E articulo aki ta trata algun pregunta cu kisas bo tin y ta mustra bo unda pa haya e contestanan den bo Bijbel. Si bo ta desea, Testigonan di Jehova gustosamente lo trata e preguntanan aki cu bo.

1. Con nos mester conmemora e morto di Hesus?

Hesus a instrui su siguidonan pa conmemora su morto mediante un cena simbolico, uzando pan y biña. E pan ta representa su curpa, y e biña ta representa su sanger.​—Lesa Lucas 22:19, 20.

Durante e ultimo cena, Hesus a uza pan sin zuurdeeg. Dicon? Pasobra hopi biaha, Bijbel ta uza zuurdeeg como simbolo di pica. Y siendo cu Hesus no tabatin pica, pan sin zuurdeeg tabata un simbolo apropia pa representa su curpa perfecto. Hesus a sacrifica su curpa perfecto y asina a pone un fin na sacrificio di animal cu e Ley di Moises a stipula. (Hebreonan 10:5, 9, 10) E biña a simbolisa e sanger precioso di Hesus cu el a drama pa nos por haya pordon di pica.​—Lesa 1 Pedro 1:19; 2:24; 3:18.

2. Ki dia nos mester conmemora e morto di Hesus?

Hesus a muri riba 14 di nisan despues cu solo a baha, pasobra segun kalender Hudiu, dia ta cuminsa ora cu solo baha. Awor, riba e anochi prome cu Hesus a muri, el a celebra e Pasco Hudiu cu su apostelnan y despues a institui un otro cena pa conmemora su morto.​—Lesa Lucas 22:14, 15.

Awe, e pueblo di Dios ta conmemora e morto di Hesus. Esey ta e medio cu Dios a uza pa libra humanidad di pica y morto. Den tempo biblico, nan tabata celebra e Pasco Hudiu un biaha pa aña. Pues, nos tambe ta conmemora e morto di Hesus un biaha pa aña. Y segun kalender di Bijbel, nos ta celebra Memorial riba 14 di nisan despues cu solo baha.​—Exodo 12:5-7, 13, 17; Lesa Juan 1:29.

  3. Ken por come di e pan y bebe di e biña?

Ora Hesus a pasa e biña pa su discipelnan, el a bisa: “E copa aki ta representa e pacto nobo.” (1 Corintionan 11:25) E pacto nobo a reemplasa e pacto di Ley cu Jehova a cera cu e Israelitanan pa medio di Moises. Si nan lo a obedece Jehova den tur cos, nan lo a bira su pueblo manera el a priminti. (Exodo 19:5, 6) Pero como cu e Israelitanan a desobedece Jehova, el a introduci un pacto nobo.​—Lesa Jeremias 31:31.

Ta algun hende so​—144.000 persona​—ta forma parti di e pacto nobo. Y pa medio di nan, Jehova lo bendiciona miyones di hende. Si, miyones di hende, procedente di tur nacion, lo ricibi bida eterno den Paradijs aki riba tera. Algun di e miembronan di e pacto nobo ta sirbiendo Jehova riba tera awe. Ta nan so mag come di e pan y bebe di e biña pasobra ta cu nan Jehova a cera “e pacto nobo” cu a drenta na vigor mediante e sanger di Hesucristo.​—Lesa Lucas 12:32; Revelacion 14:1, 3.

4. Con nos ta beneficia si nos asisti na Memorial?

Ora cu nos conmemora e morto di Hesus, nos ta haya mas aprecio pa e amor extraordinario cu Jehova a demostra na nos. El a manda su Yiu pa muri pa nos picanan. Pesey, Memorial ta yuda nos pensa seriamente riba loke e morto di Hesus ta nifica pa nos. Nos mester pensa con nos por demostra nos gratitud pa loke Jehova y Hesus a haci pa nos.​—Lesa Juan 3:16; 2 Corintionan 5:14, 15.

Pa mas informacion, wak pagina 206-208 di e buki aki, Kico Bijbel Ta Siña Realmente?, publica pa Testigonan di Jehova.