nan bisa un mucha muher: ‘Bo ta haci mi corda bo mama.’ Y hopi bes, muchanan ta purba di imita nan mayornan. Awor, kico di nos? Nos por imita nos Tata selestial Jehova? Wel, aunke nos nunca a yega di mira Jehova, nos por siña di su cualidadnan precioso. Con nos por haci esey? Nos tin cu observa su creacion, studia su Palabra y medita riba loke e Scritura ta bisa​—specialmente riba e palabra- y echonan di su yiu Hesucristo. (Juan 1:18; Rom. 1:20) Pues, nos por refleha e gloria di Jehova.

² Prome cu Jehova a crea Adam cu Eva, e tabata sa cu hende por a cumpli cu su boluntad, imita su cualidadnan y dun’e gloria, esta, honr’e cu nan conducta. (Lesa Genesis 1:26, 27.) Como cristian, nos tin cu imita e cualidadnan di Esun cu a crea nos. Si nos ta haci esey, nos tin e gran privilegio di por refleha e gloria di Dios. Si, sin importa nos cultura, educacion of rasa, nos tur por refleha e gloria di Dios. Dicon? Pasobra “Dios no ta haci distincion di persona, sino cu e ta acepta tur hende di tur nacion cu ta tem’e y cu ta haci loke ta corecto.”​—Echo. 10:34, 35.

3. Kico cristiannan ta sinti ora nan ta sirbi Jehova?

³ Cristiannan ungi ta refleha e gloria di Jehova. Pesey, apostel Pablo, kende tambe tabata ungi cu spirito santo, a skirbi: “Nos tur​—mientras cu nos cara sin velo ta refleha manera spiel e gloria di Jehova​—ta keda transforma den su imagen for di un cierto grado di gloria pa un otro grado di gloria.” (2 Cor. 3:18) E contexto ta mustra cu Pablo tabata papia di e tempo  cu Moises a baha for di Sero Sion cu e tablanan cu tabatin e Dies Mandamentonan riba dje; Moises su cara tabata briya pasobra Jehova a papia cu ne. (Exo. 34:29, 30) Aunke cristiannan nunca tabatin un experencia asina ni nan cara no ta briya literalmente manera esun di Moises, nan cara ta briya di goso ora nan ta papia tocante Jehova, tocante su cualidadnan y di su proposito maraviyoso pa humanidad. Pues, sea cu nos ta cristian ungi of miembro di e otro carnenan, nos por refleha e gloria di Jehova den nos bida y den nos sirbishi mescos cu spiel di metal cu hende tabata polish den pasado. (2 Cor. 4:1) Abo ta refleha e gloria di Jehova mediante un conducta devoto y mediante bo participacion regular den e trabou di predica?

NOS KIER REFLEHA E GLORIA DI JEHOVA

4, 5. (a) Ki lucha similar na esun di Pablo nos tin awe? (b) Con pica ta afecta nos?

⁴ Como cu nos ta sirbidor di Jehova, ta claro cu nos kier refleha e gloria di nos Creador den tur loke nos ta haci. Ma hopi bes nos ta faya. Pablo tambe tabatin e problema ey. (Lesa Romanonan 7:21-25.) Pesey, e por a splica bon cla dicon nos tin e lucha ey; el a bisa: “Pasobra tur a peca y no por refleha e gloria di Dios.” (Rom. 3:23) Si, debi cu hende a hereda imperfeccion for di Adam, nos tur a bira esclavo di e “rey” cruel cu ta pica.​—Rom. 5:12; 6:12.

⁵ Kico ta pica? Pica ta tur loke un persona ta haci contrario na Jehova su personalidad, caminda, norma y boluntad. Pica ta daña un persona su relacion cu Dios. E ta pone nos hera e marca, mescos cu un tirado di flecha ta keda sin alcansa su blanco. Nos por haci pica intencionalmente of inconscientemente. (Num. 15:27-31) Pica ta profundamente hancra den hende y ta forma un barera entre nos y nos Creador. (Sal. 51:5; Isa. 59:2; Col. 1:21) Pesey, mayoria di hende ta biba na un manera completamente aleha for di Jehova y no tin e privilegio maraviyoso di por refleha e gloria di Dios. No tin duda, pica ta e cos cu mas ta afecta humanidad.

6. Dicon nos por refleha e gloria di Dios aunke nos ta imperfecto?

⁶ Aunke nos a nace cu pica, Jehova ‘ta duna nos speransa.’ (Rom. 15:13) El a percura e medio pa elimina pica​—e sacrificio di rescate di Hesucristo. Pero pa nos por stop di ta “esclavo di pica”, nos tin cu pone fe den e sacrificio ey. E ora ey, nos ta den e posicion pa refleha e gloria di Jehova y cera un amistad cu ne. (Rom. 5:19; 6:6; Juan 3:16) Anto si nos mantene e amistad ey, nos por ta sigur cu Jehova lo bendiciona nos awor y cu den futuro nos lo ta personanan perfecto cu lo biba pa semper. Pues, como hende imperfecto, nos tin un gran honor! Dicon? Pasobra a pesar di nos condicion, den bista di Jehova nos por refleha su gloria!

KICO TA YUDA NOS REFLEHA E GLORIA DI DIOS?

7. Kico nos tin cu reconoce pa nos por refleha e gloria di Dios?

⁷ Como hende imperfecto, nos tur tin debilidad. Pesey, pa nos por refleha e gloria di Dios, cada un di nos mester ta honesto cu nos mes y reconoce cu nos ta pecador. (2 Cro. 6:36) Si, nos tin cu sa kico ta nos debilidadnan pa nos por traha riba nan pa asina nos por duna gloria na Dios. Por ehempel, si nos ta wak pornografia, nos tin cu admiti cu nos tin mester di yudansa di e ancianonan​—y dal paso pa haya esaki. (Sant. 5:14, 15) Esey ta e prome cos cu nos tin cu haci si nos kier tin un bida cu ta duna honor na Jehova Dios. Ademas, como su adoradonan, nos  tin cu samina nos mes constantemente pa wak si nos ta cumpliendo cu su normanan husto. (Pro. 28:18; 1 Cor. 10:12) Sea loke sea nos debilidadnan, nos tin cu sigui lucha pa domina nan pa nos por refleha e gloria di Dios.

8. Kico nos mester haci maske nos no ta perfecto?

⁸ Hesus tabata e unico hende cu a yega di biba y muri sin haci pica. Semper el a agrada Dios y refleha Su gloria. Hesus tabata perfecto, pero nos no. No obstante, nos por y mester sigui haci esfuerso pa imita su ehempel. (1 Ped. 2:21) No ta nos progreso so Jehova ta wak; e ta wak e esfuerso tambe cu nos ta haci pa refleha su gloria y ta bendiciona nos esfuerso sincero.

9. Ki rol Bijbel ta hunga den bida di cristiannan cu kier cumpli cu e rekisitonan di Dios?

⁹ Jehova su Palabra skirbi por yuda nos mira unda nos tin cu mehora. Pesey, ta masha importante pa nos lesa y studia Bijbel y medita riba loke e ta bisa. (Sal. 1:1-3) Dicon? Pasobra ta ora nos ta lesa Bijbel tur dia, nos por haya sa unda nos tin cu haci cambio. (Lesa Santiago 1:22-25.) Ademas, conocemento di Bijbel ta fortalece nos fe y ta yuda nos evita pica grave y keda determina pa agrada Jehova.​—Sal. 119:11, 47, 48.

10. Dicon oracion por yuda nos sirbi Jehova mas plenamente?

¹⁰ Un otro cos cu nos mester haci pa por refleha e gloria di Jehova ta “persevera den oracion.” (Rom. 12:12) Nos por y mester haci oracion na Jehova pa pidie yuda nos sirbie na un manera cu e ta acepta. Ta bon pa nos pidie duna nos spirito santo, mas fe, fortaleza pa resisti tentacion y habilidad pa “maneha e palabra di e berdad corectamente.” (2 Tim. 2:15; Mat. 6:13; Luc. 11:13; 17:5) Anto nos mester depende riba Jehova, nos Tata selestial, mescos cu un yiu ta depende riba su tata. Y nos por ta sigur cu si nos pidie yuda nos pa sirbie mas mihor, lo e yuda nos. Nunca nos no mester pensa cu nos ta cans’e. Mas bien, laga nos sigui haci oracion pa alab’e, gradicie y pidie guia specialmente ora nos haya nos cu prueba. Ademas, nos por pidi Jehova yuda nos sirbie di tal manera cu nos ta glorifica su nomber santo.​—Sal. 86:12; Sant. 1:5-7.

11. Con e reunionnan di congregacion ta yuda nos refleha e gloria di Dios?

¹¹ Dios a confia e cuido di su carnenan valioso na “e esclavo fiel y prudente.” (Mat. 24:45-47; Sal. 100:3) E esclavo ta masha interesa den e manera cu su compañeronan den fe ta refleha e gloria di Jehova. Y un manera cu e esclavo ta yuda nos refleha e gloria di Dios ta mediante e reunionnan. Nos reunionnan ta yuda nos drecha nos calidad di bida y mehora nos cualidadnan cristian, mescos cu un sastre ta drecha nos paña y mehora nos apariencia. (Heb. 10:24, 25) Pesey, laga nos yega nos reunionnan na tempo, pasobra si nos tin custumber di yega laat, nos ta perde parti di e informacion spiritual cu nos tin mester pa mehora nos bida y nos cualidadnan cristian.

LAGA NOS IMITA DIOS

12. Con nos por imita Dios?

¹² Si nos kier refleha e gloria di Jehova, nos tin cu ‘imit’e.’ (Efe. 5:1) Y un manera pa imita Jehova ta di adopta su punto di bista di cosnan. Si nos ta purba di haci cos na nos manera y no segun Jehova su manera di pensa, nos ta deshonr’e y perhudica nos mes. Y como cu e mundo rond di nos ta bou di influencia di e malbado, Satanas e Diabel, nos tin cu traha duro pa odia loke Jehova ta odia y stima loke E ta stima. (Sal. 97:10; 1 Juan 5:19)  Nos mester ta plenamente convenci cu e unico manera pa sirbi Dios na e manera cu e ta acepta ta haciendo tur cos pa su gloria.​—Lesa 1 Corintionan 10:31.

13. Dicon nos tin cu odia pica, y kico esaki lo motiva nos pa haci?

¹³ Jehova ta odia pica y nos mester haci mescos. Esey ta nifica cu nos mester keda mas leu posibel for di tur loke ta malo y no purba wak con cerca nos por yega di pica sin comete pica. Un di e cosnan cu nos tin cu keda leu for di dje ta apostasia. Dicon? Pasobra si nos bira apostata, nos no por refleha e gloria di Dios. (Deu. 13:6-9) Pesey, nos mester keda leu for di hende apostata of cualkier persona cu ta pretende di ta nos ruman pero cu ta trece reproche riba e nomber di Dios. Esaki ta conta asta si ta trata di un miembro di nos famia. (1 Cor. 5:11) Nos no ta gana nada si nos ta purba di refuta argumentonan di hende apostata of hende cu ta critica Jehova su organisacion. De echo, nos ta pone nos relacion cu Jehova na peliger si nos bay profundisa nos mes den loke nan ta pone riba Internet of publica den nan literatura.​—Lesa Isaias 5:20; Mateo 7:6.

14. Cua ta un di e maneranan di mas importante pa imita Jehova, y dicon?

¹⁴ Un di e maneranan di mas importante pa imita nos Tata selestial ta di demostra amor. Si, nos mester demostra amor mescos cu el a haci. (1 Juan 4:16-19) De echo, e amor cu nos tin pa otro ta  identifica nos como discipel di Hesus y sirbidor di Jehova. (Juan 13:34, 35) Aunke nos ta imperfecto, nos tin cu sigui haci esfuerso pa mustra amor tur ora. Si nos ta cultiva amor y otro cualidadnan cu ta agrada Dios, nos lo evita di haci pica of loke ta malo.​—2 Ped. 1:5-7.

15. Ki efecto amor tin riba nos relacion cu otro hende?

¹⁵ Amor ta motiva nos pa haci bon pa otro hende. (Rom. 13:8-10) Por ehempel, si nos ta stima nos casa, nos ta keda fiel na dje. Amor pa ancianonan y respet pa nan trabou lo yuda nos keda sumiso y sigui nan guia. Muchanan cu ta stima nan mayornan ta obedece y honra nan y no ta papia malo di nan. Si nos ta stima nos prohimo, nos lo no considera nan como persona inferior ni falta respet pa nan. (Sant. 3:9) Y ancianonan cu ta stima e carnenan di Dios lo trata nan cu ternura.​—Echo. 20:28, 29.

16. Con amor ta yuda nos den sirbishi?

¹⁶ Amor mester ta bisto tambe den nos sirbishi. Amor pa Jehova ta pone cu nos no ta laga e indiferencia of reaccion negativo di algun doño di cas desanima nos. Mas bien, nos ta sigui predica e bon noticia. Amor lo motiva nos pa prepara bon y pa sigui haci esfuerso pa ta eficaz den sirbishi. Si nos realmente ta stima Jehova y nos prohimo, nos lo no mira e trabou di predica djis como un obligacion. Al contrario, nos lo mir’e como un gran privilegio, y nos lo hacie cu goso.​—Mat. 10:7.

SIGUI DUNA GLORIA NA DIOS

17. Dicon ta importante pa nos reconoce cu pica hereda por stroba nos di refleha e gloria di Jehova?

¹⁷ Mayoria di hende no ta realisa cu pica ta algo serio, pero nos si sa esey. Pesey, nos ta consciente cu nos tin cu lucha contra e tendencia cu nos tin di haci pica. Nos sa cu nos tin cu train nos consenshi di tal manera cu e por motiva nos pa haci loke ta corecto asina cu nos cuminsa pensa of desea loke ta malo. (Rom. 7:22, 23) Ta berdad cu hende ta debil, pero Dios por duna nos e forsa pa haci loke ta corecto den cualkier situacion.​—2 Cor. 12:10.

18, 19. (a) Kico ta yuda nos vence den nos lucha contra spiritonan malbado? (b) Kico nos mester ta determina pa haci?

¹⁸ Pa nos por duna gloria na Jehova, nos tin cu lucha contra spiritonan malbado tambe. Y nos por vence den e lucha aki cu yudansa di e armadura spiritual cu Dios ta duna. (Efe. 6:11-13) Satanas ta haci tur loke e por pa haya e gloria cu Jehova so merece. Ademas, Diabel ta haci tur su esfuerso pa daña nos relacion cu Jehova. No obstante, nos y miyones di otro hende imperfecto​—tanto homber como muher y mucha​—ta keda fiel y ta duna gloria na Dios. Esey ta un derota pa Satanas! Pesey, laga nos sigui alaba Jehova mescos cu e criaturanan selestial, kendenan ta sclama: “Bo ta digno, Jehova, nos Dios, di ricibi alabanza pa bo gloria, honor y poder, pasobra ta abo a crea tur cos, y pa motibo di bo boluntad nan ta existi y a ser crea.”​—Rev. 4:11.

¹⁹ Si, laga nos ta determina pa semper sigui duna gloria na Jehova maske kico cu pasa. Y nos por ta sigur cu e ta masha contento cu asina tanto hende ta haci nan maximo esfuerso pa imit’e y refleha su gloria. (Pro. 27:11) Pesey, nos mester tin e mesun sintimentonan cu David, kende a canta: “Lo mi alaba bo, o SEÑOR mi Dios, cu henter mi curason, y lo mi glorifica bo nomber pa semper.” (Sal. 86:12) Nos ta anhela e dia cu nos por imita Jehova su gloria perfectamente y pa semper! Esaki lo ta posibel pa tur hende obediente. Awor, kico di abo? Bo ta reflehando e gloria di Jehova for di awor, cu e speransa di sigui haci esey pa semper?

[Preguntanan di Estudio]

[Plachi na pagina 31]

Abo ta refleha e gloria di Jehova den e maneranan aki?